Ingabe Uyakhumbula?

Ingabe ubafunde ngokucophelela omagazini bamuva be-Nqabayokulinda? Bona ukuthi ungakwazi yini ukuphendula imibuzo elandelayo:

• Iziphi izici ezintathu eziyinhloko ezingasisiza simelane nokuthambekela kokungathembeki?

Yilezi: (1) Hlakulela ukwesaba uNkulunkulu okunempilo. (1 Pet. 3:12) (2) Hlakulela ukuba nonembeza oqeqeshwe ngeBhayibheli. (3) Sebenza kanzima ukuze ube nomuzwa wokwaneliseka.—4/15, amakhasi 6-7.

• Sazi kanjani ukuthi ukukhonza uJehova sinombono ongathí sina akusho ukuthi kufanele sihlale siswacile noma ukuthi sigweme ukuzijabulisa?

Singacabangela isibonelo sikaJesu. Wayekujabulela ukuphumula nokudla nabanye. Siyazi ukuthi wayengahlali eswacile futhi wayengeneka. Abanye, ngisho nezingane, babedonsekela kuye futhi bezizwa bekhululekile uma benaye.—4/15, ikhasi 10.

• Yini engenziwa umbhangqwana lapho ubuhlobo bawo bubonakala buntengantenga ngemva kokuthola umntwana?

Kudingeka ubuye uvuselele uthando lwawo. Umyeni angalwela ukusiza umkakhe asuse noma imiphi imizwa yokungazethembi angase abe nayo. Bobabili futhi kudingeka basebenzele ukuba babe nokukhulumisana okuhle baxoxe ngemizwa yabo nezidingo zabo ezingokwenyama.—5/1, amakhasi 12-13.

• Yini eyayifanekiselwa umnqumo okukhulunywa ngawo encwadini yamaRoma isahluko 11?

Umnqumo umelela ingxenye yesibili yenzalo ka-Abrahama, u-Israyeli ongokomoya. UJehova unjengempande futhi uJesu unjengesiqu salo mnqumo ongokomfanekiso. Lapho amaJuda angokwemvelo amaningi enqaba uJesu, abeZizwe ababa amakholwa babengaxhunyelelwa kuwo, ngaleyo ndlela kupheleliswe isibalo esigcwele sengxenye yesibili yenzalo ka-Abrahama.—5/15, amakhasi 22-25.

• Iziphi izindaba ezinhle ngokukhethekile esingazinikeza abampofu?

Lezo zindaba ezinhle yilezi: UNkulunkulu umise uJesu njengeNkosi. UJesu unguMbusi omuhle kakhulu ozoqeda ukuhlupheka. Kungani? Ngoba uzobusa bonke abantu futhi unamandla okuthatha isinyathelo; unozwela ngabahluphekayo; futhi angayiqeda imbangela yokuhlupheka, ewukuthambekela ekwenzeni izinto ngobugovu esakuzuza njengefa.—6/1, ikhasi 7.

• Wayesho ukuthini uJesu lapho ethi kuKayafase: “Wena ngokwakho ushilo”?—Math. 26:63, 64.

Kubonakala sengathi inkulumo ethi “wena ngokwakho ushilo” yayiyindlela evamile yokukhuluma yamaJuda ayeyisebenzisa ukuze aqinisekise ukuthi okushiwo kuyiqiniso. UMpristi Ophakeme uKayafase wayebuze uJesu ukuthi wayenguKristu iNdodana kaNkulunkulu. Ukuphendula kukaJesu ngokuthi: “Wena ngokwakho ushilo” kwakuyimpendulo eqinisekisa lokho.—6/1, ikhasi 18.

• Ingabe abantwana abaphelele uJesu ayengaba nabo babeyoba ingxenye yesihlengo?

Cha. Nakuba uJesu ayengase abe ubaba wezigidi zabantwana abaphelele, labo bantwana babengeke babe ingxenye yesihlengo. Ukuphila okuphelele kukaJesu yedwa kwakulingana nokuka-Adamu. (1 Thim. 2:6)—6/15, ikhasi 13.

• AmaKristu angabonisa kanjani ukuthi ayasilalela isixwayiso ngabafundisi bamanga esilotshwe encwadini yezEnzo 20:29, 30?

Awabamukeli abafundisi bamanga emakhaya awo futhi awababingeleli. (Roma 16:17; 2 Joh. 9-11) AmaKristu agwema izincwadi zezihlubuki, izinhlelo ze-TV izihlubuki ezivela kuzo nezingosi ze-Internet ezinezimfundiso zazo.—7/15, amakhasi 15-16.

• Ubani okufanele afundise izingane ngoNkulunkulu?

Ubaba nomama kumelwe balekelelane ekwenzeni lokhu, ngokuvumelana neseluleko seBhayibheli. (IzAga 1:8; Efe. 6:4) Ucwaningo lubonisa ukuthi lapho bobabili abazali behileleka, kuba nomphumela omuhle ezinganeni.—8/1, amakhasi 6-7.