Ubani Ongumholi Ofanelekayo Namuhla?

Ngo-1940 kwaba nenkinga yomholi ePhalamende LaseBrithani. UDavid Lloyd George oneminyaka engu-77 ubudala, owayelalele inkulumo-mpikiswano, wayehole iBrithani yanqoba eMpini Yezwe 1, futhi iminyaka eminingi ayichitha kwezombusazwe yamenza wakwazi ukuwuhlaziya ngobuhlakani umsebenzi wezikhulu. Enkulumweni yakhe yango-May 8, eMkhandlwini Omelela Abantu Abavamile, wathi: “Isizwe sikulungele ukudela konke uma nje sinomholi, uma nje sinoHulumeni obonisa ngokucacile ukuthi uphokophelephi futhi uma nje siqiniseka ukuthi labo abasiholayo benza konke abangakwenza.”

AMAZWI kaLloyd George akubonisa ngokucacile ukuthi abantu balindele ukuba abaholi babo babe nekhono futhi benze imizamo eqotho yokuthuthukisa izinto. Isisebenzi esithile esasigqugquzela ukhetho sakubeka kanje: “Uma abantu bevotela umongameli, basuke bevotela umuntu abazobeka ezandleni zakhe ukuphila kwabo, ikusasa labo, abantwana babo.” Kunzima kakhulu ukufeza lowo msebenzi. Kungani kunjalo?

Izwe lethu lihaqwe izinkinga ezibonakala zingenakuxazululeka. Ngokwesibonelo, imuphi umholi oye wazibonakalisa ehlakaniphile futhi enamandla kangako ukuthi angaqeda ubugebengu nempi? Ubani kubaholi banamuhla onemali kanye nesihawu esanele ukuze akwazi ukunikeza wonke umuntu ukudla namanzi ahlanzekile futhi alungiselele ezempilo? Ubani okwaziyo ukuvikela nokulondoloza indawo yonke futhi ozimisele ukukwenza lokho? Ubani onekhono kanye namandla anele okuqinisekisa ukuthi isintu sisonke sijabulela ukuphila isikhathi eside ngenjabulo?

Abantu Abakwazi Ukuwenza Lo Msebenzi

Kuyiqiniso ukuthi abanye abaholi baye baphumelela ngezinga elithile. Nokho, bangabusa okungenani amashumi ambalwa eminyaka—bese kulandela bani? Omunye wabaholi abanekhono kunabo bonke abake baphila, iNkosi uSolomoni yakwa-Israyeli wasendulo, wazindla ngalo mbuzo. Waphetha: “Yebo, mina ngawuzonda wonke umsebenzi wami onzima engangiwusebenza kanzima phansi kwelanga, engangiyowushiya ngemuva ngiwushiyele umuntu owayeyoba khona ngemva kwami. Futhi ubani owaziyo ukuthi uyoba ngohlakaniphile yini noma oyisiwula? Nokho uyowulawula wonke umsebenzi wami onzima engawusebenza kanzima futhi ngabonisa ukuhlakanipha kuwo phansi kwelanga. Nalokhu kuyize.”—UmShumayeli 2:18, 19.

USolomoni wayengazi noma owayezomlandela wayeyoqhubeka yini nomsebenzi wakhe omuhle noma wayeyowubhidliza wonke. KuSolomoni, umjikelezo wokususa ababusi abadala kumiswe abasha ‘wawuyize.’ Ezinye izinguqulo zeBhayibheli zithi lo mjikelezo “awusizi ngalutho,” noma “awunanjongo.” Enye inguqulo ithi: “Awunangqondo.”

