Umuntu Ophayo Uyobusiswa

IMIHLATSHELO ibilokhu iyingxenye ebalulekile yokukhulekela kweqiniso. Ama-Israyeli ayenza imihlatshelo yezilwane kanti amaKristu aziwa ngokwenza ‘imihlatshelo yokudumisa.’ Nokho, kuneminye imihlatshelo ejabulisa uNkulunkulu. (Heb. 13:15, 16) Le mihlatshelo iletha injabulo nezibusiso njengoba izibonelo ezilandelayo zibonisa.

UHana, incekukazi ethembekile yasendulo, wayefuna ngayo yonke inhliziyo yakhe ukuba nendodana kodwa wayengakwazi ukuthola abantwana. Lapho ethandaza, wafunga kuJehova wathi uma engathola indodana, ‘uyoyinika uJehova zonke izinsuku zokuphila kwayo.’ (1 Sam. 1:10, 11) Ngokuhamba kwesikhathi, uHana wakhulelwa, wabeletha indodana wayibiza ngokuthi uSamuweli. Ngemva kokuba uSamuweli elunyuliwe, uHana wamyisa etabernakele, njengoba nje ayefungile. UJehova wambusisa uHana ngokuzidela kwakhe. UHana waba nezinye izingane ezingu-5, uSamuweli waba umprofethi nomlobi weBhayibheli.—1 Sam. 2:21.

NjengoHana noSamuweli, amaKristu namuhla anethuba lokusebenzisa ukuphila kwawo enkonzweni yesikhathi esigcwele. UJesu wathembisa ukuthi uJehova uyobusisa noma yimiphi imizamo yokuzidela esiyenzayo ukuze simkhonze.—Marku 10:28-30.

Ekhulwini lokuqala, owesifazane ongumKristu uDorka wayaziwa ngokwenza ‘izenzo eziningi ezinhle nezipho eziningi zesihe’—imihlatshelo ayeyenza ukuze asize abanye. Ngokudabukisayo, uDorka wagula futhi wafa, lokhu kwalizwisa ubuhlungu ibandla. Lapho abafundi bezwa ukuthi uPetru wayekuleyo ndawo, bamnxusa ukuba afike ngokushesha. Akungabazeki ukuba bajabula lapho uPetru efika futhi evusa uDorka, owaba umuntu wokuqala obhaliwe eBhayibhelini owavuswa umphostoli! (IzE. 9:36-41) UNkulunkulu wayengayikhohliwe imihlatshelo kaDorka. (Heb. 6:10) Imisebenzi yakhe yokupha igcinwe eZwini likaNkulunkulu ukuze silingise isibonelo sakhe esihle.

Umphostoli uPawulu naye wabeka isibonelo esihle ngokusebenzisa isikhathi sakhe enaka abantu. Lapho ebhalela abafowabo abangamaKristu eKorinte uPawulu wathi: “Mina ngizokuthokozela kakhulu ukusebenzisa konke enginakho nokuba ngisetshenziswe ngokuphelele ngenxa yemiphefumulo yenu.” (2 Kor. 12:15) UPawulu wabona ngokwenzeka kuye ukuthi ukuzidela ngenxa yabanye akujabulisi wena kuphela kodwa okubaluleke nakakhulu kukwenza uthole izibusiso futhi wamukelwe uJehova.—IzE. 20:24, 35.

Kusobala ukuthi uJehova uyajabula lapho sisebenzisa isikhathi namandla ethu ukuze sishumayele futhi sisize esikholwa nabo. Kodwa zikhona yini ezinye izindlela esingasekela ngazo umsebenzi wokushumayela ngoMbuso? Yebo zikhona. Okunye esingakwenza, ukudumisa uNkulunkulu ngokunikela ngezinto ezibonakalayo noma ngemali. Iminikelo yethu ithuthukisa umsebenzi wokushumayela, isekele izithunywa zevangeli nabanye abasenkonzweni yesikhathi esigcwele. Ngaphezu kwalokho, iminikelo yethu yokuzithandela isekela umsebenzi wokuhumusha, ukwenziwa kwama-video, isize ezinhlekeleleni zemvelo nasekwakhiweni kwamaHholo OMbuso. Singaqiniseka ngokuthi umuntu ophayo uyobusiswa. Ngaphezu kwalokho sisuke sidumisa uJehova lapho sinikela ngezinto zethu zenani elikhulu.—IzAga 3:9; 22:9.

