Bazalwane—Hlwanyelani Ninombono Womoya, Nilwele Ukusebenziseka!

“Lowo ohlwanyela enombono womoya uyovuna ukuphila okuphakade.”—GAL. 6:8.

1, 2. Ugcwaliseka kanjani uMathewu 9:37, 38, futhi lokhu kuye kwadala siphi isidingo emabandleni?

UPHILA esikhathini esiyingqopha-mlando! Umsebenzi uJesu Kristu akhuluma ngawo ugcwaliseka ngokugcwele. Wathi: “Ukuvuna kukhulu, kodwa izisebenzi zimbalwa. Ngakho-ke, ncengani iNkosi yokuvuna ukuba ithumele izisebenzi ekuvuneni kwayo.” (Math. 9:37, 38) UJehova uNkulunkulu uphendula leyo mithandazo ngendlela engakaze ibonwe. Phakathi nonyaka wenkonzo ka-2009, inani lamabandla oFakazi BakaJehova emhlabeni wonke landa ngamabandla angu-2 031, lafinyelela ku-105 298. Ngokwesilinganiso, bangu-757 ababebhapathizwa usuku ngalunye!

² Ukwanda okunjalo kudala isidingo sabazalwane abafanelekayo abazohola ekufundiseni nasekwaluseni amabandla. (Efe. 4:11) Kuyo yonke le minyaka, uJehova ubelokhu emisa amadoda afanelekayo ukuze anakekele izidingo zezimvu zakhe, futhi siyaqiniseka ngokuthi uyoqhubeka enza kanjalo. Isiprofetho esikuMika 5:5 sisiqinisekisa ngokuthi ezinsukwini zokugcina, abantu bakaJehova babeyoba ‘nabelusi abayisikhombisa nezikhulu eziphakeme eziyisishiyagalombili,’ okumelela inani elikhulu lamadoda afanelekela ukubahola.

3. Chaza ukuthi kusho ukuthini ‘ukuhlwanyela unombono womoya.’

³ Uma ungumzalwane obhapathiziwe, yini engakusiza ukuba ufune ukufinyelela amalungelo enkonzo? Isihluthulelo siwukuba ‘uhlwanyele unombono womoya.’ (Gal. 6:8) Ukwenza lokho kuhilela ukuphila ngendlela eyenza umoya ongcwele kaNkulunkulu usebenze ngokukhululekile ekuphileni kwakho. Zimisele ‘ukungahlwanyeli unombono wenyama.’ Gwema ukuba izinto ezinjengokunethezeka, ukuzilibazisa nokuzijabulisa zifiphaze isifiso sakho sokwenza okwengeziwe enkonzweni kaNkulunkulu. Wonke amaKristu kufanele ‘ahlwanyele enombono womoya,’ futhi ngokuhamba kwesikhathi, amadoda enza kanjalo angase afanelekele amalungelo ebandleni. Ngenxa yokuthi namuhla kunesidingo esikhulu sezinceku ezikhonzayo nabadala, lesi sihloko siqondiswe ngokukhethekile emadodeni angamaKristu. Ngakho-ke, bazalwane siyaninxusa ukuba nisicabangele ngomthandazo lesi sihloko.

Zamani Ukufinyelela Umsebenzi Omuhle

4, 5. (a) Abazalwane ababhapathiziwe banxuswa ukuba bazame ukufinyelela maphi amalungelo ebandleni? (b) Umuntu angawafinyelela kanjani?

⁴ Indoda engumKristu ayimane nje ibe umbonisi. Kumelwe ilwele ukuwufinyelela lo “msebenzi omuhle.” (1 Thim. 3:1) Lokhu kuhlanganisa ukukhonza abafowabo ngokunakekela izidingo zabo ngobuqotho. (Funda u-Isaya 32:1, 2.) Indoda ezama ukufinyelela leli lungelo ngezisusa ezinhle ayishukunyiswa ukuzifunela udumo. Kunalokho, ishukunyiswa isifiso sokusiza abanye.