Ngezinye izikhathi, kusetshenziswa ubudlova ukuze kuphoqelelwe ushintsho kubabusi. Abaholi abanekhono baye babulawa besemsebenzini wabo. U-Abraham Lincoln, umongameli owayehlonishwa kakhulu wase-United States, wake watshela izilaleli: “Ngiye ngakhethwa ukuze ngibe sesikhundleni esibalulekile isikhathi esifushane, futhi manje, emehlweni enu, ngiphathiswe igunya elizodlula ngokushesha.” Ngempela wabusa isikhathi esifushane. Naphezu kwakho konke akwenza kanye nesifiso sakhe sokwenzela abantu okwengeziwe, uMongameli uLincoln waba ngumholi iminyaka emine kuphela ezweni lakhe. Ekuqaleni kokubusa kwakhe kwesibili, wabulawa umuntu owayefuna kushintshwe umholi.

Ngisho nabaholi abangcono kakhulu abangabantu abanakuliqinisekisa ikusasa labo. Khona-ke, kufanele yini ubethembe ukuthi bangaliqinisekisa elakho? IBhayibheli lithi: “Ningabeki ithemba lenu ezicukuthwaneni, noma endodaneni yomuntu wasemhlabeni, okungekhona okwayo ukusindisa. Umoya wayo uyaphuma, iphindela emhlabathini wayo; ngalolo suku imicabango yayo iyashabalala.” Inguqulo i-Byington iyibeka kanje ingxenye yokugcina yevesi 4: “Ngalolo suku izinhloso zakhe ezinhle zishabalala ngokuphelele.”—IHubo 146:3, 4.

Kungaba nzima ukwamukela iseluleko sokungathembeli kubaholi abangabantu. Nokho, iBhayibheli alisho ukuthi isintu ngeke size sibe nomholi onekhono, ozinzile. U-Isaya 32:1 uthi: “Bheka! Inkosi iyobusa ngenjongo yokulunga.” UJehova uNkulunkulu, uMdali womuntu, ulungiselele “inkosi,” uMholi, ngokushesha ezolawula izindaba zomhlaba ngokugcwele. Ingubani le nkosi? Isiprofetho seBhayibheli siyayiveza.

Lowo Ofaneleka Ngempela Ukuba Umholi

Eminyakeni eyizinkulungwane ezimbili edlule, ingelosi yathi kowesifazane osemusha ongumJuda ogama lakhe linguMariya: “Uzokhulelwa, ubelethe indodana, kumelwe uyiqambe ngokuthi uJesu. Iyoba umuntu omkhulu ibizwe ngokuthi yiNdodana YoPhezukonke; uJehova uNkulunkulu uyoyinika isihlalo sobukhosi sikaDavide uyise, futhi iyobusa njengenkosi phezu kwendlu kaJakobe kuze kube phakade, nombuso wayo ngeke uphele.” (Luka 1:31-33) Yebo, uJesu waseNazaretha uyiNkosi eyachazwa yisiprofetho seBhayibheli.

Ngokuvamile imidwebo yenkolo iveza uJesu engumntwana, engumuntu ongondlekile futhi obuthakathaka noma engumuntu ozincisha izinto ngokweqile ovumela konke okumehlelayo. Le mifanekiso ayikhuthazi ukuba sithembele kuye njengoMbusi. Nokho, uJesu Kristu wangempela okukhulunywa ngaye eBhayibhelini, wakhula waba indoda eyingqabavu, evuthiwe, egcwele intshiseko futhi eyenza izinto ngokuzithandela. Futhi wayenezinye izici ezimenza afaneleke ukuba umholi. (Luka 2:52) Okulandelayo izici ezimbalwa zobuntu bakhe obuvelele.

UJesu wagcina ubuqotho ngokuphelele. Ukwethembeka nobuqotho bakhe kwakusobala kangangokuthi wabekela izitha zakhe inselele yokuba ziveze ezazimmangalela ngakho. Zahluleka. (Johane 8:46) Izimfundiso zakhe ezingenabuzenzisi zashukumisa abantu abaningi abaqotho ukuba babe abalandeli bakhe.—Johane 7:46; 8:28-30; 12:19.

