Umkhaya Ohlukene Ngokwenkolo Ungaba Nayo Injabulo

“Wazi ngani ukuthi ngeke umsindise [umngane wakho womshado]?”—1 KOR. 7:16.

UNGAKWAZI YINI UKUPHENDULA?

Yini amaKristu angayenza ukuze ahlakulele ukuthula emkhayeni ohlukene ngokwenkolo?

UmKristu angase awasize kanjani amalungu omkhaya angakholwa ukuba amukele ukukhulekela kweqiniso?

Abanye bangenzani ukuze basize amaKristu akanye nabo asemikhayeni ehlukene ngokwenkolo?

1. Ukwamukela isigijimi soMbuso kungaba namuphi umphumela emkhayeni?

NGESINYE isikhathi, lapho uJesu ethuma abaphostoli bakhe, wathi: “Njengoba nihamba, nishumayele, nithi, ‘Umbuso wamazulu ususondele.’” (Math. 10:1, 7) Lezi zindaba ezinhle zaziyoletha ukuthula nenjabulo kulabo abazamukela ngokwazisa okuqotho. Nokho, uJesu waxwayisa abaphostoli bakhe ngokuthi abaningi babeyowuphikisa umsebenzi wabo wokushumayela ngoMbuso. (Math. 10:16-23) Ukuphikiswa okubuhlungu nakakhulu yilokho okwenzeka lapho amalungu omkhaya enqaba isigijimi soMbuso.—Funda uMathewu 10:34-36.

2. Kungani amaKristu asemikhayeni ehlukene ngokwenkolo engajabula?

² Ingabe lokhu kusho ukuthi abalandeli bakaKristu abasemikhayeni ehlukene ngokwenkolo abanakuyithola injabulo? Lutho neze! Nakuba ngezinye izikhathi ukuphikiswa okuvela emkhayeni kungaba nzima kakhulu, akubi njalo ngaso sonke isikhathi. Ngaphezu kwalokho, ukuphikisa komkhaya kungaphela ngokuhamba kwesikhathi. Okuningi kuxhomeke endleleni amaKristu asabela ngayo kulokho kuphikiswa noma ukunganakwa. Ngaphezu kwalokho, uJehova uyababusisa labo abaqotho kuye, abenze bajabule naphezu kwezimo ezingezinhle. Abakholwayo banganezela enjabulweni yabo (1) ngokulwela ukuhlakulela ukuthula ekhaya (2) nangokuzama ngobuqotho ukusiza amalungu omkhaya angakholwa ukuba amukele ukukhulekela kweqiniso.

HLAKULELA UKUTHULA EKHAYA

3. Kungani umKristu osemkhayeni ohlukene ngokwenkolo kufanele ahlakulele ukuthula?

³ Kudingeka ukuba kube nokuthula ekhaya ukuze imbewu yokulunga ithele izithelo emkhayeni. (Funda uJakobe 3:18.) Ngisho noma umkhaya wakhe ungakabi munye ekukhulekeleni okuhlanzekile, umKristu kumelwe enze umzamo oqotho wokuhlakulela ukuthula ekhaya. Lokhu kungenziwa kanjani?

4. AmaKristu angakulondoloza kanjani ukuthula kwawo kwangaphakathi?

⁴ AmaKristu kumelwe alondoloze ukuthula kwawo kwangaphakathi. Lokhu kudinga umthandazo oqotho, ongasilethela “ukuthula kukaNkulunkulu” okungenakuqhathaniswa. (Fil. 4:6, 7) Injabulo nokuthula kutholakala ngokungenisa ulwazi ngoJehova nangokusebenzisa izimiso ezingokomBhalo ekuphileni. (Isaya 54:13) Ukuhlanganyela emihlanganweni yebandla nasenkonzweni yasensimini ngentshiseko nakho kuyadingeka uma sifuna ukuba nokuthula nenjabulo. Ngokuvamile, amalungu akholwayo ahlala emkhayeni ohlukene ngokwenkolo angakwazi ukuhlanganyela ngandlela-thile emisebenzini yobuKristu. Ngokwesibonelo, cabanga ngo-Enza,a umyeni wakhe omphikisa ngendlela enobudlova. Uhlanganyela emsebenzini wokwenza abafundi ngemva kokuba eseqede imisebenzi yakhe yasekhaya. Uthi, “Isikhathi ngasinye lapho ngenza umzamo wokuhlanganyela izindaba ezinhle nabanye, uJehova ungibusisa ngokucebile ngemiphumela emihle.” Ngokuqinisekile, lezo zibusiso ziletha ukuthula, ukwaneliseka nenjabulo.