⁵ Umuntu ofuna ukufaneleka njengenceku ekhonzayo noma ukuba umbonisi kufanele alwele ukuhlangabezana nezimfuneko ezisemiBhalweni. (1 Thim. 3:1-10, 12, 13; Thithu 1:5-9) Uma ungumzalwane ozinikezele, zibuze: ‘Ingabe ngihlanganyela ngokugcwele emsebenzini wokushumayela futhi ngisize abanye ukuba benze okufanayo? Ngiyabakha yini abakhulekeli engikanye nabo ngokuba nesithakazelo esiqotho enhlalakahleni yabo? Ingabe nginedumela lokuba umfundi okhuthele weZwi likaNkulunkulu? Ngiyalithuthukisa yini izinga lezimpendulo zami? Ingabe ngizifeza ngenkuthalo izabelo engizinikwa abadala?’ (2 Thim. 4:5) Le mibuzo kufanele icatshangelwe ngokunzulu.

6. Siyini isihluthulelo sokufanelekela imithwalo yemfanelo ebandleni?

⁶ Enye indlela yokufanelekela imithwalo yemfanelo ebandleni ‘iwukwenziwa ube namandla kumuntu onguye ngaphakathi ngamandla okusebenza komoya kaNkulunkulu.’ (Efe. 3:16) Ukuba inceku ekhonzayo noma umdala ebandleni lobuKristu akusona isikhundla esivotelwayo. Kuyilungelo elitholwa kuphela yilabo abathuthukayo ngokomoya. Ungathuthuka kanjani ngokomoya? Enye indlela iwukuba ‘uqhubeke uhamba ngomoya’ futhi uhlakulele izithelo zawo. (Gal. 5:16, 22, 23) Njengoba ubonakalisa izimfanelo ezingokomoya ezidingekayo ukuze usingathe imithwalo yemfanelo eyengeziwe futhi usebenzisa iseluleko esikusiza ukuba uthuthuke, ‘intuthuko yakho iyobonakala kubo bonke abantu.’—1 Thim. 4:15.

Kudingeka Umoya Wokuzidela

7. Kuhilelani ukukhonza abanye?

⁷ Ukukhonza abanye kuhilela ukuzikhandla nomoya wokuzidela. Ngenxa yokuthi ababonisi abangamaKristu bangabelusi abangokomoya, bakhathazeka kakhulu ngezinkinga zomhlambi. Phawula indlela eyamthinta ngayo umphostoli uPawulu imithwalo yakhe yemfanelo yokwalusa. Watshela amaKristu ayekanye nawo eKorinte: “Nganilobela ngezinyembezi eziningi nginosizi olukhulu nobuhlungu benhliziyo, kungekhona ukuba nidabuke, kodwa ukuba nilwazi uthando enginalo ikakhulukazi ngani.” (2 Kor. 2:4) Kusobala ukuthi uPawulu wayewenza ngenhliziyo yonke umsebenzi wakhe.

8, 9. Yisho izibonelo eziseBhayibhelini zamadoda anakekela izidingo zabanye.

⁸ Umoya wokuzidela ubulokhu uwuphawu lwamadoda azikhandlayo ngenxa yezinceku zikaJehova. Ngokwesibonelo, asinakulokotha sicabange ngoNowa etshela umkhaya wakhe: ‘Ningibize uma seniqedile ukwakha umkhumbi, ngizongena.’ UMose akazange athi kuma-Israyeli eGibhithe: ‘Sizohlangana oLwandle Olubomvu. Zamani ukuzifikela khona.’ UJoshuwa akazange athi: ‘Ningitshele uma izindonga zaseJeriko ziwa.’ U-Isaya akazange akhombe omunye athi: ‘Nangu! Thuma yena.’—Isaya 6:8.

