Lokho Esikufunda KuJesu

Ngokuphila Komndeni

Yimuphi umbono ngomshado owenza umndeni ujabule?

Umshado uyisibopho esingcwele. Lapho ebuzwa ukuthi kulungile yini ukudivosa, uJesu wathi: “Anifundanga yini ukuthi lowo owabadala kusukela ekuqaleni wabenza kwaba owesilisa nowesifazane, wathi, ‘Ngenxa yalesi sizathu indoda iyoshiya uyise nonina inamathele kumkayo, futhi laba ababili bayoba nyamanye’? Ngakho abasebabili, kodwa sebenyamanye. Ngakho-ke, lokho uNkulunkulu akubophele ndawonye makungahlukaniswa muntu. . . . Noma ubani ohlukanisa nomkakhe, ngaphandle kwesizathu sobufebe, ashade nomunye, uyaphinga.” (Mathewu 19:4-6, 9) Lapho abantu abashadile belalela iseluleko sikaJesu futhi bethembekile komunye nomunye, bonke ekhaya bazizwa belondekile futhi bejabule.

Kungani uthando ngoNkulunkulu lwenza imindeni ijabule?

UJesu wathi: “‘Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho.’ Lona ngumyalo omkhulu kunayo yonke futhi ungowokuqala.” Uthini umyalo wesibili omkhulu? UJesu wathi: “Kumelwe uthande umakhelwane wakho [kuhlanganise nalabo ohlala nabo ekhaya] njengoba uzithanda wena.” (Mathewu 22:37-39) Ngakho-ke, isihluthulelo senjabulo ekhaya siwukuba nobuhlobo obuhle noNkulunkulu ngoba ukumthanda kwenza sithandane.

Indoda nomfazi bangajabulisana kanjani?

Amadoda ajabulisa omkawo lapho elandela isibonelo sikaJesu. Wayelithanda ngokujulile ibandla, umkakhe ongokomfanekiso. (Efesu 5:25) Wathi: ‘INdodana yomuntu ayizelanga ukukhonzwa, kodwa ukukhonza.’ (Mathewu 20:28) UJesu wayengeyena undlovu kayiphikiswa noma umuntu onokhahlo kulabo ababengaphansi kwakhe kodwa wayeqabula. (Mathewu 11:28) Ngakho amadoda kufanele asebenzise igunya lawo ngendlela enomusa ezuzisa bonke ekhaya.

Abafazi nabo bangazuza esibonelweni sikaJesu. IBhayibheli lithi ‘inhloko kaKristu nguNkulunkulu.’ Liphinde lithi “inhloko yowesifazane yindoda.” (1 Korinte 11:3) UJesu akazange abone sengathi kuyamehlisa ukuthobela igunya likaNkulunkulu. Wayemhlonipha ngokujulile uYise. Wathi: “Ngaso sonke isikhathi ngenza izinto ezimjabulisayo.” (Johane 8:29) Umfazi ozithoba ebunhlokweni bomyeni wakhe ngoba ethanda futhi ehlonipha uNkulunkulu uba negalelo elikhulu ekwenzeni umuzi wakhe ujabule.

Yini abazali abangayifunda endleleni uJesu ayebheka ngayo izingane?

UJesu wazinika isikhathi sokuba nezingane futhi wayenesithakazelo ekutheni zicabangani futhi zizizwa kanjani. IBhayibheli lithi: “UJesu wabizela abantwana kuye, ethi: ‘Bayekeni abantwana beze kimi.’” (Luka 18:15, 16) Ngelinye ilanga, abantu bagxeka abafana abathile ababa nesibindi sokukhuluma ngokholo lwabo kuJesu. Kodwa uJesu wayincoma leyo ntsha, wabe esethi kulabo bagxeki: “Anizange yini nikufunde lokhu, ‘Emlonyeni wezingane nowabasancela ulungiselelé indumiso’?”—Mathewu 21:15, 16.

Yini izingane ezingayifunda kuJesu?

UJesu wabekela izingane isibonelo esihle sokuthanda izinto ezingokomoya. Lapho eneminyaka engu-12 watholakala “ethempelini, ehlezi phakathi kwabafundisi ebalalele futhi ebabuza.” Waba yini umphumela? “Bonke ababemlalele babelokhu bemangele ngenxa yokuqonda kwakhe nezimpendulo zakhe.” (Luka 2:42, 46, 47) Nokho, ulwazi ayenalo aluzange lumenze aqhoshe. Kunalokho, lwamenza wahlonipha abazali bakhe. IBhayibheli lithi: “Waqhubeka ezithoba kubo.”—Luka 2:51.

Ukuze uthole ukwaziswa okwengeziwe, bheka isahluko 14 sencwadi ethi Lifundisani Ngempela IBhayibheli?a

[Umbhalo waphansi]