IZwi LikaJehova Liyaphila
Amaphuzu Avelele Encwadi KaJakobe NezikaPetru
CISHE eminyakeni engaba ngu-30 ngemva kwePhentekoste lika-33 C.E., umfundi uJakobe—umfowabo kaJesu ngamzali munye—ubhalela “izizwe eziyishumi nambili” zika-Israyeli ongokomoya incwadi. (Jak. 1:1) Umgomo wakhe: ukuzikhuthaza ukuba ziqine okholweni futhi zikhuthazele lapho zibhekene nezilingo. Unikeza neseluleko sokulungisa izimo eziphazamisayo esezikhona emabandleni.
Ngaphambi nje komkhankaso woMbusi WamaRoma, uNero, wokushushisa amaKristu ngo-64 C.E., umphostoli uPetru uwabhalela incwadi yakhe yokuqala, ewakhuthaza ukuba ame aqine okholweni. Encwadini yakhe yesibili, ayibhala ngokushesha ngemva kweyokuqala, ukhuthaza akholwa nabo ukuba banake izwi likaNkulunkulu futhi ubaxwayisa ngokuza kosuku lukaJehova. Ngempela, singazuza ngokusinaka isigijimi esisencwadini kaJakobe nasezincwadini zikaPetru.—Heb. 4:12.
UNKULUNKULU UBANIKA UKUHLAKANIPHA LABO ‘ABAKUCELA NGOKHOLO’
UJakobe uyabhala: “Uyajabula umuntu oqhubeka ekhuthazelela ukulingwa, ngoba lapho amukeleka uyokwamukela umqhele wokuphila.” Labo ‘abaqhubeka becela ngokholo,’ uJehova ubanikeza ukuhlakanipha abakudingayo ukuze bakhuthazelele izilingo.—Jak. 1:5-8, 12.
Labo ‘ababa ngabafundisi’ ebandleni nabo badinga ukholo nokuhlakanipha. Ngemva kokuchaza ulimi ngokuthi “luyilungu elincane” kodwa olukwazi ‘ukubeka amabala kuwo wonke umzimba,’ uJakobe uxwayisa ngemikhuba yezwe engonakalisa ubuhlobo bomuntu noNkulunkulu. Ubuye anikeze izinyathelo noma ubani ogulayo ngokomoya okufanele azithathe ukuze alulame.—Jak. 3:1, 5, 6; 5:14, 15.
Izimpendulo Zemibuzo YemiBhalo
2:13—“Isihe sethaba ngokunqoba phezu kwesahlulelo” ngayiphi indlela? Lapho kudingeka silandise kuNkulunkulu, uyasicabangela isihe esiye sasibonisa kwabanye abese eyasithethelela ngesisekelo somhlatshelo wesihlengo weNdodana yakhe. (Roma 14:12) Ingabe lesi akusona isizathu sokwenza isihe sibe imfanelo evelele ekuphileni kwethu?
4:5—UJakobe ucaphuna muphi umBhalo lapha? UJakobe akacaphuni ivesi elithile. Nokho, la mazwi aphefumulelwe uNkulunkulu kungenzeka asekelwe emqondweni osemiBhalweni enjengoGenesise 6:5; 8:21; IzAga 21:10 neyabaseGalathiya 5:17.
Izifundo Esizitholayo:
1:14, 15. Isono sandulelwa isifiso esingalungile. Ngakho-ke, akufanele sifukamele izifiso ezingalungile ngokuqhubeka sicabanga ngazo. Kunalokho, kudingeka ‘siqhubeke sicabanga’ ngezinto ezakhayo futhi sigcwalise izingqondo nezinhliziyo zethu ngazo.—Fil. 4:8.
2:8, 9. “Ukubonisa ukukhetha” kuphambene ‘nomthetho wobukhosi’ wothando. Ngakho-ke, amaKristu eqiniso awakhethi.
2:14-26. ‘Sisindiswa ngokholo,’ hhayi “ngenxa yemisebenzi” ephathelene noMthetho kaMose noma yobuKristu. Ukholo lwethu akufanele lube olokuzisholo. (Efe. 2:8, 9; Joh. 3:16) Kumelwe lusishukumisele ukuba senze ngokuvumelana nentando kaNkulunkulu.
3:13-17. Ngokuqinisekile, “ukuhlakanipha kwaphezulu” kuphakeme kunokuhlakanipha ‘kwasemhlabeni, kobulwane nokobudemoni’! Kufanele ‘siqhubeke sifuna ukuhlakanipha kokwesaba uNkulunkulu njengengcebo efihliweyo.’—IzAga 2:1-5.