⁹ UJesu Kristu uyisibonelo sethu esivelele somuntu owavumela umoya kaNkulunkulu ukuba umshukumise. Wasamukela ngokuzithandela isabelo sakhe sokuba uMhlengi wesintu. (Joh. 3:16) Uthando lukaJesu lokuzidela akufanele yini lusishukumisele ukuba sizidele? Lapho echaza indlela ayezizwa ngayo ngomhlambi, omunye umzalwane osenesikhathi eside engumdala wathi: “Amazwi uJesu awasho kuPetru—yalusa amawundlu ami—angithinta inhliziyo. Kuyo yonke le minyaka, ngiye ngabona ukuthi amazwi ambalwa othando noma isenzo esincane somusa singamkhuthaza umuntu odangele. Ngiwujabulela kakhulu umsebenzi wokwalusa.”—Joh. 21:16.

10. Yini engashukumisela amadoda angamaKristu ukuba alingise isibonelo sikaJesu sokukhonza abanye?

¹⁰ Ngokuphathelene nomhlambi kaNkulunkulu, kumelwe amadoda azinikezele ebandleni afune ukubonisa isimo sengqondo sikaJesu, owathi: “Ngizonenza niqabuleke.” (Math. 11:28) Ukholo kuNkulunkulu nothando ngebandla kushukumisela amadoda angamaKristu ukuba azame ukuwufinyelela lo msebenzi omuhle, angacabangi ukuthi ngeke alunge noma ukuthi unzima kakhulu. Nokho, kuthiwani uma umuntu engenaso isifiso sokufinyelela amalungelo? Ingabe umzalwane angasihlakulela isifiso sokukhonza ibandla?

Hlakulela Isifiso Sokukhonza

11. Umuntu angasihlakulela kanjani isifiso sokukhonza abanye?

¹¹ Uma imizwa yokungafaneleki ibikuvimbela ukuba uzame ukufinyelela amalungelo enkonzo, kuyafaneleka ukuba uthandazele umoya ongcwele. (Luka 11:13) Umoya kaJehova uyokusiza ukuba unqobe noma ikuphi ukukhathazeka okungenzeka ukuthi unakho ngale ndaba. Sona kanye isifiso sokukhonza sivela kuNkulunkulu, ngoba wumoya kaJehova oshukumisa umzalwane ukuba alwele ukufinyelela amalungelo enkonzo bese umnika amandla okufeza inkonzo engcwele. (Fil. 2:13; 4:13) Ngakho-ke, kuyafaneleka ukuba ucele uJehova ukuba akusize ube nesifiso sokwamukela amalungelo enkonzo.—Funda iHubo 25:4, 5.

12. Umuntu angakuthola kanjani ukuhlakanipha akudingayo ukuze afeze imithwalo yemfanelo ayiphathisiwe?

¹² Umzalwane angase anqume ukuba angazami ukufinyelela amalungelo enkonzo ngoba ebona sengathi ukunakekela izidingo zomhlambi kuyakhandla futhi kunzima. Noma angase abe nomuzwa wokuthi akanakho ukuhlakanipha okudingekayo ukuze afeze le mithwalo yemfanelo. Uma kunjalo, mhlawumbe angathola ukuhlakanipha ngokufunda iZwi likaNkulunkulu ngenkuthalo nezincwadi ezisekelwe kulo. Angase futhi azibuze: ‘Ingabe ngiyasibeka isikhathi sokutadisha iZwi likaNkulunkulu futhi ngithandazele ukuhlakanipha?’ Umfundi uJakobe waloba: “Uma noma ubani kini entula ukuhlakanipha, makaqhubeke ekucela kuNkulunkulu, ngoba ubapha bonke ngesandla esivulekile ngaphandle kokusola; uyomnika kona.” (Jak. 1:5) Uyawakholelwa yini la mazwi aphefumulelwe? Lapho ephendula umthandazo kaSolomoni, uNkulunkulu wamnika “inhliziyo ehlakaniphile neqondayo” eyamenza wakwazi ukuhlukanisa phakathi kokuhle nokubi lapho ahlulela. (1 AmaKh. 3:7-14) Yiqiniso, indaba kaSolomoni yayihlukile. Kodwa, singaqiniseka ngokuthi uNkulunkulu uyowanika ukuhlakanipha amadoda awaphathise imithwalo yemfanelo ebandleni ukuze akwazi ukuzinakekela kahle izimvu zakhe.—IzAga 2:6.

