Vumela ‘Umthetho Womusa Wothando’ Uqaphe Ulimi Lwakho
“Umlomo wakhe uwuvule ngokuhlakanipha, nomthetho womusa wothando usolimini lwakhe.”—IZAGA 31:26.
1, 2. (a) Iyiphi imfanelo abakhulekeli bakaJehova abakhuthazwa ukuba bayihlakulele? (b) Sizoxoxa ngani kulesi sihloko?
AMAZWI anohlonze inkosi yasendulo uLemuweli eyawathola kunina ayehlanganisa nemfanelo ebalulekile yomfazi omuhle. Yatshelwa: “Umlomo wakhe uwuvule ngokuhlakanipha, nomthetho womusa wothando usolimini lwakhe.” (IzAga 31:1, 10, 26) Umusa wothando uyimfanelo efiselekayo olimini lowesifazane ohlakaniphile nakubo bonke abantu abafuna ukujabulisa uJehova uNkulunkulu. (Funda izAga 19:22.) Umusa wothando kufanele ubonakale emazwini abo bonke abakhulekeli beqiniso.
2 Uyini umusa wothando? Kufanele uboniswe kobani? Yini eyosisiza ukuba sibe “nomthetho womusa wothando” olimini lwethu? Ukwenza kanjalo kuyoyithinta kanjani indlela esikhulumisana ngayo namalungu omkhaya wethu kanye namanye amaKristu?
Lapho Umusa Wothando Ushukunyiswa Uthando Oluqotho
3, 4. (a) Uyini umusa wothando? (b) Umusa wothando uhluka kanjani emseni ovamile, noma wobuntu?
3 Njengoba yona kanye le nkulumo isikisela, umusa wothando uhlanganisa izimfanelo ezimbili, eziwumusa nothando. Uhlanganisa umusa, okungukuthi, ukuba nesithakazelo kwabanye futhi usibonise ngezenzo eziwusizo nangamazwi abonisa ukucabangela. Njengoba uhlanganisa nothando, ukubonisa umusa wothando kudinga ukuba sibe nesithakazelo enhlalakahleni yabanye ngoba sibathanda. Nokho, igama lolimi lokuqala lomusa wothando lisho okungaphezu kokubonisa umusa ngenxa yothando. Umusa wothando uwumusa onamathela ngokuzithandela nangobuqotho kothile kuze kube yilapho injongo yawo ngokuphathelene nalowo muntu isifezekile.
4 Umusa wothando uhlukile emseni ovamile nangomunye umqondo. Umusa ovamile, noma wobuntu, ungaboniswa ngisho nasezihambini. Yilolu hlobo lomusa umphostoli uPawulu nabanye abangu-275 ayehamba nabo abaluboniswa yizakhamuzi zasesiqhingini saseMelitha lapho bephukelwa umkhumbi—abantu ababengabazi nhlobo. (IzE. 27:37–28:2) Ngakolunye uhlangothi, umusa wothando uwukunamathelana ngobuqotho phakathi kwabantu asebenobuhlobo kakade.a Yilowo musa amaKheni awubonisa “bonke abantwana bakwa-Israyeli ngesikhathi bekhuphuka bephuma eGibhithe.”—1 Sam. 15:6.
Ukuzindla Nokuthandaza Kubalulekile
5. Yini eyosisiza ukuba silawule ulimi lwethu?
5 Akulula ukubonisa umusa wothando lapho sikhuluma. Ekhuluma ngolimi, umfundi uJakobe wabhala: “Akekho noyedwa kubantu ongaluthambisa. Luyinto engalawuleki elimazayo, lugcwele ubuthi obubulalayo.” (Jak. 3:8) Yini engasisiza ukuba silawule leli lungu lo mzimba okunzima kangaka ukulilawula? Amazwi uJesu awasho kubaholi benkolo bosuku lwakhe asinika ukuqonda. Wathi: “Umlomo ukhuluma ngokuchichima kwenhliziyo.” (Math. 12:34) Ukuze umusa wothando uqaphe ulimi lwethu, kudingeka siyigxilise le mfanelo enhliziyweni yethu—umuntu esinguye ngaphakathi. Ake sibone ukuthi ukuzindla nokuthandaza kungasisiza kanjani ukuba sikwenze lokhu.
6. Kungani kufanele sizindle ngokwazisa ngezenzo zikaJehova zomusa wothando?
6 IBhayibheli lithi uJehova uNkulunkulu ‘uchichima umusa wothando.’ (Eks. 34:6) Umhubi wahlabelela: “O Jehova, umusa wakho wothando ugcwalisé umhlaba.” (IHu. 119:64) ImiBhalo iqukethe ukulandisa okuningi kwendlela uJehova abonisa ngayo umusa wothando kubakhulekeli bakhe. Ukuzinika isikhathi sokuzindla ngokwazisa ‘ngezenzo zikaJehova’ kungagxilisa kithi isifiso sokuhlakulela le mfanelo yokwesaba uNkulunkulu.—Funda iHubo 77:12.