5. Iyiphi inselele amaKristu asemikhayeni ehlukene ngokwenkolo avame ukubhekana nayo, futhi iluphi usizo olutholakalayo?

⁵ Kudingeka senze umzamo oqotho ukuze kube nokuthula phakathi kwethu namalungu omkhaya angakholwa. Lokhu kungase kube inselele ngoba ngezinye izikhathi lokho afuna sikwenze kungase kungqubuzane nezimiso zeBhayibheli. Ukunamathela kwethu ngobuqotho ezimisweni ezilungile kungase kuwacasule amanye amalungu omkhaya angakholwa, kodwa ukunamathela kuzo kugcina kulethe ukuthula. Yiqiniso, ukungahoxi lapho into ingangqubuzani nezimiso ezingokomBhalo kungabangela ukuhilizisana okungadingekile. (Funda izAga 16:7.) Lapho sibhekene nenselele, kubalulekile ukuba sifune iseluleko esingokomBhalo kubadala nasezincwadini ezikhishwa isigaba senceku ethembekileyo neqondayo.—IzAga 11:14.

6, 7. (a) Kungani abanye bephikisa amalungu omkhaya aqala ukufunda noFakazi BakaJehova? (b) Umuntu ofundelwa iBhayibheli noma umKristu kufanele asabele kanjani ekuphikiseni komkhaya?

⁶ Kudingeka sethembele kuJehova futhi sibe nokuqondisisa ngemizwa yamalungu omkhaya angakholwa ukuze sihlakulele ukuthula emkhayeni. (IzAga 16:20) Ngisho nabasanda kuqala ukufundelwa iBhayibheli bangabonisa ukuqonda kule ndaba. Abanye abayeni noma amakhosikazi angakholwa bangase bangabi nankinga lapho umngane wabo womshado efundelwa iBhayibheli. Bangase bavume ngisho nokuvuma ukuthi lokhu kungawuzuzisa umkhaya. Nokho, abanye bangase balwisane nakho. U-Esther, manje osenguFakazi, uyavuma ukuthi “wathukuthela ngempela” lapho umyeni wakhe eqala ukufunda iBhayibheli noFakazi BakaJehova. Uthi, “Ngangizilahla izincwadi zakhe noma ngizishise.” UHoward, ekuqaleni owayemelene nokufunda komkakhe iBhayibheli, uthi: “Amadoda amaningi esaba ukuthi omkawo bayengelwa ukuba bajoyine ihlelo lenkolo. Umyeni angase angazi ukuthi kufanele asabele kanjani kulokhu akubheka njengosongo abese ephikisa.”

⁷ Umfundi weBhayibheli ophikiswa umngane wakhe womshado kufanele asizwe ukuba abone ukuthi akudingeki ayeke ukufunda. Ngokuvamile uyokwazi ukulungisa izinto ngokuba mnene nangokuhlonipha umngane wakhe womshado ongakholwa. (1 Pet. 3:15) UHoward uthi, “Angive ngijabula ngokuthi umkami wahlala ezolile wangathatha izinto ngamawala!” Umkakhe uyachaza: “UHoward wayengiphoqa ukuba ngiyeke ukufunda iBhayibheli ethi ngiluthwa ingqondo. Kunokuba ngiqophisane naye, ngamane ngathi mhlawumbe uqinisile kodwa ngamtshela nokuthi ngangingaboni ukuthi lokho kungenzeka kanjani ngempela. Ngakho, ngamcela ukuba afunde incwadi engangiyifunda. Wakwenza lokho futhi akazange aphikisane nalokho ekushoyo. Lokhu kwamthinta ngokujulile.” Kuhle ukukhumbula ukuthi abangane bomshado abangakholwa bangase bazizwe belahlwa noma besongelwa lapho abangane babo abangamaKristu beya emisebenzini yobuKristu, kodwa ukuqinisekiswa ngokuthi basathandwa kungenza lukhulu ekudambiseni leyo mizwa.

