Uyamenywa Emhlanganweni Wesigodi Ka-1989 “Wokuzinikela KuNkulunkulu”!
1 Amazwi athi “ukuzinikela kokwesaba uNkulunkulu” abhekisela ekuhlonipheni, ekukhulekeleni, nasekukhonzeni uNkulunkulu, ngokuthembeka ebukhosini bakhe bendawo yonke. Isibonelo esiphambili sokuzinikela kokwesaba uNkulunkulu uJesu Kristu. Wayengumuntu okuwukuphela kwakhe owabonisa ukuzinikela kokwesaba uNkulunkulu ngokuphelele ngaphansi kwezimo ezinzima kwaze kwaba sekufeni kwakhe. (1 Thim. 3:16; Heb. 7:26) Njengabalandeli bakaKristu, kumelwe siziqeqeshe ngokuzikhandla ukuze sibonise ukuzinikela kokwesaba uNkulunkulu. Lokhu kuhilela ukukhuthazelela ukuphikiswa njengoba kwenza uJesu. (2 Thim. 3:12) Ukuziqeqesha sinomgomo wokuzinikela kokwesaba uNkulunkulu “kunesithembiso salokhu kuphila,” okungukuthi, impilo engokomoya, ukwaneliseka, injabulo, nenjongo ekuphileni. Futhi kusinikeza isithembiso sokuphila “okuzayo.” (1 Thim. 4:7, 8) Ngakho, ukuziqeqesha okunjalo akukhona okokusizuzisa ngokwezinto ezibonakalayo. Kunalokho, ngenxa yakho, siyaneliswa amalungiselelo ayisisekelo njengoba sikhonza uJehova.—1 Thim. 6:6-8.
2 Nakuba kungase kufike ushushiso nobunzima, amaKristu eqiniso awadingi ukwesaba, ngoba “iNkosi iyakwazi ukuhlangulisa ekulingweni abamesabayo uNkulunkulu.” (2 Pet. 2:9) Uwayala ukuba abonakale ‘ngokuhamba okungcwele nangokumesaba uNkulunkulu’ ukuze asinde ekwahluleleni kosuku lukaJehova. (2 Pet. 3:10, 11) Ingabe ungathanda ukufunda izindlela zokuqinisa ukuzinikela kwakho kokwesaba uNkulunkulu ukuze uhlale uthembekile kuJehova ezinsukwini ezinzima ezizayo? Kuyonikezwa iseluleko esiwusizo kakhulu nesikhuthazo ngokuqondene nalokhu eMihlanganweni Yesigodi yezinsuku ezintathu ‘Yokwesaba UNkulunkulu’ ehlelelwe insimu yegatsha lethu kulelihlobo. Hlela manje ukuba khona nokuhlanganyela ekudleni okuhle okungokomoya okuyonikezwa.
3 FIKA NGAPHAMBI KWESIKHATHI: OFakazi BakaJehova baziwa kahle ngokuthenjelwa kwabo nangokugcina kwabo isikhathi. (Luka 16:10) Lokhu kubalulekile lapho siya emhlanganweni. Kufanele sifike ngaphambi kwesikhathi usuku ngalunye futhi sibe sesihleli phansi ngaphambi kokuba isimiso siqale. Lokhu kudinga ukuvumela isikhathi esanele sokunakekela izinto ezidinga ukunakwa, njengokupaka izimoto, ukuthola izindawo zokuhlala ezifanelekile zemikhaya yethu, nokuthola amathikithi okudla omhlangano.
