Ukuhlola ‘Izinto Ezijulile ZikaNkulunkulu’

“Umoya uhlola ezintweni zonke, ngisho nasezintweni ezijulile zikaNkulunkulu.”—1 KORINTE 2:10.

1. Imaphi amanye amaqiniso eBhayibheli enza abafundi beBhayibheli abasha bajabule?

ABANINGI kithi esisebandleni lobuKristu bangayikhumbula injabulo esayizwa lapho siqala ukufunda iqiniso. Sathola isizathu sokubaluleka kwegama likaJehova, sokuba avumele ukuhlupheka, sokuba kube nabathile abaya ezulwini nokuthi ikusasa libaphatheleni bonke abanye abantu abathembekile. Kungenzeka ukuthi sasiye salifunda iBhayibheli ngaphambili, kodwa lezi zinto zazifihlekile kithi, njengoba zisafihlekile kwabaningi esintwini. Sasifana nomuntu obheke ibalazwe kodwa ongakwazi ukulisebenzisa ukuze limqondise endaweni ethile. Eyedwa, ubona nje amagama ezindawo ezihlukahlukene. Kodwa ngosizo lomuntu okwazi ukufunda ibalazwe, manje uyajabula ngoba useyazi ukuthi uyaphi nokuthi uzofika kanjani. Ngokufanayo, lapho othile eqala ukusisiza ukuba siqonde imiBhalo, saqala ukubona ‘izinto ezijulile zikaNkulunkulu.’—1 Korinte 2:8-10.

2. Kungani injabulo yokufunda iZwi likaNkulunkulu ingaba engapheli?

² Ingabe kufanele saneliswe ukuba nolwazi lweBhayibheli olukha phezulu? Inkulumo ethi ‘izinto ezijulile zikaNkulunkulu’ ihlanganisa nokuqonda ukuhlakanipha kukaNkulunkulu okwembulelwe amaKristu ngomoya ongcwele kodwa okufihlekile kwabanye. (1 Korinte 2:7) Yeka ukuthi ukuhlakanipha kukaNkulunkulu kuwumkhakha wokucwaninga ongenamkhawulo ongasijabulisa kanjani! Ngeke size sazi yonke into ngokuhlakanipha kwezindlela zikaNkulunkulu. Injabulo esaba nayo lapho siqala ukufunda izimfundiso zeBhayibheli eziyisisekelo singayilondoloza phakade uma siqhubeka sihlola ‘izinto ezijulile zikaNkulunkulu’ singakhathali.

3. Kungani kudingeka siziqonde ngokuphelele izizathu zezinkolelo zethu?

³ Kungani kudingeka ukuba siziqonde lezo ‘zinto ezijulile’? Ukungagcini ngokuqonda esikukholelwayo kodwa nokuqonda ukuthi kungani sikukholelwa—izisekelo zezinkolelo zethu—kuqinisa ukholo lwethu futhi kusenze siqiniseke ngokwengeziwe. ImiBhalo isitshela ukuba sisebenzise ‘amandla ethu okucabanga’ ukuze ‘sizitholele ngokwethu okuyintando kaNkulunkulu enhle neyamukelekayo nepheleleyo.’ (Roma 12:1, 2) Ukuqonda isizathu esenza uJehova asicele ukuba siphile ngendlela ethile kuqinisa ukuzimisela kwethu ukumlalela. Ngakho-ke, ukwazi ‘izinto ezijulile’ kungasinika amandla okumelana nezilingo zokwenza izenzo ezingqubuzana nomthetho futhi kungasishukumisela ukuba ‘sishisekele imisebenzi emihle.’—Thithu 2:14.

4. Ukutadisha iBhayibheli kuhilelani?

⁴ Ukuze siqonde izinto ezijulile kudingeka sitadishe. Nokho, ukutadisha akufani nokufunda into ethile okukha phezulu. Kuhilela ukuhlolisisa ukwaziswa ukuze sibone ukuthi kuhlangana kanjani nalokho esikwaziyo kakade. (2 Thimothewu 1:13) Kuhlanganisa ukuqonda izizathu zalokho okushiwoyo. Ukutadisha iBhayibheli kufanele kuhlanganise nokuzindla ngendlela esingakusebenzisa ngayo lokho esikufundayo ekwenzeni izinqumo ezihlakaniphile nasekusizeni abanye. Njengoba “yonke imiBhalo iphefumulelwe uNkulunkulu” isifundo sethu kufanele sihlanganise “wonke amazwi aphuma emlonyeni kaJehova.” (2 Thimothewu 3:16, 17; Mathewu 4:4) Ukutadisha iBhayibheli kungadinga ukuzikhandla! Kodwa kungaba futhi okujabulisayo, futhi akunzima kakhulu ukuqonda ‘izinto ezijulile.’

