“Zigcineni Othandweni LukaNkulunkulu”
“Zigcineni othandweni lukaNkulunkulu, nibe nilindele isihe seNkosi yethu uJesu Kristu ninombono wokuphila okuphakade.”—JUDE 21.
1, 2. UJehova uye wabonisa kanjani ukuthi uyasithanda, futhi sazi kanjani ukuthi akamane nje asigcine othandweni lwakhe?
UJEHOVA UNKULUNKULU uye wasibonisa ukuthi uyasithanda ngezindlela eziningi. Nokho, akungabazeki ukuthi ilungiselelo lomhlatshelo wesihlengo liwubufakazi obukhulu kunabo bonke bothando lwakhe. Uthando lwakhe ngesintu lujule kangangokuthi wathumela iNdodana yakhe ayithandayo lapha emhlabeni ukuba izosifela. (Joh. 3:16) UJehova wakwenza lokhu ngoba efuna ukuba siphile phakade futhi sizuze othandweni lwakhe kuze kube phakade!
2 Nokho, ingabe singalokotha sicabange ukuthi uJehova uyomane asigcine othandweni lwakhe kungakhathaliseki ukuthi sikhetha ukwenzani? Cha. Ngoba kuJude 21, sifunda lesi sikhuthazo: “Zigcineni othandweni lukaNkulunkulu, nibe nilindele isihe seNkosi yethu uJesu Kristu ninombono wokuphila okuphakade.” Inkulumo ethi “zigcineni othandweni lukaNkulunkulu” ibonisa ukuthi kudingeka senze okuthile. Yini-ke edingekayo ukuze sihlale sisothandweni lukaNkulunkulu?
Singazigcina Kanjani Othandweni LukaNkulunkulu?
3. UJesu wathi yini okwakudingeka ayenze ukuze ahlale esothandweni lukaYise?
3 Impendulo yalo mbuzo siyithola emazwini kaJesu awasho ngobusuku bakhe bokugcina elapha emhlabeni. Wathi: “Uma nigcina imiyalo yami, niyohlala othandweni lwami, njengoba nje nami ngiye ngagcina imiyalo kaBaba futhi ngihlala othandweni lwakhe.” (Joh. 15:10) Kusobala ukuthi uJesu wayenomuzwa wokuthi kwakudingeka agcine imiyalo kaJehova ukuze ahlale enobuhlobo obuhle noYise. Uma lokho kwakudingeka eNdodaneni kaNkulunkulu ephelele, kangakanani kithina?
4, 5. (a) Iyiphi indlela eyinhloko esingabonisa ngayo ukuthi siyamthanda uJehova? (b) Kungani singenasizathu sokungawujabuleli umqondo wokulalela imiyalo kaJehova?
4 Ngokuyinhloko, sibonisa ukuthi siyamthanda uJehova ngokumlalela. Umphostoli uJohane wakuchaza kanje: “Yilokhu okushiwo uthando ngoNkulunkulu, ukuba sigcine imiyalo yakhe; futhi imiyalo yakhe ayiwona umthwalo.” (1 Joh. 5:3) Kuyavunywa ukuthi ukulalela akuthandeki ezweni lanamuhla. Nokho, phawula le nkulumo: “Imiyalo yakhe ayiwona umthwalo.” UJehova akasiceli ukuba senze into okunzima kakhulu ukuba siyenze.
5 Ngokwesibonelo, ubungamcela yini umngane wakho omkhulu ukuba athwale okuthile owaziyo ukuthi ngeke akwazi nokukuphakamisa? Ubungeke! UJehova usidlula kude ngokuba nomusa futhi ukuqonda kahle kakhulu ukulinganiselwa kwethu. IBhayibheli lisiqinisekisa ngokuthi ‘uyakhumbula ukuthi siluthuli.’ (IHu. 103:14) Akasoze athi asenze into azi kahle ukuthi izosehlula. Ngakho asinasizathu sokungawujabuleli umqondo wokulalela imiyalo kaJehova. Kunalokho, siyaqaphela ukuthi ukulalela kusinika ithuba eliyingqayizivele lokubonisa uBaba wethu osezulwini ukuthi simthanda ngempela nokuthi sifuna ukuhlala othandweni lwakhe.
Isipho Esikhethekile Esivela KuJehova
6, 7. (a) Uyini unembeza? (b) Fanekisa ukuthi unembeza ungasisiza kanjani ukuba sihlale othandweni lukaNkulunkulu.