13, 14. (a) Chaza indlela “uthando uKristu analo” olwamthinta ngayo uPawulu. (b) “Uthando uKristu analo” kufanele lusithinte kanjani?

¹³ Enye into engakusiza ukuba uhlakulele isifiso sokukhonza abanye ukucabanga ngokujulile ngakho konke uJehova neNdodana yakhe abasenzele khona. Ngokwesibonelo, cabanga ngeyesi-2 Korinte 5:14, 15. (Funda.) ‘Uthando uKristu analo lusiqhubezela’ kanjani? Uthando uKristu alubonisa ngokusifela ngokuvumelana nentando kaNkulunkulu lukhulu kangangokuba uma siluqonda izinhliziyo zethu zishukunyiswa ngokujulile. UPawulu washukunyiswa uthando lukaKristu. Lwamvimbela ukuba enze ngobugovu futhi lwamsiza ukuba afinyelele imigomo yakhe yokukhonza uNkulunkulu nabantu basebandleni nabangaphandle.

¹⁴ Ukuzindla ngothando uKristu analo ngabantu kusishukumisela ukuba simbonge. Ngenxa yalokho, siyaqaphela ukuthi kuyoba okungafanele kanjani ukuba siqhubeke ‘sihlwanyela sinombono wenyama’ ngokuphishekela imigomo yobugovu nangokuphilela ukwanelisa izifiso zethu kuphela. Kunalokho, sihlela izimo zethu ukuze umsebenzi esiwunikwe uNkulunkulu ube yinto eza kuqala ekuphileni kwethu. Sishukunyiselwa ukuba sibe ‘izinceku’ zabafowethu ngoba sibathanda. (Funda eyabaseGalathiya 5:13.) Uma sizibheka njengezinceku ezibakhonza ngokuthobeka abantu bakaJehova abazinikezele, siyobaphatha ngenhlonipho. Ngokuqinisekile, ngeke silandele umoya wokugxeka nokwahlulela ogqugquzelwa uSathane.—IsAm. 12:10.

Okungenziwa Umkhaya

15, 16. Iyiphi indima efezwa amalungu omkhaya ukuze indoda ifanelekele ukuba inceku ekhonzayo noma umdala?

¹⁵ Uma umzalwane eshadile futhi enabantwana, isimo somkhaya wakhe siyacatshangelwa lapho kubhekwa ukuthi uyafaneleka yini ukuba inceku ekhonzayo noma umdala. Ngempela, ingokomoya nedumela lomkhaya wakhe likuthinta ngokuqondile ukumiswa kwakhe. Lokhu kugcizelela ukubaluleka kwendima yomkhaya ekusekeleni umyeni nobaba njengoba efuna ukukhonza ibandla njengenceku ekhonzayo noma njengomdala.—Funda eyoku-1 Thimothewu 3:4, 5, 12.

¹⁶ UJehova uyajabula lapho amalungu omkhaya wamaKristu ebambisana. (Efe. 3:14, 15) Kudingeka ukulinganisela ngenhloko yomkhaya ukuze ifeze imithwalo yemfanelo yebandla futhi yengamele umkhaya wayo “ngendlela enhle.” Ngakho, kubalulekile ukuba umdala noma inceku ekhonzayo itadishe iBhayibheli nomkayo nezingane ukuze bonke bazuze ekuKhulekeleni Komkhaya masonto onke. Kufanele aye nomkhaya wakhe enkonzweni yasensimini njalo. Kubaluleke ngokufanayo ukuba amalungu omkhaya abambisane nenhloko yomkhaya emizamweni yayo.