BASIZE BAMUKELE UKUKHULEKELA KWEQINISO

8. Isiphi iseluleko umphostoli uPawulu asinikeza amaKristu anabangane bomshado abangakholwa?

⁸ Umphostoli uPawulu uyala umKristu ukuba angamshiyi umuntu ashade naye ngoba nje engakholwa.b (Funda eyoku-1 Korinte 7:12-16.) Ukukhumbula ukuthi umngane womshado ongakholwa angagcina engumKristu kungasiza okholwayo ukuba alondoloze injabulo yakhe nakuba esemkhayeni ohlukene ngokwenkolo. Nokho, njengoba okuhlangenwe nakho okulandelayo kubonisa, kudingeka siqaphe lapho sizama ukusiza umngane ongakholwa amukele isigijimi seqiniso.

9. Lapho uqala ukukhuluma ngeqiniso leBhayibheli namalungu omkhaya angakholwa, yikuphi ukuqapha okudingekayo?

⁹ Ekhumbula indlela asabela ngayo lapho efunda iqiniso leBhayibheli, uJason uthi, “Ngangifuna ukutshela wonke umuntu!” Lapho umfundi weBhayibheli eqala ukuqonda amaqiniso awafunda emiBhalweni, angase ajabule kakhulu aze akhulume ngawo ngaso sonke isikhathi. Angase alindele ukuba amalungu omkhaya angakholwa amukele isigijimi soMbuso ngokushesha, kodwa lawo malungu angase angasamukeli. Isasasa uJason ayenalo ekuqaleni lamthinta kanjani umkakhe? Umkakhe uyakhumbula: “Ngakhungatheka.” Omunye wesifazane owamukela iqiniso ngemva kweminyaka engu-18 umyeni alamukela uthi, “Mina kwadingeka ngilifunde kancane kancane.” Uma uqhuba isifundo seBhayibheli nomfundi omngane wakhe womshado akathandi ukuhlanganyela naye ekukhulekeleni kweqiniso, kungaba njani nibe nezikhathi zokuprakthiza njalo ukuze usize lo mfundi ukuba abe nesu lokungacunuli lapho exoxa ngalezi zindaba? UMose wathi: “Imfundiso yami iyoconsa njengemvula, amazwi ami aconse njengamazolo, njengemikhemezelo phezu kotshani.” (Dut. 32:2) Ukukhetha izikhathi ezikahle zokukhuluma ngamaqiniso eBhayibheli ambalwa kungenza lukhulu kunokugcingca umngane wakho.

10-12. (a) Isiphi iseluleko umphostoli uPetru asinikeza amaKristu anabangane bomshado abangakholwa? (b) Omunye umuntu ofundelwa iBhayibheli wafunda kanjani ukusebenzisa iseluleko esikweyoku-1 Petru 3:1, 2?

¹⁰ Umphostoli uPetru wanikeza abafazi abangamaKristu abasemikhayeni ehlukene ngokwenkolo iseluleko esiphefumulelwe. Wabhala: “Zithobeni kubayeni benu, ukuze kuthi, uma bekhona abangalilaleli izwi, bazuzwe ngaphandle kwezwi ngokuziphatha kwabafazi babo, ngoba beye baba ofakazi bokuzibonela bokuziphatha kwenu okumsulwa kanye nenhlonipho ejulile.” (1 Pet. 3:1, 2) Inkosikazi ingase ikwazi ukuzuza umyeni wayo ukuba ahlanganyele nayo ekukhulekeleni kweqiniso ngokumthobela nangokumhlonipha ngokujulile, ngisho noma eyiphatha ngonya. Ngokufanayo, indoda ekholwayo kufanele iziphathe ngendlela yokwesaba uNkulunkulu futhi ibe inhloko yomkhaya enothando naphezu kwanoma ikuphi ukuphikisa komkayo ongakholwa.—1 Pet. 3:7-9.

