UMthendeleko—Amaqiniso Ahambisana Naleli Siko

ABANTU emhlabeni wonke bawugcina njalo lo mkhosi—kungakhathaliseki ukuthi kukaningana ngonyaka, njalo ngesonto, noma nsuku zonke. Kodwa, ubizwa ngokuthi imfihlakalo yokholo, futhi iningi lalabo abawugcinayo lithi aliwuqondi kahle. Ubhekwa njengongcwele futhi kucatshangwa ukuthi kufanele ube yisimangaliso.

Lona umkhosi woMthendeleko—ingxenye yeMisa lamaKatolika lapho umpristi ethandazela khona isinkwa newayini bese ibandla lamukeliswa uKristu eSidlweni Esingcwele.a UPapa Benedict XVI wathi kumaKatolika, lo mkhosi “uyingqikithi nendikimba yokholo lwethu.” Esikhathini esingeside esidlule, isonto lagubha “uNyaka Womthendeleko” njengengxenye yomzamo “wokuvuselela nokuthuthukisa ukholo ngomthendeleko.”

Ngisho namaKatolika anokholo olubuthaka alikhonzile leli siko. Ngokwesibonelo, endabeni yamuva nje kumagazini i-Time, owesifazane othile owachazwa njengomKatolika osemusha, othuthukayo, wabhala: “Kungakhathaliseki ukuthi sinaziphi izinkinga nobuKatolika njengenkolo, sisanamathela kulokho okusihlanganisayo okholweni lobuKatolika: ukuzinikela kwethu ekugubheni umkhosi woMthendeleko.”

Kodwa uyini uMthendeleko? Ingabe abalandeli bakaKristu kulindeleke ukuba bawugcine? Ake siqale ngokucabangela indlela leli siko loMthendeleko elaqala ngayo. Siyobe sesigxila embuzweni obaluleke kakhulu: Ingabe ngempela uMthendeleko uvumelana nomkhosi owaqalwa uJesu Kristu eminyakeni engaba ngu-2 000 edlule?

UMthendeleko NeLobukholwa

Akunzima ukubona ukuthi kungani uMthendeleko ubhekwa njengesimangaliso. Inkathi emqoka kulo mkhosi ifika phakathi nomthandazo woMthendeleko. Ngaleso sikhathi, ngokwencwadi ethi Catechism of the Catholic Church, “amandla amazwi nezenzo zikaKristu, kanye namandla oMoya Ongcwele” enza inyama negazi likaJesu “kube khona kulo mhlatshelo.” Ngemva kokuba umpristi edle isinkwa newayini, umema amakholwa ukuba azokwamukela iSidlo, ngokuvamile ngokudla isinkwa kuphela, noma uMzimba.

ISonto LamaKatolika lifundisa ukuthi isinkwa newayini kuphenduka ngokuyisimangaliso kube umzimba negazi likaKristu uqobo—imfundiso okuthiwa ukuguquka kwesinkwa sibe umzimba kaKristu. Le mfundiso yaqala kancane kancane, ekuqaleni le nkulumo yachazwa futhi yasetshenziswa ngokusemthethweni ekhulwini le-13. Ngesikhathi seNguquko YamaProthestani, izici ezithile zoMthendeleko wamaKatolika zangatshazwa. ULuther wayenqaba imfundiso yokuguquka kwesinkwa sibe umzimba kaKristu, wakhetha imfundiso yokuthi isinkwa newayini kuhlangana nomzimba kaKristu. Mncane ngempela umahluko kulokhu. ULuther wafundisa ukuthi isinkwa newayini kuhlangana nenyama negazi likaJesu, kodwa akuguquki kube umzimba waKhe.

Ngokuhamba kwesikhathi, kwaqubuka ezinye izimpikiswano mayelana nencazelo yoMthendeleko kanye nendlela nesikhathi okufanele ugcinwe ngaso phakathi kwezinkolo zeLobukholwa. Noma kunjalo, ngandlela-thile lo mkhosi usabaluleke kakhulu kulo lonke eLobukholwa. Kodwa wawunjani umkhosi wokuqala owasungulwa uJesu?

Ukusungulwa “KweSidlo SeNkosi Sakusihlwa”

UJesu uqobo wasungula “isidlo seNkosi sakusihlwa,” noma iSikhumbuzo sokufa kwakhe. (1 Korinte 11:20, 24) Kodwa ingabe waqala isiko eliyimfihlakalo lapho abalandeli bakhe babeyokudla umzimba negazi lakhe ngempela?