6 Kuleli zwe eliyinkimbinkimbi, kunezinqumo eziningi okudingeka sizenze ezihilela ukulalela kwethu uNkulunkulu. Singaqiniseka kanjani ukuthi lezi zinqumo zivumelana nentando kaNkulunkulu? UJehova uye wasinikeza isipho esingasisiza kakhulu kule ndaba yokulalela. Lesi sipho unembeza. Uyini unembeza? Uyikhono elikhethekile lokukwazi ukuzihlola. Unjengomahluleli wangaphakathi, osenza sikwazi ukubheka izinqumo okumelwe sizenze ekuphileni noma ukucabanga ngezenzo esesizenzile futhi usho ukuthi zilungile noma azilungile, zinhle noma zimbi.—Funda amaRoma 2:14, 15.
7 Singawusebenzisa kanjani unembeza wethu ngendlela enenzuzo? Cabanga ngalo mfanekiso. Umuntu othile udabula ihlane elikhulu ngezinyawo. Akunazindlela, akunamigwaqo futhi akunazimpawu. Kodwa, uyaqhubeka nohambo lwakhe. Kanjani? Usebenzisa ikhampasi. Ikhampasi inobuso obunjengewashi obunezinhlangothi ezine eziyinhloko nenaliti enozibuthe ekhombe enyakatho. Ngaphandle kwekhampasi, lo muntu ubezolahleka aze ancame. Ngokufanayo, ezikhathini eziningi umuntu ongenawo unembeza angakhungatheka ngokuphelele lapho ezama ukwenza izinqumo zokuziphatha nezilungile ekuphileni.
8, 9. (a) Ikuphi ukulinganiselwa kukanembeza wethu okudingeka sihlale sikukhumbula? (b) Yini esingayenza ukuze unembeza wethu uhlale uwusizo ngempela kithi?
8 Nokho, njengekhampasi, unembeza ulinganiselwe. Uma lo muntu odabula ehlane engase abeke ikhampasi eceleni kukazibuthe, inaliti ngeke isakhomba enyakatho. Ngokufanayo, uma singavumela izifiso zenhliziyo yethu zisilawule, yini engenzeka? Ukuthambekela kwethu kobugovu kungawusonta unembeza wethu. IBhayibheli lisixwayisa ngokuthi “inhliziyo ikhohlisa ngaphezu kwanoma yini enye futhi yenza ngokuphelelwa yithemba.” (Jer. 17:9; IzAga 4:23) Ngaphezu kwalokho, uma lo muntu engenalo ibalazwe elinembile, ikhampasi yakhe ngeke imsize kangako. Ngokufanayo, uma singenciki esiqondisweni esinokwethenjelwa nesingaguquki seZwi likaNkulunkulu, iBhayibheli, cishe unembeza wethu ungase ungasisizi ngalutho. (IHu. 119:105) Kuyadabukisa ukuthi abantu abaningi kuleli zwe bavumela izifiso zezinhliziyo zabo zibalawule kuyilapho bengazinaki izindinganiso eziseZwini likaNkulunkulu. (Funda eyabase-Efesu 4:17-19.) Yingakho abantu abaningi benza izinto ezinyantisayo, nakuba benawo unembeza.—1 Thim. 4:2.
9 Kufanele sizimisele ukungalokothi sifane nabo! Kunalokho, masiqhubeke sivumela iZwi likaNkulunkulu lifundise futhi liqeqeshe unembeza wethu ukuze usisize ngempela. Kudingeka silalele unembeza wethu oqeqeshwe ngeBhayibheli kunokuba silawulwe izifiso zethu zobugovu. Ngesikhathi esifanayo, kufanele silwele ukuhlonipha onembeza babafowethu nodadewethu esibathandayo. Senza konke esingakwenza ukuze sigweme ukubakhubekisa, sikhumbula ukuthi unembeza wabafowethu kungenzeka ukuthi usheshe uzwele kunowethu.—1 Kor. 8:12; 2 Kor. 4:2; 1 Pet. 3:16.
10. Iziphi izindlela ezintathu esizoxoxa ngazo manje?
10 Manje ake sixoxe ngezindlela ezintathu esingabonisa ngazo uthando lwethu ngoJehova ngokumlalela. Yiqiniso ukuthi unembeza uyoba nengxenye endleleni ngayinye, kodwa kubaluleke kakhulu ukuba ngokuyinhloko uqondiswe izindinganiso zokuziphatha eziphefumulelwe zeBhayibheli. Izindlela ezintathu esilalela ngazo uJehova ngothando yilezi: (1) Sithanda labo abathandwa uJehova, (2) sihlonipha igunya (3) futhi silwela ukuhlale sihlanzekile emehlweni kaNkulunkulu.