¹¹ Ziningi izibonelo namuhla ezibonisa inzuzo yokusebenzisa iseluleko sikaPetru. Cabanga ngalokho okwenzeka kuSelma. Lapho eqala ukufunda iBhayibheli noFakazi BakaJehova, umyeni wakhe, uSteve, akakuthandanga lokho. Umyeni uyavuma, “Ngathukuthela, ngaba nesikhwele, futhi ngazizwa ngingalondekile.” USelma uthi: “Ngisho nangaphambi kokuba ngithole iqiniso, ukuhlala noSteve kwakudinga ngiqikelele izinto engizishoyo nengizenzayo. Wayeyisififane. Lapho ngiqala ukufunda iBhayibheli, lolu laka lwakhe lwakhula.” Yini eyasiza?

¹² USelma ukhumbula isifundo asifunda kuFakazi owayemfundela. Uthi: “Ngolunye usuku, ngangingafuni ukufunda ngoba ngayizolo ebusuku, uSteve wayengishayile ngizama ukumbonisa into ethile. Ngangiphatheke kabi futhi ngidabukile. Ngemva kokutshela udade owayengifundela okwakwenzekile nendlela engangizizwa ngayo, wangicela ukuba ngifunde eyoku-1 Korinte 13:4-7. Njengoba ngiyifunda, ngaqala ukuziphendulela, ‘USteve akakaze angenzele neyodwa yalezi zinto ezibonisa uthando.’ Kodwa lo dade wangenza ngacabanga ngendlela ehlukile ngokungibuza, ‘Kulezi zenzo zothando, zingaki wena ozibonisa umyeni wakho?’ Ngaphendula ngokuthi, ‘Azikho, ngoba ulukhuni.’ Ngomoya ophansi lo dade wathi, ‘Selma, ubani ozama ukuba umKristu lapha? Nguwe noma uSteve?’ Ngiqaphela ukuthi kwakudingeka ngilungise ukucabanga kwami, ngathandaza kuJehova ngicela ukuba angisize ngimthande kakhudlwana uSteve. Kancane kancane, izinto zaqale ukushintsha.” USteve wamukela iqiniso ngemva kweminyaka engu-17.

INDLELA ABANYE ABANGASIZA NGAYO

13, 14. Abanye ebandleni bangabasiza kanjani labo abasemikhayeni ehlukene ngokwenkolo?

¹³ Njengemikhemezelo yemvula ematisa inhlabathi futhi isize izitshalo ukuba zikhule, abantu abaningi ebandleni banesandla enjabulweni yamaKristu asemikhayeni ehlukene ngokwenkolo. U-Elvina waseBrazil uthi: “Uthando lwabafowethu nodadewethu yilo olwangisiza ukuba ngime ngiqine eqinisweni.”

¹⁴ Uma abanye ebandleni bebonisa umusa nesithakazelo elungwini lomkhaya elingakholwa kungayithinta kakhulu inhliziyo yalo. Umyeni othile eNigeria owamukela iqiniso ngemva kweminyaka engu-13 umkakhe alamukela uthi: “Ngesinye isikhathi ngihamba noFakazi othile, imoto yakhe yephuka. Wafuna oFakazi abahlala eduze futhi basilalisa emzini wabo. Basinakekela sengathi kade sazana. Ngavele ngaluzwa ngaso leso sikhathi uthando lobuKristu umkami ayehlale ekhuluma ngalo.” ENgilandi, inkosikazi eyamukela iqiniso ngemva kweminyaka engu-18 umyeni wayo alamukela, iyakhumbula: “OFakazi babesimema sobabili ukuba sizodla nabo. Ngangizizwa njalo ngamukelekile.”c Ezweni elifanayo, umyeni othile owagcina esenguFakazi, uthi: “Abafowethu nodade babesivakashela, noma besimemela emizini yabo, futhi ngaqaphela ukuthi bangabantu abakhathalelayo. Lokhu kwaphawuleka ngokukhethekile lapho ngisesibhedlela futhi abaningi bengivakashela.” Zikhona yini izindlela ongabonisa ngazo isithakazelo esifanayo emalungwini omkhaya angakholwa?