UJesu wayesanda kugubha iPhasika lamaJuda futhi waxosha uJuda Iskariyothe, umphostoli owayesezomkhaphela. UMathewu, ongomunye wabaphostoli abangu-11 ababekhona, wabika: “Njengoba beqhubeka bedla, uJesu wathatha isinkwa, futhi ngemva kokusho isibusiso, wasihlephula, wasinikeza abafundi, wathi: ‘Thathani, yidlani. Lokhu kusho umzimba wami.’ Wathatha nendebe, esebongile [ngesiGreki, eu·kha·ri·ste΄sas], wabanika yona, wathi: ‘Phuzani kuyo, nonke; ngoba lokhu kusho “igazi” lami “lesivumelwano,” elizothululwa ngenxa yabaningi ngenjongo yokuthethelelwa kwezono.’”—Mathewu 26:26-28.

KuJesu, nakuzo zonke izinceku zikaNkulunkulu, ukuthandazela ukudla kwakuyisibopho. (Duteronomi 8:10; Mathewu 6:11; 14:19; 15:36; Marku 6:41; 8:6; Johane 6:11, 23; IzEnzo 27:35; Roma 14:6) Ingabe sikhona isizathu sokukholelwa ukuthi ngokubonga kanjalo, uJesu wayenza nesimangaliso, enza ukuba abalandeli bakhe badle inyama negazi lakhe uqobo?

Ingabe “Lokhu Kusho” Noma “Lokhu Kungu-”?

Kuyiqiniso ukuthi ezinye izinguqulo zeBhayibheli zihumusha amazwi kaJesu ngale ndlela: “Thathani nidle; lokhu kungumzimba wami,” nangokuthi, “Phuzani nonke, ngoba lokhu kuyigazi lami.” (Mathewu 26:26-28, Conferenza Episcopale Italiana; The New Jerusalem Bible) Kuyiqiniso futhi ukuthi igama lesiGreki elithi e·stin΄, eliwuhlobo lwesenzo sesiGreki esisho “ukuba,” ngokuyinhloko lisho ukuthi “kungu-.” Kodwa isenzo esifanayo singasho nokuthi “kusho.” Ngokuthakazelisayo, ezinguqulweni eziningi zeBhayibheli, lesi senzo sivame ukuhunyushwa ngokuthi “kusho” noma “kumelela.”b Umongo yiwo onquma indlela yokuhumusha enembe kangcono. Ngokwesibonelo, kuMathewu 12:7, elithi e·stin΄, lihunyushwa ngokuthi “kusho” ezinguqulweni eziningi zeBhayibheli: “Ukube benazile ukuthi lokhu kusho ukuthini [ngesiGreki, e·stin]: Ngifuna isihe hhayi umhlatshelo, beningeke nibalahle abangenacala.”—CEI; Douay Version.

Kuleli phuzu, izazi eziningi zeBhayibheli ezihlonishwayo ziyavuma ukuthi igama elithi “kungu-” aliwuhumushi ngokunembile umqondo uJesu ayewuveza lapha. Ngokwesibonelo, uJacques Dupont wacabangela amasiko nomphakathi uJesu ayehlala kuwo wayesephetha ngokuthi indlela yokuhumusha “engokwemvelo kakhulu” yaleli vesi kufanele ithi: “Lokhu kusho umzimba wami” noma, “Lokhu kumelela umzimba wami.”

Kunoma ikuphi, akunakwenzeka ukuthi uJesu wayeqonde ukuthi abafundi bakhe kufanele badle inyama yakhe futhi baphuze igazi lakhe ngokoqobo. Ngani? Ngemva kweSikhukhula sosuku lukaNowa, lapho uNkulunkulu enika abantu imvume yokudla inyama yezilwane, wabenqabela ngokuqondile abantu ukudla igazi. (Genesise 9:3, 4) Lo myalo waphindwa eMthethweni KaMose, uJesu awulalela ngokuphelele. (Duteronomi 12:23; 1 Petru 2:22) Abaphostoli baphefumulelwa ngomoya ongcwele ukuba baphinde umyalo onqabela ukudla igazi, okwenza lowo mthetho waba isibopho kuwo wonke amaKristu. (IzEnzo 15:20, 29) Ingabe uJesu wayengasungula umkhosi ofuna ukuba abalandeli bakhe beqe umthetho ongcwele kaNkulunkulu uMninimandla onke? Lutho neze!

Kusobala-ke ukuthi uJesu wasebenzisa isinkwa newayini njengezifanekiselo. Isinkwa esingenamvubelo sasisho, noma simelela umzimba ongenasono owawuzonikelwa. Iwayini elibomvu lalimelela igazi elaliyothululwa “ngenxa yabaningi ngenjongo yokuthethelelwa kwezono.”—Mathewu 26:28.