4 Isikhathi somhlangano sinikeza ithuba elihle lokujabulela ukuhlangana okujabulisayo. Kodwa ukuvakasha nabangane kuze kwephuze kakhulu ebusuku kungaphazamisa imizamo yethu yokufika ngesikhathi ngosuku olulandelayo. Umphumela ungaba ukukhathazeka okukhulu nokukhungatheka ngenxa yokuselwa futhi kanjalo kudingeke ukuba sijahe ekuseni. Ukuze ivimbele lokhu, eminye imikhaya ikuthola kuzuzisa ukubeka isikhathi esikahle sokuyolala. Ngokubambelela ngokuqinile esimisweni, iyakwazi ukulala isikhathi esanele futhi ikulungele ukusheshe ivuke ngosuku olulandelayo. Lokhu kuyenza igweme ukufika isimiso sesiqhubeka, okuphazamisayo nokungabacasula labo asebehleli kakade. Ukucabangela kwethu kulokhu kungabonisa inhlonipho yethu ngoJehova, futhi kunikeza ubufakazi bokuzinikela kweqiniso kokwesaba uNkulunkulu.
5 UMHLANGANO WEZINSUKU EZINTATHU:
UMhlangano Wesigodi “Wokuzinikela Kokwesaba UNkulunkulu” uyothatha izinsuku ezintathu. Kuzo zonke izimiso kuyonikezwa ukwaziswa okukhethwe ngokucophelela okubalulekile empilweni yethu engokomoya. Izihloko ezihlukahlukene ezihlobene nokuzinikela kokwesaba uNkulunkulu kuyoxoxwa ngazo ezinkulumweni, emibonisweni, nasedrameni yosuku lwanamuhla.
6 Zimisele ukungaphuthelwa nangesisodwa isimiso. Lokhu kungase kudinge ukuzidela nokwenza ushintsho esimisweni sakho. Abanye bakuthola kudingekile ukwenza amalungiselelo akhethekile nabaqashi babo. Abaningi baze badele ngisho nezinzuzo ezingokwezimali ukuze babe khona kuzo zonke izimiso. Ngokuqinisekile uJehova uyobabusisa labo abenza lokhu kube indaba yomthandazo oqotho futhi benze umzamo oqotho wokuba babe lapho.—Luka 13:24.
7 LALELA NGOKUZIMISELA: Phakathi nesimiso somhlangano, musa ukuphazanyiswa yizinto ozibonayo nayimisindo engahlobene nendaba okuxoxwa ngayo endaweni yesikhulumi. Yeka ukuthi simbonga kanjani uJehova osiphe ikhono lokugxilisa ingqondo “ngokuzimisela” emicabangweni esiyithandayo. Ukuzinikela kwethu kokwesaba uNkulunkulu kufanele kusishukumisele ukuba sikhethe lokho okuvumelana nesicelo sikaJehova kuIsaya 55:2, (NW): “Ngilalele ngokuzimisela.”
8 Nakuba kuyiqiniso ukuthi inkulumo eyinhloko iyamenyezelwa eningini, okuningi kokwaziswa okuyonikezwa kulomhlangano kulungiselelwe ikakhulukazi labo asebezinikele kakade kuJehova. Lomhlangano uyosazisa ngezidingo zamanje futhi usisize ukuba sihambisane nenhlangano kaJehova ethuthukayo. Ukungalalelisisi kuyosenza ukuba sisilele. Kumelwe sizigcine sithathekile yisimiso ukuze sizuze ngokugcwele ekondliweni okungokomoya okucebile.—1 Pet. 2:2.
9 Eminyakeni edlule, izihambeli eziningi zomhlangano ziye zathuthukisa umkhuba ozuzisayo wokubhala amaphuzu phakathi nesimiso. Izinto ezifanele zokubhala amaphuzu kufanele ziphathwe kanye namaBhayibheli namaculo njengezinto zokuqala lapho kuyiwa emhlanganweni. Abanye kungenzeka ukuthi baye bakubheka ngokugxeka ukubhala amaphuzu, benomuzwa wokuthi ayikho inzuzo yangempela kukho. Uma uye wacabanga kanjalo, kungani ungazami ukubhala amaphuzu eMhlanganweni “Wokuzinikela KuNkulunkulu”? Njengoba kunjalo kwabaningi abanye, ungase uthole ukuthi kuyindlela enhle yokugcina ukunakekela kwakho kugxile kulokho okushiwoyo futhi kukuvikela ukuba uphuphe emini noma uvumele ingqondo yakho ukuba izule.