UJehova Usiza Abamnene Ukuba Baqonde

5. Ubani ongaqonda ‘izinto ezijulile zikaNkulunkulu’?

⁵ Ngisho noma wawudonsa kanzima esikoleni futhi ungakujwayele ukutadisha, akufanele ucabange ukuthi awusoze waziqonda ‘izinto ezijulile zikaNkulunkulu.’ Phakathi nenkonzo kaJesu yasemhlabeni, akubona abantu abahlakaniphile nongqondongqondo uJehova abembulela ukuba baqonde injongo yakhe kodwa wembulela abantu abangafundile nabavamile ababethobeke ngokwanele ukuba bafundiswe inceku kaNkulunkulu. Babebonakala benjengezingane lapho beqhathaniswa nalabo ababefundiswe ezikoleni. (Mathewu 11:25; IzEnzo 4:13) Ngokuqondene ‘nezinto uNkulunkulu aye wazilungiselela labo abamthandayo,’ umphostoli uPawulu wawabhalela lokhu amaKristu ayekanye nawo: “UNkulunkulu uzambulele thina ngomoya wakhe, ngoba umoya uhlola ezintweni zonke, ngisho nasezintweni ezijulile zikaNkulunkulu.”—1 Korinte 2:9, 10.

6. Eyoku-1 Korinte 2:10 isho ukuthini?

⁶ Umoya kaNkulunkulu uzihlola kanjani ‘izinto zonke, ngisho nezinto ezijulile zikaNkulunkulu’? Kunokuba anike umKristu ngamunye esakhe isambulo, uJehova usebenzisa umoya wakhe ukuze uqondise inhlangano yakhe, esiza abantu bakaNkulunkulu abanobunye ukuba baqonde iBhayibheli. (IzEnzo 20:28; Efesu 4:3-6) Emhlabeni wonke, wonke amabandla ajabulela isimiso esifanayo sokufunda iBhayibheli. Phakathi nenkathi ethile yeminyaka, amabandla ahlanganisa zonke izimfundiso eziseBhayibhelini. Umoya ongcwele usebenza ngebandla ukuze usize abantu babe nesimo sengqondo esidingekayo ukuze baqonde ‘izinto ezijulile zikaNkulunkulu.’—IzEnzo 5:32.

‘Izinto Ezijulile ZikaNkulunkulu’ Zihlanganisani?

7. Kungani abantu abaningi bengaziqondi ‘izinto ezijulile zikaNkulunkulu’?

⁷ Akufanele sicabange ukuthi ‘izinto ezijulile’ ziyizinto okunzima vele ukuziqonda. Ulwazi ‘lwezinto ezijulile zikaNkulunkulu’ lufihlekile kubantu abaningi, hhayi ngoba kunzima kakhulu ukufinyelela ukuhlakanipha kukaNkulunkulu, kodwa ngoba uSathane ekhohlisa abantu ukuba benqabe usizo olunikezwa nguJehova ngenhlangano yakhe.—2 Korinte 4:3, 4.

8. Iziphi izinto ezijulile uPawulu ayekhuluma ngazo esahlukweni sesithathu sencwadi ayibhalela abase-Efesu?

⁸ Isahluko sesithathu sencwadi uPawulu ayibhalela abase-Efesu sibonisa ukuthi ‘izinto ezijulile zikaNkulunkulu’ zihlanganisa amaqiniso amaningi iningi labantu bakaJehova eliwaqonda kahle, njengokuthi ingubani iNzalo ethenjisiwe, ukukhethwa kwabantu abathile esintwini abanethemba lasezulwini noMbuso kaMesiya. UPawulu wabhala: “Kwezinye izizukulwane le mfihlo ayizange yaziswe kubantwana babantu njengoba manje yambuliwe ngomoya kubaphostoli bakhe abangcwele nabaprofethi, ewukuthi, ukuba abantu bezizwe babe yizindlalifa kanye nathi namalungu omzimba akanye nathi nabahlanganyeli kanye nathi esithembisweni, simunye noKristu Jesu.” UPawulu wathi wayabelwe ukuba “enze abantu babone ukuthi iqondiswa kanjani le mfihlo engcwele leyo esikhathini esidlule esingaziwa ebilokhu ifihlwe kuNkulunkulu.”—Efesu 3:5-9.

