Ukuthola Ithemba Ezweni Eligcwele Usizi

“IZAKHAMUZI zineqhaza elikhulu ngokwengeziwe ekwenzeni okuhle emphakathini futhi zixazulule izinkinga ezivamile kunanini ngaphambili emlandweni wabantu.” Owayengumongameli wase-United States, uBill Clinton, washo la mazwi engqungqutheleni eyayise-Ottawa, eCanada, ngo-March 2006. Waphetha ngokuthi umoya wokwenza okuhle ubulokhu wanda ezizweni ngezizwe kusukela kwagadla i-tsunami ngo-2004 futhi wezwakalisa ukuba nethemba lokuhle, wathi amazwe omhlaba manje “ancike kwelinye nelinye kunanini ngaphambili.”

Ingabe singalindela ukuba izinhlekelele zemvelo zenze abantu kuyo yonke indawo basebenzele ikusasa elingcono? Ingabe ‘ukuncika kwamazwe kwelinye nelinye’ kuyisisekelo esinokwethenjelwa sethemba lekusasa elinokuthula kweqiniso nokulondeka okuhlala njalo?

Umthombo Wethemba Langempela

Umlando omude wemizamo yabantu eminyakeni engaphezu kwezinkulungwane eziyisithupha ubonisa ukuthi abantu ngokuphindaphindiwe bayadumazana. Ngakho-ke, kungesizathu esihle imiBhalo ephefumulelwe isiyala: “Ningabeki ithemba lenu ezicukuthwaneni, noma endodaneni yomuntu wasemhlabeni, okungekhona okwayo ukusindisa.” (IHubo 146:3) Ukubeka ithemba lethu ezinhlanganweni zaleli zwe, ezintweni zalo ezibonakalayo nasemaphusheni alo kumane nje kuholele ekudumazekeni. Ngani? Ngoba “izwe liyadlula, kanjalo nesifiso salo.”—1 Johane 2:17.

Nokho, phakathi namakhulu eminyaka, uNkulunkulu ubelokhu eyithemba elingantengantengi labantu abalungileyo. IBhayibheli limbiza ngokuthi ‘ithemba lika-Israyeli’ wasendulo nangokuthi ‘ithemba lokhokho bama-Israyeli,’ futhi kunezinkulumo eziningi ezibonisa ukuba nethemba kuye, ukuthembela kuye nokuqiniseka ngaye. (Jeremiya 14:8; 17:13; 50:7) Ngempela, imiBhalo isikhuthaza ukuba ‘sithembe uJehova.’—IHubo 27:14.

IzAga 3:5, 6 ziyasikhuthaza: “Thembela kuJehova ngayo yonke inhliziyo yakho, ungenciki kokwakho ukuqonda. Mqaphele kuzo zonke izindlela zakho, yena uyokwenza izindlela zakho ziqonde.” Kunezizathu ezinengqondo zokuba usethembe ngokugcwele isithembiso esinjalo ngoba uJehova uNkulunkulu akaguquki, singamethemba futhi uyaligcina izwi lakhe. (Malaki 3:6; Jakobe 1:17) Ukufunela okungcono kakhulu, futhi uma ngaso sonke isikhathi ukunaka lokho okushiwo iZwi lakhe, iBhayibheli, kuyokuqondisa ngokuphumelelayo kulezi zikhathi ezesabekayo.—Isaya 48:17, 18.

Umuntu olandela iseluleko sikaNkulunkulu ngenhliziyo yonke angencika kulesi sithembiso: “Ungesabi, ngoba nginawe. Ungaqalazi ngapha nangapha, ngoba nginguNkulunkulu wakho. Ngizokuqinisa. Impela ngizokusiza. Impela ngizoqhubeka ngikubambé ngokuqinile ngesandla sami sokunene sokulunga.” (Isaya 41:10) Ukuthandaza ngobuqotho nokuzindla ngalesi siqinisekiso kubaduduza kakhulu bonke labo abamthanda ngempela uJehova uNkulunkulu, ngoba kubasiza babhekane nezimo ezilukhuni nokukhathazeka.

Cabanga ngo-Andrea, ongomunye woFakazi BakaJehova futhi ongumama wezingane ezimbili. Uthi: “Umthandazo nokuzindla ngezithembiso zikaJehova kuphela okunginika amandla okuvuka ngizithathe lapho ngidikibaliswa imizwa yokungaqiniseki ekuphileni kwami. Uma ngigcina uJehova eyiyona nsika yokuphila kwami, kuba lula ukuba ngiqhubeke ngizinzile.”

