Ingabe UMbuso KaNkulunkulu Usenhliziyweni?

Encwadini yakhe ethi, Jesus of Nazareth, uPapa uBenedict XVI uthi: “UMbuso kaNkulunkulu utholakala ngokuba nenhliziyo elalelayo.” Kwabanye, yilokho kanye okushiwo uMbuso kaNkulunkulu—ushintsho olwenzeka kumuntu ngaphakathi lapho amukela uJesu Kristu futhi eba nokholo. Ingabe uMbuso kaNkulunkulu umane nje uyinguquko eyenziwa umuntu, umbuso ‘osenhliziyweni yakho kuphela’?

UMBUSO wawuyinto ebaluleke kakhulu kuJesu. UPapa uBenedict uthi uyinto “uJesu agxila kakhulu kuyo lapho eshumayela.” Phakathi nengxenye enkulu yenkonzo yakhe eyaba mfushane, uJesu walihamba lonke izwe, “eshumayela izindaba ezinhle zombuso.” (Mathewu 4:23) Ngokufundisa kwakhe nangezimangaliso azenza, wakwenza kwaba sobala ukuthi uMbuso awusho ukwamukela uNkulunkulu nokumlalela. Uhlanganisa ukubusa, ukwahlulela nezibusiso zaphakade.

Ukubusa Nokwahlulela

Suku lumbe uJesu esezoqeda inkonzo yakhe yasemhlabeni, unina wabafundi bakaJesu ayesondelene kakhulu nabo, uJakobe noJohane, waya kuJesu wathi: “Khipha izwi lokuba la madodana ami amabili ahlale phansi, enye ngakwesokunene sakho enye ngakwesobunxele sakho, embusweni wakho.” (Mathewu 20:21) Ngokusobala, wayengakhulumi ngento esezinhliziyweni zamadodana akhe. Wayeqonda ukuthi uMbuso uhlanganisa ukubusa noJesu futhi wayefuna amadodana akhe abuse naye. Eqinisweni, uJesu wathembisa abaphostoli bakhe abathembekile abangu-11 ukuthi babeyoba seMbusweni wakhe, ‘bahlale ezihlalweni zobukhosi futhi bahlulele’ kanye naye. (Luka 22:30) Ngakho-ke, abalandeli bakaJesu babazi ukuthi uMbuso wakhe wawuyoba umbuso ongokoqobo—uhulumeni.

Kuthiwani ngabantu abavamile bangosuku lukaJesu? Ingabe babebheka uMbuso njengenguquko nje eyenziwa umuntu, noma babelindele okuthile okukhulu? Ngaphambi nje kwePhentekoste lika-33 C.E. ngesikhathi uJesu engena eJerusalema egibele ithole lembongolo, izixuku zamamukela futhi zakhamuluka: “Siyanxusa, sindisa iNdodana kaDavide!” (Mathewu 21:9) Kungani babesho la mazwi? Akungabazeki ukuthi base beqaphela ukuthi uJesu unguMesiya othenjisiwe nokuthi uNkulunkulu wayeyomnika uMbuso ongunaphakade, “isihlalo sobukhosi sikaDavide uyise.” Babelangazelela insindiso, ukuthula nobulungisa obabuyolethwa yilowo Mbuso.—Luka 1:32; Zakariya 9:9.

Izibusiso Ezingunaphakade

Ngisho nabantu ababebonakala bengayigqizi qakala inkonzo kaJesu babeyazi enye yezimfundiso zakhe. Lapho uJesu ebulawa, iselelesi esasibethelwe eduze kwakhe samcela: “Jesu, ngikhumbule lapho ungena embusweni wakho.” UJesu wasiphendula wathini? Waqinisekisa leyo ndoda eyayisizokufa: “Uyokuba nami ePharadesi.”—Luka 23:42, 43.

Kusobala ukuthi leso selelesi sasikholelwa ukuthi lapho uJesu evuswa kwabafileyo, wayeyothola, noma wayeyongena eMbusweni. UJesu wayengeke nje agcine ngokuba negunya lokuvusa nokuguqula leyo ndoda—kuhlanganise nezinye izigidi zabafileyo—kodwa wayeyokulangazelela ukukwenza lokho. Yebo, njengoba enikwe amandla okuba yiNkosi ezulwini, uyokwazi ukulethela abantu emhlabeni wonke izibusiso ezingunaphakade esebenzisa lowo Mbuso.—Johane 5:28, 29.