UJesu wayezinikele ngokuphelele kuNkulunkulu. Wayezimisele ukufeza umsebenzi ayewabelwe uNkulunkulu kangangokuthi akukho mphikisi—ongumuntu noma oyidemoni—owayengamyekisa. Ukuhlaselwa ngobudlova akuzange kumesabise. (Luka 4:28-30) Ukukhathala nendlala akuzange kumqede amandla. (Johane 4:5-16, 31-34) Ngisho nalapho abangane bakhe bemshiya, akazange achezuke emgomweni wakhe.—Mathewu 26:55, 56; Johane 18:3-9.

UJesu wayebakhathalela ngokujulile abantu. Wapha abalambile ukudla. (Johane 6:10, 11) Waduduza abacindezelekile. (Luka 7:11-15) Wavula amehlo ezimpumputhe, izindlebe zezithulu futhi waphulukisa ababegula. (Mathewu 12:22; Luka 8:43-48; Johane 9:1-6) Wakhuthaza abaphostoli bakhe ababesebenza kanzima. (Johane, izahluko 13-17) Wazibonakalisa ‘engumalusi omuhle’ onakekela izimvu zakhe.—Johane 10:11-14.

UJesu wayezimisele ukusebenza. Wageza izinyawo zabaphostoli ukuze abafundise isifundo esibalulekile. (Johane 13:4-15) Nezakhe izinyawo zagcwala uthuli njengoba ayeshumayela izindaba ezinhle emigwaqweni ewubhuqu yakwa-Israyeli. (Luka 8:1) Ngisho nalapho ayesehlele ukuphumula “endaweni engenabantu,” waya ezixukwini zabantu lapho zimfuna ukuze azifundise okwengeziwe. (Marku 6:30-34) Ngaleyo ndlela wabekela wonke amaKristu isibonelo sokukhuthala.—1 Johane 2:6.

UJesu wasifeza isabelo sakhe wabe esewushiya umhlaba. UJehova uNkulunkulu wamupha ubukhosi kanye nokungafi emazulwini, emvuza ngokwethembeka kwakhe. NgoJesu ovusiwe, iBhayibheli lithi: “UKristu, njengoba esevusiwe kwabafileyo, akasafi; ukufa akuseyona inkosi phezu kwakhe.” (Roma 6:9) Ungaqiniseka ukuthi unguMholi wesintu ongcono kakhulu. Lapho uKristu Jesu esewubusa ngokuphelele umhlaba, ngeke sibe khona isidingo sokubeka omunye umbusi, futhi ngeke kusadingeka ukuba kushintshwe abaholi. Ngeke abulawe esabusa, futhi umsebenzi wakhe ngeke ubhidlizwe umholi ongenakhono oyongena esikhundleni sakhe. Kodwa ngokukhethekile yini azoyenza eyozuzisa isintu?

Okuzokwenziwa Yilo Mholi Omusha

IHubo 72 lisinikeza imininingwane ethile eyisiprofetho maqondana nendlela le Nkosi ephelele futhi engafi eyobusa ngayo. Emavesini 7 no-8, siyafunda: “Ezinsukwini zayo olungile uyohluma, kanye nokuchichima kokuthula ize ingabe isaba khona inyanga. Iyoba nezikhonzi kusukela olwandle kuze kube solwandle kusukela eMfuleni kuze kube semikhawulweni yomhlaba.” Ngaphansi kokubusa kwayo okuzuzisayo, abahlala emhlabeni bayojabulela ukulondeka kwaphakade. Iyobhubhisa zonke izikhali ezikhona futhi iyosusa ngisho nesifiso sokulwa enhliziyweni yomuntu. Abantu abahlasela omakhelwane babo namuhla njengamabhubesi anephango noma abanolaka njengamabhere bayobe besishintshe ngokuphelele isimo sabo sengqondo. (Isaya 11:1-9) Kuyovama ukuthula.

IHubo 72 evesini 12 kuya ku-14 liqhubeka lithi: “Iyokhulula ompofu okhalela usizo, nohluphekile nanoma ubani ongenamsizi. Iyohawukela ophansi nompofu, imiphefumulo yabampofu iyoyisindisa. Iyokhulula umphefumulo wabo ekucindezelweni nasebudloveni, igazi labo liyoba yigugu emehlweni ayo.” Ophansi, ompofu nohluphekile bayoba yingxenye yomkhaya owodwa wesintu ojabulayo, bemunye ngaphansi komholi oyiNkosi uJesu Kristu. Ukuphila kwabo kuyogcwala injabulo, hhayi ubuhlungu nokuphelelwa yithemba.—Isaya 35:10.

