Imibuzo Evela Kubafundi

Ingabe singakwazi ukusho ngokuthe ngqó ukuthi zingaki iziprofetho eziphathelene noMesiya ezisemiBhalweni YesiHebheru?

Ukutadisha ngokucophelela imiBhalo YesiHebheru kusenza sikwazi ukubona inqwaba yeziprofetho ezagcwaliseka kuJesu Kristu. Lezi ziprofetho zabikezela ngokuningiliziwe isizinda sikaMesiya, isikhathi ayeyovela ngaso, izenzo zakhe, indlela ayeyophathwa ngayo nendawo yakhe elungiselelweni likaJehova uNkulunkulu. Lapho zihlanganiswa, zakha isithombe esihle esisisiza ukuba sibone ukuthi uJesu unguMesiya. Nokho, kudingeka siqaphe uma sizama ukuthola ukuthi zingaki ngokuthe ngqó iziprofetho eziphathelene noMesiya ezitholakala emiBhalweni YesiHebheru.

Abavumelani bonke abantu ngokuthi iziphi iziprofetho eziphathelene noMesiya futhi iziphi ezingaphathelene naye. Encwadini yakhe ethi The Life and Times of Jesus the Messiah, u-Alfred Edersheim wathi imibhalo yasendulo yorabi ithi angu-456 amavesi emiBhalweni YesiHebheru akhuluma ngoMesiya, nakuba amaningi kuwo engakhulumi ngaye ngokuqondile. Ukuwabhekisisa la mavesi angu-456 kuphakamisa imibuzo ngamanye awo ukuthi ingabe ngempela ayiziprofetho ezibhekisele kuJesu Kristu. Ngokwesibonelo, u-Edersheim wathi amaJuda ayebheka uGenesise 8:11 njengobhekisele kuMesiya. Ayekholelwa ukuthi “iqabunga lomnqumo elalethwa ijuba, lalinqampunwe eNtabeni KaMesiya.” Lo mlobi wabuye wakhuluma ngo-Eksodusi 12:42. Echaza indlela amaJuda ayeliqonda ngayo ngokunganembile leli vesi, wabhala: “Njengoba uMose aphuma ogwadule, noMesiya wayeyophuma eRoma.” Akungabazeki ukuthi izazi eziningi nabanye bangakuthola kunzima ukuhlobanisa la mavesi amabili nalezi zincazelo ezinganembile noJesu Kristu.

Ngisho noma singanamathela ngokuqinile kulezo ziprofetho ezagcwaliseka ngempela kuJesu Kristu, sihlangabezana nobunzima ekuvumelaneni nenani eliqondile lazo. Ngokwesibonelo, cabanga ngo-Isaya isahluko 53 oqukethe izici zesiprofetho eziningana eziphathelene noMesiya. U-Isaya 53:2-7 uyaprofetha: “Akanaso isithunzi . . . Wadelelwa futhi wagwenywa ngabantu . . . Yena ngokwakhe wathwala ukugula kwethu . . . Wayehlatshwa ngenxa yeseqo sethu . . . Wayelethwa ngokungathi yimvu ekuhlatshweni.” Ingabe wonke la mavesi aku-Isaya isahluko 53 kufanele abhekwe njengesiprofetho esisodwa esiphathelene noMesiya, noma kufanele isici ngasinye sikaMesiya kulesi siprofetho sibhekwe njengesiprofetho esizimele?

Cabanga nango-Isaya 11:1, ofundeka kanje: “Kuyophuma ihlumela esiphunzini sikaJese; ezimpandeni zakhe ihlumela liyothela.” Lesi siprofetho siyavela futhi evesini 10, sinamagama afanayo. Ingabe kufanele sibale la mavesi amabili njengeziprofetho ezimbili ezihlukene noma sisibheke njengesiprofetho esisodwa esiphindwayo? Iziphetho esifinyelela kuzo ngo-Isaya isahluko 53 no-Isaya isahluko 11 ngokucacile ziyolithinta inani leziprofetho eziphathelene noMesiya.

Ngakho, senza kahle ngokugwema ukusho ngokuqondile ukuthi zingaki iziprofetho eziphathelene noMesiya ezisemiBhalweni YesiHebheru. Inhlangano kaJehova iye yanyathelisa izinhlu ezibonisa iziprofetho eziningi eziphathelene noJesu nokugcwaliseka kwazo.a Lezi zinhlu zingasisiza futhi zisikhuthaze esifundweni somuntu siqu, somkhaya nasenkonzweni yethu yasobala. Ngaphezu kwalokho, iziprofetho eziningi eziphathelene noMesiya, kungakhathaliseki ukuthi zingaki, zisinikeza ubufakazi obuqinile bokuthi uJesu unguKristu, noma uMesiya.

[Umbhalo waphansi]