Ukubhapathizwa Egameni Likabani Nelani?
“Ngakho-ke hambani niyokwenza . . . abafundi, nibabhapathize egameni likaYise neleNdodana nelomoya ongcwele.”—MATH. 28:19.
1, 2. (a) Yini eyenzeka eJerusalema ngePhentekoste lika-33 C.E.? (b) Kungani abaningi esixukwini bashukunyiselwa ukuba babhapathizwe?
IJERUSALEMA laliphithizela izixuku ezivela ezindaweni ngezindawo. Kwakuwusuku lwePhentekoste lika-33 C.E., kugujwa umkhosi obalulekile futhi kunezivakashi eziningi ezazize kuwo. Kwabe sekwenzeka okuthile okungavamile, okwathi ngemva kwako umphostoli uPetru wanikeza inkulumo eshukumisayo eyaba nethonya elimangalisayo. Amazwi akhe athinta amaJuda namaproselithe angaba ngu-3 000, abe esephenduka futhi abhapathizwa. Landa kanjalo ibandla elisha lobuKristu elalisanda kwakhiwa. (IzE. 2:41) Ukubhapathizwa kwabantu abaningi kangaka emachibini noma emadanyini aseJerusalema kumelwe ukuba kwaba undabamlonyeni!
2 Yini eyaholela ekubhapathizweni kwabantu abaningi kangaka? Ekuqaleni kwalolo suku, “kwezwakala umsindo uvela ezulwini ufana nje nowesivunguvungu esinamandla.” Abafundi bakaJesu abangaba ngu-120 ababesekamelweni eliphezulu lendlu ethile bagcwala umoya ongcwele. Ngemva kwalokho, kwabuthana amadoda nabesifazane abesaba uNkulunkulu futhi bahlatshwa umxhwele ukuzwa laba bafundi ‘bekhuluma ngezinye izilimi.’ Lapho bezwa okwakushiwo uPetru kuhlanganise namazwi akhe ayengagudl’iguma ngokufa kukaJesu, abaningi “bahlabeka enhliziyweni.” Kwakufanele benzeni? UPetru waphendula: “Phendukani, yilowo nalowo kini abhapathizwe egameni likaJesu Kristu . . , nizokwamukela isipho sesihle somoya ongcwele.”—IzE. 2:1-4, 36-38.
3. Ngosuku lwePhentekoste, yini amaJuda namaproselithe aphendukile okwakudingeka ayenze?
3 Cabanga ngesimo esingokwenkolo salawo maJuda namaproselithe ezwa uPetru. Ayesemamukele uJehova njengoNkulunkulu wawo. Ngaphezu kwalokho, ngokufunda imiBhalo YesiHebheru, ayazi ngomoya ongcwele, ongamandla kaNkulunkulu asebenzayo awasebenzisa ekudaleni nangemva kwalokho. (Gen. 1:2; AbaHl. 14:5, 6; 1 Sam. 10:6; IHu. 33:6) Kodwa ayedinga okwengeziwe. Kwakubalulekile ukuba aqonde futhi amukele indlela kaNkulunkulu yensindiso—uMesiya, uJesu. Yingakho uPetru aqokomisa isidingo sokuba “abhapathizwe egameni likaJesu Kristu.” Ezinsukwini ezimbalwa ngaphambili, uJesu ovusiwe wayeyale uPetru nabanye ukuba babhapathize abantu “egameni likaYise neleNdodana nelomoya ongcwele.” (Math. 28:19, 20) Lawo mazwi ayebaluleke kakhulu ekhulwini lokuqala, futhi kusenjalo namanje. Kungani?
Egameni LikaYise
4. Yiluphi ushintsho olwase lwenzekile ngokuphathelene nabantu ababenobuhlobo noJehova?
4 Njengoba kuphawuliwe, labo abasabela enkulumweni kaPetru babekhulekela uJehova futhi ngaphambili babenobuhlobo naye. Babezama ukulandela uMthetho wakhe, yingakho beza eJerusalema bevela ezindaweni ngezindawo. (IzE. 2:5-11) Nokho, uNkulunkulu wayesanda kwenza ushintsho olukhulu ekusebenzelaneni kwakhe nabantu. Wayewalahlile amaJuda, engasesona isizwe sakhe esikhethekile; ukugcina kwawo uMthetho kwakungaseyona indlela yokuba awamukele. (Math. 21:43; Kol. 2:14) Uma labo ababelalele babefuna ukuqhubeka benobuhlobo noJehova, kwase kudingeka benze okuthile.
