Ithuluzi Lokusiza Intsha Ikhumbule UMdali Wayo

EMINYAKENI engaba ngu-3 000 edlule, indoda ehlakaniphile uSolomoni yabhala: “Khumbula uMdali wakho emihleni yobusha bakho.” (UmSh. 12:1, iBhayibheli lesiZulu elivamile.) Intsha engamaKristu isinelinye ithuluzi lokuyisiza ukuba yenze lokhu. EMihlanganweni Yesigodi yoFakazi BakaJehova ethi “Ukuqondiswa Umoya KaNkulunkulu” eyaqhutshwa emhlabeni wonke kusukela ngo-May 2008 kuze kube ngo-January 2009, kwakhululwa incwadi ethi Intsha Iyabuza—Izimpendulo Ezisebenzayo, uMqulu 2.

Ekhasini elingaphakathi lesembozo kunencwadi iNdikimba Ebusayo eyibhalele intsha. Ngokwengxenye ithi: “Sithandazela ukuba amaphuzu akule ncwadi akusize ukwazi ukumelana nezingcindezi nezilingo intsha yanamuhla ebhekene nazo futhi akubonise indlela yokwenza izinqumo ezivumelana nentando kaNkulunkulu.”

Abazali bafuna ukukhulisa izingane zabo “ngokuyala nangokuqondisa umqondo kweNkosi,” futhi lokhu kufanele. (Efe. 6:4) Nokho, lapho ifinyelela ibanga lokuthomba, intsha eningi iqala ukungaqiniseki futhi ifise sengathi ingathola isiqondiso. Uma ungumzali wengane ekulelo banga, ungayisiza kanjani ukuba izuze ngokugcwele kule ncwadi? Nakhu okunye ukusikisela:

▪ Zitholele eyakho incwadi, uzijwayeze yona. Lokhu kuhilela okungaphezu nje kokuyifunda. Zama ukuthola umuzwa wesihloko ngasinye. Kunokumane itshele intsha ukuthi yini elungile nengalungile, le ncwadi izama ukuqeqesha ‘amandla ayo okuqonda.’ (Heb. 5:14) Ibuye iyinikeze nokusikisela okuwusizo kwendlela engakumelela ngayo okulungile. Ngokwesibonelo, iSahluko 15 (“Ngingamelana Kanjani Nokucindezela Kontanga?”) asigcini ngokutshela intsha ukuba yenqabe. Sinikeza amasu asekelwe eBhayibhelini nezimpendulo ezisebenzayo eziyoyisiza ukuba ifunde indlela ‘yokuphendula umuntu ngamunye.’—Kol. 4:6.

▪ Sebenzisa izici zale ncwadi ezihilela umfundi. Nakuba lezi zingxenye ziklanyelwe intsha, kunganjani nawe ubhale kweyakho incwadi lapho kufaneleka?a Ngokwesibonelo, lapho ufunda imibuzo emibili ehilela umfundi esekhasini 16 mayelana nokuphola, zama ukukhumbula indlela owawuzizwa ngayo ngesikhathi usalingana nengane yakho. Mhlawumbe ezikhaleni ezilungiselelwe, ungase ubhale izimpendulo owawungazibhala ngaleso sikhathi. Ungabe usuzibuza: ‘Imizwa yami ngale ndaba isishintshe kanjani ngokuhamba kweminyaka? Ikuphi ukuqonda engibe nakho kusukela ngaleso sikhathi sobusha, futhi ngingakwazi kanjani ukukudlulisela ngokuphumelelayo enganeni yami?’

▪ Hlonipha ilungelo lomntanakho lokungakubonisi izinto ezithile. Izingxenye zencwadi ezihilela umfundi ziklanyelwe ukuba ingane yakho ikhiphe okusesifubeni sayo futhi ikubhale noma icabange ngakho. Umgomo wakho uwukwazi okusenhliziyweni yayo, hhayi okusencwadini yayo. Ekhasini 3 ngaphansi kwesithi “Umyalezo Wabazali,” le ncwadi isikisela lokhu: “Ukuze nikhuthaze izingane zenu zikukhiphe konke okusezifubeni zazo, kwamukeleni uma zingathandi ukunibonisa zona. Ngokuhamba kwesikhathi zingase zinitshele imizwa yazo ngalokho ezikubhalile.”