10 Amaphuzu akudingekile ukuba abe made noma aningilize. Ngokuvamile igama elilodwa noma amabili ayokwanela ukuba ahlanganise iphuzu eliyinhloko. Abadala bakuthola kuwusizo ukuba namaphuzu ahlelwe ngobunono ukuze babukeze isimiso somhlangano ngokunenzuzo eMhlanganweni Wenkonzo. Bangase futhi basebenzise amaphuzu amaningi kwanikezwe emhlanganweni ekufundiseni kwabo nasemsebenzini wabo wokwalusa kamuva.
11 Sonke kufanele siyinake indlela esilalela ngayo, ngoba isho injabulo yethu nokuphila kwethu uqobo. Lapho siseMhlanganweni Wesigodi “Wokuzinikela KuNkulunkulu,” kumelwe sikhumbule iseluleko sikaJehova kuzAga 8:33-35: “Yizwani ukulaya, nihlakaniphe, ningakwenqabi. Ubusisiwe umuntu ongizwayo, elinda imihla ngemihla ngasemasangweni ami, ehlala ngasezinsikeni zeminyango yami. Ngokuba ongifumanayo ufumana ukuphila, azuze umusa kuJehova.”
12 UMTHANDAZO NENGOMA: Enye yezivunulo ezinhle kakhulu zokuzinikela kwethu kokwesaba uNkulunkulu iwukuhlabelelela uJehova uNkulunkulu izindumiso. Kuyabonakala ukuthi ukuhlatshelelwa kwezingoma kwakuyisici esivamile sobuKristu beqiniso ngekhulu lokuqala leminyaka. (1 Kor. 14:15) UJehova futhi uyajabula lapho abantu bakhe besondela kuye ngomthandazo oqotho. Imihlangano yesigodi isinikeza ithuba elingavamile lokuba sihlangane nezinkulungwane zabafowethu nodadewethu ekudumiseni uJehova kokubili ngengoma nangomthandazo. Nokho, abanye baye babonisa ukuntula inhlonipho ngalezingxenye ezibalulekile zokukhulekela kwethu. Kanjani? Ngokufika emhlanganweni ngokungadingekile phakathi noma ngemva kwengoma nomthandazo wokuvula. Ekupheleni kwesimiso, abanye bashiya izindawo zabo zokuhlala phakathi nengoma nangaphambi komthandazo. Ngani? Ngezikhathi ezingavamile kungase kube khona izizathu ezinhle zalokhu. Nokho, abanye bangase baliyeke ilungelo lokuhlabelela nokuhlanganyela emthandazweni ukuze nje bahambe kuqala baye ezimotweni zabo. Abanye baye bashiya izindawo zokuhlala ukuze babe phakathi kwabokuqala emgqeni wezincwadi ezikhishiwe noma wokudla. Kumelwe kunakekelwe ukuthi lapho sifuna lokho okuyozuzisa thina siqu, asivumeli isimo sengqondo sezwe sokuba ngowokuqala noma izimfanelo zokungamesabi uNkulunkulu njengokuhaha nobugovu ukuba zivimbele intuthuko yethu engokomoya. Njengabantu abanokuzinikela kokwesaba uNkulunkulu, silwela ukubonisa inhlonipho efanelekile ngezici zokukhulekela kwethu eziphakeme kangako, okungukuthi, ukuthandaza kwethu nokuhlabelelela uJehova.
13 IMIKHUBA YETHU YOBUKRISTU: Eminyakeni edlule, imikhuba yethu nokubonakala kwethu kobuKristu emihlanganweni kuye kwasizuzela idumela elihle njengoFakazi BakaJehova. Lokhu kungenxa yokuthi siyibheka ngokufanelekile imihlangano yethu njengemikhosi engokomoya, hhayi njengohambo lokuzijabulisa. Ngakho-ke, silwela ukubonisa isimo sengqondo esingokomoya nokuziphatha njengezikhonzi.