5, 6. Yini amaJuda namaproselithe amaningi ekhulu lokuqala ayenza ukuze abe nobuhlobo noNkulunkulu?
5 Ngokuqinisekile kwakungadingeki bafulathele uJehova, uMniki-kuphila wabo. (IzE. 4:24) Cha, manje kunanini ngaphambili, labo abasabela encazelweni kaPetru babona ukuthi uJehova wayenguBaba onomusa kakhulu. Wayethumele uMesiya ukuba azobakhulula futhi wayezimisele ukuthethelela ngisho nalabo uPetru ayengathi ngabo: “Yonke indlu ka-Israyeli mayazi ngokuqinisekile ukuthi uNkulunkulu wamenza iNkosi noKristu, lo Jesu enambethela.” Empeleni, labo abathintwa amazwi kaPetru manje babengaba nesizathu esikhulu ngisho nangokwengeziwe sokwazisa lokho uBaba ayekwenzele bonke abafuna ukuba nobuhlobo naye!—Funda IzEnzo 2:30-36.
6 Ngempela, lawo maJuda namaproselithe manje babengabona ukuthi ukuba nobuhlobo noJehova kwakuhilela ukumqaphela njengoMlungiseleli wensindiso ngoJesu. Ungaqonda-ke ukuthi kungani baphenduka ezonweni zabo, ezazihlanganisa nokuhlanganyela kwabo bazi noma bengazi ekubulaleni uJesu. Yingaleso sizathu futhi phakathi nezinsuku ezalandela “baqhubeka bezinikela ekufundiseni kwabaphostoli.” (IzE. 2:42) ‘Babengasondela ngenkululeko yokukhuluma esihlalweni sobukhosi somusa ongafanelwe,’ futhi babeyokudinga lokho.—Heb. 4:16.
7. Abaningi namuhla baye bawushintsha kanjani umbono wabo ngoNkulunkulu futhi babhapathizwa egameni likaYise?
7 Namuhla, izigidi zabantu bezizinda ezihlukahlukene baye bafunda iqiniso ngoJehova eBhayibhelini. (Isaya 2:2, 3) Abanye babethi uNkulunkulu akekho noma uma ekhona akanandaba nabantu, kodwa bakholiseka ukuthi uMdali ukhona nokuthi babengaba nobuhlobo obuhle naye. Abanye babekhulekela onkulunkulu abangoziqu-zintathu noma izithombe ezihlukahlukene. Bafunda ukuthi uJehova kuphela onguMninimandla onke, futhi sebembiza ngegama lakhe. Lokhu kuvumelana neqiniso elashiwo uJesu lokuthi abafundi bakhe kufanele babhapathizwe egameni likaYise.
8. Yini okwadingeka ukuba labo ababengazi ngesono sika-Adamu bayiqaphele ngoBaba?
8 Baye bafunda nokuthi banesono abasizuze ngefa ku-Adamu. (Roma 5:12) Lokhu kwaba into entsha okwadingeka bayamukele njengeyiqiniso. Abantu abanjalo bangafaniswa nomuntu ogulayo owayengazi ukuthi uyagula. Kungenzeka ukuthi zazikhona izimpawu zokuthi wayegula, njengokuba nezinhlungu zesikhashana. Nokho, njengoba isifo sakhe sasingaxilongiwe, kungenzeka wayecabanga ukuthi cishe wayengumqemane. Kodwa ukuhlolwa kwabonisa okuhlukile. (Qhathanisa neyoku-1 Korinte 4:4.) Uzokwenzenjani uma esethola ngokunembile ukuthi uphethwe yini? Ngeke yini kube ukuhlakanipha ukuba afune indlela yokwelashwa eyaziwayo, eqinisekisiwe futhi ephumelelayo abese eyisebenzisa? Ngokufanayo, lapho bazi iqiniso ngesono esisizuze ngefa, abaningi baye bamukela okushiwo iBhayibheli “ngesifo” sabo futhi baye baqonda ukuthi uNkulunkulu unikeza “ikhambi.” Yebo, bonke abahlukaniswe noBaba kufanele baphendukele kuLowo ongabelapha.—Efe. 4:17-19.