Usizo Ekuqhubeni Isifundo SeBhayibheli Somkhaya

Incwadi ethi Intsha Iyabuza, uMqulu 2, iyithuluzi elihle kakhulu elingasetshenziswa ekuKhulekeleni Komkhaya. Njengoba le ncwadi ingenayo imibuzo yesigaba ngasinye, ungayisebenzisa kanjani? Kunganjani usebenzise indlela ephumelela kakhulu ezinganeni zakho lapho uqhuba isifundo ngasinye?

Ngokwesibonelo, eminye imikhaya ingase ikujabulele ukuba nezikhathi zokuprakthiza lapho ifunda ingxenye ethi “Uhlelo Lokumelana Nokucindezela Kontanga” emakhasini 132 no-133. Umbuzo wokuqala kule ngxenye ungase usize indodana noma indodakazi yakho ibone lokho okuyinselele kakhulu kuyo. Umbuzo wesibili uveza isimo le nselele engase iphakame kuso. Ngemva kokucabangela imiphumela yokuhlulwa ukucindezela kontanga noma yokumelana nako, ingane yakho icelwa ukuba icabangele izindlela zokwamukela, zokuphebeza noma zokubuyisela ingcindezi kubo. Siza indodana yakho noma indodakazi ukuba ibe nomqondo osabalele futhi ilungiselele izindlela zokuphendula eyozizwa ikhululekile ukuzisebenzisa neyokwazi ukuzisebenzisa ngesibindi nangokuqiniseka.—IHu. 119:46.

Ithuluzi Elikhuthaza Ukukhulumisana

Incwadi ethi Intsha Iyabuza, uMqulu 2, ikhuthaza intsha ukuba ixoxe nabazali bayo. Ngokwesibonelo, ibhokisi elithi “Ngingaxoxa Kanjani Ngobulili Nobaba Noma Umama?” (amakhasi 63-64) nelithi “Khuluma Nabazali Bakho!” (ikhasi 189) anikeza ukusikisela okuwusizo kwendlela ongaqala ngayo ingxoxo ngezindaba ezithanda ukuba bucayi. Enye intombazane eneminyaka engu-13 yabhala, “Le ncwadi yangenza ngaba nesibindi sokuxoxa nabazali bami ngezinto engangizicabanga—ngisho nengangizenzile.”

Le ncwadi ikhuthaza ukukhulumisana nangezinye izindlela. Ekupheleni kwesahluko ngasinye kunebhokisi elinesihloko esithi “Ucabangani?” Alihloselwanga nje ukubukeza kodwa futhi lingasetshenziswa njengohlaka lwezingxoxo zomkhaya. Ngasekupheleni kwesahluko ngasinye kunebhokisi elithi “Engizokwenza!” Leli bhokisi linika intsha ithuba lokubhala izindlela eziqondile engakusebenzisa ngazo lokho ekufunde kuleso sahluko. Umusho wokugcina ebhokisini ngalinye elithi “Engizokwenza!” uthi: “Engingathanda ukukubuza umzali (abazali) wami ngale ndaba . . . ” Lokhu kungasiza intsha ukuba ifune iseluleko esiwusizo kubazali bayo.

Finyelela Inhliziyo!

Njengomzali, umgomo wakho uwukufinyelela inhliziyo yengane yakho. Incwadi ethi Intsha Iyabuza, uMqulu 2, ingakusiza ukuba wenze kanjalo. Cabangela indlela omunye ubaba aye wakwazi ngayo ukusebenzisa le ncwadi ukuze akhuthaze ingxoxo ekhululekile phakathi kwakhe nendodakazi yakhe.

“Mina noRebekah sinezindawo ezinhle esithanda ukuya kuzo ngezinyawo, ngamabhayisikili noma ngemoto. Ngithole ukuthi lezi zikhathi zokushaywa umoya zimnikeza ithuba lokuba avuleke.

