Obani Abashumayela Izindaba Ezinhle?
“ . . . ziyoshunyayelwa emhlabeni wonke owakhiwe.”—MATHEWU 24:14.
OFAKAZI BAKAJEHOVA bashumayela izindaba ezinhle emhlabeni wonke. Lokhu bakwenza ngezindlela ezihlukahlukene. Nansi enye indlela abashumayela ngayo:
Baya Kubantu. NjengoJesu nabafundi bakhe, oFakazi BakaJehova baya kubantu babatshele izindaba ezinhle. (Luka 8:1; 10:1) Abalindeli abantu ukuba beze kubo. Ukushumayela ngoMbuso kaNkulunkulu yinto eyenziwa yibo bonke oFakazi—manje abangaphezu kwezigidi ezingu-7. Bashumayela endlini ngendlu, emigwaqweni, ngocingo nangezinye izindlela. Ngonyaka ofile, oFakazi basebenza amahora angaphezu kwezigidi eziyizinkulungwane nengxenye benza lo msebenzi.
Abagcini nje ngokufundisa abanye ngoMbuso kaNkulunkulu, kodwa futhi babafundisa ‘konke uJesu abayala ngakho.’ (Mathewu 28:20) Baqhuba njalo izifundo zeBhayibheli zasekhaya zamahhala ezingaphezu kwezigidi ezingu-8.
OFakazi bashumayela emhlabeni wonke—emazweni angu-236. Bashumayeza abantu bezizinda ezihlukahlukene. Bashumayela emaphandleni nasemadolobheni, kubantu abahlala emahlathini ase-Amazon naseSiberia, ezingwadule zase-Afrika naseziNtabeni zaseHimalaya. Abakhokhelwa ngomsebenzi abawenzayo; kunalokho, basebenzisa isikhathi sabo nemali yabo ukuze bawufeze. Lokhu bakwenza ngoba bathanda uNkulunkulu nomakhelwane babo. Enye indlela abashumayela ngayo izindaba ezinhle yilena:
Bashumayela Ngezincwadi. Lo magazini, isihloko sawo esiphelele esithi INqabayokulinda Ememezela UMbuso KaJehova, manje unyatheliswa ngezilimi ezingu-185 futhi kunyatheliswa amakhophi angaphezu kwezigidi ezingu-42 umagazini ngamunye. Umngane wawo i-Phaphama!, nayo ememezela ngoMbuso, inyatheliswa ngezilimi ezingu-83 futhi kunyatheliswa amakhophi ayizigidi ezingaba ngu-40 umagazini ngamunye.
Izincwadi, izincwajana, amapheshana, ama-CD, ama-MP3 nama-DVD okuchaza izimfundiso zeBhayibheli kutholakala ngezilimi ezingaba ngu-540. Eminyakeni eyishumi edlule, oFakazi baye banyathelisa futhi basakaza amakhophi alezi zinto angaphezu kwezigidi eziyizinkulungwane ezingu-20, okungukuthi ngokwesilinganiso, umuntu ngamunye ohlala emhlabeni uye wathola ezintathu!
OFakazi BakaJehova baye banyathelisa noma baqasha ezinye izinkampani ukuba zinyathelise izinguqulo ezihlukahlukene zeBhayibheli. INguqulo Yezwe Elisha YemiBhalo Engcwele—ehunyushwa, inyatheliswe futhi isakazwe oFakazi—manje itholakala iphelele noma iyingxenye ngezilimi ezingu-96. Kuye kwasakazwa amakhophi angaphezu kwezigidi ezingu-166. Nansi enye indlela oFakazi abasakaza ngayo izindaba ezinhle zoMbuso:
Imihlangano YobuKristu. Masonto onke kuba nemihlangano emaHholo OMbuso endawo. Le mihlangano ayigcini nje ngokuba yindlela yokukhulekela; iklanyelwe ukufundisa. Kuba khona izinkulumo ezidingida izihloko zeBhayibheli futhi kutadishwa iBhayibheli kusetshenziswa umagazini INqabayokulinda nezinye izincwadi. Le mihlangano ibuye isize oFakazi ukuba babe abamemezeli bezindaba ezinhle abaphumelelayo.
OFakazi batadisha izincwadi nomagazini abafanayo emabandleni angaphezu kuka-107 000 emhlabeni wonke, futhi lokhu kunezela ebunyeni babo. Bonke abantu bamukelekile ukuza kule mihlangano. Akuthathwa nkongozelo. Yiqiniso, yonke le mizamo ibiyoba yize ukube oFakazi bebengakusebenzisi abakushumayelayo. Ngakho, enye indlela abashumayela ngayo iwukuphila ngokuvumelana nezindaba ezinhle abazishumayelayo. Kanjani?
Ngokuba Yisibonelo. Bazama ukuziphatha ngendlela amaKristu okufanele aziphathe ngayo futhi benza konke okusemandleni ukuphatha abanye ngendlela nabo abafuna ukuphathwa ngayo. (Mathewu 7:12) Nakuba bengaphelele futhi ngezinye izikhathi benza amaphutha, bazama ngobuqotho ukuphatha bonke abantu ngothando, ngokungagcini nje ngokubashumayeza, kodwa nangokubasiza ngokoqobo noma nini lapho kungenzeka.
OFakazi BakaJehova abazami ukuguqula umhlaba wonke ngokushumayela. Kunalokho, lapho uJehova esenelisekile ngokuthi lo msebenzi wenziwe kahle, uyoletha ukuphela, njengoba uJesu abikezela. Lokho kuyosho ukuthini ngomhlaba nangabantu abahlala kuwo?
[Isithombe ekhasini 7]
OFakazi BakaJehova bashumayela izindaba ezinhle emhlabeni wonke