9. Yini uJehova ayenza ukuze sikwazi ukuba nobuhlobo naye?
9 Uma ukuphila kwakho usukunikezele kuJehova uNkulunkulu futhi usungumKristu obhapathiziwe, uyazi ukuthi kuyinto enhle kanjani ukuba nobuhlobo naye. Manje usuyaqonda ukuthi uYihlo, uJehova, unothando kangakanani. (Funda amaRoma 5:8.) Nakuba u-Adamu no-Eva babonile kuye, uNkulunkulu wathatha isinyathelo sokuba inzalo yabo—kuhlanganise nathi—ikwazi ukuba nobuhlobo obuhle naye. Ukuze enze lokho, uNkulunkulu kwadingeka abekezelele ubuhlungu bokubona iNdodana yakhe ayithandayo izwiswa ubuhlungu futhi ifa. Ingabe ukwazi lokhu akusisizi yini ukuba siqaphele igunya likaNkulunkulu futhi silalele imiyalo yakhe ngoba simthanda? Uma ungakakwenzi lokho, unezizathu zokuzinikezela kuNkulunkulu futhi ubhapathizwe.
Egameni LeNdodana
10, 11. (a) Umkweleta kangakanani uJesu? (b) Uzizwa kanjani ngokufa kukaJesu njengesihlengo?
10 Nokho, cabanga futhi ngalokho uPetru akusho esixukwini. Wagcizelela ukwamukela uJesu, okuhlobene ngokuqondile nokubhapathizwa ‘egameni leNdodana.’ Kungani kwakubalulekile ngaleso sikhathi, futhi kungani kubalulekile namanje? Phela ukwamukela uJesu nokubhapathizwa egameni lakhe kusho ukuqaphela indima yakhe ebuhlotsheni bethu noMdali. Kwadingeka ukuba uJesu alengiswe esigxotsheni sokuhlushwa ukuze asuse isiqalekiso soMthetho kumaJuda; nokho, ukufa kwakhe kwakunenzuzo enkulu ngaphezu kwale. (Gal. 3:13) Waba umhlatshelo wesihlengo owawudingwa isintu sonke. (Efe. 2:15, 16; Kol. 1:20; 1 Joh. 2:1, 2) Ukuze afeze lokhu, wakhuthazelela ukungabi nabulungisa, ukuthukwa, ukuhlushwa nokubulawa ekugcineni. Uwazisa kangakanani umhlatshelo wakhe? Zicabange ungumfanyana oneminyaka engu-12 usemkhunjini i-Titanic, owacwila ngo-1912 ngemva kokushayisa iqhwa elintantayo. Ufuna ukugxuma ungene esikejaneni sokutakula, kodwa sigcwele. Kusenjalo indoda ethile esikejaneni ivalelisa umkayo ngokumanga, bese igxumela emkhunjini ocwilayo, ifake wena kuleso sikejana sokutakula. Uzizwa kanjani? Ngokuqinisekile uyibonga ungaqedi! Manje usungaqonda indlela umfanyana owaba nokuhlangenwe nakho okunjalo azizwa ngayo.a Nokho, uJesu wakwenzela okungaphezu kakhulu kwalokhu. Wafa ukuze wena uphile phakade.
11 Wazizwa kanjani lapho ufunda ngalokho iNdodana kaNkulunkulu ekwenzele kona? (Funda eyesi-2 Korinte 5:14, 15.) Cishe wayazisa ngokujulile. Lokho kwakushukumisela ukuba unikezele ukuphila kwakho kuNkunkulu futhi ‘ungabe usaziphilela wena, kodwa uphilele lowo owakufela.’ Ukubhapathizwa egameni leNdodana kusho ukuqaphela lokho uJesu aye wakwenzela kona futhi wamukele igunya lakhe ‘njengoMmeli Oyinhloko wokuphila.’ (IzE. 3:15; 5:31) Ngaphambili, wawungenabo ubuhlobo noMdali, futhi empeleni ungenalo ithemba eliqinisekile. Kodwa ngokubonisa ukholo egazini likaJesu Kristu elachitheka nangokubhapathizwa, manje unobuhlobo noBaba. (Efe. 2:12, 13) Umphostoli uPawulu wabhala: ‘Nina enanikade nahlukanisiwe futhi niyizitha ngoba izingqondo zenu zisemisebenzini emibi, manje uNkulunkulu usephinde wanibuyisela ngomzimba wenyama kaJesu ngokufa kwakhe, ukuze anethule ningcwele ningenasici.’—Kol. 1:21, 22.