Injongo YeSidlo SeNkosi Sakusihlwa

UJesu waphetha umkhosi wokuqala weSidlo SeNkosi Sakusihlwa ngala mazwi: “Qhubekani nikwenza lokhu ningikhumbula.” (Luka 22:19) Ngempela lo mkhosi uyasisiza ukuba sikhumbule uJesu nezinto ezimangalisayo ezafezwa ukufa kwakhe. Usikhumbuza ukuthi uJesu wasekela ubukhosi bukaYise, uJehova. Usikhumbuza nokuthi ngokufa kwakhe njengomuntu ophelele, ongenasono, uJesu ‘wanikela umphefumulo wakhe waba yisihlengo sabaningi.’ Isihlengo sivula ithuba lokuba noma ubani obonisa ukholo emhlatshelweni wakhe akhululwe esonweni futhi azuze ukuphila okuphakade.—Mathewu 20:28.

Nokho, ngokuyinhloko iSidlo SeNkosi Sakusihlwa siyisidlo senhlanganyelo. Abahilelekile (1) nguJehova uNkulunkulu, owalungiselela isihlengo, (2) uJesu Kristu, “iWundlu likaNkulunkulu,” owanikela ngesihlengo kanye (3) nabafowabo bakaJesu abangokomoya. Ngokudla isinkwa newayini, leli qembu lakamuva libonisa ukuthi linobunye ngokuphelele noKristu. (Johane 1:29; 1 Korinte 10:16, 17) Libonisa nokuthi ‘lisesivumelwaneni esisha’ njengabafundi bakaJesu abagcotshwe ngomoya. Laba bayobusa noKristu ezulwini njengamakhosi nabapristi.—Luka 22:20; Johane 14:2, 3; IsAmbulo 5:9, 10.

ISikhumbuzo kufanele senziwe nini? Impendulo iba sobala uma ukhumbula ukuthi uJesu wakhetha usuku olukhethekile lokusungula lo mkhosi—iPhasika. Kwase kuyiminyaka engaphezu kuka-1 500 abantu bakaNkulunkulu bekhumbula lolu suku minyaka yonke, uNisani 14 ekhalendeni labo, ukuze bakhumbule ukusindisa kukaJehova abantu bakhe ngokuphawulekayo. Ngokusobala, uJesu wayeyala abalandeli bakhe ukuba basebenzise usuku olufanayo ukuze bakhumbule isenzo esikhulu sensindiso uNkulunkulu ayezosenza ngokufa kukaKristu. Ngakho, abalandeli bakaJesu beqiniso baba khona eSidlweni SeNkosi Sakusihlwa minyaka yonke ngosuku oluqondana noNisani 14 ekhalendeni lesiHebheru.

Ingabe lokhu bakwenza ngoba bethanda isiko? Empeleni, yilokho okukhanga abantu abaningi ngokugcina uMthendeleko. Umlobi wendaba eshiwo ngenhla kumagazini i-Time wathi: “Kunokuthile okududuza ngokujulile ngokuhlanganyela emikhosini yasendulo egcinwa abaningi kangaka.” NjengamaKatolika amaningi namuhla, lo mlobi uyathanda ukuba lo mkhosi uqhutshwe ngesiLatini njengoba kwakwenziwa kudala. Ngani? Uyabhala: “Ngifuna ukuzwa ingoma yeMisa ihlatshelelwa ngolimi engingaluqondi ngoba ngokuvamile angikuthandi engikuzwayo uma lihlatshelelwa ngesiNgisi.”

OFakazi BakaJehova, kanye nezigidi zabantu abathakazelayo, bayakujabulela ukugcina iSidlo SeNkosi Sakusihlwa ngolimi lwabo nomaphi lapho behlala khona. Bayakujabulela ukuthuthukisa indlela abakuqonda ngayo okushiwo ukufa kukaKristu nokubaluleka kwako. Amaqiniso anjalo akufanelekele ukucatshangelwa nokudingidwa unyaka wonke. OFakazi bathola ukuthi ukukhumbula iSikhumbuzo kuyindlela engcono kakhulu yokuqhubeka bekhumbula uthando olukhulu lukaJehova uNkulunkulu neNdodana yakhe, uJesu Kristu. Kubasiza ukuba ‘baqhubeke bememezela ukufa kweNkosi, ize ifike.’—1 Korinte 11:26.

[Imibhalo yaphansi]

[Amazwi acashunwe esihlokweni ekhasini 27]

Wawunjani umkhosi wokuqala owasungulwa uJesu?

[Isithombe ekhasini 28]

UJesu wasungula iSikhumbuzo sokufa kwakhe

[Isithombe ekhasini 29]

Ukugcina iSikhumbuzo sokufa kukaJesu Kristu