15, 16. Yini engasiza umKristu ukuba alondoloze injabulo yakhe lapho abanye emkhayeni beqhubeka bengakholwa?

¹⁵ Yiqiniso, akubona bonke abangane bomshado, izingane, abazali noma abanye esihlobene nabo abangakholwa abalamukelayo iqiniso ngisho nangemva kweminyaka eminingi yokuziphatha ngokwethembeka nokufakaza ngesu lokungacunuli kwalowo okholwayo. Abanye baqhubeka bengenandaba noma baphikise umshawushile. (Math. 10:35-37) Nokho, lapho amaKristu ebonisa izimfanelo zokwesaba uNkulunkulu, lokhu kungaba nomphumela omuhle kakhulu. Umyeni owayengakholwa ngaphambili uthi: “Lapho umngane womshado okholwayo eqala ukubonakalisa lezo zimfanelo ezithandekayo, awazi ukuthi kwenzekani engqondweni nasenhliziyweni yalowo ongakholwa. Ngakho, ungalilahli ithemba ngomngane wakho ongakholwa.”

¹⁶ Ngisho noma ilungu lomkhaya liqhubeka lingumuntu ongakholwa, umKristu angakwazi ukujabula. Nakuba umyeni wakhe engazange asabele esigijimini soMbuso yize sekuyiminyaka engu-21 ezama ukumshumayeza, omunye udade uthi: “Ngiyakwazi ukulondoloza injabulo yami ngokulwela ukuthokozisa uJehova, ngokugcina ubuqotho bami kuye nangokuziqinisa ngokomoya. Ukugxila emisebenzini engokomoya—isifundo somuntu siqu, ukuba khona emihlanganweni, inkonzo yasensimini nokusiza abanye ebandleni—kuye kwangisondeza kakhulu kuJehova futhi kwalonda inhliziyo yami.”—IzAga 4:23.

UNGAPHELI AMANDLA!

17, 18. UmKristu angahlala kanjani enethemba ngisho nasemkhayeni ohlukene ngokwenkolo?

¹⁷ Uma ungumKristu othembekile osemkhayeni ohlukene ngokwenkolo, ungapheli amandla. Khumbula ukuthi “uJehova ngeke abalahle abantu bakhe ngenxa yegama lakhe elikhulu.” (1 Sam. 12:22) Unawe uma nje ubambelela kuye. (Funda eyesi-2 IziKronike 15:2.) Ngakho, “jabula kakhulu ngoJehova.” Ngempela, “gingqela indlela yakho kuJehova, wethembele kuye.” (IHu. 37:4, 5) ‘Phikelela emthandazweni,’ futhi ube nokholo lokuthi uBaba wethu osezulwini onothando angakusiza ukuba ukhuthazelele bonke ubunzima.—Roma 12:12.

¹⁸ Cela uJehova ukuba akunike umoya wakhe ongcwele ukuze ukusize uhlakulele ukuthula ekhaya. (Heb. 12:14) Yebo, kungenzeka ukuba ukhuthaze izimo zokuthula ezingase ekugcineni zithinte inhliziyo yamalungu omkhaya angakholwa. Uyothola injabulo nokuthula kwengqondo nenhliziyo njengoba ‘zonke izinto uzenzela inkazimulo kaNkulunkulu.’ (1 Kor. 10:31) Lapho ulwela ukwenza konke lokhu, yeka ukuthi kukhuthaza kanjani ukwazi ukuthi abafowenu nodadewenu ebandleni lobuKristu bayokusekela ngothando!

[Imibhalo yaphansi]

[Isithombe ekhasini 28]

Khetha isikhathi esihle sokuchaza izinkolelo zakho

[Isithombe ekhasini 29]

Bakhathaleleni abangane bomshado abangakholwa