12, 13. (a) Ukubhapathizwa egameni leNdodana kufanele kuyithinte kanjani indlela osabela ngayo lapho othile ekucasula? (b) NjengomKristu obhapathizwe egameni likaJesu, isiphi isibopho onaso?
12 Nakuba wabhapathizwa egameni leNdodana, kukuphatha kabuhlungu ukubona ukuthambekela kwakho esonweni. Ukukuqaphela lokhu kuwusizo nsuku zonke. Ngokwesibonelo, uma othile ekucasula, ingabe uyakhumbula ukuthi nobabili niyizoni? Nobabili nidinga intethelelo kaNkulunkulu, futhi nobabili kufanele nithethelele. (Marku 11:25) Ukuze agcizelele lesi sidingo, uJesu wenza lo mfanekiso: Inkosi yenceku ethile yesula isikweletu sayo samathalenta ayizinkulungwane eziyishumi (odenariyu abayizigidi ezingu-60). Kamuva leyo nceku yenqaba ukuthethelela inceku eyayikanye nayo eyayiyikweleta odenariyu abayikhulu. UJesu wabe eseveza leli phuzu: UJehova ngeke amthethelele umuntu ongamthetheleli umfowabo. (Math. 18:23-35) Yebo, ukubhapathizwa egameni leNdodana kusho ukuqaphela igunya likaJesu nokulwela ukulandela isibonelo nezimfundiso zakhe, kuhlanganise nesokuzimisela ukuthethelela abanye.—1 Pet. 2:21; 1 Joh. 2:6.
13 Ngenxa yokuthi awuphelele, awukwazi ukulingisa uJesu ngokugcwele. Noma kunjalo, ufuna ukumlingisa ngokusemandleni akho ngokuvumelana nokuzinikezela kwakho kuNkulunkulu ngenhliziyo yonke. Lokhu kuhilela ukuqhubeka usebenzela ukulahla ubuntu obudala nokugqoka obusha. (Funda eyabase-Efesu 4:20-24.) Lapho uqala ukwazisa umngane, cishe uzama ukufunda esibonelweni nasezimfanelweni zakhe ezinhle. Ngokufanayo, ufuna ukufunda kuKristu futhi umlingise.
14. Ungabonisa kanjani ukuthi uyaliqaphela igunya likaJesu njengeNkosi yasezulwini?
14 Kunenye indlela ongabonisa ngayo ukuthi uyaqonda ukuthi yini ehilelekile ekubhapathizweni kwakho egameni leNdodana. UNkulunkulu “wabeka . . . zonke izinto ngaphansi kwezinyawo [zikaJesu], wamenza inhloko phezu kwazo zonke izinto ebandleni.” (Efe. 1:22) Ngakho, kudingeka uhloniphe indlela uJesu aqondisa ngayo labo abazinikezele kuJehova. Ebandleni, uKristu usebenzisa abantu abangaphelele, ikakhulu amadoda amadala ngokomoya, abadala abamisiwe. Ilungiselelo lokuba namadoda anjalo amisiwe ulenze “enombono wokulungiswa kwabangcwele, . . . ngenjongo yokwakhiwa komzimba kaKristu.” (Efe. 4:11, 12) Ngisho noma umuntu ongaphelele enza iphutha, uJesu njengeNkosi yoMbuso wasezulwini uyakwazi ukusingatha leyo ndaba ngesikhathi nangendlela yakhe. Ingabe uyakukholelwa lokhu?