UMbuso Wawuphakathi Kwabo

UJesu akazange yini athi: “Umbuso kaNkulunkulu uphakathi kwenu”? Yebo washo, futhi lawo mazwi akhe atholakala kuLuka 17:21. Wayesho ukuthini?

Umongo ubonisa ukuthi washo la mazwi ekhuluma nabaFarisi, iqembu lenkolo yobuJuda elalimelene naye. Akunakwenzeka ukuthi uJesu wayekhuluma ngoshintsho olwenziwa abaFarisi noma ukuba kwabo nenhliziyo elalelayo. Babeneyabo imibono mayelana nezinto ababezilindele kuMesiya noMbuso wakhe. Kubo, uMesiya wayeyofika “namafu amazulu” njengeNkosi ekhazimulayo ezokhulula amaJuda ekubusweni amaRoma futhi abuyisele umbuso wakwa-Israyeli. (Daniyeli 7:13, 14) Kodwa uJesu wababonisa iphutha ababelenza. Wathi: “Umbuso kaNkulunkulu awuzi ngokubonakala okuphawulekayo.” Wanezela: “Bhekani! umbuso kaNkulunkulu uphakathi kwenu.”—Luka 17:20, 21.

Nakuba uJesu afundisa futhi wenza izimangaliso ezazimembula ngokucacile ukuthi uyiNkosi yoMbuso ethenjisiwe, abaFarisi bamane bamphikisa nakakhulu ngenxa yokuthi babengenazo izisusa ezinhle nokholo lweqiniso. Babengakholwa ukuthi uJesu unguMesiya. Ngakho, wababekela amaqiniso njengoba enjalo: UMbuso, owawumelelwe iNkosi yawo emisiwe, ‘wawuphakathi kwabo.’ Wayengasho neze ukuthi kufanele bahlole izinhliziyo zabo. UJesu nabafundi bakhe babemi phambi kwabo. Wathi: “Umbuso kaNkulunkulu ulapha kanye nani.”—Luka 17:21, Contemporary English Version.

UMbuso Obalulekile Kini

Nakuba uMbuso kaNkulunkulu ungekho ezinhliziyweni zabantu abonayo, kufanele ubaluleke kubo. Ngokufundisa kwakhe nangezimangaliso azenza, uJesu wazama ukusiza izilaleli zakhe ukuba zibe nokholo olusuka enhliziyweni kuhulumeni olungile owawuyoletha ukuthula nokulondeka kweqiniso. Wayefuna zibe nokholo olwaluyokwenza ukuphila kwazo kube ngcono. Eqinisweni, wazifundisa ukuba zithandaze: “Baba wethu osemazulwini, malingcweliswe igama lakho. Umbuso wakho mawuze. Intando yakho mayenzeke nasemhlabeni, njengasezulwini.” (Mathewu 6:9, 10) Amazwi akhe athinta izilaleli zakhe eziningi futhi zaba nokholo olwazishukumisela ukuba zimlandele ukuze zithole izibusiso zoMbuso kaNkulunkulu.

Ungathanda yini ukuba nalolu hlobo lokholo? Yini-ke okumelwe uyenze ukuze ube nokholo olunjalo? Khumbula amazwi okuqala ashiwo uJesu eNtshumayelweni yakhe yaseNtabeni edumile: “Bayajabula abaqaphela isidingo sabo esingokomoya, ngoba umbuso wamazulu ungowabo.” (Mathewu 5:3) Sikukhuthaza ukuba wamukele isicelo soFakazi BakaJehova abakunike lo magazini sokutadisha nawe iBhayibheli. Ngokwenza kanjalo, uyoba nethemba lokuphila ngaphansi kombuso obusa ngokulunga nobulungisa futhi uyoshintsha ube umuntu ongcono. Ngaphezu kwalokho, uyophila ngaphansi koMbuso oyolethela bonke abantu ukuthula nokulondeka.

[Amazwi acashunwe esihlokweni ekhasini 11]

Ingabe uMbuso kaNkulunkulu wawusezinhliziyweni zabaphikisi bakaJesu abanenkani nababefuna ukumbulala?