Isimiso Esisha Somhlangano Wesifunda
1 Kusukela ngo-September, isihloko semihlangano yesifunda siyobe sithi “Lalela Futhi Ufunde Ukuze Wenze Ngokuvumelana NeZwi LikaNkulunkulu.” Lesi sihloko, esisekelwe kuDuteronomi 31:12, 13, sinikeza isisekelo esifanele saso sonke isimiso ukuze kuqokonyiswe izifundo okudingeka sizifunde futhi sizisebenzise.
2 Nakuba abantu abaningi namuhla belalela amazwi aphefumulelwe amaningi adukisayo, kunesidingo esikhulu sokuba ngamunye wethu alalele iZwi likaNkulunkulu futhi afunde ukwenza ngokuvumelana nalo. (Luka 11:28; 1 Thim. 4:1) Sinalokhu engqondweni, isimiso somhlangano wesifunda siklanyelwe ukunikeza isikhuthazo nosizo kubamemezeli, emikhayeni, kubadala, nakumaphayona. NgoMgqibelo, kuyoba nochungechunge olunezingxenye ezine ngaphansi kwesihloko esithi “Ukubhekana Nezinkinga Zethu—Ngokulalelisisa IZwi LikaNkulunkulu.” Kanti ngeSonto ekuseni, kuyoba nochungechunge olunesihloko esithi “Indlela ImiBhalo Eyala Ngayo Ekulungeni.” Sonke isimiso siyonikeza isikhuthazo esingokomoya leso wena nomkhaya wakho okungafanele sinilahlekele.
3 Kokubili ngoMgqibelo nangeSonto, kuyonikezwa ukusikisela okusebenzisekayo kwenkonzo yasensimini futhi kwenziwe nemiboniso. Kuyonikezwa okuhlangenwe nakho kanye nezingxoxo ezakhayo nezifundisayo. Kanjalo, ngokuba khona nangokulalela ngenjongo yokukusebenzisa lokho okufundayo, uyoba sesimweni esihle sokwenza ngokuvumelana ngokugcwele nemiyalo yeZwi likaNkulunkulu.
4 Esinye sezici ezivelele zomhlangano wesifunda kuyoba ukubhapathizwa kwabafowethu nodadewethu abasanda kuzinikezela. Ngaphambili kakhulu kwalesi sibonakaliso sasobala sokuzinikezela kwabo, labo abazobhapathizwa kufanele batshele umbonisi owengamele ngesifiso sabo sokubhapathizwa ukuze akwazi ukuhlela ukuba abadala bahlangane nabo.
5 Inkulumo yeningi yololu chungechunge lwemihlangano yesifunda inesihloko esithi “Kungani Kufanele Uqondiswe IBhayibheli?” Mema abantu abathakazelayo ukuba babe khona. Ngokulangazelela isikhuthazo esidingeka kakhulu nosizo wena nomkhaya wakho eniyoluthola, yenzani amalungiselelo aqondile okuba khona kuso sonke isimiso.