“Into yokuqala esaxoxa ngayo kule ncwadi kwaba incwadi evela eNdikimbeni Ebusayo kanye nesihloko esithi ‘Umyalezo Wabazali.’ Ngangifuna indodakazi yami yazi ukuthi njengoba kushiwo ekhasini 3, kufanele ibhale ngokukhululekile encwadini yayo. Ngangingeke ngikubheke ekubhalile.

“Ngacela uRebekah ukuba kube nguye okhetha izahluko ayengathanda ukuba sixoxe ngazo ngokulandelana kwazo. Esinye sezahluko zokuqala azikhetha kwakungesithi ‘Ingabe Kufanele Ngiyidlale Imidlalo Yama-computer?’ Ngangingasoze ngakucabanga nokukucabanga ukuthi angakhetha leso! Nokho, wayenesizathu. Abangane bakhe abaningana babedlala umdlalo onyantisayo. Ngangingazi lutho ngobudlova obethusayo nenhlamba okukuwo! Kodwa konke lokhu kwavela lapho sixoxa ngebhokisi elithi ‘Engizokwenza!’ ekhasini 251. Lelo bhokisi lasiza uRebekah nokuba alungiselele indlela azophendula ngayo uma kwenzeka othile ezama ukumcindezela ukuba adlale lowo mdlalo.

“Sikhuluma nje, uRebekah akangifihleli izinto azibhalile encwadini yakhe. Sixoxa singaqedi esifundweni sethu. Siyashintshana ngokufunda, kamuva afune ukuxoxa ngayo yonke into, kuhlanganise nezithombe namabhokisi. Lokhu kunginikeza ithuba lokumxoxela ukuthi kwakunjani ngesikhathi ngingangaye, naye angitshele ukuthi izinto sezinjani namuhla. Ufuna ukungixoxela yonke into!”

Uma ungumzali, akungabazeki ukuthi wajabula kakhulu lapho kukhululwa le ncwadi. Manje usunethuba lokuyisebenzisa kahle. INdikimba Ebusayo yethemba ukuthi le ncwadi ethi Intsha Iyabuza—Izimpendulo Ezisebenzayo, uMqulu 2, iyoba isibusiso emkhayeni wakho. Kwangathi ingasisiza sonke—ikakhulukazi intsha yethu esiyithandayo—ukuba ‘siqhubeke sihamba ngomoya ongcwele.’—Gal. 5:16.

[Umbhalo waphansi]

[Ibhokisi ekhasini 30]

Okushiwo Enye Intsha

“Lena yincwadi okufanele uhlale phansi nepeni bese uyifundisisa. Ukuhlelwa kwayo njengencwadi yezenzakalo zansuku zonke kwenza kube lula ukuzindla wedwa ngomgomo wokuzakhela indlela engcono kakhulu yokuphila.”—UNicola.

“Ngibhekana nengcindezi enkulu yokuba ngiphole, evela ngisho nakubantu abangifisela okuhle. Ingxenye yokuqala yale ncwadi yangiqinisekisa ukuthi kungakhathaliseki ukuthi umuntu uthini kimi, angikakulungeli ukuphola.”—UKatrina.

“Ibhokisi elithi ‘Ingabe Ucabangela Ukubhapathizwa?’ lingisize ukuba ngibheke ukubhapathizwa kwami njengento engathí sina nakakhulu. Lingishukumisele ukuba ngihlaziye kabusha indlela engitadisha ngayo nemithandazo yami.”—U-Ashley.

“Nakuba abazali bami abangamaKristu bangifundisa kusukela ngimncane, le ncwadi ingenze ngazindla ngezinyathelo okufanele ngizithathe ekuphileni kwami. Ingisize nokuba ngikhululeke ngokwengeziwe lapho ngixoxa nabazali bami.”—UZamira.

[Isithombe ekhasini 31]

Bazali, jwayelanani kahle nale ncwadi

[Isithombe ekhasini 32]

Kwenze umgomo wakho ukufinyelela inhliziyo yengane yakho