Ungaphinde Yini Ukhonze?

17, 18. (a) Uma umzalwane engasafaneleki ukukhonza, yini okungase kudingeke ukuba ayenze? (b) Umzalwane owayekhonza njengomdala noma njengenceku ekhonzayo kufanele abe namuphi umbono?

¹⁷ Mhlawumbe wake waba umdala noma inceku ekhonzayo kodwa manje awuseyena. Uyamthanda uJehova futhi ungaqiniseka ngokuthi usakukhathalela. (1 Pet. 5:6, 7) Ingabe watshelwa ukuthi kudingeka wenze izinguquko ezithile? Zimisele ukuvuma iphutha futhi ulilungise ngosizo lukaNkulunkulu. Gwema ukuduba. Hlakanipha futhi ubonise isimo sengqondo esihle. Umdala othile owayesekhonze iminyaka eminingi kodwa walahlekelwa amalungelo akhe enkonzo wathi: “Ngazibekela umgomo wokuqhubeka ngiya emihlanganweni, enkonzweni yasensimini futhi ngifunda iBhayibheli njengangaphambili lapho ngisewumdala, futhi ngawufinyelela. Ngafunda ukubekezela ngoba ngangicabanga ukuthi ngangizophinde ngiwathole la malungelo ngemva konyaka noma emibili kodwa kwathatha cishe iminyaka engu-7 ngaphambi kokuba ngiphinde ngikhonze njengomdala. Phakathi naleso sikhathi, isikhuthazo sokuba ngingapheli amandla kodwa ngiqhubeke ngizama ukufinyelela amalungelo enkonzo sangisiza kakhulu.”

¹⁸ Uma ungumzalwane ubhekene nesimo esisanda kuchazwa, ungapheli amandla. Zindla ngendlela uJehova ayibusisa ngayo inkonzo yakho nomkhaya wakho. Yakha umkhaya wakho ngokomoya, vakashela abagulayo futhi ukhuthaze ababuthaka. Ngaphezu kwakho konke, lazise ilungelo lakho lokudumisa uNkulunkulu nokumemezela izindaba ezinhle zoMbuso njengomunye woFakazi BakaJehova.a—IHu. 145:1, 2; Isaya 43:10-12.

Phinde Uzihlole

19, 20. (a) Bonke abesilisa ababhapathiziwe banxuswa ukuba benzeni? (b) Sizoxoxa ngani esihlokweni esilandelayo?

¹⁹ Namuhla isidingo sababonisi nezinceku ezikhonzayo sikhulu kunanini ngaphambili. Ngakho-ke, sinxusa bonke abesilisa ababhapathiziwe ukuba baphinde bahlole izimo zabo bese bezibuza, ‘Kungani ngingeyona inceku ekhonzayo noma umdala?’ Vumela umoya kaNkulunkulu ukusize ukuba ube nesimo esihle sengqondo ngale ndaba ebalulekile.

²⁰ Ukuzidela kwamanye amaKristu kuzuzisa wonke amalungu ebandla. Uma senza izinto ezibonisa umusa nokungabi nabugovu, sithola injabulo etholakala ngokukhonza abanye nangokuhlwanyela sinombono womoya. Nokho, njengoba isihloko esilandelayo sizobonisa, kumelwe singawenzi lusizi umoya ongcwele kaNkulunkulu. Singakugwema kanjani lokhu?

[Umbhalo waphansi]

Ungaphendula Kanjani?

• Isiprofetho esikuMika 5:5 sisiqinisekisa ngani?

• Chaza ukuthi uhilelani umoya wokuzidela.

• Umzalwane angasihlakulela kanjani isifiso sokukhonza abanye?

• Kubaluleke kangakani ukubambisana komkhaya ukuze indoda ifanelekele ukukhonza njengenceku ekhonzayo noma umdala?

[Izithombe ekhasini 25]

Yini ongayenza ukuze ufinyelele amalungelo enkonzo?