UMbuso Oyoshintsha Wonke Umhlaba

UNGAQAGELA yini ukuthi yimuphi lo Mbuso esikhuluma ngawo?—a Yilowo uJesu asifundisa ukuba siwuthandazele. Wasifundisa ukuba sicele lokhu kuNkulunkulu: “Umbuso wakho mawuze.” (Mathewu 6:9, 10) Sekuyiminyaka ecishe ibe ngu-2 000 abalandeli bakaJesu bethandaza kuNkulunkulu ukuba uMbuso waKhe ufike. Ingabe nawe uyawuthandazela?—

Ukuze uqonde ukuthi umbuso uyini, kudingeka wazi ukuthi iyini inkosi. Inkosi umuntu obusayo. Inkosi kumelwe ibe nendawo noma izwe ezolibusa. UMbuso kaNkulunkulu uzobusa wonke umhlaba. Lapho uMbuso kaNkulunkulu ufika, bonke abantu emhlabeni bayojabulela izibusiso eziyolethwa yilowo Mbuso.

UMbuso kaNkulunkulu uwuhulumeni wasezulwini. Ku-Isaya 9:6, iBhayibheli likhuluma ngoMbusi walo hulumeni. Yizwa ukuthi lithini ngaye: “Sizalelwe umntwana, . . . ukubusa kwesikhulu kuyoba phezu kwehlombe lakhe. Igama lakhe kuyothiwa . . . iSikhulu Sokuthula.”

Ubani iNkosi yasezulwini ephakeme?— Uqinisile uma uthi uJehova. IBhayibheli lithi “ungoPhezukonke emhlabeni wonke.” (IHubo 83:18) Livame ukubiza uJesu ngokuthi “iNdodana kaNkulunkulu.” Esinye isizathu salokho ukuthi nguJehova owamnika ukuphila. UJehova unguYise kaJesu wangempela.—Luka 1:34, 35; Johane 1:34, 49; 3:17; 11:27; 20:31; IzEnzo 9:20.

UMbuso kaNkulunkulu, uJesu asifundisa ukuba siwuthandazele, uwuhulumeni okhetheke kakhulu. UJehova ubeke uJesu iNdodana yakhe ukuba ibe uMbusi walowo Mbuso. Kodwa ingabe bewazi ukuthi kunababeyokhethwa ukuba babuse njengamakhosi noJesu eMbusweni kaYise?— Ake sixoxe ngabo.

Ngaphambi nje kokuba afe, uJesu watshela abaphostoli bakhe abathembekile ukuthi wayeya “endlini” kaYise osezulwini. Wathi: “Ngiyahamba ngiyonilungisela indawo . . . ukuze kuthi lapho ngikhona nani nibe khona.” (Johane 14:1-3) Ingabe uyazi ukuthi abaphostoli nabathile abakhethiwe bayokwenzani ezulwini noJesu?— ‘Bayobusa njengamakhosi kanye naye.’ IBhayibheli lisitshela nokuthi bangaki abayobusa njengamakhosi noJesu. Bangu-144 000.—IsAmbulo 14:1, 3; 20:6.

Ucabanga ukuthi kuyoba njani emhlabeni lapho sekubusa uJesu nalabo abakhethiwe abangu-144 000?— Kuyoba kuhle kakhulu! Izimpi ziyophela. Izilwane ziyohlala ngokuthula zona zodwa kanye nathi. Akekho oyogula noma afe. Amehlo ezimpumputhe ayovuleka, izindlebe zezithulu ziyokuzwa, abayizinyonga bayogijima bagxume njengendluzele. Umhlaba uyokhiqiza inala yokudla. Bonke abantu bayothandana njengoba nje uJesu afundisa abafundi bakhe. (Johane 13:34, 35) Ake sibheke imiBhalo ka-Isaya engezansi futhi sifunde ngezinto ezinhle eziyokwenzeka.—Isaya 2:4; 11:6-11; 25:8; 33:24; 35:5, 6; 65:21-24.

Kusukela uJesu afundisa abantu ukuthi bathandaze bathi “umbuso wakho mawuze,” baningi abaye bafunda ngalowo Mbuso. Lolu lwazi luye lwashintsha ukuphila kwabo. Maduze, lapho lowo Mbuso ufika futhi uthatha indawo yabo bonke ohulumeni basemhlabeni, wonke umuntu okhonza uJehova uNkulunkulu nolalela uMbusi wakhe amkhethile, uJesu Kristu, uyojabulela ukuthula, impilo enhle nenjabulo.—Johane 17:3.