15. Uma usazobhapathizwa, iziphi izibusiso ongalindela ukuzithola ngemva kokubhapathizwa?
15 Abanye abakazinikezeli kuJehova futhi babhapathizwe. Uma ungakakwenzi lokhu, ngokwalokhu okushiwo ngenhla, uyabona yini ukuthi ukuqaphela iNdodana kuyinto enengqondo nebonisa ukwazisa okumelwe uyenze? Ukubhapathizwa egameni leNdodana kuyokubeka ethubeni lokuthola izibusiso ezinhle.—Funda uJohane 10:9-11.
Egameni Lomoya Ongcwele
16, 17. Kusho ukuthini kuwe ukubhapathizwa egameni lomoya ongcwele?
16 Kusho ukuthini ukubhapathizwa egameni lomoya ongcwele? Njengoba sibonile ngenhla, labo abezwa uPetru ngosuku lwePhentekoste babazi ngomoya ongcwele. Eqinisweni, babebubona ubufakazi bokuthi uNkulunkulu uyaqhubeka ewusebenzisa. UPetru wayengomunye wabantu abaye “bagcwala umoya ongcwele, baqala ukukhuluma ngezinye izilimi.” (IzE. 2:4, 8) Inkulumo ethi “egameni lika-” ayisho njalo igama lomuntu. Namuhla, ziningi izinto ezenziwa “egameni likahulumeni,” yize engeyena umuntu. Zenziwa ngegunya likahulumeni. Ngokufanayo, umuntu obhapathizwa egameni lomoya ongcwele uyaqaphela ukuthi umoya ongcwele awuyena umuntu, kodwa ungamandla kaJehova asebenzayo. Lokho kubhapathizwa kusho ukuthi lowo muntu uqaphela indima yomoya ongcwele enjongweni kaNkulunkulu.
17 Ingabe ukufunda kwakho iBhayibheli akuzange kukwenze wazi ngomoya ongcwele? Ngokwesibonelo, usuyazi ukuthi imiBhalo yalotshwa ngokuphefumulelwa ngomoya ongcwele. (2 Thim. 3:16) Njengoba uthuthuka ngokomoya, cishe wakuqonda ngokwengeziwe ukuthi ‘uBaba osezulwini, ubanika umoya ongcwele labo abawucela kuye,’ kuhlanganise nawe. (Luka 11:13) Cishe uye wakubona ukusebenza komoya ongcwele ekuphileni kwakho. Ngakolunye uhlangothi, uma usazobhapathizwa egameni lomoya ongcwele, isiqinisekiso sikaJesu sokuthi uBaba unika abantu umoya ongcwele sisho ukuthi kunezibusiso zangempela ozozithola lapho wamukela lowo moya.
18. Iziphi izibusiso ezitholwa yilabo ababhapathizwa egameni lomoya ongcwele?
18 Kusobala ukuthi nanamuhla uJehova uqondisa futhi ahole ibandla lobuKristu ngomoya wakhe. Lowo moya uyasisiza futhi njengabantu ngabanye emisebenzini yethu yansuku zonke. Ukubhapathizwa kwethu egameni lomoya ongcwele kuhilela ukuqaphela indima yawo ekuphileni kwethu nokubambisana nawo ngokwazisa. Nokho, abanye bangase bazibuze ukuthi singaphila kanjani ngokuvumelana nokuzinikezela esakwenza kuJehova nokuthi umoya ongcwele uhileleke kanjani. Sizoxoxa ngalokho esihlokweni esilandelayo.
[Umbhalo waphansi]
a Bheka i-Phaphama! ka-April 8, 1982, amakhasi 18-24.
Ingabe Uyakhumbula?
• Ukubhapathizwa kwakho egameni likaYise kuhilelani?
• Kusho ukuthini ukubhapathizwa egameni leNdodana?
• Ungabonisa kanjani ukuthi uyakuqonda ukubaluleka kokubhapathizwa egameni likaYise neleNdodana?
• Kusho ukuthini ukubhapathizwa egameni lomoya ongcwele?
[Izithombe ekhasini 10]
Ngemva kwePhentekoste lika-33 C.E., ibuphi ubuhlobo abafundi abasha ababa nabo noBaba?
[Umthombo]
By permission of the Israel Museum, Jerusalem