Fundiswa YiZwi LikaNkulunkulu
Iyini Injongo KaNkulunkulu Ngomhlaba?
Lesi sihloko sinemibuzo okungenzeka uke wazibuza yona futhi sikubonisa amavesi ongathola kuwo izimpendulo eBhayibhelini lakho. OFakazi BakaJehova bangakujabulela ukuxoxa nawe ngalezi zimpendulo.
1. Iyini injongo kaNkulunkulu ngomhlaba?
Umhlaba yikhaya lomuntu. Ngemva kokudala izingelosi ukuba zihlale ezulwini, uNkulunkulu wadala umuntu ukuba ajabulele umhlaba. (Jobe 38:4, 7) Ngakho, uJehova wabeka umuntu wokuqala epharadesi elihle elibizwa ngokuthi i-Edene, wanika yena nezingane ayezoba nazo ithuba lokuphila phakade emhlabeni.—Genesise 2:15-17; funda iHubo 115:16.
Insimu yase-Edene yayisengxenyeni encane yomhlaba. U-Adamu no-Eva babezoba nabantwana. Njengoba abantu babanda, babezokwenza wonke umhlaba ube ipharadesi. (Genesise 1:28) Umhlaba awusoze wabhujiswa.—Funda iHubo 104:5.
2. Kungani umhlaba ungelona ipharadesi manje?
U-Adamu no-Eva abamlalelanga uNkulunkulu, ngakho baxoshwa e-Edene. IPharadesi lalahleka futhi akekho umuntu oke waphumelela ukulibuyisa. IBhayibheli lithi: “Umhlaba ngokwawo unikelwé esandleni somubi.”—Jobe 9:24; funda uGenesise 3:23, 24.
Kodwa uJehova akayikhohliwe injongo yakhe yasekuqaleni ngabantu futhi akasoze ehluleka ukuyifeza. (Isaya 45:18) Uyobuyisela abantu esimweni ayehlose ukuba babe kuso.—Funda iHubo 37:11.
3. UNkulunkulu uyokubuyisela kanjani ukuthula emhlabeni?
Ukuze abantu babe nokuthula, uNkulunkulu kumelwe asuse abantu ababi kuqala. Empini ye-Armagedoni, izingelosi zikaNkulunkulu ziyobhubhisa bonke abamelene noNkulunkulu. USathane uyoboshwa iminyaka eyinkulungwane, kodwa abantu abathanda uNkulunkulu bayosinda, baphile esimisweni esisha sezinto emhlabeni.—Funda isAmbulo 16:14, 16; 20:1-3; 21:3, 4.
4. Kuyophela nini ukuhlupheka?
Phakathi neminyaka eyinkulungwane, uJesu uyobusa umhlaba esezulwini futhi uyowubuyisela esimweni sepharadesi. Uyosula zonke izono zabathanda uNkulunkulu. Uyoqeda ukugula, ukuguga nokufa.—Funda u-Isaya 11:9; 25:8; 33:24; 35:1.
UNkulunkulu uyobuqeda nini ububi emhlabeni? UJesu wanikeza “isibonakaliso” esasiyobonisa ukuthi ukuphela kuseduze. Izimo zezwe zisongela ukusinda kwabantu futhi zibonisa ukuthi manje siphila ‘esiphelweni sesimiso sezinto.’—Funda uMathewu 24:3, 7-14, 21, 22; 2 Thimothewu 3:1-5.
5. Obani abayophila ePharadesi elizayo?
UJesu wayala abalandeli bakhe ukuba benze abantu abafundi futhi babafundise izindlela zikaNkulunkulu zothando. (Mathewu 28:19, 20) Emhlabeni wonke, uJehova usiza izigidi zabantu ukuba zifanelekele ukuphila esimisweni esisha sezinto emhlabeni. (Zefaniya 2:3) EmaHholo OMbuso oFakazi BakaJehova, abantu bafunda ukuba abayeni nobaba abangcono, amakhosikazi nomama abangcono. Bendawonye, abazali nezingane bafundiswa izizathu zokukholelwa ukuthi abantu bayoba nekusasa elijabulisayo.—Funda uMika 4:1-4.
EHholo LoMbuso uzothola abantu abathanda uNkulunkulu nabafuna ukumjabulisa.—Funda amaHebheru 10:24, 25.
Ukuze uthole ukwaziswa okwengeziwe, bheka isahluko 3 sencwadi Lifundisani Ngempela IBhayibheli? enyatheliswa oFakazi BakaJehova.