3:18. Imbewu yezindaba ezinhle zoMbuso kumelwe ihlwanyelwe ngokuthula yilabo abenza ukuthula. Kubalulekile ukuba sibe ngabenzi bokuthula, singabi abaqhoshayo, abathanda izingxabano noma abavukelayo.
‘YIMANI NIQINILE OKHOLWENI’
UPetru ukhumbuza amakholwa akanye nawo ‘ngethemba lawo eliphilayo’ lefa analo ezulwini. UPetru uyawatshela: “Niluhlanga olukhethiweyo‚ ubupristi obobukhosi‚ isizwe esingcwele.” Ngemva kokunikeza iseluleko esiqondile ngokuphathelene nokuzithoba, unxusa bonke ukuba babe ‘nomqondo ofanayo, babonise ukuzwelana, uthando lobuzalwane, ububele besisa, futhi bathobeke engqondweni.’—1 Pet. 1:3, 4; 2:9; 3:8.
Njengoba ‘ukuphela kwesimiso sezinto samaJuda sekusondele,’ uPetru weluleka abafowabo ukuba ‘bahluzeke engqondweni futhi baphaphamele ukuthandaza.’ Uthi kubo: “Hlalani nisangulukile, qaphani. . . . Melanani [noSathane], niqinile okholweni.”—1 Pet. 4:7; 5:8, 9.
Izimpendulo Zemibuzo YemiBhalo
3:20-22—Ubhapathizo lusisindisa kanjani? Ubhapathizo luyimfuneko kulabo abafuna ukusindiswa. Nokho, ubhapathizo ngokwalo alusisindisi. Empeleni insindiso itholakala “ngokuvuka kukaJesu Kristu.” Umuntu obhapathizwayo kumelwe abe nokholo lokuthi insindiso itholakala kuphela ngenxa yokuthi uJesu wafa ukufa komhlatshelo, wavuswa futhi “ungakwesokunene sikaNkulunkulu,” enegunya kwabaphilayo nabafileyo. Ubhapathizo olusekelwe okholweni olunjalo yilona olufana ‘nokuthwalwa ngokuphepha emanzini kwemiphefumulo eyisishiyagalombili.’
4:6—Obani ‘abafileyo izindaba ezinhle ezamenyezelwa’ kubo? Laba yilabo ‘ababefile eziphambekweni nasezonweni zabo,’ noma ababefile ngokomoya, ngaphambi kokuba bezwe izindaba ezinhle. (Efe. 2:1) Nokho, ngemva kokuba nokholo ezindabeni ezinhle baqala ‘ukuphila’ ngokomoya.
Izifundo Esizitholayo:
1:7. Ukuze ukholo lwethu lube olwenani eliphakeme kakhulu, kumelwe luhlolwe noma luvivinywe. Ukholo olunjalo oluqinile ‘luyawulonda ngempela umphefumulo.’ (Heb. 10:39) Akumelwe sihlehlele emuva lapho ukholo lwethu luvivinywa.
1:10-12. Izingelosi zazifisa ukubona nokuqonda amaqiniso angokomoya ajulile abhalwa abaprofethi bakaNkulunkulu basendulo aphathelene nebandla lamaKristu agcotshiwe. Nokho, lezi zinto zacaca kuphela lapho uJehova eqala ukusebenzelana nalelo bandla. (Efe. 3:10) Akufanele yini silingise isibonelo sezingelosi futhi silwele ukuhlola “ezintweni ezijulile zikaNkulunkulu”?—1 Kor. 2:10.
2:21. Silingisa iSibonelo sethu, uJesu Kristu, kufanele sizimisele ukuhlupheka kuze kube seqophelweni lokufa ukuze sisekele ubukhosi bukaJehova.
5:6, 7. Lapho siphonsa izinkathazo zethu kuJehova, uyasisiza ukuba siqhubeke sibeka kuqala ukukhulekela kweqiniso kunokuba sikhathazeke ngokungadingekile ngalokho usuku olulandelayo olungase lusiphathele khona.—Math. 6:33, 34.
“USUKU LUKAJEHOVA LUYOFIKA”
UPetru uyabhala: “Isiprofetho asikaze silethwe ngentando yomuntu, kodwa abantu bakhuluma okuvela kuNkulunkulu ngoba babeqhutshwa umoya ongcwele.” Ukunaka izwi lesiprofetho kungasivikela ‘kubafundisi bamanga’ nakwabanye abantu abonakalisayo.—2 Pet. 1:21; 2:1-3.
UPetru uyaxwayisa: “Ezinsukwini zokugcina kuyofika abahleki bosulu nokuhleka kwabo usulu.” Kodwa “usuku lukaJehova luyofika njengesela.” UPetru uphetha incwadi yakhe ngeseluleko esinenzuzo kulabo ‘abalindele futhi abakukhumbula njalo ukufika kosuku lukaJehova.’—2 Pet. 3:3, 10-12.
