Ubani Ongase Alazi Ikusasa?
“NgingowaPhezulu . . . , Lowo owazisa isiphetho kwasekuqaleni, nalowo owazisa izinto ezingakenziwa kusukela kudala.” —Isaya 46:9, 10.
KULEZI zikhathi zesiyaluyalu abahlaziyi bezombangazwe, bezomnotho, nabezenhlalo bahlola umlando nalokho okwenzeka namuhla bezama ukubikezela ikusasa. Abanye, bemagange befuna ukwazi ukuthi ikusasa libaphatheleni, bafuna izimpendulo kubafundi bezinkanyezi noma kwabasebenzelana nemimoya. Abantu abanjalo bavame ukudumala ngemiphumela. Ingabe akunakwenzeka nhlobo ukwazi ukuthi kuzokwenzekani kuleli zwe, emikhayeni yethu, nakithi imbala? Ekugcineni, ingabe ukhona ngempela umuntu ongabona ikusasa kusengaphambili?
Emazwini acashunwe ngenhla awasho kumprofethi u-Isaya, uNkulunkulu uMninimandla onke uJehova, walichaza ikhono lakhe lokubikezela ikusasa. Ngo-Isaya, uNkulunkulu wabikezela ukukhululwa kwama-Israyeli asendulo ekuthunjweni eBhabhiloni nokubuya kwawo eyokwakha kabusha iJerusalema nethempeli. Sasinembe kangakanani lesi siprofetho? Cishe kusasele iminyaka engu-200, u-Isaya walisho ngokunembile igama likaKoresi owayezonqoba iBhabhiloni. Ngaphezu kwalokho, u-Isaya walichaza ngokunembile isu likaKoresi lokuchezukisa umfula i-Ewufrathe, owawuyisivikelo salo muzi. Waze wabikezela ngisho nokuthi uKoresi wayezothola iminyango emikhulu ivulwe gengelezi, okuyinto eyabangela ukuba anqobe kalula.—Isaya 44:24–45:7.
Uma eqhathaniswa noNkulunkulu, umuntu akanawo amandla okubona ikusasa. Inkosi ehlakaniphile uSolomoni yabhala: “Ungaziqhayisi ngosuku olulandelayo, ngoba awazi ukuthi usuku luyozalani.” (IzAga 27:1) Lokho eyakusho kusenjalo. Akekho umuntu ongabona ngisho nelakhe ingomuso. Yini eyenza uNkulunkulu ehluke? Uziqonda ngokugcwele zonke izinto azidalile, kuhlanganise ukwakheka nokuthambekela komuntu. UNkulunkulu angakubona ngokunembile lokho okuyokwenziwa abantu ngabanye nezizwe zonke, uma ekhetha ukwenza kanjalo. Ngaphezu kwalokho, unekhono elingenakulinganiswa lokulawula imiphumela yezenzakalo. Uma ebikezela ngabaprofethi bakhe ukuthi kuyokwenzeka okuthile, uba ‘yiLowo owenza izwi lenceku yakhe ligcwaliseke, Lowo oyifeza ngokuphelele injongo yezithunywa zakhe.’ (Isaya 44:26) UJehova uNkulunkulu kuphela ongasho lokho ngeqiniso.
U-Isaya waphila eminyakeni engu-700 ngaphambi kukaJesu, uMesiya. Kodwa, u-Isaya waprofetha ngokuza kukaMesiya. Nokho, ikakhulukazi kusukela ngekhulu le-18 kuya phambili, abagxeki beBhayibheli baye bahlasela ubuqiniso bencwadi ka-Isaya. Bathi iziprofetho zika-Isaya zazingezona izibikezelo ngempela kodwa zalotshwa sezigcwalisekile, umlobi nje kamuva owabhala lokho okwase kwenzekile. Ingabe kuyiqiniso lokho? Ngo-1947 kwatholakala ikhophi yencwadi ka-Isaya, kanye neminye imiqulu yasendulo, emgedeni oseduze noLwandle Olufile. Izazi zathi le khophi yenziwa eminyakeni engaphezu kwekhulu ngaphambi kokuzalwa kukaMesiya noma uKristu owayebikezelwe. Yebo, iBhayibheli lalembula ikusasa!
U-Isaya nabanye abalobi beBhayibheli babengeke babikezele izenzakalo zekusasa ngokuhlakanipha kwabo nje siqu. Kunalokho, “bakhuluma okuvela kuNkulunkulu ngoba babeqhutshwa umoya ongcwele.” (2 Petru 1:21) Ezihlokweni ezilandelayo, sizogxila emininingwaneni ethile yokuphila kukaJesu eyabikezelwa u-Isaya. Ngemva kwalokho siyobe sesicabangela izenzakalo ezabikezelwa uJesu nabafundi bakhe eziphathelene nosuku lwethu kanye nekusasa.