Ivesi 16 liyathembisa: “Kuyoba khona inala yokusanhlamvu emhlabeni; kuyoba khona ukuchichima esiqongweni sezintaba.” Indlala iyaqhubeka ihlupha izigidi emhlabeni namuhla. Ezombusazwe nokuhaha kwenza ukuba ukudla okwanele okukhona kungabiwa ngokulingana, ngenxa yalokho, abaningi, ikakhulu izingane, bayafa ngenxa yendlala. Kodwa lapho sekubusa uJesu Kristu, le nkinga iyoshabalala. Umhlaba uyokhiqiza isivuno esihle sokudla okumnandi kakhulu. Sonke isintu siyokondliwa kahle.

Ungathanda ukuthola lezo zibusiso ezizolethwa umholi onekhono? Uma kunjalo, sikukhuthaza ukuba ufunde ngalo Mholi osezobusa ngokuphelele kuwo wonke umhlaba. OFakazi BakaJehova bayokujabulela ukukusiza ukuba wenze kanjalo. Ngeke udumazeke, ngoba uJehova uNkulunkulu ngokwakhe uthi ngeNdodana yakhe: “Mina, yebo mina, ngiyimisile inkosi yami eZiyoni, intaba yami engcwele.”—IHubo 2:6.

[Ibhokisi ekhasini 5]

BASUKA EZIKHUNDLENI BENGAZELELE

Ngokuvamile umbusi angalindela ukuthi abantu ababusayo bayomhlonipha futhi bamsekele uma ebalethela isilinganiso esithile sokuthula nezimo zokuphila ezinokulondeka. Nokho, uma abantu bengasamethembi ngenxa yanoma yisiphi isizathu, ngokushesha omunye angathatha isikhundla sakhe. Okulandelayo ezinye zezibonelo zezimo lapho ababusi abanamandla baphoqeleka khona ukuba bashiye izikhundla zabo ngokushesha.

Izimo zokuphila ezingajabulisi. Ekupheleni kwekhulu le-18, izakhamuzi eziningi zaseFrance zaphoqeleka ukuba zikhokhe intela emba eqolo zibe zithola ukudla okuncane. Lezi zimo zaba nomthelela ekubangeleni iNguquko YaseFrance, eyabangela ukuba iNkosi uLouis XVI inqunywe ngo-1793.

Impi. Impi YeZwe 1 yaqeda ukubusa kwabanye bababusi abanamandla emlandweni. Ngokwesibonelo, ngo-1917 indlala eyabangelwa yimpi e-St. Petersburg eRussia yaphenduka iNguquko Yango-February. Lokhu kuvukela kwasusa esikhundleni uMbusi waseRussia uNicholas II futhi kwaholela ekubuseni kobuKhomanisi. Ngo-November 1918 iJalimane yayifuna ukuthula, kodwa imiBuso Esizanayo ayivumanga ukuyeka ukulwa kwaze kwaba yilapho sekushintshwe umbusi. Ngenxa yalokho, uMbusi waseJalimane uWilhelm II waphoqeleka ukuba abalekele eNetherlands.

Ukufisa izimiso ezihlukile zikahulumeni. Ngo-1989 iKhethini Lensimbi lasuswa. Imibuso eyayibonakala iqine njengedwala yabhidlika njengoba abantu ababengaphansi kwayo babenqaba ubuKhomanisi futhi bemisa izinhlobo ezihlukahlukene zokubusa.

[Izithombe ekhasini 7]

UJesu wasuthisa abalambile, waphulukisa abagulayo futhi washiyela wonke amaKristu isibonelo esihle

[Umthombo Wesithombe ekhasini 4]

Lloyd George: Photo by Kurt Hutton/Picture Post/Getty Images