14 Phawula lokhu okuhlangenwe nakho okuhle okwajatshulelwa umkhaya woFakazi lapho udla esitolo sokudlela edolobheni lomhlangano ngehlobo elidlule. Umzalwane wabhala: “Indoda ethile nomkayo babehleli etafuleni elaliseduze kwelethu. Lapho beqeda ukudla kwabo, lendoda yeza etafuleni lethu, yacela uxolo, yase ithi ingathanda ukusitusa ngenxa yokubonakala kwethu kobunono nokuhlanzekile. Umkami wayitshela ukuthi sasihambele uMhlangano wamaWatchtower ngalempelasonto. Yathi iyaqiniseka ukuthi kunjalo. Yayibone abaningi abafowethu nodadewethu kulelohhotela ngesikhathi yona nomkayo behleli khona, futhi bonke babebonisa ukuziphatha nokugqoka okuyisibonelo. Yathi esontweni esonta kulo, intsha ayigqoki noma iziphathe njengabantu abasha. Lokhu kungenza ngiqonde ukuthi kubaluleke kangakanani ukukhulisa abantwana bethu kusukela ebuncaneni ukuba babe isibonelo esihle sobuKristu ngazo zonke izikhathi. Kumelwe kubongwe iseluleko esiqinile nesiqondiso seNhlangano kaJehova sokuba sibeke isibonelo esihle.”
15 Ngokudabukisayo, abanye ababa khona emihlanganweni baye baba abanganaki ngokungadingekile esimweni sabo sengqondo, ekugqokeni, enkulumweni, nasekuziphatheni. Lapho lokho kubonakala ebandleni noma emhlanganweni, labo abanezimfanelo ezingokomoya kufanele banikeze iseluleko sothando ngenjongo yokulungisa. (Gal. 6:1; Efe. 4:11,12) Ukuzinikela kwethu kokwesaba uNkulunkulu kufanele kusishukumisele ekubeni sikhuthale ekusekeleni idumela lethu elihle nasekulondolozeni izindinganiso eziphakeme zokuziphatha ngazo zonke izikhathi.
16 KUSAZALI: Abantwana abasebancane nasebevile eshumini bamenywa ngokukhethekile ukuba babe khona eMhlanganweni Wesigodi “Wokuzinikela KuNkulunkulu.” Okuningi kokwaziswa kuyobe kubakhuthaza ngokukhethekile. Yeka ukuthi kuhle kanjani ukubona ukuzinikela kokwesaba uNkulunkulu kwabasha abaye bafunda ukulalelisisa kuyo yonke imihlangano yobuKristu futhi abanesithakazelo esiqotho esimisweni somhlangano! (IHu. 148:12, 13) Kodwa okuningi kuxhomeke esibonelweni nasekuqondiseni kwabazali. Abaningi abasebancane baqeqeshwe kahle ukuba babhale amaphuzu. Uma njengomzali ungakabaqeqeshi abantwana bakho ukuba babhale amaphuzu, kungani ungasebenzisi isikhathi esisasele ngaphambi komhlangano ukuba wenze kanjalo? Ngisho nabasebancane kakhulu bangakhuthazwa ukuba babhale phansi imiBhalo kanye namazwi ayinhloko ahlobene nayo abawezwa eshiwo izikhulumi. Abanye abazali bahlela ukuba kubukezwe amaphuzu ayinhloko esimiso sosuku ngemva kokuba sebefike endaweni abahlala kuyo noma lapho besendleleni beya ekhaya.
17 Yiqiniso, abazali abaningi bayaqaphela ukuthi ukuthambekela okungokwemvelo kwabantwana kuwukuba badlale. Bantula okuhlangenwe nakho ekuphileni futhi abavuthiwe. Ngakho, kumelwe bafundiswe izikhathi okumelwe banake ngazo nendlela yokuziphatha emihlanganweni. Lokhu kudinga ukuqondisa okuhle kwabazali babo. Abanye abazali baye bayekelela kulokhu. Ngezinye izikhathi, nakuba abazali bengase babonise ukumhlonipha okufanele uJehova ngesikhathi kuthandazwa, abantwana babo bayadlala futhi baphazamisa abanye. Abazali kufanele bazi ukuthi abantwana babo benzani ngesikhathi kuthandazwa. Yini abayenzayo lapho besuka ezindaweni zabo zokuhlala phakathi nesimiso? Ingabe abantwana bashiywa bengabhekiwe phakathi noma ngemva kwesimiso somhlangano? Ukuzinikela kokwesaba uNkulunkulu kweqiniso kufanele kushukumisele abazali ukuba babaqaphelisise abantwana babo ngazo zonke izikhathi njengoba bebakhulisa “ngokuyala nangokuqondisa kweNkosi.”—Efe. 6:4.
