Ukhubazekile—Kodwa Uyakushisekela Ukukhonza

LAPHO uqala ukubona uLeonardo, ungase ungacabangi ukuthi angasebenza esakhiweni. Zombili izandla zakhe zanqamuka engozini yasemsebenzini. Nokho, nakuba ekhubazekile, uLeonardo wayesebenza kanzima e-Acajutla, e-El Salvador, njengoba ungambona esithombeni.

Ukuze akwazi ukusebenza kuleso sakhiwo, uLeonardo wazenzela amathuluzi akhe. Unefosholo azifakela kulo inkintsho yensimbi, ngakho ufaka ingalo yakhe kuyo bese ngobuhlakani akhe udoti awufake ebhaleni. Esikhundleni sezibambo, wafaka izinsimbi eziyindilinga ukuze agqube ngazo ibhala. Yini eyamshukumisela ukuba ahlanganyele kulo msebenzi?

ULeonardo wayefuna ukuba nesandla ekwakhiweni kweHholo LoMbuso langakubo, noma indawo yokukhulekela yebandla loFakazi BakaJehova. Wayenezizathu eziningi zokuba angahlanganyeli kulo msebenzi wokwakha. Wayesebenza isikhathi esigcwele emsebenzini wokuziphilisa, ekhubazekile, futhi kakade wayekhonza ebandleni njengenceku ekhonzayo. Nokho, wayefuna ukwenza konke angakwenza ukuze akhonze uNkulunkulu nasesakhiweni.

Ingabe unomoya ofanayo ngokukhonza uNkulunkulu? Kunokusebenzisa ukukhubazeka kwakhe njengezaba, uLeonardo wasebenzisa ingqondo ukuba azenzele amathuluzi akhe siqu ukuze akwazi ukwenza umsebenzi ayengeke akwazi ukuwenza. Wayekhonza uNkulunkulu ‘ngayo yonke ingqondo yakhe.’ (Mathewu 22:37) Kungakhathaliseki ukuthi bakhubazekile noma cha, abasebenza ekwakheni amaHholo OMbuso oFakazi BakaJehova emhlabeni wonke banomoya wokuzinikela. Umphakathi wamukelekile emihlanganweni yabo, futhi nawe wamukelekile ukuba ube khona.