Thanda Labo Abathandwa UJehova
11. Kungani kufanele sithande labo abathandwa uJehova?
11 Okokuqala, kumelwe sithande labo abathandwa uJehova. Endabeni yabangane, abantu bafana neziponji. Sithambekele ekumunceni noma yini esizungezile. UMdali wethu wazi kahle ukuthi abangane bangaba yingozi kangakanani noma babe usizo kangakanani—kubantu abangaphelele. Ngakho, usinikeza lesi seluleko esihlakaniphile: “Ohamba nabahlakaniphile uyohlakanipha, kodwa osebenzelana neziphukuphuku kuyomhambela kabi.” (IzAga 13:20; 1 Kor. 15:33) Akekho kithi ofuna ‘kumhambele kabi.’ Ngamunye wethu ufuna ‘ukuhlakanipha.’ Akekho umuntu ongenza uJehova ahlakaniphe ngaphezu kwalokho ayikho, futhi akekho umuntu ongamonakalisa. Kodwa usibekela isibonelo esihle endabeni yabangane. Cabanga nje—ibaphi abantu abangaphelele uJehova abakhetha ukuba babe abangane bakhe?
12. Hlobo luni lwabantu uJehova abakhetha ukuba babe abangane bakhe?
12 UJehova wabiza inzalamizi engu-Abrahama ngokuthi “umngane wami.” (Isaya 41:8) Le ndoda yayithembeke ngendlela ephawulekayo, ilungile futhi ilalela—indoda yokholo. (Jak. 2:21-23) UJehova ukhetha abantu abanjalo ukuba babe abangane bakhe. Nanamuhla ukhetha abangane abanjalo. Uma uJehova ekhetha abangane abanjalo, akubalulekile yini nangathi ukuba sikhethe kahle, sihambe nabahlakaniphileyo ukuze nathi sihlakaniphe?
13. Endabeni yokukhetha abangane, yini engasisiza ukuba sikhethe kahle?
13 Yini engakusiza ukuba ukhethe kahle kule ndaba? Ukutadisha izibonelo eziseBhayibhelini kungaba okukhuthazayo. Cabanga ngobungane obabuphakathi kukaRuthe noninazala uNawomi, ubungane bukaDavide noJonathani noma obabuphakathi kukaThimothewu noPawulu. (Ruthe 1:16, 17; 1 Sam. 23:16-18; Fil. 2:19-22) Isizathu esiyinhloko sokuphumelela kwalobu bungane ukuthi babusekelwe othandweni lweqiniso ngoJehova. Ungabathola yini abangane abathanda uJehova njengawe? Qiniseka ukuthi ebandleni lobuKristu ungathola abangane abaningi abanjalo. Labo bangane ngeke bakulimaze ngokomoya. Kunalokho, bayokusiza ukuba ulalele uJehova, uthuthuke ngokomoya futhi uhlwanyele unombono womoya. (Funda eyabaseGalathiya 6:7, 8.) Bayokusiza ukuba uhlale othandweni lukaNkulunkulu.
Hlonipha Igunya
14. Iziphi izici ezivame ukukwenza kube nzima ukuba sihloniphe igunya?
14 Indlela yesibili esibonisa ngayo uthando lwethu ngoJehova ihilela igunya. Kumelwe sihloniphe igunya. Kungani lokhu kunzima kangaka ngezinye izikhathi? Okokuqala nje, abantu abasezikhundleni abaphelele. Ngaphezu kwalokho, nathi asiphelele. Silwa nokuthambekela kokuvukela igunya esizalwa nakho.
15, 16. (a) Kungani kubalulekile ukuba sihloniphe labo uJehova abaphathise umthwalo wemfanelo wokunakekela abantu bakhe? (b) Isiphi isifundo esiwusizo esisithola endleleni uJehova abheka ngayo ukuvukela kwama-Israyeli uMose?