18 UKUBAMBISANA KWENU OKUGCWELE KUYAZISWA: Kwenziwe ukuhlela okukhulu nomsebenzi omningi ukuze kuqinisekiswe ukuthi wonke umuntu oze emhlanganweni uthola indawo yokuhlala, izincwadi, ukudla, namanye amalungiselelo ngokwanele. Ukuze kuqinisekiswe ukuphumelela kwalamalungiselelo, ibandla ngalinye labelwe ngokuqondile emhlanganweni othile. Ukubambisana kwenu okugcwele kubalulekile ukuze kuvinjelwe ukuminyana. Yiqiniso, zingaba khona izimo ezenza kudingeke ngabambalwa ukuba baye emhlanganweni okwenye indawo. Nokho, abaningi kumelwe bakwazi ukuya emhlanganweni osendaweni yabo abayabelwe.—1 Kor. 13:5; Fil. 2:4.
19 Kucelwa ukubambisana kwenu okugcwele endabeni yokugcina izindawo. Sizani nikhumbule ukuthi IZINDAWO ZINGAGCINELWA AMALUNGU OMKHAYA WAKHO NANOMA UBANI OKUNGENZEKA UHAMBA NANI EMOTWENI YENU KUPHELA. Sizani ningababekeli abanye izindawo. Ngezinye izikhathi, izindawo ezengeziwe azibekelwa muntu ngokukhethekile. Lokhu akubonisi uthando futhi kuyabakhohlisa abalindi nabanye abafuna izindawo. Ngokuvumelana neseluleko seBhayibheli, kufanele siphelelise ukuzinikela kwethu kokwesaba uNkulunkulu ngothando lobuzalwane futhi sibambisane ngokugcwele nelungiselelo eligunyaziwe lokugcina izindawo.—2 Pet. 1:5-8.
20 Kusikiselwa ukuba kusetshenziswe ukwahlulela okuhle ekuletheni izimpahla zomuntu siqu endaweni yomhlangano. Esikhathini esidlule, abanye baye baletha iziqandisi ezinkulu noma ezinye izinto ezinkulu ezingenakubekwa ngaphansi kwezihlalo zabo. Lezi ziye zabekwa emaphaseshini noma ezihlalweni. Umphumela walokhu uye waba ukuncisha abanye indawo, futhi ngezinye izikhathi kwephula imithetho yezomlilo neyokuphepha. Sidinga ukubonisa ukucabangela ezindabeni ezinjalo.
21 INKONZO YEZOKUDLA: Lonyaka ka-1989 uhlelelwe ilungiselelo lenkonzo yezokudla elenziwe lula elifana nelangonyaka odlule. Lokhu kuwunciphisa kakhulu umsebenzi futhi kuvumela ukuba kunakwe ngokwengeziwe izici zomhlangano ezingokomoya, njengoba izisebenzi zikwazi ukujabulela ingxenye enkulu yesimiso. (Eks. 12:16b; Dut. 31:12; it umq. 1 kk. 503-4, 821; qhathanisa noLuka 10:38-42.) Ukudla okulungiselelwe kuzanele izikhathi zasekuseni nezasemini. (Qhathanisa noMathewu 14:14-20.) Noma ubani ukhululekile ukuba azenzele amalungiselelo akhe siqu okudla kwakusihlwa, nakuba ukudla okuthile kuyotholakala emhlanganweni.
