Ungakhuthazela Kanjani Enkonzweni?
WAKE wazizwa yini ucobekile waze wafuna ukuyeka ukushumayela? Ukuphikiswa okukhulu, ukukhathazeka, impilo ebuthaka, ukucindezela kontanga noma ukungabi khona kwemiphumela ebonakalayo kungavivinya ukukhuthazela kwethu. Nokho, cabanga ngesibonelo sikaJesu. Wakhuthazelela uvivinyo olunzima kunalo lonke “ngenxa yenjabulo eyayibekwe phambi kwakhe.” (Heb. 12:2) Wayazi ukuthi ngokubonisa ukuthi izinsolo ezabekwa uNkulunkulu zazingamanga aluhlaza, wayejabulisa inhliziyo kaJehova.—IzAga 27:11.
Ngokukhuthazela enkonzweni, nawe ungajabulisa inhliziyo kaJehova. Nokho, kumelwe wenzeni uma ezinye zezithiyo zibonakala zikuqeda amandla ngokomoya? UKrystyna osekhulile futhi onempilo ebuthaka, uyavuma: “Kuvamile ukuba ngizizwe ngikhathele futhi ngidangele. Izinkinga zami ezihlobene nokukhula, njengempilo ebuthaka nokukhathazeka ngokuphila kwansuku zonke, ziye zinciphise intshiseko yami okwesikhashana.” Ungakhuthazela kanjani enkonzweni naphezu kwezithiyo ezinjalo?
Lingisa Abaprofethi
Ukuze baphikelele emsebenzini wokushumayela, abamemezeli boMbuso abathembekile bangalwela ukuba nesimo sengqondo esifana nesabaprofethi basendulo. Cabanga ngesibonelo sikaJeremiya. Lapho ebizwa ukuba azokhonza njengomprofethi, waqale waba madolo-nzima. Kodwa wakwazi ukukhuthazelela isabelo sakhe esinzima iminyaka engaphezu kwengu-40 ngoba wafunda ukuthembela kuNkulunkulu ngokuphelele.—Jer. 1:6; 20:7-11.
UHenryk ukhuthazwa isibonelo sikaJeremiya. Uthi: “Kule minyaka engaphezu kwengu-70 ngisenkonzweni, kuye kwaba nezikhathi lapho ukusabela kwabantu kuye kwangenza ngadangala—inzondo noma ukungabi nandaba kwabo. Ngalezo zikhathi, ngiye ngikhumbule isibonelo sikaJeremiya. Uthando lwakhe ngoJehova nengokomoya lakhe eliqinile lamnika amandla okuqhubeka nokuprofetha.” (Jer. 1:17) URafal naye uye wakhuthazwa isibonelo sikaJeremiya. Uthi: “Kunokugxila kuye noma endleleni ayezizwa ngayo, uJeremiya wathembela kuNkulunkulu. Waqhubeka ngesibindi nomsebenzi wakhe naphezu kobutha obabudlangile. Ngizama ukuhlale ngikukhumbula lokho.”
U-Isaya ungomunye umprofethi oyisibonelo esisiza abaningi ukuba bakhuthazele enkonzweni. UNkulunkulu wamtshela ukuthi abantu ayephila nabo babengeke bamlalele. UJehova wathi: “Yenza inhliziyo yalaba bantu ibe lukhuni, wenze izindlebe zabo zingasabeli.” Ingabe u-Isaya wayengeke aphumelele? Akunjalo, ngokombono kaNkulunkulu. Lapho ethunywa njengomprofethi, wathi: “Nangu mina! Thuma mina.” (Isaya 6:8-10) U-Isaya waqinisela esabelweni sakhe. Ingabe usabela ngendlela efanayo emyalweni wokushumayela?
Ukuze siphikelele enkonzweni nakuba abantu bengasabeli, kudingeka sigweme ukugxila endleleni embi abasabela ngayo, njengoba kwenza u-Isaya. URafal unqoba ukudangala ngale ndlela: “Ngizama ukungagxili emazwini angenamusa ashiwo abantu. Abantu abasensimini yethu banelungelo lokusabela nganoma iyiphi indlela abayifunayo.” U-Anna uyanezela: “Angiyivumeli ingqondo yami ukuba icabange nganoma yini engakhi noma edumazayo. Okungenza ngikwazi ukwenza lokhu umthandazo nokuthatha itekisi losuku ngaphambi kokuya enkonzweni yasensimini. Noma imiphi imicabango engakhi isheshe inyamalale.”