9. Kungani kuyilungelo ukuqonda ‘izinto ezijulile zikaNkulunkulu’?

⁹ UPawulu waqhubeka wachaza intando kaNkulunkulu yokuba ‘ukuhlakanipha kukaNkulunkulu okuhlukahlukene kakhulu manje kwenziwe kwaziwe ngebandla nasezulwini.’ (Efesu 3:10) Izingelosi ziyazuza ngokubona nangokuqonda ukuhlakanipha kokusebenzelana kukaJehova nebandla lobuKristu. Yeka ilungelo esinalo lokuqonda izinto ezithakazelisa ngisho nezingelosi! (1 Petru 1:10-12) Ngokulandelayo, uPawulu uthi kufanele thina ‘kanye nabo bonke abangcwele’ silwele “ukuqonda ububanzi nobude nokuphakama nokujula” kokholo lwamaKristu. (Efesu 3:11, 18) Manje ake sicabangele izibonelo ezimbalwa zezinto ezijulile ezingase zikhulise ukuqonda kwethu.

Izibonelo Zezinto Ezijulile

10, 11. NgokwemiBhalo, uJesu waba nini ingxenye eyinhloko ‘yenzalo’ ‘yowesifazane’ kaNkulunkulu wasezulwini?

¹⁰ Siyazi ukuthi uJesu uyingxenye eyinhloko ‘yenzalo’ ‘yowesifazane’ kaNkulunkulu wasezulwini okukhulunywa ngayo kuGenesise 3:15. Ukuze sandise ukuqonda kwethu, singase sibuze: ‘UJesu waba nini iNzalo ethenjisiwe? Ingabe kwenzeka esikhathini esithile ngaphambi kokuba abe umuntu, ngenkathi ezalwa njengomuntu, ngenkathi ebhapathizwa, noma lapho evuswa?’

¹¹ UNkulunkulu wayethembise ukuthi ingxenye esezulwini yenhlangano yakhe, okubhekiselwa kuyo esiprofethweni ngokuthi “owesifazane” wakhe, yayiyoveza inzalo eyayiyolimaza inyoka ekhanda. Kwadlula izinkulungwane zeminyaka kodwa lutho owesifazane kaNkulunkulu ukuba aveze inzalo enamandla okubhubhisa uSathane nemisebenzi yakhe. Ngenxa yalokho, isiprofetho sika-Isaya simbiza ngokuthi ‘uyinyumba,’ futhi sithi ‘uzwiswe ubuhlungu.’ (Isaya 54:1, 5, 6) Ekugcineni, uJesu wazalwa eBhetlehema. Kodwa kwaze kwaba kuphela ngemva kokubhapathizwa kwakhe lapho ezalwa ngomoya ukuze abe indodana kaNkulunkulu yomoya, lapho uJehova amemezela khona: “Lo yiNdodana yami.” (Mathewu 3:17; Johane 3:3) Ingxenye eyinhloko ‘yenzalo’ yowesifazane yayisizivezile. Kamuva, abalandeli bakaJesu nabo bagcotshwa futhi bazalwa ngomoya ongcwele. ‘Owesifazane’ kaJehova okwase kuyisikhathi eside ezizwa ‘enjengowesifazane ongazalanga,’ ekugcineni ‘wayesengakhamuluka ngenjabulo.’—Isaya 54:1; Galathiya 3:29.

12, 13. Imiphi imiBhalo ebonisa ukuthi wonke amaKristu agcotshiwe asemhlabeni akha “inceku ethembekileyo neqondayo”?

¹² Isibonelo sesibili sezinto ezijulile esiye sembulelwa zona siphathelene nenjongo kaNkulunkulu yokukhetha abantu abangu-144 000 esintwini. (IsAmbulo 14:1, 4) Siyayamukela imfundiso yokuthi bonke abagcotshiwe abaphila emhlabeni nganoma isiphi isikhathi bakha “inceku ethembekileyo neqondayo” uJesu athi yayiyolungiselela abendlu yakhe “ukudla” okufike ngesikhathi. (Mathewu 24:45) Imaphi amavesi eBhayibheli afakazela ukuthi lokhu kuqonda kunembile? Akunakwenzeka yini ukuthi uJesu wayebhekisela kunoma imuphi nje umKristu owakha abafowabo ngokudla okungokomoya?