Izimpendulo Zemibuzo YemiBhalo
1:19—Ubani “ikhwezi,” uphuma nini, futhi sazi kanjani ukuthi lokhu kuye kwenzeka? “Ikhwezi” nguJesu Kristu esemandleni oMbuso. (IsAm. 22:16) Ngo-1914, uJesu waphuma ngaphambi kwayo yonke indalo njengeNkosi enguMesiya, ememezela ukuntwela kosuku olusha. Ukuguqulwa kwakhe isimo kwanikeza amazwibela enkazimulo namandla akhe oMbuso, kwagcizelela nokuthi izwi likaNkulunkulu lesiprofetho lithembekile. Ukulinaka leli zwi kukhanyisa izinhliziyo zethu, kusenze siqaphele ukuthi iKhwezi liphumile.
2:4—Iyini ‘iThartharusi,’ futhi izingelosi ezivukelayo zaphonswa nini khona? IThartharusi iyisimo esifana netilongo lapho kuphonswa khona kuphela izidalwa zomoya—hhayi abantu. Yisimo sobumnyama obukhulu bengqondo ngokuphathelene nezinjongo zikaNkulunkulu ezikhazimulayo. Labo abaseThartharusi abanalo ithemba lekusasa. UNkulunkulu waphonsa izingelosi ezingalaleli eThartharusi ngosuku lukaNowa, futhi ziyohlala zikuleso simo esithotshisiwe kuze kube yilapho zibhujiswa.
3:17—UPetru wayekhuluma ngani lapho ethi, baba ‘nolwazi kusengaphambili’? Wayekhuluma ngolwazi lwezenzakalo zesikhathi esizayo yena nabanye abalobi beBhayibheli abaluthola kusengaphambili ngokuphefumulelwa. Njengoba lolu kwakungelona ulwazi olugcwele, ukuba nalo akuzange kwenze amaKristu ekhulu lokuqala azi yonke imininingwane ngezenzakalo zesikhathi esizayo. Azi kuphela umqondo oyisisekelo walokho ayengakulindela.
Izifundo Esizitholayo:
1:2, 5-7. Ngaphezu kokusisiza ukuba sandise ‘ulwazi olunembile ngoNkulunkulu nangoJesu,’ ukuzikhandla kwethu ekuhlakuleleni izimfanelo ezinjengokholo, ukukhuthazela nokuzinikela kokuhlonipha uNkulunkulu ‘kungasenza singabi abangasebenzi noma abangatheli’ ngokuqondene nalolo lwazi.—2 Pet. 1:8.
1:12-15. Ukuze siqhubeke ‘simi siqinile eqinisweni,’ sizidinga njalo izikhumbuzo, njengalezo esizithola ngemihlangano yethu yebandla, isifundo somuntu siqu nangokufunda iBhayibheli.
2:2. Kufanele siqaphele ukuba ukuziphatha kwethu kungalethi isihlamba kuJehova nasenhlanganweni yakhe.—Roma 2:24.
2:4-9. Sicabanga ngalokho aye akwenza esikhathini esidlule, singaqiniseka ukuthi “uJehova uyayazi indlela yokukhulula ekulingweni abantu abanokuzinikela kokuhlonipha uNkulunkulu, kodwa agcinele abantu abangalungile usuku lokwahlulelwa ukuze banqunywe.”
2:10-13. Nakuba “abakhazimulayo,” okungukuthi, abadala abangamaKristu, benamaphutha futhi bengase baphambuke ngezinye izikhathi, akumelwe sikhulume kabi ngabo.—Heb. 13:7, 17.
3:2-4, 12. Ukunakisisa “amazwi akhulunywa ngaphambili abaprofethi abangcwele nomyalo weNkosi noMsindisi” kuyosisiza ukuba sihlale sikukhumbula njalo ukuba seduze kosuku lukaJehova.
3:11-14. Njengabantu ‘abalindele futhi abakukhumbula njalo ukufika kosuku lukaJehova,’ kumelwe (1) ‘sibe ngcwele ekuziphatheni,’ sihlale sihlanzekile emzimbeni, engqondweni, ngokokuziphatha nangokomoya; (2) sivame emisebenzini ebonisa ‘ukuzinikela kokuhlonipha uNkulunkulu,’ njengaleyo ehlobene nomsebenzi wokushumayela ngoMbuso nokwenza abafundi; (3) sigcine ukuziphatha nobuntu bethu ‘kungenabala,’ kungonakalisiwe izwe; (4) sibe ‘abangenasici,’ senze zonke izinto ngesisusa esihlanzekile; futhi (5) sibe “sekuthuleni”—sibe nokuthula noNkulunkulu, nabafowethu abangamaKristu kanye nabanye abantu.