Dumisa UJah Ngokuthola Izikhokhelo
1 Yeka ukuthi kuyinjabulo kanjani ukuthola umagazini omusha wePhaphama! Lomagazini omuhle usisiza ukuba sihlale sazi ngezenzakalo zezwe njengoba zihlobana nesiprofetho seBhayibheli. Kanjalo, singawaqaphela kangcono amathuba okudumisa uJehova.—Amose3:7; Heb. 13:15.
2 Kuze kube manje ngo-1989, iPhaphama! iye yakhipha izihloko ezikhangayo njengesithi “Yini Eyenzekayo Ezindinganisweni?” nesithi “Ubucayi Bezindleko Zokuphila—Liyini Ikhambi?” Ukwaziswa okunjalo kwandisa ukwazisa kwethu ngeNqabayokulinda, leyo esikhathini esingaphezu kweminyaka eyikhulu eye yasekela uMbuso kaNkulunkulu njengoyikhambi langempela lezinkinga zesintu. Bobabili, Iabomagazini baye baphaphamisa abafundi ukuba baqaphele indlela izenzakalo zosuku lwanamuhla eziphawula ngayo ‘izinsuku zokugcina’ zalesimiso esidala. (2 Thim. 3:1-5) Yiqiniso, ngoApril nangoMay walonyaka kube nezihloko eziyingqophamlando zeNqabayokulinda ezilichaya ngesibindi iBabiloni Elikhulu elibi.
IZIKHOKHELO ZINIKEZA UKUDLA OKUNGOKOMOYA
3 Phakathi no-October siyoba nelungelo lokuhambisa izikhokhelo zePhaphama! noma INqabayokulinda noma zombili. Ingabe ilungu ngalinye lomkhaya wakho linesalo isikhokhelo? Uma kunjalo, khona ukufanelekela kangcono ukuba utuse nabanye ukuba benze ezabo izikhokhelo. Njengomfundi wasikhathi sonke wakho kokubili INqabayokulinda nePhaphama! ungashiseka ekuhambiseni izikhokhelo njengoba wenza lapho uhambisa omagazini abangabodwa ngosuku lukamagazini.
4 Ungahluleli kusengaphambili ukuthi umuntu uzothanda yini ukwenza isikhokhelo noma cha, kodwa, kunalokho, vumela umuntu ukuba asabele entshumayelweni yakho eqotho nenomfutho. Omunye udade wasizwa ukuba athuthukise isimo sengqondo esiqondile ngokucabanga ngesisho esithi: “Ayihlabi ngakumisa.” Wafunda ukuba njengoJehova, ongakhethi. (IzE. 10:34) Ngaphandle kwasenkonzweni yakho yendlu ngendlu, ingabe uye wazihambisa izikhokhelo kubantu ofunda nabo iBhayibheli, kulabo abasemzileni wakho kamagazini, kosebenza nabo, komakhelwane, nasezihlotsheni nalapho ufakaza emgwaqweni?
5 Abaningi baye bahlangana nabanini-khaya abathi abanayo imali yesikhokhelo ngalesosikhathi. Noma bangase bathi akunakubalungela ukuba benze isikhokhelo ngenxa yesinye isizathu. Uma lokhu kwenzeka futhi umuntu ethanda, gcwalisa amaphepha ezikhokhelo ngaso lesosikhathi sokuhambela kokuqala bese uphindela uyolanda umnikelo kamuva. Qiniseka ukuba ulandelele ngokuphindela ngesikhathi enivumelene ngaso. Lokhu kugcizelela ukubaluleka kokugcina imibiko yendlu ngendlu eqondile.
UKUFAKAZA NGOKWETHUKELA
6 Nakuba umsebenzi wendlu ngendlu useyinsika yomsebenzi wethu, siyazi ukuthi ukufakaza ngokwethukela kugcizelelwa ngokungaphezulu kulezinsuku. Kuyindlela enhle yokufinyelela abaningi balabo abasuke bengekho emakhaya ngenkathi sisebenza indlu ngendlu. Futhi kuthiwani ngalabo esisebenza nabo emsebenzini wokuziphilisa? Phakathi nenye inyanga yomkhankaso wezikhokhelo, umzalwane wanquma ukufakaza ngokuhlakanipha kwasebenza nabo. Ekuqaleni wazibekela umgomo wezikhokhelo eziyishumi ngaleyonyanga. Nokho, wamangala kakhulu lapho efinyelela lowomgomo ngezinsuku ezimbili. Cabanga ngenjabulo aba nayo lapho ekwazi ukubika izikhokhelo ezingama-68 ngaleyonyanga!
7 Phakathi no-October singahambisa izikhokhelo njengoba sihamba indlu ngendlu, lapho senza izimpindelo, nalapho sifakaza ngokwethukela. Lapho isikhokhelo singamukelwa, singasho okuthile okunjengalokhu: “Nakuba ungafisi ukwenza isikhokhelo njengamanje, ngikholwa ukuthi ubungawujabulela lomagazini esisanda kukhuluma ngawo. Siwushiya kanye nalomngane wawo ngomnikelo ka-R1,20.” Omagazini abaningi baye bahanjiswa ngalendlela.
8 Umhubi uyasinxusa: “Dumisani uJah, nina-bantu.” (IHu. 147:1, NW) Yeka ukuthi kungokufaneleka kanjani ngathi ukuba simdumise uJehova phakathi no-October ngokuhambisa izikhokhelo zeNqabayokulinda nePhaphama!