Umprofethi uHezekeli wakhonza phakathi kwamaJuda anenkani ayethunjelwe eBhabhiloni. (Hez. 2:6) Ukube lo mprofethi wabagodlela abantu amazwi kaNkulunkulu futhi othile omubi wafa ngenxa yokungaxwayiswa, uHezekeli wayeyolandisa ngalokho. UJehova watshela uHezekeli: “Igazi lakhe ngiyolibiza esandleni sakho.”—Hez. 3:17, 18.
UHenryk uzama ukuba nesimo sengqondo esinjengesikaHezekeli: “Ngifuna ukuba msulwa egazini labo bonke abantu. Ukuphila kwabantu okuyigugu kusengozini.” (IzE. 20:26, 27) UZbigniew uzizwa ngendlela efanayo: “UHezekeli kwakudingeka aqhubeke nomsebenzi wakhe kungakhathaliseki ukuthi abanye babecabangani. Lokhu kungisiza ukuba ngibe nombono onjengowoMdali ngomsebenzi wokushumayela.”
Awuwedwa
Lapho usemsebenzini wokushumayela usuke ungewedwa. Njengomphostoli uPawulu, singathi: “Siyizisebenzi ezikanye noNkulunkulu.” (1 Kor. 3:9) UKrystyna, ovumayo ukuthi ngezikhathi ezithile uyadangala, uthi: “Yingakho ngihlale ngicela kuJehova amandla. Akakaze angidumaze.” Yebo, siyawudinga umoya kaNkulunkulu ukuze usisekele enkonzweni yethu!—Zak. 4:6.
Lapho sisenkonzweni yasensimini, umoya ongcwele usisiza nokuba sibonise “izithelo zomoya.” (Gal. 5:22, 23) Lokho kube sekusisiza ukuba siphikelele emsebenzini wokushumayela, kungakhathaliseki ukuthi kwenzekani. UHenryk uthi: “Ukuba senkonzweni yasensimini kungisiza ukuba ngilungise ubuntu bami. Ngifunda ukubekezela, ukucabangela nokungayeki kalula.” Ukukhuthazela enkonzweni naphezu kwezithiyo ezihlukahlukene kungakusiza ukuba uhlakulele izithelo zomoya ngobuningi.
UJehova uqondisa lo msebenzi oyingqayizivele ngezingelosi zakhe. (IsAm. 14:6) IBhayibheli lembula ukuthi kunezidalwa zomoya ‘ezingamashumi ezinkulungwane aphindwe ngamashumi ezinkulungwane nezinkulungwane zezinkulungwane.’ (IsAm. 5:11) UJesu uqondisa lezi zingelosi ukuba zisekele izinceku zikaNkulunkulu emhlabeni. Ingabe uhlale ukukhumbula lokho lapho usenkonzweni?
U-Anna uthi: “Ukuzindla ngeqiniso lokuthi sinezingelosi enkonzweni kuwumthombo wesikhuthazo kimi. Ngiyalwazisa usizo ezilunikezayo ziqondiswa uJehova noJesu.” Yeka ukuthi kuyilungelo elingakanani ukusebenza nezingelosi ezithembekile!
Ukusebenza nabanye abamemezeli boMbuso kungasisiza kanjani ukuba sikhuthazele? Siye sabusiswa ngokuba nobudlelwane nesixuku esikhulu soFakazi abathembekile. Akungatshazwa ukuthi uye wakubona ukuba yiqiniso kwalesi saga seBhayibheli: “Insimbi ilolwa ngensimbi. Ngakho umuntu ulola ubuso bomunye.”—IzAga 27:17.