22 INhlangano iyakwazisa kakhulu ukusekela okuhle bafowethu nodadewethu enisekele ngakho amalungiselelo enkonzo yezokudla emihlanganweni yesigodi eminyakeni edlule. Lokhu kuye kwakwenza kwaba nokwenzeka ukuba kuqashwe izindawo ezikahle futhi kunakekelwe izindleko zomhlangano. Izindleko zokuqasha ezinye izindawo ziye zakhuphuka kakhulu eminyakeni embalwa edlule. Ngakho, noma imiphi iminikelo yokuhlangabezana nezindleko ezinjalo yaziswa kakhulu. Noma imiphi iminikelo yezindleko zangaphambi komhlangano ingathunyelwa eKomitini Yomhlangano Wesigodi endaweni yakini.
23 UBHAPATHIZO: Abazobhapathizwa kufanele balwele ukuba sezindaweni zabo zokuhlala engxenyeni eyabelwe lokho ngaphambi kokuba isimiso siqale ngoMgqibelo ekuseni. (Kuleyomihlangano eqala ngoMgqibelo, ubhapathizo luyoba ngeSonto ekuseni.) Yilowo nalowo oceba ukubhapathizwa kufanele aphathe izimpahla zokungena emanzini ezinesizotha kanye nethawula. Ngemva kwenkulumo yobhapathizo nomthandazo okuyokwenziwa isikhulumi, usihlalo wesimiso uyonikeza iziyalezo ezimfushane kwabazobhapathizwa bese ebiza ingoma. Lapho kuqala ukuhlatshelelwa kwevesi lokugcina, abalindi bayoqondisa abazobhapathizwa endaweni yokucwiliswa noma ezimotweni ezizobayisa khona, kuyilapho bonke abanye ezilalelini beqedela ukuhlabelela ingoma. Njengoba ubhapathizo njengoluwuphawu lokuzinikela komuntu luyindaba yomuntu siqu phakathi kwakhe noJehova, alikho ilungiselelo lalokho okuthiwa ukubhapathizwa ngokwabangane lapho abazobhapathizwa ababili noma ngaphezulu besingathana noma bebambana ngezandla lapho bebhapathizwa.
24 INKONZO YOKUZITHANDELA: Ukugcizelela ubulula kuphawuleka ikakhulukazi ngokuqondene namahora okusebenza adingekayo okuhlela nokuqhuba umhlangano wesigodi. Labo asebeneminyaka eminingi beseqinisweni bazokhumbula ukuthi esikhathini esingaphambili, ngaphambi naphakathi nemihlangano emikhulu, kwakudingeka izinkulungwane zezisebenzi zokuzithandela, zinikela ngamahora amaningi esikhathi sazo eminyango ehlukahlukene yomhlangano. Lokho kukhandleka kothando kwakwaziswa ngokujulile, kodwa ngokuvamile kwakubangela ukuba izisebenzi eziningi zokuzithandela zilahlekelwe ingxenye enkulu yesimiso.
25 Nakuba manje kudingeka izisebenzi zokuzithandela ezimbalwa namahora ambalwa ukuze kwenziwe umsebenzi, usizo lokuzithandela lusadingeka ukuze umhlangano uqhutshwe ngokushelelayo. Ingabe ungaba nayo ingxenye? Akekho okufanele abe nomuzwa wokuthi ukwenza umsebenzi wokuzithandela kuyosho ukulahlekelwa ingxenye enkulu yesimiso njengoba kuye kwenzeka kwabanye esikhathini esidlule.
26 Lapho ufika endaweni yomhlangano, thintana noMnyango Wenkonzo Yokuzithandela. Ngisho noma ungase ukwazi ukusebenza ingxenye yomhlangano kuphela, inkonzo yakho iyokwaziswa. Uyokuthola kuvuza ngokomoya ukusebenza emhlanganweni. Abantwana abaneminyaka engaphansi kweyi-16 nabo bangaba nesandla ekuphumeleleni komhlangano, kodwa kudingeka ukuba basebenze nomzali noma nombheki.
