UJehova Usihlola Ngenjongo Yokusisiza

“Amehlo [kaJehova] aqalaza kuwo wonke umhlaba ukuze abonise amandla akhe ngenxa yalabo abanhliziyo yabo iphelele kuye.”—2 IZIKR. 16:9.

1. Kungani uJehova esihlola?

UJEHOVA unguBaba ophelele. Usazi kahle kakhulu kangangokuthi wazi ngisho ‘nokuthambekela kwemicabango yethu.’ (1 IziKr. 28:9) Nokho, akasihloli ngenjongo yokuthola amaphutha. (IHu. 11:4; 130:3) Kunalokho, usihlola ngothando ngoba efuna ukusivikela kunoma yini engase ilimaze ubuhlobo bethu naye noma isilahlekisele amathemba ethu okuthola ukuphila okuphakade.—IHu. 25:8-10, 12, 13.

2. Obani uJehova ababonisa amandla akhe?

² UJehova unamandla angenakuqhathaniswa futhi ubona zonke izinto. Yingakho ekwazi ukusiza abaqotho bakhe noma nini lapho bembiza, futhi uyakwazi ukubasekela lapho bebhekene nezimo ezivivinyayo. Eyesi-2 IziKronike 16:9 ithi: “Amehlo [kaJehova] aqalaza kuwo wonke umhlaba ukuze abonise amandla akhe ngenxa yalabo abanhliziyo yabo iphelele kuye.” Phawula ukuthi uJehova usebenzisa amandla akhe ukuze asize abamkhonza ngenhliziyo epheleleyo, ehlanzekile nenezisusa ezimsulwa. Akabakhathaleli ngale ndlela abantu abakhohlisayo noma abangabazenzisi.—Josh. 7:1, 20, 21, 25; IzAga 1:23-33.

Hamba NoNkulunkulu

3, 4. Kusho ukuthini ‘ukuhamba noNkulunkulu,’ futhi iziphi izibonelo eziseBhayibhelini ezisikhanyisela ngale ndaba?

³ Kwabaningi, kunzima kakhulu ukukholelwa ukuthi uMdali wendawo yonke enkulukazi uvumela abantu ukuba bahambe naye ngomqondo ongokomoya. Nokho, yilokho kanye uJehova afuna sikwenze. Ngezikhathi zeBhayibheli, u-Enoke noNowa ‘bahamba noNkulunkulu.’ (Gen. 5:24; 6:9) UMose “waqhubeka egxilile sengathi uyambona Lowo ongabonakali.” (Heb. 11:27) INkosi uDavide yazithola ihamba ngokuthobeka eceleni kukaYise osezulwini. Yathi: “Ngeke ngintengantengiswe, ngoba [uJehova] ungakwesokunene sami.”—IHu. 16:8.

⁴ Yiqiniso, asinakusibamba ngokoqobo isandla sikaJehova sihambe naye. Kodwa singakwenza lokhu ngomqondo ongokomfanekiso. Kanjani? Umhubi u-Asafa uyabhala: “Nginawe njalo; usibambile isandla sami sokunene. Uyongihola ngeseluleko sakho.” (IHu. 73:23, 24) Ngamafuphi nje, sihamba noJehova lapho sisilalelisisa iseluleko sakhe esisithola ngokuyinhloko ngeZwi lakhe elilotshiwe ‘nangenceku ethembekileyo neqondayo.’—Math. 24:45; 2 Thim. 3:16.

5. UJehova ubaqapha kanjani njengobaba abantu bakhe abaqotho, futhi kufanele sizizwe kanjani ngaye?

⁵ Ngenxa yokuthi uJehova uyabazisa abahamba naye, ubaqapha njengobaba, abanakekele, abavikele futhi abafundise. Uthi: “Ngizokwenza ube nokuqondisisa ngikufundise indlela okufanele uhambe ngayo. Ngiyonika iseluleko iso lami likubhekile.” (IHu. 32:8) Zibuze: ‘Ngiyazibona yini ngihamba noJehova, njengokungathi sibambene ngezandla, ngilalele ukuhlakanipha kwakhe ngazi ukuthi iso lakhe elinothando lingibhekile? Ingabe ukwazi ukuthi ukhona kuthonya imicabango, amazwi nezenzo zami? Lapho ngona, ingabe ngibheka uJehova njengoBaba onesihe nomusa ofuna ukusiza abaphendukayo ukuba baphinde babe nobuhlobo obufudumele naye, noma ngimbheka njengoNkulunkulu ongangeneki nolukhuni?’—IHu. 51:17.