Qinisa Ithemba Lakho KuJehova

Eqokomisa ukubaluleka kokuthembela kuJehova, omunye umhubi wathi: “Ukuthula okuchichimayo kungokwalabo abathanda umthetho wakho, futhi akunasikhubekiso kubo.” (IHubo 119:165) Ukutadisha iZwi likaNkulunkulu ngobuqotho kungenza lukhulu ekugcwaliseni ingqondo nenhliziyo yakho ngezinto ezinhle futhi ezakhayo ngokomoya, ‘izinto eziyiqiniso, ezibaluleke ngempela, ezilungileyo, ezihlanzekile, ezithandekayo nokukhulunywa kahle ngazo.’ Uma wenza umzamo ukuba uzwe, ufunde, wamukele futhi wenze izinto ezinjalo, “uNkulunkulu wokuthula uyoba [nawe].”—Filipi 4:8, 9.

Esusela kokuhlangenwe nakho kwakhe siqu kwamashumi eminyaka, uJohn uthi: “Ukuze ngishintshe indlela engangizizwa ngayo ngekusasa, kwakubalulekile ukuba ngifunde ukuthi kwakudingeka ngenze ushintsho olukhulu ebuntwini bami nasendleleni yami yokucabanga ngaphambi kokuba ngicabange ngokuthi ngingakha ubuhlobo noNkulunkulu ophelele, ongabonakali. Ukuphela kwendlela engangingabakha ngayo lobo buhlobo kwakuwukuba ngibe umuntu ongokomoya. Lokho kwahilela ukushintsha, ngicabange ngendlela kaNkulunkulu, ngifune umbono wakhe ngezinto ngokufunda iZwi lakhe eliphefumulelwe futhi ngizindle ngalo.”

Uma uphuza amanzi eqiniso aqabulayo, anikeza ukuphila asemiBhalweni ephefumulelwe, uyobe usebenzisa ikhambi osekuyiminyaka lizibonakalisa lisebenza ekumelaneni nethala elingapheli lezinto ezimbi esizilethelwa ithelevishini, amabhayisikobho namaphephandaba nsuku zonke. Ukusebenzisa lokho okushiwo yiBhayibheli kungaqinisa nezibopho zomkhaya futhi kusize ekunciphiseni ukukhathazeka. Ngaphezu kwalokho, uNkulunkulu uthembisa ukuthi ukulungele “[ukubonisa] amandla akhe ngenxa yalabo abanhliziyo yabo iphelele kuye.” (2 IziKronike 16:9) Uyolungisa izinto ngendlela yokuthi akukho lutho okumelwe ulwesabe ngempela.

UPhinehas, oye wahlala endaweni enezimpi futhi okwabulawa kuyo inqwaba yabantu, uthi: “Ngiye ngafunda ukubeka ukuphila kwami ezandleni zikaJehova ezikhathalelayo. Ukunamathela ezimisweni zeBhayibheli kungenze ngaphepha ezinkingeni eziningi.” Uma uthembela ngempela kuJehova uNkulunkulu, angakusiza ukuba uchushe ngisho nakobunjani ubunzima. (IHubo 18:29) Ingane encane enobuhlobo obuhle nabazali bayo ifunda ukubethemba ngokugcwele futhi izizwa ilondekile ezandleni zabo ngisho nalapho igula noma ikhathazwa ezinye izinto. Nawe ungaba nomuzwa ofanayo uma uthatha isinyathelo futhi wamukela isimemo sokumethemba uJehova.—IHubo 37:34.

Isisekelo Esiqinisekile Sethemba

UJesu Kristu watshela abalandeli bakhe: “Kumelwe nithandaze ngale ndlela: ‘Baba wethu osemazulwini, malingcweliswe igama lakho. Umbuso wakho mawuze. Intando yakho mayenzeke nasemhlabeni, njengasezulwini.’” (Mathewu 6:9, 10) Lowo Mbuso wasezulwini—uhulumeni osezandleni zikaJesu Kristu—uyindlela kaNkulunkulu yokubonakalisa ubukhosi bakhe obufanele phezu komhlaba.—IHubo 2:7-12; Daniyeli 7:13, 14.

Ukwesaba okungezindlela eziningi okuthinta zonke izici zokuphila namuhla kubonisa ngokucacile ukuthi kuyadingeka ukuba uNkulunkulu angenele. Kuyajabulisa ukuthi uzongenela maduze! Manje uJesu Kristu, obekwe uNkulunkulu esihlalweni sobukhosi njengeNkosi enguMesiya, uphathiswe igunya lokulwela ubukhosi bukaJehova futhi angcwelise igama laKhe. (Mathewu 28:18) Maduze, ukubusa kwalo Mbuso kuzoqondiswa emhlabeni ukuze kuqede zonke izimbangela zokwesaba nokukhathazeka. U-Isaya 9:6 ubalula izimfanelo ezibonisa ukuthi uJesu uyakufanelekela ukuba uMbusi ongasikhulula ekwesabeni esinakho. Ngokwesibonelo, ubizwa ngokuthi “uYise Ongunaphakade,” “uMeluleki Omangalisayo,” nangokuthi “iSikhulu Sokuthula.”