15 Ngakho, ungase uzibuze, ‘Uma kunzima kangaka ngathi ukuhlonipha igunya, kungani kudingeka silihloniphe?’ Ngokuyisisekelo impendulo ihilela impikiswano yobukhosi. Ubani oyomkhetha njengombusi wakho? Uma sikhetha uJehova njengoMbusi wethu, kudingeka sihloniphe igunya lakhe. Uma singakwenzi lokho, ingabe singambiza kufanele ngokuthi unguMbusi wethu? Ngaphezu kwalokho, ngokuvamile uJehova usebenzisa igunya lakhe ngabantu abangaphelele abaphathise umthwalo wemfanelo wokunakekela abantu bakhe. Uma sibavukela labo bantu, uJehova uyozibheka kanjani izenzo zethu?—Funda eyoku-1 Thesalonika 5:12, 13.
16 Ngokwesibonelo, lapho ama-Israyeli ekhononda futhi evukela uMose, uJehova wabheka lezo zenzo zawo njengokungathi avukela yena. (Num. 14:26, 27) UNkulunkulu akakashintshi. Uma singake sivukele abantu abaphathise igunya, siyobe sivukela yena!
17. Isiphi isimo sengqondo okufanele silwele ukusihlakulela ngalabo abanomthwalo wemfanelo ebandleni?
17 Umphostoli uPawulu wembula isimo sengqondo okufanele sisihlakulele ngalabo abanomthwalo wemfanelo ebandleni lobuKristu. Wabhala: “Lalelani abaholayo phakathi kwenu futhi nizithobe, ngoba baqapha imiphefumulo yenu njengabayolandisa; ukuze lokhu bakwenze ngenjabulo hhayi ngokububula, ngoba lokhu bekuyonilimaza.” (Heb. 13:17) Kuyavunywa ukuthi kudinga umzamo wangempela ukuhlakulela leso simo sengqondo sokulalela nokuzithoba. Nokho, khumbula ukuthi silwela ukuhlala othandweni lukaNkulunkulu. Akufanele yini senze konke okusemandleni ukuze siwufinyelele lo mgomo?
Hlale Uhlanzekile Emehlweni kaJehova
18. Kungani uJehova efuna ukuba sihlale sihlanzekile?
18 Indlela yesithathu esibonisa ngayo uthando lwethu ngoJehova iwukulwela ukuhlale sihlanzekile emehlweni akhe. Ngokuvamile abazali bayazikhandla ukuze baqiniseke ukuthi abantwana babo bahlanzekile. Ngani? Ngoba, okokuqala, ukuhlanzeka kubalulekile empilweni nasenhlalakahleni yomntwana. Ngaphezu kwalokho, umntwana ohlanzekile uwumelela kahle umkhaya wakubo, ubonisa ukuthi abazali bakhe bayamthanda futhi bayamnakekela. Ngezizathu ezifanayo, uJehova ufuna ukuba sihlanzeke. Uyazi ukuthi ukuhlanzeka kubalulekile enhlalakahleni yethu. Wazi nokuthi uma sihlanzekile simmelela kahle njengoBaba wethu osezulwini. Lokhu kubaluleke kakhulu, ngoba abantu bangase badonseleke kuNkulunkulu esimkhonzayo ngoba bephawula indlela esihluke ngayo kubantu baleli zwe elingcolile.
19. Sazi kanjani ukuthi inhlanzeko ibalulekile?
19 Iziphi izici okudingeka sihlale sihlanzekile kuzo? Empeleni kuzo zonke izici. Kwa-Israyeli wasendulo, uJehova wakwenza kwacaca kubantu bakhe ukuthi inhlanzeko yayibaluleke kakhulu. (Lev. 15:31) UMthetho KaMose wakhuluma ngezinto ezinjengokugqiba indle, ukugeza izitsha, izandla, izinyawo nezingubo. (Eks. 30:17-21; Lev. 11:32; Num. 19:17-20; Dut. 23:13, 14) Ama-Israyeli akhunjuzwa ukuthi uNkulunkulu wawo, uJehova, ungcwele—okusho “ukuhlanzeka” ‘nobumsulwa.’ Izinceku zikaNkulunkulu ongcwele nazo kudingeka zibe ngcwele.—Funda uLevitikusi 11:44, 45.