7, 8. (a) Isiphi isenzo somusa wothando uJehova asenzela uLoti nomkhaya wakhe? (b) UDavide wazizwa kanjani lapho uNkulunkulu embonisa umusa wothando?
7 Ngokwesibonelo, cabanga ngendlela uJehova akhulula ngayo umshana ka-Abrahama uLoti nomkhaya wakhe lapho ebhubhisa iSodoma, umuzi ababehlala kuwo. Njengoba isikhathi sasisondela, izingelosi ezazize kuLoti zamnxusa ukuba athathe umkhaya wakhe futhi babaleke ngokushesha kulowo muzi. IBhayibheli lithi: ‘Lapho elokhu elibala, khona-ke ngobubele bukaJehova obabuphezu kwakhe, lezi zingelosi zabamba isandla sakhe nesandla somkakhe nezandla zamadodakazi akhe amabili zabakhiphela ngaphandle zabamisa ngaphandle komuzi.’ Izinhliziyo zethu azithinteki yini lapho sizindla ngalesi senzo sokusindisa, futhi asishukunyiselwa yini ukuba sivume ukuthi lokhu kwakuwukubonakalisa umusa wothando kaNkulunkulu?—Gen. 19:16, 19.
8 Cabanga nangesibonelo senkosi yakwa-Israyeli wasendulo, uDavide, eyahlabelela: ‘UJehova uthethelela sonke isiphambeko sakho, uphulukisa zonke izifo zakho.’ Yeka indlela okumelwe ukuba uDavide wabonga ngayo ngokuthethelelwa isono sakhe asenza noBhati-Sheba! Wadumisa uJehova, ethi: “Njengoba amazulu ephakeme kunomhlaba, kanjalo umusa wakhe wothando mkhulu kulabo abamesabayo.” (IHu. 103:3, 11) Ukuzindla ngalokhu kulandisa nangokunye okusemiBhalweni kwenza izinhliziyo zethu zichichime ukwazisa ngomusa wothando kaJehova, kusishukumisele ukuba simdumise futhi simbonge. Lapho izinhliziyo zethu zigcwala ukubonga, siyothambekela ngokwengeziwe ekulingiseni uNkulunkulu weqiniso.—Efe. 5:1.
9. Abakhulekeli bakaJehova banasiphi isizathu esinamandla sokubonisa umusa wothando ekuphileni kwabo kwansuku zonke?
9 Izibonelo ezingokomBhalo zibonisa ukuthi uJehova ubabonisa umusa wakhe wothando—uthando oluqotho—labo asebamukele ukuba babe nobuhlobo naye. Kuthiwani ngalabo abangenabo ubuhlobo noNkulunkulu ophilayo? Ingabe uJehova ubaphatha ngokhahlo noma ngonya? Lutho neze. ULuka 6:35 uthi: “[UNkulunkulu] unomusa kwabangabongiyo nababi.” “Yena [wenza] ilanga lakhe liphumele abantu ababi nabahle futhi [enze] imvula ine phezu kwabantu abalungile nabangalungile.” (Math. 5:45) Ngaphambi kokuba sifunde iqiniso futhi siphile ngokuvumelana nalo, sasiwuthola umusa kaNkulunkulu, noma umusa awubonisa bonke abantu. Nokho, njengabakhulekeli bakhe, sesithola uthando lwakhe oluqotho—umusa wakhe wothando ogxilayo. (Funda u-Isaya 54:10.) Yeka indlela esibonga ngayo ngalokhu! Yeka ukuthi lokhu kuyisizathu esinamandla kangakanani sokubonisa umusa wothando lapho sikhuluma nakwezinye izici zokuphila kwethu kwansuku zonke!
10. Kungani umthandazo uwusizo olukhulu ekwenzeni umusa wothando ube ingxenye yobuntu bethu?
10 Into ewusizo olukhulu ekuhlakuleleni umusa wothando yilungelo lokuthandaza. Lokhu kungenxa yokuthi uthando nomusa—izimfanelo ezakha umusa wothando—ziphakathi kwezithelo zomoya ongcwele kaJehova. (Gal. 5:22) Singagxilisa umusa wothando ezinhliziyweni zethu ngokuqondiswa yilo moya. Indlela eqondile yokuthola umoya ongcwele kaJehova iwukuwucela ngomthandazo. (Luka 11:13) Kuyafaneleka ukuba siwuthandazele ngokuphindaphindiwe umoya kaNkulunkulu futhi samukele isiqondiso sawo. Yebo, ukuzindla nokuthandaza kubalulekile uma sifuna ukuba umthetho womusa wothando ube solimini lwethu.