6. Yini uJehova akwazi ukuyenza umzali ongumuntu angenakukwazi ukuyenza?

⁶ Ngezinye izikhathi, uJehova angase asisize nangaphambi kokuba sithathe inkambo embi. Ngokwesibonelo, angase abone ukuthi inhliziyo yethu enamandla okukhohlisa isiqala ukufisa izinto ezingafanele. (Jer. 17:9) Esimweni esinjalo, angase athathe isinyathelo masinya ngokungafani nendlela abazali abangabantu abangenza ngayo ngoba “amehlo akhe akhanyayo” ayakwazi ukusibheka ngaphakathi ekujuleni ukuze ahlole imicabango yethu ejule kakhulu. (IHu. 11:4; 139:4; Jer. 17:10) Cabanga ngendlela uNkulunkulu asabela ngayo kulokho okwenzeka kuBharuki, unobhala nomngane omkhulu womprofethi uJeremiya.

Waba Ngubaba Wangempela KuBharuki

7, 8. (a) Wayengubani uBharuki, futhi iziphi izifiso eziyingozi okungenzeka waqala ukuba nazo enhliziyweni yakhe? (b) UJehova wabonisa kanjani ukuthi wayekhathalela uBharuki njengobaba?

⁷ UBharuki wayengumbhali ochwepheshile owakhonza noJeremiya ngokwethembeka esabelweni esasinzima kakhulu—sokumemezela izahlulelo zikaJehova kuJuda. (Jer. 1:18, 19) Ngesinye isikhathi, uBharuki, okungenzeka ukuthi wayevela emkhayeni ovelele, waqala ukuzifunela “izinto ezinkulu.” Mhlawumbe waqala ukuzindla ngesifiso sokuzifukula noma sokuchuma ngokwezinto ezibonakalayo. Kunoma ikuphi, uJehova wabona ukuthi inhliziyo kaBharuki yayisiqala ukuba nalo mcabango oyingozi. Esebenzisa uJeremiya, uJehova wathi kuBharuki: “Wena uthé: ‘Maye, manje, kimi, ngoba uJehova unezele usizi ebuhlungwini bami! Ngidiniwe ngenxa yokububula kwami, futhi angitholanga ndawo yokuphumula.’” UNkulunkulu wabe esethi: “Uqhubeka uzifunela izinto ezinkulu. Musa ukuqhubeka uzifuna.”—Jer. 45:1-5.

⁸ Nakuba uJehova akhuluma noBharuki ngamazwi aqinile, wayengamthukuthelele, kodwa wayemkhathalela njengobaba. Kusobala ukuthi uNkulunkulu wabona ukuthi izifiso zale ndoda zazingabonisi ukuthi yayinenhliziyo embi noma enobuqili. UJehova wayazi nokuthi iJerusalema noJuda kwase kuzobhujiswa futhi wayengafuni ukuba uBharuki aphambuke kuleso sikhathi esibucayi. Ngakho, ukuze aphinde asangulukise inceku yakhe, uNkulunkulu wamkhumbuza ukuthi ‘wayezoletha inhlekelele phezu kwayo yonke inyama,’ wanezela nokuthi uma uBharuki enza ngokuhlakanipha, wayeyophila. (Jer. 45:5) Empeleni, uNkulunkulu wayethi kuBharuki: ‘Sanguluka Bharuki. Khumbula ukuthi yini ezokwenzeka maduze kubantu bakwaJuda nabaseJerusalema abonayo. Hlala uthembekile uphile! Ngizokuvikela.’ Kusobala ukuthi uJehova wayifinyelela inhliziyo kaBharuki ngoba walungisa ukucabanga kwakhe futhi wasinda lapho iJerusalema libhujiswa eminyakeni engu-17 kamuva.