¹³ UNkulunkulu watshela isizwe sakwa-Israyeli: “Ningofakazi bami . . . yebo inceku yami engiyikhethile.” (Isaya 43:10) Kodwa ngoNisani 11 wonyaka ka-33 C.E., uJesu watshela abaholi bakwa-Israyeli ukuthi uNkulunkulu wayesilahlile isizwe sabo ukuba singabe sisaba inceku yaKhe. Wathi: “Niyophucwa umbuso kaNkulunkulu unikwe isizwe esithela izithelo zawo.” UJesu wathi ezixukwini: “Bhekani! Indlu yenu ishiywa nani.” (Mathewu 21:43; 23:38) Njengenceku kaJehova, indlu ka-Israyeli yayingathembekile futhi ingaqondi. (Isaya 29:13, 14) Kamuva ngalolo suku, lapho uJesu ebuza: “Ngubani ngempela oyinceku ethembekileyo neqondayo”? empeleni wayebuza ukuthi, ‘Isiphi isizwe esiqondayo esiyongena esikhundleni sika-Israyeli sibe inceku kaNkulunkulu ethembekile?’ Umphostoli uPetru wanikeza impendulo lapho etshela ibandla lamaKristu agcotshiwe: ‘Niyisizwe esingcwele, isizwe esiyimpahla ekhethekile.’ (1 Petru 1:4; 2:9) Leso sizwe, “u-Israyeli kaNkulunkulu,” saba inceku entsha kaNkulunkulu. (Galathiya 6:16) Njengoba nje wonke amalungu esizwe sakwa-Israyeli wasendulo ayakha “inceku” eyodwa, ngokufanayo wonke amaKristu agcotshiwe emhlabeni akhona ngesikhathi esithile akha “inceku ethembekileyo neqondayo” eyodwa. Yeka ukuthi kuyilungelo elingakanani kithi ukuthola “ukudla” ngale nceku kaNkulunkulu!

Isifundo Somuntu Siqu Singaba Mnandi

14. Kungani ukutadisha iBhayibheli, hhayi ukumane ulifunde nje, kuletha injabulo?

¹⁴ Lapho sembulelwa ukuqonda okusha kwemiBhalo, asizizwa yini sijabule ngenxa yendlela okuqinisa ngayo ukholo lwethu? Yingakho ukutadisha iBhayibheli, hhayi ukumane ulifunde nje, kungasilethela injabulo enkulu kakhulu. Ngakho-ke, lapho ufunda izincwadi zobuKristu, zibuze: ‘Le ncazelo ihlangana kanjani nalokho engangikuqonda ngale ndaba ngaphambili? Imiphi eminye imiBhalo noma izizathu engingase ngicabange ngazo ezingazisekela ngokwengeziwe iziphetho ezinikezwe kulesi sihloko?’ Uma kudingeka ukucwaninga okwengeziwe, ubhale phansi umbuzo othanda ukuthola impendulo yawo, bese ucwaninga ngawo esifundweni sakho esilandelayo.

15. Iziphi izinto ongazicwaninga ezingajabulisa, futhi zingaba kanjani nenzuzo ehlala njalo?

¹⁵ Iziphi izinto ongazifunda ezingakulethela injabulo yokuthola ukuqonda okusha? Izinto ezinjengokuhlaziya ngokujulile izivumelwano ezihlukahlukene uNkulunkulu aye wazenza ngokwenzuzo yesintu zingajulisa ukuqonda kwakho. Ungaqinisa ukholo lwakho ngokutadisha iziprofetho ezibhekisela kuJesu Kristu noma ngokufunda enye yezincwadi zesiprofetho edingida ivesi nevesi lencwadi yeBhayibheli. Ukubukeza umlando wanamuhla woFakazi BakaJehova usebenzisa incwadi ethi OFakazi BakaJehova—Abamemezeli BoMbuso KaNkulunkulu, uma itholakala ngolimi lwakho, nakho kuyaluqinisa ukholo.a Ukubukeza “Imibuzo Evela Kubafundi” enyatheliswe komagazini abadlule be-Nqabayokulinda ngokuqinisekile kuyokusiza ukuba uwaqonde kangconywana amavesi athile. Ngokwesibonelo, nakisisa indlela izizathu ezingokwemiBhalo ezendlalwe ngayo ukuze kufinyelelwe isiphetho esinikezwayo. Lokhu kuyokusiza ukuba uqeqeshe ‘amandla akho okuqonda’ futhi kukwenze ube nokuqonda. (Hebheru 5:14) Njengoba utadisha bhala amaphuzu eBhayibhelini lakho noma ephepheni ukuze ukucwaninga kwakho kukuzuzise phakade wena nalabo okwaziyo ukubasiza.

