Isizathu Sokuba Ufune Ukuqhuba Isifundo SeBhayibheli
1 Okunye kokuhlangenwe nakho okuzuzisa kakhulu kumKristu ukusetshenziswa uJehova ukuba asize othile ukuba abe umfundi kaKristu. (Math. 28:19, 20; 1 Kor. 3:6, 9) Kulabo esibasiza ngalendlela, kungasho ukuphila okuphakade.
2 Kwakheka ubuhlobo obuseduze kakhulu phakathi kofundisayo nomfundi. Ukukhula ngokomoya komfundi ngempela kuwumthombo wenjabulo enkulu. (1 Thes. 2:11, 19 20) Ngakho-ke, kumelwe kube umgomo womKristu ngamunye ukuqhuba okungenani isifundo seBhayibheli sasekhaya esisodwa nothile ongekho emkhayeni wakhe siqu. Njengoba kulindelekile, kuwumthwalo wemfanelo wenhloko yomkhaya ngayinye ukuba iqhube isifundo seBhayibheli esinenjongo sasikhathi sonke nomkhaya wayo siqu. Kulawo makhaya anobaba ongakholwa, umama ongumKristu kuyodingeka ukuba enze amalungiselelo afanelekile okutadisha iBhayibheli nabantwana.
THANDAZELA UKUTHOLA IZIFUNDO
3 Njengoba sesingene shí kulesikhathi sesiphelo, sonke kumelwe senze imizamo yokuqhuba izifundo zeBhayibheli eziphumelelayo. Umthandazo wasikhathi sonke kuJehova ngokuphathelene nalokhu ubonisa isifiso sethu esiqotho sokuqhuba isifundo seBhayibheli. Ubonisa ukuthi siyayibona indaba yokufa nokuphila ehilelekile. (Hez. 33:7-9, 14-16) Singaqiniseka ngesibusiso sikaJehova emizamweni yethu eqotho.—1 Joh. 5:14, 15.
4 Ukuze siphumelele ekwenzeni abafundi, kufanele silungiselele kahle. Kuwusizo kakhulu futhi ukubheka abanye abanekhono ekuqhubeni izifundo zeBhayibheli. Ezinyangeni ezizayo, siyodlulisela ukusikisela okuvela kubabonisi abajikelezayo nabanye abebelokhu bephumelela ekwenzeni abafundi. Uchungechunge lwezihloko luyoqokomisa eminye imibono ewusizo ngendlela yokuqalisa nokuqhuba izifundo zeBhayibheli eziphumelelayo.
IZIHLOKO ZESIKHATHI ESIZAYO
5 Imiphi eminye yalemibono eyocatshangelwa kuyiNkonzo Yethu Yombuso yesikhathi esizayo? Siyokhuluma ngendlela abamemezeli abahlukahlukene namaphayona abaye baqalisa ngayo izifundo zeBhayibheli nokuthi iziphi izindlela zokufundisa abaye bazisebenzisa ukuze bafinyelele izinhliziyo zabafunda nabo. Futhi siyohlanganyela ukusikisela okumayelana nokwakha ukwazisa ngenhlangano kaJehova nokuhlakulela isifiso sokuhlanganyela enkonzweni yasensimini. Futhi kuyoba nokusikisela ngendlela ongenza ngayo isifundo seBhayibheli somkhaya wakho sibe nenjongo ngokwengeziwe ukuze abantwana bakho bakhe ubuhlobo bomuntu siqu obuseduze noJehova.
6 Phakathi neminyaka yenkonzo emine edlule, kuye kwabhapathizwa abantu abangu-959 834 emhlabeni wonke, futhi abangu-12 683 kulaba babesemabandleni aseNingizimu Afrika. Isixuku esikhulu salabantu safinyelela iqophelo lobhaphathizo ngosizo lothile owayebaqhubela isifundo seBhayibheli. Inani lababekhona eSikhumbuzweni nasemihlanganweni yethu yesigodi libonisa ukuthi kunabaningi ngokwengeziwe abasengasizwa ukuba bathuthukele obhaphathizweni. Ngokuqhubeka nemizamo yethu yokuqalisa nokuqhuba izifundo zeBhayibheli nabanjalo, singakwazi ukusiza abaningi ngokwengeziwe ukuba babe abafundi futhi ekugcineni bajabulele ukuphila okuphakade—1 Thim. 6:12, 19.