9. Ungayiphendula kanjani imibuzo esesigabeni?

⁹ Njengoba uzindla ngendaba kaBharuki, cabanga ngemibuzo nangemiBhalo elandelayo: Indlela uNkulunkulu asebenzelana ngayo noBharuki yembulani ngaye nangendlela azizwa ngayo ngezinceku zakhe? (Funda amaHebheru 12:9.) Sicabanga ngezikhathi ezibucayi esiphila kuzo, yini esingayifunda eselulekweni uNkulunkulu asinikeza uBharuki nasendleleni uBharuki asabela ngayo? (Funda uLuka 21:34-36.) Abadala abangamaKristu bangamlingisa kanjani uJeremiya bakhathalele izinceku zikaJehova ngendlela azikhathalela ngayo?—Funda eyabaseGalathiya 6:1.

INdodana Yabonisa Uthando LukaYise

10. UJesu uhlonyiswe kanjani ukuba akwazi ukuba iNhloko yebandla lobuKristu?

¹⁰ Ngaphambi kwenkathi yobuKristu, uJehova wembula uthando analo ngabantu bakhe ngokusebenzisa abaprofethi nezinye izinceku ezithembekile. Namuhla, lolu thando silubona ikakhulu eNhlokweni yebandla lobuKristu, uJesu Kristu. (Efe. 1:22, 23) Ngakho, encwadini yesAmbulo, uJesu uchazwa ngokuthi uyiwundlu ‘elinamehlo ayisikhombisa, okungamehlo asho imimoya eyisikhombisa kaNkulunkulu ethunyelwe emhlabeni wonke.’ (IsAm. 5:6) Yebo, njengoba umoya ongcwele kaNkulunkulu umnika amandla, uJesu unokuqonda okuphelele. Naye ubona lokho esiyikho ngaphakathi futhi ubona yonke into.

11. UKristu unayiphi indima, futhi indlela asibheka ngayo ifana kanjani nekaYise?

¹¹ Nokho, njengoJehova, uJesu akalona iphoyisa lasezulwini. Usihlola ngothando. Esinye seziqu zikaJesu esithi “uYise Ongunaphakade,” sisikhumbuza ngendima ayoba nayo ekunikezeni bonke ababonisa ukholo kuye ukuphila okuphakade. (Isaya 9:6) Ngaphezu kwalokho, njengeNhloko yebandla lobuKristu, uKristu angashukumisela amaKristu avuthiwe ngokomoya futhi anenhliziyo evumayo, ikakhulu abadala, ukuba baduduze noma beluleke abadinga usizo.—1 Thes. 5:14; 2 Thim. 4:1, 2.

12. (a) Izincwadi ezabhalelwa amabandla ase-Asia Minor angu-7 zembulani ngoJesu? (b) Abadala basibonisa kanjani isimo sengqondo sikaKristu emhlambini kaNkulunkulu?

¹² Ukuthi uKristu unesithakazelo esijulile ngomhlambi kubonakala ezincwadini azibhalela abadala bamabandla angu-7 ase-Asia Minor. (IsAm. 2:1–3:22) Kulezo zincwadi, uJesu wabonisa ukuthi wayeqaphela konke okwakwenzeka ebandleni ngalinye nokuthi wayebakhathalela ngokujulile abalandeli bakhe. Kwenzeka okufanayo namuhla—empeleni kwenzeka ngezinga elikhulu—ngoba umbono wesAmbulo ugcwaliseka “osukwini lweNkosi.”a (IsAm. 1:10) Ngokuvamile, uKristu ubonisa uthando lwakhe ngokusebenzisa abadala abakhonza njengabelusi bebandla abangokomoya. Angashukumisa lezi “zipho ezingabantu” ukuba ziduduze, zikhuthaze noma zeluleke lapho kudingeka. (Efe. 4:8; IzE. 20:28; funda u-Isaya 32:1, 2.) Ingabe ubheka imizamo yabo njengebonisa ukuthi uKristu unesithakazelo kuwe?

