Amandla KaNkulunkulu Embulwe Ezinkanyezini
“Phakamiselani amehlo enu phezulu nibone. Ngubani odale lezi zinto? YiLowo okhipha ibutho lazo ngisho nangesibalo, zonke azibize ngisho nangamagama. Ngenxa yobuningi bamandla ashukumisayo, kwazise futhi unamandla amakhulu, ayikho neyodwa kuzo entulekayo.”—ISAYA 40:26.
ILANGA lethu liyinkanyezi nje enobukhulu obuvamile. Noma kunjalo, isisindo salo sikhulu ngokuphindwe izikhathi ezingu-330 000 kunesomhlaba. Iningi lezinkanyezi eziseduze lincane kunelanga. Kodwa ezinye izinkanyezi, njengaleyo okuthiwa i-V382 Cygni, zinesisindo esiphindwe okungenani izikhathi ezingu-27 kuneselanga.
Ilanga lethu likhipha amandla angakanani? Cabanga nje ukuthi umlilo bekuyodingeka ushise kangakanani ukuze uwuzwe uqhele ngamakhilomitha ayishumi. Ngokwesilinganiso, ilanga lingamakhilomitha ayizigidi ezingu-150 ukusuka emhlabeni. Kodwa, uma libalele, ukushisa kwalo kushisa isikhumba! Okumangalisayo ukuthi cishe ingxenye eyodwa kuphela kweziyizigidi eziyinkulungwane zamandla elanga efinyelela emhlabeni. Noma kunjalo, le ngxenyana encane yamandla elanga yanele ukuze isekele ukuphila emhlabeni.
Empeleni, ososayensi balinganisela ukuthi amandla aphelele elanga lethu lilodwa anele ukusekela onozungezilanga abangaba yizigidi zezigidi ezingu-31 abanjengomhlaba. Noma uma ilinganisa ubukhulu bala mandla ngenye indlela, ingosi ye-Internet ye-Space Weather Prediction Center (SWPC) ithi: Ukube wonke amandla elanga abengaqoqelwa ndawonye umzuzwana nje owodwa, abeyonikeza elase-United States “ugesi owanele iminyaka engu-9 000 000 ezayo, lisebenzisa ugesi ngezinga eliwusebenzisa ngalo manje.”
Amandla elanga aphuma ebuthunjini balo—obuphehla amandla enuzi ngokuhlakaza ama-athomu abese ekhipha amandla amakhulu. Ilanga likhulu futhi ubuthumbu balo bubanzi kangangokuba kuthatha izigidi zeminyaka ukuba amandla aphuma kubo afinyelele ngaphandle. Ingosi ye-Internet ye-SWPC ithi: “Ukube iLanga belingayeka ukukhipha amandla namuhla, bekuyothatha iminyaka engu-50 000 000 ukuba kube nemiphumela ephawulekayo eMhlabeni!”
Manje cabangela leli qiniso: Lapho uphakamisa amehlo ebusuku obucwathile, ubona izinkulungwane zezinkanyezi ezinjengelanga lethu, ngayinye ekhipha amandla amakhulu. Ososayensi balinganisela ukuthi kunezigidigidi zezinkanyezi endaweni yonke!
Zavelaphi zonke lezi zinkanyezi? Abacwaningi abaningi sebekholelwa ukuthi ngenxa yezizathu abangakaziqondi, indawo yonke yamane yaba khona eminyakeni eyizigidi eziyizinkulungwane ezingu-14 edlule. IBhayibheli limane nje lithi: “Ekuqaleni uNkulunkulu wadala amazulu nomhlaba.” (Genesise 1:1) Ngokungangabazeki, Lowo owadala imishini ekhipha amandla amakhulu esiyibiza ngezinkanyezi angachazwa ngokuthi “unamandla amakhulu.”—Isaya 40:26.
Indlela UNkulunkulu Awasebenzisa Ngayo Amandla Akhe
UJehova uNkulunkulu usebenzisa amandla akhe ukuze asekele labo abenza intando yakhe. Ngokwesibonelo, umphostoli uPawulu wazikhandla ekufundiseni abanye ngoNkulunkulu. UPawulu wayengeyena umuntu onamandla angaphezu kwawemvelo, kodwa wakwazi ukufeza okuningi okuhle nakuba ayephikiswa. Kanjani? Wavuma ukuthi wayethola “amandla angaphezu kwavamile” kuNkulunkulu.—2 Korinte 4:7-9.
UJehova uNkulunkulu ubuye abe namandla okubhubhisa labo abaphula izimiso zakhe zokuziphatha ngamabomu. UJesu Kristu wakhuluma ngokubhujiswa kweSodoma neGomora neSikhukhula sosuku lukaNowa njengezibonelo zendlela uJehova akhetha ngayo ukusebenzisa amandla okubhubhisa. UJesu waprofetha ukuthi maduze uJehova uzophinde asebenzise amandla akhe ukuze abhubhise labo abangazinaki izindinganiso zaKhe.—Mathewu 24:3, 37-39; Luka 17:26-30.
Wena Uthinteka Kanjani?
Ngemva kokuzindla ngamandla kaNkulunkulu abonakala ezinkanyezini, ungase uzizwe njengeNkosi uDavide, eyathi: “Lapho ngibona amazulu akho, imisebenzi yeminwe yakho, inyanga nezinkanyezi okulungiselele, uyini umuntu ofayo ukuba umkhumbule, nendodana yomuntu wasemhlabeni ukuba uyinakekele?”—IHubo 8:3, 4.
Yebo, kusenza sithobeke ukuqaphela indlela esibonakala singelutho ngayo uma siqhathaniswa nobukhulu bendawo yonke. Kodwa, akudingeki ukuba sizizwe singelutho ngenxa yamandla kaNkulunkulu. UJehova waphefumulela umprofethi u-Isaya ukuba abhale la mazwi aqinisekisayo: “[UNkulunkulu] unika okhatheleyo amandla; kongenamandla ashukumisayo wenza kuvame amandla aphelele. Abafana bayokhathala futhi baphelelwe amandla, nezinsizwa uqobo ziyokhubeka nakanjani, kodwa labo abathemba uJehova bayothola amandla kabusha. Bayokhuphuka ngamaphiko njengezinkozi. Bayogijima bangaphelelwa amandla; bayohamba bangakhathali.”—Isaya 40:29-31.
Uma ufisa ukwenza intando kaNkulunkulu, ungaqiniseka ngokuthi uyokunika umoya wakhe ongcwele ukuze akusekele. Kodwa kumelwe uwucele. (Luka 11:13) Ngosizo lukaNkulunkulu, ungakhuthazelela noma ikuphi ukuvivinywa futhi uthole amandla okwenza okulungile.—Filipi 4:13.
[Amazwi acashunwe esihlokweni ekhasini 7]
Ngosizo lukaNkulunkulu, ungakhuthazelela noma ikuphi ukuvivinywa futhi uthole amandla okwenza okulungile
[Izithombe ekhasini 7]
Kusuka phezulu kwesokunxele kuya kwesokudla: Umthala i-Whirlpool, iqoqo lezinkanyezi i-Pleiades, i-Orion Nebula, umthala i-Andromeda
[Izithombe ekhasini 7]
Isisindo selanga sikhulu ngokuphindwe izikhathi ezingu-330 000 kunesomhlaba
[Imithombo Yezithombe ekhasini 7]
Pleiades: NASA, ESA and AURA/Caltech; all others above: National Optical Astronomy Observatories