Cabangela inkulumo ethi “uYise Ongunaphakade.” Lesi sikhundla sibonisa ukuthi uJesu unamandla negunya—kanye nesifiso—sokunika abantu abalalelayo ithuba lokuphila phakade emhlabeni ngesisekelo somhlatshelo wakhe wesihlengo. Lokhu kusho ukuthi ekugcineni abantu bayokhululwa esonweni nasekungaphelelini abakuzuza kumuntu wokuqala owona, u-Adamu. (Mathewu 20:28; Roma 5:12; 6:23) UKristu futhi uyosebenzisa igunya lakhe alinikwe uNkulunkulu ukuba ababuyisele ekuphileni abaningi abaye bafa.—Johane 11:25, 26.

Ngesikhathi esemhlabeni, uJesu wazibonakalisa ‘enguMeluleki Omangalisayo.’ Ngenxa yolwazi lwakhe ngeZwi likaNkulunkulu nangenxa yokuqonda okungaphezu kokuvamile anakho ngobunjalo babantu, uJesu wayekwazi ukuxazulula izinkinga zokuphila kwemihla namalanga. Kusukela abekwa esihlalweni sobukhosi, uKristu uqhubeka ‘enguMeluleki Omangalisayo,’ okhonza njengomuntu oyinhloko emzileni kaJehova wokukhulumisana nabantu. Iseluleko sikaJesu, esilotshwe eBhayibhelini, sihlakaniphile futhi asinaphutha ngaso sonke isikhathi. Ukwazi nokukukholelwa lokhu kungakwenza uphile ukuphila okungenakho ukungaqiniseki nokwesaba okukhwantabalisayo.

U-Isaya 9:6 ubiza uJesu nangokuthi ‘uyiSikhulu Sokuthula.’ Ekuleso sikhundla, uKristu maduzane uzosebenzisa amandla akhe ukuze aqede konke ukungalingani—kwezombangazwe, kwezenhlalo nakwezomnotho. Kanjani? Ngokuletha isintu ngaphansi koMbuso owodwa kaMesiya onokuthula.—Daniyeli 2:44.

Ngaphansi kokubusa koMbuso, kuyoba khona ukuthula okuhlala njalo emhlabeni wonke. Kungani ungaqiniseka ngalokhu? Isizathu sembulwe ku-Isaya 11:9, othi: “Ngeke neze [izakhamuzi zoMbuso zilimaze noma zibangele] incithakalo kuyo yonke intaba yami engcwele; ngoba umhlaba ngokuqinisekile uyogcwala ulwazi ngoJehova njengoba nje amanzi esibekela ulwandle.” Ekugcineni, wonke umuntu emhlabeni uyoba nolwazi olunembile ngoNkulunkulu futhi uyomlalela. Ingabe inhliziyo yakho ayijabuli ngalesi sithembiso? Uma ijabula, ungazindeli ukungenisa “ulwazi” oluyigugu “ngoJehova.”

Ungaluthola lolu lwazi ngoNkulunkulu olwakha ukholo nolunikeza ukuphila ngokuhlola lokho iBhayibheli elikufundisayo ngempela ngezenzakalo zosuku lwethu nangekusasa eliqhakazile elithenjiswe eBhayibhelini. Ngakho-ke, sikunxusa ukuba uzizuzise emfundweni yamahhala yeBhayibheli enikezwa oFakazi BakaJehova endaweni yakini. Lena indlela yokudambisa ukwesaba neyokuthola ithemba langempela ezweni eligcwele usizi.

[Ibhokisi/Izithombe ekhasini 7]

Isizathu Sokuba Uhulumeni WoMbuso Unikeze Ithemba

NjengeNkosi yoMbuso kaNkulunkulu, uJesu Kristu unikezwe amandla negunya lokubusa endaweni yonke. (Mathewu 28:18) Uyoyibuyisela ngokuphelele imvelo yomhlaba esimweni sayo esifanele. Futhi unamandla okunqoba ukugula nezifo. Imisebenzi yamandla ayenza emhlabeni yayingamazwibela ezibusiso ezinhle nakakhulu ezizoba khona lapho esebusa njengeNkosi ephelele nethembekile. Iziphi izimfanelo zale Nkosi enguMesiya kwezisohlwini olungezansi ezikukhanga ngokukhethekile?

▪ Uyangeneka.—Marku 10:13-16.

▪ Unengqondo futhi akakhethi.—Marku 10:35-45.

▪ Singamethemba futhi akanabugovu.—Mathewu 4:5-7; Luka 6:19.

▪ Ulungile futhi unobulungisa.—Isaya 11:3-5; Johane 5:30; 8:16.

▪ Uyacabangela, uyabonelela futhi uthobekile.—Johane 13:3-15.

[Isithombe ekhasini 4]

Ukufunda iBhayibheli nokuzindla kungagxilisa kithi ukumethemba uJehova