Usizo Ngesikhathi Esifanele

13-15. UNkulunkulu angase akhethe ukuyiphendula kanjani imithandazo yethu? Nikeza izibonelo.

¹³ Ingabe wake wathandaza kakhulu ucela usizo futhi umthandazo wakho waphendulwa ngokuvakashelwa umKristu ovuthiwe ngokomoya? (Jak. 5:14-16) Mhlawumbe lolo sizo waluthola enkulumweni emhlanganweni wobuKristu noma ngokufunda enye yezincwadi zethu. Ngokuvamile uJehova uyiphendula ngalezi zindlela imithandazo yethu. Ngokwesibonelo, umzalwane othile wanikeza inkulumo futhi ngemva kwayo kweza kuye udade owayengaphathwanga neze ngendlela enobulungisa emasontweni andulele. Kunokukhononda ngenkinga yakhe, wezwakalisa ukwazisa okukhulu ngamaphuzu athile angokomBhalo awathola enkulumweni. Ayesebenza esimweni sakhe futhi amduduza kakhulu. Yeka indlela ayejabule ngayo ngokuthi wayeyile esifundweni!

¹⁴ Ngokuphathelene nosizo olutholakala ngomthandazo, cabanga ngesibonelo seziboshwa ezintathu ezafunda iqiniso leBhayibheli zisejele futhi zaba abamemezeli abangabhapathiziwe. Ngenxa yesigameko esithile sobudlova, zonke iziboshwa kulelo jele zaphucwa amalungelo amaningana. Lokho kwabangela udlame. Iziboshwa zanquma ukuthi ngakusasa ngemva kokudla kwasekuseni ngeke ziwabuyisele amapuleti ukuze zibonise ukungahambisani kwazo nalokhu. Laba bamemezeli abathathu abangabhapathiziwe bazithola besenkingeni. Uma behlanganyela kulokhu kuvukela, bayobe bengalaleli iseluleko sikaJehova esikweyabaseRoma 13:1. Uma bengahlanganyeli, babengalindela ukuhlaselwa yilezi ziboshwa ezibhodla umlilo.

¹⁵ Engakwazi ukuxoxa ngalolu daba, la madoda athandaza acela ukuhlakanipha. Ngakusasa ekuseni, womathathu athola ukuthi ayefinyelele esinqumweni esifanayo—ayezovele akubonge ukudla kwasekuseni. Kamuva lapho onogada befika bezoqoqa amapuleti, la madoda amathathu ayengenawo ngoba ayengawathathanga. Yeka indlela ayejabule ngayo ngokuthi ‘uMuzwi womthandazo’ wayewazwile!—IHu. 65:2.

Ukubheka Ikusasa Ngokuqiniseka

16. Umsebenzi wokushumayela ubonisa kanjani ukuthi uJehova uyabakhathalela abanjengezimvu?

¹⁶ Umsebenzi wokushumayela owenziwa emhlabeni wonke ungobunye ubufakazi bokuthi uJehova uyabakhathalela abantu abanhliziyo ziqotho, kungakhathaliseki ukuthi bahlalaphi. (Gen. 18:25) Ngokuvamile, esebenzisa izingelosi, uJehova angaqondisa izinceku zakhe kubantu abanjengezimvu—ngisho noma behlala ezindaweni ezingakafinyelelwa ngezindaba ezinhle. (IsAm. 14:6, 7) Ngokwesibonelo, esebenzisa ingelosi, uNkulunkulu wathuma uFiliphu, umvangeli wekhulu lokuqala, ukuba ayothola isikhulu saseTopiya asichazele imiBhalo. Waba yini umphumela? Leyo ndoda yamukela izindaba ezinhle, yaba umlandeli kaJesu obhapathiziwe.b—Joh. 10:14; IzE. 8:26-39.