27 UKUQOPHA: Ukusetshenziswa kwamakhamera evideo nezinto zokuqopha amazwi kuvunyelwe endaweni yomhlangano. Nokho, labo abasebenzisa izinto ezinjalo kumelwe banakekele ukuze bagweme ukuphazamisa abanye. Izinto ezinjalo akumelwe zimiswe emaphaseji noma ezindaweni zokuphuma. Izinto ezinjalo akufanele zixhunywe esimisweni sokusakaza seningi noma emapulakini kagesi. Amalambu kagesi amakhulu ngeke avunyelwe. Labo ababangela ukuphazamiseka noma abangazinaki noma yiziphi zeziqondiso ezingenhla kufanele balungise isimo ngaphandle kokulibala lapho silethwa ekunakekeleni kwabo. Abalindi nabanye abaphethe bayoqapha ukuze balungise noma ikuphi ukwephulwa kwaleziqondiso, futhi labo abasebenzisa izinto ezinjalo kufanele babambisane nabo ngokugcwele.
28 UKUZINIKELA KWETHU KOKWESABA UNKULUNKULU kuzobhekana novivinyo olunzima esikhathi esizayo esiseduze. “Yebo, bonke abathanda ukuhamba ngokumesaba uNkulunkulu kuKristu Jesu bayakuzingelwa.” (2 Thim. 3:12) Yeka ukuthi simbonga kangakanani uJehova ngamalungiselelo angokomoya anjengeMihlangano Yesigodi ‘Yokuzinikela KuNkulunkulu,’ lapho ezobe esiqeqesha khona futhi ‘esifundisa ukuba sidele ukungakholwa nezinkanuko zezwe, sihambe ngokuqonda, nangokulunga, nangokumesaba uNkulunkulu kulesisikhathi samanje.’—Thithu 2:12.
[Box on page 10]
Esikukhunjuzwa Ngomhlangano Wesigodi
IZINDAWO ZOKULALA: Abamemezeli abaningi bayozenzela amalungiselelo abo siqu ezindawo zokuhlala. Nokho, uma ufuna ukuba abazalwane abahlela umhlangano bakulungiselele indawo yokuhlala futhi ungakasifaki isicelo sendawo yokuhlala, siza uthumele iFomu lakho Lesicelo Sendlu ngokushesha.
IZINGOMA: Njengoba ukuhlabelela kuyingxenye yokukhulekela kwethu, sinikhuthaza nonke ukuba niprakthize izingoma ezilandelayo eziyoba yingxenye yesimiso: 155, 217, 100, 160, 164, 221, 69, 174, 202, 19, 42, 180, 204, 191, 177, 181, 187, no-45. Lapho niprakthiza lezingoma sisikisela ukuba nisebenzise amakhasethi eNhlangano.
IZIKHATHI ZESIMISO: Kuwukuhlakanipha futhi kubonisa ukwazisa ukuba sibe sesisezindaweni zethu zokuhlala lapho kuqala isimiso. Lokho kuyoba ngo-9:50 a.m. ngosuku lokuqala. Hlela ukuba uhlale isimiso size siphele. Ingoma nomthandazo wokuphetha kuyoba ngo-4:00 p.m. ngosuku lokugcina.
UMHLANGANO OPHATHELENE NEBETHEL: Ngosuku lwesibili kuyoba nomhlangano wanoma yibaphi abamemezeli abazinikezele abaphakathi kweminyaka eyi-19 nengama-35 ubudala abangathanda ukungenela inkonzo yaseBethel. Kuyokwenziwa izaziso emhlanganweni ngokuqondene nesikhathi esiqondile nendawo yalomhlangano.
ISIBONAKALISO SAMAPHAYONA: Wonke amaphayona avamile nakhethekile, ababonisi abajikelezayo, izithunywa zevangeli, nalabo abasenkonzweni yaseBethel kuyodingeka ukuba beze namakhadi abo athi Jehovah’s Witnesses Isibonakaliso Nesabelo (S-202) emhlanganweni. Labo abayobe sebenezinyanga eziyisithupha besohlwini ngesikhathi somhlangano wesigodi abayokuya kuwo bangathola amathikithi omhlangano ka-R18 lapho beveza amakhadi abo athi Jehovah’s Witnesses Isibonakaliso Nesabelo kulowomhlangano owodwa kuphela. Liphathe ngokunakekela lelikhadi njengemali. Awunakunikwa elinye emhlanganweni. Noma yiziphi izincwadi ezikhululiwe zamahhala noma ezinye ezitholakala ngenani lamaphayona amaphayona ayozithola endaweni yezincwadi kuphela.
