Incwadi Evela EMadagascar
Lwaluzwakala Njengomculo Omnandi
IMITHWALO yayisisobhokweni. Sasiyoqala isabelo sethu esisha sezithunywa zevangeli—esiqhingini saseMadagascar. Savalelisa izihlobo nabangane sihlengezela izinyembezi kodwa sazama ukuziqinisa sethemba ukuthi uJehova wayesikhethele indawo esasiyophumelela kuyo.
Asisoze sawulibala umhlangano wethu webandla wokuqala esabelweni sethu esisha. Wawungafunga ukuthi umzalwane owayeqhuba iSifundo se-Nqabayokulinda ubhidisa iqembu labaculi bezinsimbi. Sasingaluzwa nhlobo ulimi kodwa lwaluzwakala njengomculo omnandi. Sabona ukuthi kwakusazothatha isikhathi ngaphambi kokuba sikuzwe kahle okwakushiwo.
Mhla ngiqala ukuzwa umbuzo womzalwane owawungekho esigabeni, ngathuka sengiwuphendulile. Ababehlezi eduze kwami bangizwa. Ngaba namahloni futhi ngahlekela phansi ngivale umlomo ngezandla, kodwa ngajabula ngokuthi kukhona engase ngikucoshacosha!
Esikhundleni sokuba kube yimina obekela abanye isibonelo enkonzweni, ngaba nomuzwa wokuthi ngidinga ukucathuliswa. Abafowethu nodadewethu bangibonisa ngothando indlela yokwethula isigijimi esizwakalayo enkonzweni yasensimini, bangibonisa okufanele ngikusho nemiBhalo okufanele ngiyisebenzise.
Ngolunye usuku ngisensimini, enye ingane yamemeza, “Vazaha! Vazaha!” Leli yigama lesiMalagasy elivamile elisho “isifiki.” Saphakamisa izinyawo ngoba singafuni ukuba kuqhamuke ezinye izingane ziqale ukusho okufanayo. Kusenjalo, omunye umfana wakhuza lona owayememeza, wathi: “Akasona isifiki, uyakwazi ukukhuluma ulimi lwethu!” Kwadingeka ukuba udade engangihamba naye angitshele ukuthi bathini ngoba angibezwanga kahle ngenxa yokuthi babekhuluma basheshe. Nakuba kunjalo, intuthuko encane engangiyenza yayingijabulisa. Ngokuhamba kwesikhathi, ngaqala ukuzizwa ngisekhaya.
Izikhathi ezimbalwa kwakuthi uma ngizizwa nginesizungu, ngizwe ngesandlana esincane sesibamba esami, uma ngibheka phansi ngibone ubuso obumamathekayo obubonisa ukuthi buyangithakasela yize ngangingakwazi ukukhuluma kahle. Ayive iyisibusiso intsha yasebandleni! Omunye udade osemusha, uHasina, uyangitolikela lapho ngikhuluma nabantu. Lapho kungekho muntu ongiqondayo, yena ubonakala engiqonda. Uvame nokungisiza lapho ngizama ukukhuluma nabangane bami ebandleni, abachazele ukuthi ngiqonde ukuthini.
Mina nomyeni wami sasisebandleni elase lizohlukaniswa kumiswe elinye. Lokho kwasho ukuthi abanye abantu abafundelwayo kwakuzodingeka badluliselwe kwabanye ngoba behlala ensimini yebandla elisha. Omunye udade wangicela ukuba ngifundele omunye wabantu ayebafundela. Ngangingazethembi, ngakho ngamazisa ukuthi angikakulungeli, kodwa wangincenga. Wangiqinisekisa ngokuthi uJehova uzongisiza ngiphumelele. Engibheke ngamehlo agcwele uthando nobungane, esebenzisa ulimi olula, wangitshela ukuthi maduze nje ngizokwazi ukufundisa abanye ngendlela engifisa ngayo. Lawo mazwi angiqinisa idolo.
Lowo mfundi uye wathuthuka kahle kakhulu. Ngelinye ilanga ngisegcekeni, ngamuzwa engimemeza. Wayehamba nomyeni wakhe beyobhalisa umshado wabo ngokomthetho. Umyeni wakhe useqalile ukufundelwa iBhayibheli, futhi kunemigomo eminingana engokomoya abafuna ukuyifinyelela; omunye wayo ukubhapathizwa. Ukuzwa lokho kwangijabulisa, yize ngazi ukuthi nguJehova odonsela abantu kuye, akuthina.
Siye safunda okuningi kulesi sabelo esisha. Nakuba sibakhumbula abangane nomndeni wethu ekhaya, sizizwa sengathi bakhona abanye babo esize nabo lapha. Sivame ukuxoxa ngabo kubafowethu nodadewethu balapha, futhi baze babuze ngabo nokuthi bayaphila yini. Sibheke phambili esikhathini lapho “umndeni” wethu walapha eMadagascar nalowo osemuva ekhaya uyohlangana khona.
Namanje ngisawuzwa “umculo” lapho abantu balapha bekhuluma. Kodwa manje sengiyawaqonda amagama. Ngibheke phambili esikhathini lapho nami ngiyokwazi ukuhambisana nalo mculo omnandi kunokuba ngiphume eceleni. UJesu wathi: “Ningalokothi nikhathazeke ngosuku olulandelayo, ngoba usuku olulandelayo luyoba nezalo izinkathazo.” (Mathewu 6:34) Ngakho, sizoqhubeka sizama ukuyifunda le ngoma kancane kancane. Okwamanje ngizoqhubeka ngibeke indlebe, ngigxilise ingqondo nenhliziyo ukuze ekugcineni ngikwazi ukulukhuluma kahle ulimi njengabafowethu nodadewethu balapha eMadagascar abanesineke nothando.
[Isithombe ekhasini 25]
Ngishumayela noHasina