20. Iziphi izici okudingeka sihlale sihlanzekile kuzo?
20 Ngakho-ke, kudingeka ukuba sihlanzeke ngaphakathi nangaphandle. Silwela ukugcina imicabango yethu ihlanzekile. Sinamathela ngokwethembeka ezindinganisweni zikaJehova zokuhlanzeka ngokokuziphatha, kungakhathaliseki ukuthi leli zwe elisizungezile lingcole kangakanani ngokobulili. Okubaluleke kunakho konke, silwela ukugcina ukukhulekela kwethu kuhlanzekile, sigweme noma ikuphi ukungcoliswa inkolo yamanga. Sihlale sikhumbula isixwayiso esiphefumulelwe esiku-Isaya 52:11: “Sukani, sukani, phumani lapho, ningathinti lutho olungcolile; phumani phakathi kwalo, zigcineni nihlanzekile.” Namuhla sihlale sihlanzekile ngokomoya ngokungathinti noma yini uBaba wethu osezulwini ayibheka njengengahlanzekile ngomqondo ongokomoya. Ngokwesibonelo, yingakho siqikelela ukuba sigweme imikhosi namaholidi enkolo yamanga athandwa kakhulu kuleli zwe lanamuhla. Yiqiniso, kuyinselele ukuhlale sihlanzekile. Kodwa abantu bakaJehova balwela ukwenza kanjalo ngoba lokhu kubasiza ukuba bahlale othandweni lukaNkulunkulu.
21. Singaqiniseka kanjani ukuthi siyohlale sisothandweni lukaNkulunkulu?
21 UJehova ufuna sihlale othandweni lwakhe kuze kube phakade. Kodwa sonke ngothi lwethu kudingeka siqinisekise ukuthi senza konke esingakwenza ukuze sihlale othandweni lukaNkulunkulu. Lokhu singakwenza ngokulingisa isibonelo sikaJesu nangokubonisa uJehova ukuthi siyamthanda ngokulalela imiyalo yakhe. Uma senza kanjalo, singaqiniseka ngokuthi akukho lutho ‘oluyosihlukanisa nothando lukaNkulunkulu olukuKristu Jesu iNkosi yethu.’—Roma 8:38, 39.
Ingabe Uyakhumbula?
• Unembeza wethu ungasisiza kanjani ukuba sihlale othandweni lukaNkulunkulu?
• Kungani kufanele sithande labo abathandwa uJehova?
• Kungani kubalulekile ukuhlonipha igunya?
• Ukuhlanzeka kubaluleke kangakanani kubantu bakaNkulunkulu?
[Ibhokisi/Isithombe ekhasini 20]
INCWADI EKHUTHAZA UKUZIPHATHA OKUHLE
Emhlanganweni wesigodi ka-2008/2009 kwakhululwa incwadi enamakhasi angu-224 enesihloko esithi “Zigcineni Othandweni LukaNkulunkulu.” Iyini injongo yale ncwadi entsha? Iklanyelwe ukusiza amaKristu ukuba azi izindinganiso zikaJehova futhi azithande, njengoba ngokuyinhloko igxila ekuziphatheni kobuKristu. Ukuyitadisha ngokucophelela le ncwadi kuyosenza siqiniseke ngokwengeziwe ukuthi ukuphila ngokuvumelana nezindinganiso zikaJehova kuyindlela engcono kakhulu yokuphila manje futhi kuholela ekuphileni okuphakade esikhathini esizayo.
Ngaphezu kwalokho, le ncwadi iklanyelwe ukusisiza ukuba sibone ukuthi ukulalela uJehova akuwona umthwalo. Ngokuphambene nalokho, kuyindlela yokubonisa uJehova ukuthi simthanda kangakanani. Ngakho, le ncwadi iyosishukumisela ukuba sizibuze, ‘Kungani ngilalela uJehova?’
Lapho abathile benza iphutha elibuhlungu lokusuka othandweni lukaJehova, ngokuvamile inkinga isuke isekuziphatheni, hhayi emfundisweni ethile. Yeka ukuthi kubaluleke kangakanani-ke ukuba siqinise uthando lwethu nokwazisa esinakho ngemithetho kaJehova nezimiso zakhe ezisiqondisayo ekuphileni kwethu kwansuku zonke! Siyaqiniseka ukuthi le ncwadi entsha iyosiza izimvu zikaJehova emhlabeni wonke ukuba zikumelele ngokuqinile okulungile, zibonise uSathane engumqambimanga futhi ngaphezu kwakho konke zizigcine othandweni lukaNkulunkulu!—Jude 21.
[Isithombe ekhasini 18]
“Uma nigcina imiyalo yami, niyohlala othandweni lwami, njengoba nje nami ngiye ngagcina imiyalo kaBaba futhi ngihlala othandweni lwakhe”