Olimini Lwabantu Abashadile
11. (a) Sazi kanjani ukuthi uJehova ulindele ukuba amadoda abonise omkawo umusa wothando? (b) Umthetho womusa wothando ungayisiza kanjani indoda ukuba iqaphe ulimi lwayo?
11 Umphostoli uPawulu ukhuthaza amadoda: “Qhubekani nithanda omkenu, njengoba nje noKristu alithanda ibandla futhi wazinikela ngenxa yalo.” (Efe. 5:25) Uwakhumbuza nangalokho uJehova akutshela u-Adamu no-Eva. Lo mphostoli uthi: “Indoda iyoshiya uyise nonina inamathele kumkayo, futhi laba ababili bayoba nyamanye.” (Efe. 5:31) Kusobala ukuthi uJehova ulindele ukuba amadoda anamathele ngobuqotho komkawo, ababonise umusa wothando ngaso sonke isikhathi. Indoda elulimi lwayo lulawulwa uthando oluqotho ayiwadaluli amaphutha omkayo kwabanye noma ikhulume ngaye ngokujivazayo. Iyakujabulela ukumdumisa. (IzAga 31:28) Uma ngasizathu simbe kuphakama izinkinga emshadweni, umusa wothando ushukumisela indoda ukuba ibambe ulimi lwayo ukuze ingakhulumi ngendlela eyehlisa umkayo.
12. Amazwi enkosikazi angabonisa kanjani ukuthi ulimi lwayo lulawulwa umthetho womusa wothando?
12 Umthetho womusa wothando kufanele ulawule nolimi lwenkosikazi. Amazwi ayo akufanele athonywe umoya wezwe. Njengoba ‘inenhlonipho ejulile ngomyeni wayo,’ ikhuluma kahle ngaye emphakathini futhi yenza abanye bamhloniphe nakakhulu. (Efe. 5:33) Ingafuni ukunciphisa inhlonipho izingane ezinayo ngoyise, iyakugwema ukuphikisana naye noma ukungabaza umbono wakhe phambi kwazo. Izinto ezinjalo izixoxa naye ngasese. IBhayibheli lithi: “Owesifazane ohlakaniphe ngempela uyakhile indlu yakhe.” (IzAga 14:1) Umuzi wakhe uyindawo ejabulisayo nethokomele kuwo wonke amalungu omkhaya.
13. Umthetho womusa wothando kufanele ubuse kuphi ikakhulu, futhi kungenzeka kanjani lokho?
13 Ngisho nalapho bebodwa ekhaya, abantu abashadile kumelwe baqhubeke besebenzisa ulimi lwabo ngendlela ebonisa ukuthi bayahloniphana. UPawulu wabhala: “Kulahleni konke kude nani, ulaka, intukuthelo, ububi, inkulumo eyihlazo, nenkulumo eyichilo ephuma emlonyeni wenu.” Wanezela: “Gqokani uthando lomzwelo, umusa, ukuthobeka, ubumnene, nokubekezela. . . . Gqokani uthando, ngoba luyisibopho esiphelele sobunye.” (Kol. 3:8, 12-14) Lapho izingane zijwayele ukuzwa amazwi anothando nanomusa ekhaya, ziyokhula zijabule futhi ziyolingisa indlela abazali bazo abakhuluma ngayo.
14. Izinhloko zemikhaya zingalusebenzisa kanjani ulimi lwazo ukuze ziduduze labo abangaphansi kwazo?
14 Umhubi wabhala lokhu ngoJehova: “Siza, kwangathi umusa wakho wothando ungangiduduza.” (IHu. 119:76) Indlela evelele uJehova aduduza ngayo abantu bakhe iwukubakhuthaza nokubaqondisa. (IHu. 119:105) Izinhloko zemikhaya zingazuza kanjani esibonelweni sikaBaba wethu osezulwini futhi zisebenzise ulimi lwazo ukuze ziduduze labo abangaphansi kwazo? Lokhu zingakwenza ngokunikeza isiqondiso nesikhuthazo lapho kudingeka. Yeka ukuthi ukuKhulekela Komkhaya kwakusihlwa kuyithuba elihle kangakanani lokuthola amagugu angokomoya!—IzAga 24:4.