Indlela Abanye Abanikela Ngayo Emsebenzini Womhlaba Wonke

Njengasesikhathini somphostoli uPawulu, abaningi namuhla ‘babeka eceleni okuthile’ noma bahlela ukunikela ngemali ethile bese beyifaka ebandleni ebhokisini lomnikelo elibhalwe ukuthi “Umsebenzi Womhlaba Wonke.” (1 Kor. 16:2) Njalo ngenyanga, amabandla athumela iminikelo ehhovisini legatsha loFakazi BakaJehova eliqondisa umsebenzi wokushumayela kuleyo ndawo. Ungakwazi nokuthumela iminikelo ngokuqondile enhlanganweni engokomthetho esetshenziswa oFakazi BakaJehova ezweni lakini. Ukuze uthole igama lenhlangano engokomthetho esetshenziswa oFakazi BakaJehova ezweni lakini, sicela uxhumane nehhovisi legatsha. Ikheli lingatholakala ku-www.pr2711.com/zu. Nazi izindlela onganikela ngazo, kuye ngezimo zendawo okuyo, nohlobo lwendlela yokunikela ofuna ukuyisebenzisa:

IMINIKELO EQONDILE

Unganikela ngokuthumela imali kuyi-akhawunti yenhlangano, noma usebenzise ikhadi lasebhange, noma nge-credit card. Kwamanye amazwe ungakwazi ukunikela usebenzisa ingosi ethi jw.org/zu noma enye ingosi efanele.
Unganikela ngemali engukheshe, amagugu okuhloba (jewelry), noma ezinye izinto eziyigugu. Lowo mnikelo kumelwe uhambisane nencwadi echazayo ukuthi leyo mali noma into iwumnikelo oqondile.

IMINIKELO ENEMIBANDELA

Iminikelo yemali engaphindiselwa uma onikele ngayo eyidinga.
Bhala incwadi echaza ukuthi umnikelo unemibandela.

EZINYE IZINDLELA ZOKUNIKELA

Ukwenezela ekunikeleni ngemali nezinto eziyigugu, zikhona nezinye izindlela zokunikela ezingazuzisa umsebenzi woMbuso kuwo wonke umhlaba. Lezi zindlela zibalwe ngezansi. Kungakhathaliseki ukuthi uthanda ukusebenzisa yiphi indlela noma izindlela, sicela uqale uxhumane nehhovisi legatsha elikhonza izwe lakini ukuze uthole ukuthi yiziphi izindlela ezisebenzisekayo. Njengoba izimfuneko ezingokomthetho nemithetho yentela ingefani, kubalulekile ukubuza othile owazi kabanzi ngezomthetho ngaphambi kokuba ukhethe indlela ozonikela ngayo.

Umshwalense: Uma umuntu enomshwalense wokuphila noma womhlalaphansi/wempesheni, anganikela ngokubhalisa enye yezinhlangano ezingokomthetho ezisetshenziswa oFakazi BakaJehova njengendlalifa.

Ama-akhawunti Asebhange: Imali ekuyi-akhawunti yasebhange inganikwa inhlangano engokomthetho ezisetshenziswa oFakazi BakaJehova njengendlalifa, kuye ngezimfuneko zamabhange endawo.

Amasheya Nama-bond: Umuntu anganikela ngamasheya nama-bond akhe enhlanganweni engokomthetho esetshenziswa oFakazi BakaJehova noma enze isivumelwano esibhalwe phansi esinikeza isiqondiso sokuba lawo masheya nama-bond adluliselwe kuyo uma efa.

Izakhiwo Nezindawo: Uma umuntu enesakhiwo nendawo okungathengiseka, anganikela ngakho enhlanganweni engokomthetho esetshenziswa oFakazi BakaJehova noma uma onikelayo ehlala kuleyo ndawo, angase ahlele ukuba aqhubeke ehlala kuyo kuze kube yilapho eshona.

Izincwadi Zefa Nama-Trust: Umuntu angahlela ukuba impahla yakhe noma imali inikelwe enhlanganweni esetshenziswa oFakazi BakaJehova lapho eshona. Lokho angakwenza ngokuthi abhale encwadini yefa engokomthetho noma ngokubhala igama lenhlangano ezozuza esivumelwaneni se-trust. Leli lungiselelo lingaba nezinzuzo ezithile ngokuphathelene nentela.

Njengoba igama elithi “ukunikela okuhleliwe” libonisa, lezi zindlela zokunikela ngokuvamile zidinga ukuba onikelayo ahlele. Ukuze kusizwe abantu abafisa ukusekela umsebenzi womhlaba wonke woFakazi BakaJehova ngohlobo oluthile lokunikela okuhleliwe, kuye kwalungiselelwa incwajana ethi Charitable Planning to Benefit Kingdom Service Worldwide. Le ncwajana etholakala ngesiNgisi nangeSpanish, yabhalelwa ukunikeza ukwaziswa ngezindlela ezihlukahlukene zokunikela ezingasetshenziswa manje noma kamuva, njengokushiyela othile ifa. Ukwaziswa okutholakala kule ncwajana kungase kungasebenzi ngokugcwele esimweni sakho ngenxa yemithetho yentela noma eminye imithetho yasezweni lakini. Ngokusebenzisa lezi zindlela zokunikela ngokuzithandela, abaningi baye basiza ekusekeleni imisebenzi yethu engokwenkolo emhlabeni kabanzi futhi basebenzisa ngokugcwele izinzuzo zentela. Uma ikhona ezweni lakini, le ncwajana ingatholakala ngokucela ikhophi kunobhala ebandleni okulo.

Ukuze uthole imininingwane eyengeziwe, chofoza amagama athi “Nikelela Umsebenzi Wethu Womhlaba Wonke” asezansi kunoma yiliphi ikhasi le-jw.org/zu, noma uxhumane nehhovisi legatsha.