Siza Izingane Zisijabulele Isifundo SeBhayibheli

16. Ungazisiza kanjani izingane ukuba zijabulele isifundo seBhayibheli?

¹⁶ Kuningi abazali abangakwenza ukuze benze izingane zabo zilangazelele izinto ezingokomoya. Ungalithathi kancane ikhono lezingane lokuqonda izinto ezijulile. Uma wabela izingane isihloko ezizosicwaninga lapho zilungiselela isifundo seBhayibheli somkhaya, ungazicela ukuba zisho ezikutholile. Isifundo somkhaya singahlanganisa nezikhathi zokuprakthiza ukuze kusizwe izingane ukuba zifunde indlela yokuvikela ukholo lwazo futhi zibonise ukuthi lokho ezifundiswe kona kuyiqiniso. Ngaphezu kwalokho ningasebenzisa incwajana ethi “Bona Izwe Elihle”b ukuze nifunde ngezindawo eziseBhayibhelini futhi nicacise lokho enifunda ngakho ekufundweni kweBhayibheli kwamasonto onke.

17. Kungani kudingeka ukuba silinganisele lapho sicwaninga esifundweni seBhayibheli somuntu siqu?

¹⁷ Izinto umuntu angazicwaninga esifundweni somuntu siqu zingajabulisa futhi ziqinise ukholo, kodwa qaphela ukuba ungazivumeli zithathe isikhathi sakho sokulungiselela imihlangano yebandla. Imihlangano ingenye indlela uJehova asifundisa ngayo ‘ngenceku ethembekileyo neqondayo.’ Nokho, ukucwaninga okwengeziwe kungakusiza ukuba unikeze izimpendulo eziwusizo emihlanganweni—ngokwesibonelo eSifundweni Sencwadi Sebandla, noma ngesikhathi samaphuzu avelele okufundwa kweBhayibheli kwamasonto onke eSikoleni Senkonzo Esingokwasezulwini.

18. Kungani ukwenza umzamo wokutadisha “izinto ezijulile zikaNkulunkulu” kuzuzisa ngempela?

¹⁸ Isifundo esijulile somuntu siqu seZwi likaNkulunkulu singakusiza ukuba usondele kuJehova. Libonisa inzuzo yesifundo esinjalo, iBhayibheli lithi: “Ukuhlakanipha kuyisivikelo njengoba nje nemali iyisivikelo; kodwa inzuzo yolwazi iwukuthi ukuhlakanipha kona kuyabalonda abaninikho.” (UmShumayeli 7:12) Ngakho-ke, ukwenza umzamo odingekayo ukuze ujulise ukuqonda kwakho izinto ezingokomoya kuzuzisa ngempela. Kulabo abaqhubeka befuna, iBhayibheli liyathembisa: “Uyoluthola ulwazi ngoNkulunkulu.”—IzAga 2:4, 5.

[Imibhalo yaphansi]

Ungachaza?

• Ziyini ‘izinto ezijulile zikaNkulunkulu’?

• Kungani kungafanele siyeke ukutadisha izinto ezijulile?

• Kungani injabulo yokuqonda ‘izinto ezijulile zikaNkulunkulu’ ingase itholwe yiwo wonke amaKristu?

• Ungazuza kanjani ngokwengeziwe “ezintweni ezijulile zikaNkulunkulu”?

[Isithombe ekhasini 28]

UJesu waba nini iNzalo ethenjisiwe?

[Isithombe ekhasini 31]

Abazali bangabela izingane zabo izihloko okumelwe zizicwaninge zilungiselela isifundo somkhaya