17. Kungani kungafanele sikhathazeke ngokweqile ngekusasa?

¹⁷ Njengoba lesi simiso sezinto siya ngasekupheleni kwaso, ‘imihelo yokucindezeleka’ eyabikezelwa izoqhubeka. (Math 24:8) Ngokwesibonelo, intengo yokudla ingase yenyuke kakhulu ngenxa yabantu abaningi abakudingayo, ngenxa yesimo sezulu esibi kakhulu noma ukuntengantenga kwezomnotho. Kungase kube nzima ukuthola umsebenzi, futhi abantu abasebenzayo bangaze bacindezelwe kakhulu ukuba basebenze amahora engeziwe. Kungakhathaliseki ukuthi kwenzekani, bonke abagcina izinto ezingokomoya ziza kuqala futhi bagcine ‘iso labo lilihle’ akudingeki ukuba bakhathazeke ngokweqile. Bayazi ukuthi uNkulunkulu uyabathanda futhi uyobanakekela. (Math. 6:22-34) Ngokwesibonelo, cabanga ngendlela uJehova amnakekela ngayo uJeremiya esikhathini esibucayi ngaphambi kokubhujiswa kweJerusalema ngo-607 B.C.E.

18. UJehova wambonisa kanjani uJeremiya ukuthi wayemthanda ngesikhathi iJerusalema livinjezelwe?

¹⁸ Engxenyeni yokugcina yokuvinjezelwa kweJerusalema yiBhabhiloni, uJeremiya wayeboshwe eGcekeni Labaqaphi. Wayeyokuthola kanjani ukudla? Ukube wayengaboshiwe wayeyozizamela kona. Kodwa wayencike ngokuphelele kubantu ababemzungezile, abaningi babo ababemzonda! Noma kunjalo, uJeremiya akazange athembele kubantu, kodwa kuNkulunkulu owayemthembise ukumnakekela. Ingabe uJehova wasigcina isithembiso sakhe? Impela! Waqinisekisa ukuthi uJeremiya wayethola “isinkwa esiyindilinga” nsuku zonke “saze saphela sonke isinkwa emzini.” (Jer. 37:21) UJeremiya, uBharuki, u-Ebhedi-meleki nabanye, basinda kuleyo nkathi yendlala, izifo nokufa.—Jer. 38:2; 39:15-18.

19. Njengoba silindele ikusasa, yini okufanele sizimisele ukuyenza?

¹⁹ Yebo, “amehlo kaJehova aphezu kwabalungileyo, nezindlebe zakhe zisekunxuseni kwabo.” (1 Pet. 3:12) Uyajabula yini ngokuthi uYihlo osezulwini uyakuqapha? Ingabe ukwazi ukuthi amehlo akhe akubheke ngenjongo yokukusiza kukwenza uzizwe uvikelekile futhi ulondekile? Ngakho, zimisele ukuqhubeka uhamba noNkulunkulu—kungakhathaliseki ukuthi ikusasa lingase likuphatheleni. Singaqiniseka ngokuthi uJehova uyohlale ebaqaphile njengobaba bonke abantu bakhe abaqotho.—IHu. 32:8; funda u-Isaya 41:13.

[Imibhalo yaphansi]

Ungachaza?

• Singabonisa kanjani ukuthi ‘sihamba noNkulunkulu’?

• UJehova wabonisa kanjani ukuthi uyamthanda uBharuki?

• NjengeNhloko yebandla lobuKristu, uJesu uzibonisa kanjani izimfanelo zikaYise?

• Singabonisa ngaziphi izindlela ukuthi sithembele kuNkulunkulu phakathi nalezi zikhathi ezibucayi?

[Izithombe ekhasini 9]

Abadala abangamaKristu namuhla babonisa ukukhathalela kukaJehova njengoba kwenza uJeremiya kuBharuki

[Isithombe ekhasini 10]

UJehova angalunikeza kanjani usizo ngesikhathi esifanele?