Ukusebenza nabanye enkonzweni kusinika ithuba eliyingqayizivele lokubona izindlela ezisebenzayo okungenzeka sasingazijwayele. U-Elżbieta uthi: “Ukusebenza nabamemezeli abahlukahlukene kunginika amathuba okubonisa uthando kwamanye amakholwa nakubantu esihlangana nabo.” Zama ukuhamba nabamemezeli abahlukahlukene enkonzweni. Lokho kuzokwenza inkonzo yakho ithakazelise.
Zinakekele
Ukuze sihlale sishiseka enkonzweni, kumelwe sihlele kahle, sibe nesimiso esihle sesifundo somuntu siqu futhi siphumule ngokwanele. Ngamanye amazwi, kufanele sizinakekele ngokomoya nangokwenyama.
IBhayibheli lithi: “Ngokuqinisekile amacebo okhuthele ayamzuzisa.” (IzAga 21:5) UZygmunt, manje oneminyaka engu-88 ubudala, uthi: “Ukwenza inkonzo yami ngendlela ehlelekile kungisiza ukuba ngihlale nginenjongo. Ngisihlela ngokucophelela isikhathi sami ukuze ngibe nesikhathi esanele sokushumayela.”
Ukuyazi kahle imiBhalo kuyasiqinisa futhi kusihlomisele inkonzo. Njengoba nje kudingeka sidle ukuze siphile, kumelwe sizondle njalo ngokudla okungokomoya ukuze siqhubeke sihlanganyela emsebenzini wokushumayela. Ukuzondla nsuku zonke ngeZwi likaNkulunkulu nokudla “ngesikhathi esifanele” kungasinika amandla enkonzweni.—Math. 24:45-47.
U-Elżbieta wenza izinguquko ezinkulu ekuphileni kwakhe ukuze athuthukise inkonzo yakhe. Uthi: “Ngiye ngasinciphisa kakhulu isikhathi engisichitha ngibuka ithelevishini ukuze ngibe nesikhathi esengeziwe sokulungiselela inkonzo. Lapho ngifunda iBhayibheli njalo kusihlwa, ngiye ngicabange ngabantu engihlangane nabo ensimini. Ngiye ngibheke imiBhalo nezihloko ezingase zibasize.”
Ukuphumula ngokwanele kuyokusiza ukuba ungasheshi ukhathale futhi kungakwenza ukwazi ukuhlanganyela ngokugcwele enkonzweni. Ngakolunye uhlangothi, ukuzijabulisa ngokweqile kungalehlisa izinga lenkonzo yakho. U-Andrzej, ummemezeli oshisekayo, uyaphawula: “Ukungaphumuli ngokwanele kukwenza ukhathale kakhulu futhi uma usukhathele kakhulu kulula ukufikelwa ukudangala. Ngenza konke engingakwenza ukuze ngigweme lokhu.”—UmSh. 4:6.
Naphezu kwemizamo yethu eqotho, bambalwa kakhulu abantu abamukela izindaba ezinhle. Nokho, uJehova akasoze awukhohlwa umsebenzi wethu. (Heb. 6:10) Ngisho noma abaningi bengafuni ukukhuluma nathi, bangase bakhulume ngathi ngemva kokuba sihambile. Umphumela ungafana ngandlela-thile nalokho okwashiwo ngokuqondene noHezekeli: Abantu “bazokwazi ngokuqinisekile ukuthi umprofethi ubekhona phakathi kwabo.” (Hez. 2:5) Yiqiniso, inkonzo yethu ayilula kodwa izuzisa thina nabantu abasilalelayo.
UZygmunt uyaphawula: “Ukuhlanganyela enkonzweni kusisiza ukuba sigqoke ubuntu obusha nokuba sibonise uthando ngoNkulunkulu nangomakhelwane bethu.” U-Andrzej uyanezela: “Kuyilungelo ukuhlanganyela kulo msebenzi osindisa ukuphila. Awusoze waphindwa ngaleli zinga noma ezimweni ezifana nalezi.” Nawe ungathola izibusiso eziningi ngokukhuthazela enkonzweni namuhla.—2 Kor. 4:1, 2.
[Izithombe ekhasini 31]
Ukuzinakekela ngokomoya nangokwenyama kusisiza sikhuthazele enkonzweni