Bonisa Uthando Oluqotho Kwamanye AmaKristu
15. Abadala namanye amaKristu avuthiwe bangalusebenzisa kanjani ulimi lwabo ukuze balonde abanye ebandleni?
15 INkosi uDavide yathandaza: “Umusa wakho wothando nokuba kwakho neqiniso makungilonde njalo.” (IHu. 40:11) Abadala namanye amaKristu avuthiwe ngokomoya ebandleni bangamlingisa kanjani uJehova kule ndaba? Ngokuqinisekile, kungaba isenzo somusa ukusebenzisa ulimi lwethu ngenjongo yokuqondisa abanye kulokho okushiwo imiBhalo.—IzAga 17:17.
16, 17. Iziphi ezinye izindlela esingabonisa ngazo ukuthi ulimi lwethu lulawulwa umthetho womusa wothando?
16 Yini okumelwe siyenze uma sibona omunye umKristu eqala ukuphila ngendlela engqubuzana nezimiso zeBhayibheli? Umusa wothando ngeke yini usishukumisele ukuba sisebenzise ulimi lwethu ukuze sizame ukumsiza? (IHu. 141:5) Uma kwenzeka sazi ukuthi umKristu othile wenze isono esingathí sina, uthando oluqotho lusishukumisela ukuba sikhuthaze umenzi wobubi ukuba “abize amadoda amadala ebandla” ukuze “amthandazele, amgcobe ngamafutha egameni likaJehova.” (Jak. 5:14) Uma umenzi wobubi engabathinti abadala, sisuke singabonisi uthando noma umusa uma singababikeli lolo daba. Abanye phakathi kwethu kungenzeka badangele, banesizungu, bahlushwa imizwa yokuzizwa bengelutho noma bakhungethwe ukudumazeka. Indlela enhle yokubonisa ukuthi umthetho womusa wothando usolimini lwethu ‘iwukukhuluma ngokududuzayo nemiphefumulo ecindezelekile.’—1 Thes. 5:14.
17 Kufanele sisabele kanjani lapho izitha zikaNkulunkulu zisakaza amahlebezi ngamanye amaKristu? Kunokuba singabaze ubuqotho babafowethu, kumelwe siyenqabe inkulumo enjalo ngokumane sithule, noma uma lowo muntu obamangalelayo ebonakala enengqondo, singambuza ukuthi uyaqiniseka yini ngempela ngalokho akushoyo. Uma izitha zabantu bakaNkulunkulu zifuna ukwazi ukuthi zingabatholaphi abafowethu abangamaKristu ngenjongo yokubalimaza, uthando oluqotho ngabo lusishukumisela ukuba singazinikezi lokho kwaziswa.—IzAga 18:24.
Umuntu ‘Onomusa Wothando Uyothola Ukuphila’
18, 19. Kungani kungafanele ukuba umthetho womusa wothando usuke olimini lwethu lapho sisebenzelana namanye amaKristu?
18 Uthando oluqotho kufanele lube sobala kukho konke ukusebenzelana kwethu nabanye abakhulekeli bakaJehova. Ngisho nasezimweni ezinzima, umthetho womusa wothando kufanele ungasuki olimini lwethu. UJehova akazange ajabule lapho umusa wothando wabantwana bakwa-Israyeli uba “njengamazolo amukayo ekuseni.” (Hos. 6:4, 6) Ngakolunye uhlangothi, uJehova uyajabula lapho esibona siwubonisa njalo umusa wothando. Cabanga ngendlela abusisa ngayo labo abawuphishekelayo.
19 IzAga 21:21 zithi: “Ophishekela ukulunga nomusa wothando uyothola ukuphila, ukulunga nodumo.” Phakathi kwezibusiso ayozithola ukuphila okungenasiphelo, hhayi okwesikhashana. UJehova uyamsiza ukuba “abambisise ukuphila kwangempela.” (1 Thim. 6:12, 19) Ngakho-ke, masenze konke esingakwenza ukuze ‘siqhube umusa wothando komunye nomunye.’—Zak. 7:9.
[Umbhalo waphansi]
a Ukuze uthole ingxoxo eyengeziwe yendlela umusa wothando ohluke ngayo ebuqothweni, othandweni nasemseni ovamile, bheka INqabayokulinda ka-May 15, 2002, amakhasi 12-13, 18-19.
Ungachaza?
• Ungawuchaza kanjani umusa wothando?
• Yini eyosisiza ukuba sibe nomthetho womusa wothando olimini lwethu?
• Abantu abashadile bangawubonisa kanjani umusa wothando ekukhulumeni kwabo?
• Ekusebenzelaneni kwethu namanye amaKristu, yini ebonisa ukuthi umthetho womusa wothando usolimini lwethu?
[Isithombe ekhasini 23]
UDavide watusa umusa wothando kaJehova
[Isithombe ekhasini 24]
Ingabe niba nakho njalo ukuKhulekela Komkhaya kwakusihlwa?