AMABHEJI: Lamakhadi alungiselelwe njengendlela yokumemezela umhlangano nanjengendlela yokubona abazalwane bethu nodade abakhona. Ngakho-ke, siza ufake lelobheji elilungiselelwe ngokukhethekile emhlanganweni nalapho uya noma ubuya endaweni yomhlangano. Ibheji aliyona nje kuphela indlela yokubonana kodwa ngokuvame kakhulu kuphumela ekunikezeni ubufakazi obuhle lapho sihamba. Kufanele uwathole ngebandla njengoba engeke atholakale emihlanganweni. Amabheji angu-5c lilinye futhi isembozo sepulastiki singu-50c sisinye.
ISIXWAYISO: Kungakhathaliseki ukuthi upaka kuphi, kufanele ukhiye imoto yakho ngazo zonke izikhathi futhi ungalokothi ushiye lutho lubonakala ngaphakathi. Uma kunokwenzeka, gcina izinto zakho zikhiyelwe ebhuthini. Futhi, qaphela amasela nabakhuthuzi abahehwa imibuthano emikhulu. Lokhu kuhlanganisa ukungashiyi lutho olubalulekile ezihlalweni lungabhekwe muntu emhlanganweni. Ngaphezu kwalokho, kuye kwabikwa ukuthi kukhona ingozi enkulu yokuwa ezitebhisini uma odade begqoke izicathulo eziphakeme. Sizani niqaphele.
[Box on page 10]
IMIHLANGANO YESIGODI KA-1989
Ngezansi sihlele izinsuku, izindawo nezilimi zomhlangano wesigodi ngamunye.
November 17-19:
EST. HELENA, iHholo LoMbuso laseLevelwood (IsiNgisi)
December 8-10:
EWINDHOEK, Athletics and Soccer Stadium (Isimiso sezilimi ezimbili ngesiBhunu/ngesiNgisi, isiKwanyama)
December 15-17:
EBLOEMFONTEIN, Free State Stadium (Isimiso sezilimi ezimbili ngesiBhunu/ngesiNgisi, IsiSuthu)
EKAPA, Goodwood Show Grounds (IsiNgisi, isiBhunu, Xhosa)
EGOLI, National Exhibition Centre (IsiNgisi, isiSuthu, isiZulu, isiPutukezi nesiGreki kancane)
EMAFIKENG, Mafikeng Rugby Stadium (Akukaqinisekwa) (IsiTswana)
KAMANZINl, Show Grounds (IsiZulu, isiNgisi kancane)
ENKOWANKOWA, Sport Stadium (IsiTsonga, IsiVenda kancane)
December 23-25:
ETHEKWINI, King’s Park Rugby Stadium (IsiNgisi nesiZulu)
EGABORONE, National Stadium (IsiTswana nesiNgisi kancane)
EMASERU, Pitso Grounds (Akukaqinisekwa) (IsiSuthu nesiNgisi kancane) EMDANTSANE, Sisa Dukashe Stadium (IsiXhosa)
December 29-31:
EPITOLI, Show Grounds (IsiNgisi, isiBhunu, iSipedi nesimiso sezilimi ezimbili ngesiZulu/ngesiSuthu. Sizani niphawule ukuthi lesi kuyoba yisona sodwa isimiso seSipedi esiyoba khona kulonyaka)
KANYAMAZANE, KaNyamazane Stadium (IsiZulu)
ENEWCASTLE, R. K. Rumelin Stadium (IsiZulu)
EPORT ELIZABETH, Boet Erasmus Stadium (Isimiso sezilimi ezimbili ngesiBhunu/ngesiNgisi)
EMTATA, Independence Stadium (IsiXhosa)