Indlela Yokwenza Abafundi Ngencwadi Ethi Ulwazi
1 Umgomo ofiselekayo kuwo wonke amaKristu ukufundisa abanye iqiniso nokwenza labo ‘abathambekele ngokufanele ekuphileni okumi phakade’ ukuba babe abafundi. (IzE. 13:48; Math. 28:19, 20) Inhlangano kaJehova isinikeze ithuluzi elimangalisayo lokufeza lokhu—incwadi ethi Ulwazi Oluholela Ekuphileni Okumi Phakade. Isihloko sayo siqokomisa ukubaluleka kwezifundo zeBhayibheli zasekhaya, ngoba ukuphila okumi phakade kuxhomeke ekungeniseni ulwazi ngoJehova, owukuphela kukaNkulunkulu weqiniso, neNdodana yakhe, uJesu Kristu.—Joh. 17:3.
2 Incwadi ethi Ulwazi manje iyincwadi eyinhloko yeNhlangano esetshenziselwa ukuqhuba izifundo zeBhayibheli zasekhaya. Uma siyisebenzisa, singafundisa iqiniso kalula, ngokucacile, nangendlela efushanisiwe. Lokhu kuyosisiza ukuba sifinyelele izinhliziyo zalabo abafundiswayo. (Luka 24:32) Yiqiniso, umqhubi kudingeka asebenzise amasu amahle okufundisa. Lesi senezelo silungiselelwe leyo njongo ngokukhethekile ukuze sinikeze ukusikisela nezikhumbuzo ezimayelana nezindlela zokufundisa eziye zaphumelela. Ngokuhlakanipha, nangokwezimo zomuntu ngamunye, ungase ukwazi ukukusebenzisa kancane kancane okunye noma konke ukwaziswa okunikezwe lapha. Sigcine lesi senezelo, usibheke njalo uma kudingeka. Amaphuzu ahlukahlukene akuso angakusiza ukuba uphumelele ngokwengeziwe ekusebenziseni incwadi ethi Ulwazi ekwenzeni abafundi.
3 Qhuba Isifundo SeBhayibheli Sasekhaya Esithuthukayo: Yiba nesithakazelo esiqotho somuntu siqu kumuntu ofunda naye njengozoba umfundi ongumKristu nomzalwane noma udade ongokomoya. Fudumala, ube nobungane, futhi ushiseke. Ngokuba isilaleli esihle, ungakwazi ukumazi omunye umuntu—isizinda nesimo sakhe ekuphileni—okuzokusiza ukuba ubone ukuthi ungamsiza kanjani kangcono ngokomoya. Zimisele ukuzidela ngenxa yomfundi.—1 Thes. 2:8.
4 Lapho isifundo sesiqaliwe, kutuswa ukuba izahluko zencwadi ethi Ulwazi zifundwe ngokulandelana kwazo. Lokhu kuzokwenza umfundi aqonde iqiniso ngendlela ethuthukayo, njengoba lencwadi ithuthukisa izihloko zeBhayibheli ngokulandelana okunengqondo. Gcina isifundo silula futhi sithakazelisa ukuze siphile futhi sithuthuke. (Roma 12:11) Izahluko eziningi ningase nikwazi ukuzihlanganisa ngesikhathi esingangehora noma ngaphezudlwana, ngaphandle kokugijima kakhulu esifundweni, kuye ngezimo nekhono lomfundi. Abafundi bayothuthuka kangcono lapho umfundisi nomfundi begcina isikhathi sabo sesifundo sesonto ngalinye. Ngaleyo ndlela, abantu abaningi bangase bakwazi ukuqeda izahluko ezingu-19 zalencwadi ngezinyanga eziyisithupha noma ngaphezudlwana.
5 Yethula isifundo ngasinye ngokukhulumela okufushane okuvusa isithakazelo ngalokho okuzofundwa. Uzoqaphela ukuthi isihloko sesahluko ngasinye siwumongo waso, odinga ukugcizelelwa. Isihlokwana ngasinye siqokomisa iphuzu eliyinhloko, okukusiza ukuba uhlale ucabanga ngephuzu eliyinhloko lesahluko. Qaphela ukuba ungakhulumi kakhulu. Kunalokho, zama ukuthola ukukhulumela komfundi. Ukubuza imibuzo eqondile ehola umfundi, esekelwe kulokho asekwazi kakade, kuyomsiza ukuba acabange futhi afinyelele iziphetho eziqondile. (Math. 17:24-26; Luka 10:25-37; bheka Incwadi Yokuchasisa Isikole, ikhasi 51, isigaba 10.) Namathela ekwazisweni okusencwadini ethi Ulwazi. Ukunezela eminye imininingwane kungasusa umqondo emaphuzwini ayinhloko noma kuwafiphaze bese kwenza isifundo sibe side. (Joh. 16:12) Uma kuphakanyiswa umbuzo ongaphathelene nendaba efundwayo, ezimweni eziningi ungawuphendula ekuphetheni kwesifundo. Lokhu kuyokwenza ukwazi ukuhlanganisa isifundo sangalelo sonto ngaphandle kokuphazamiseka. Chazela umfundi ukuthi ngokuhamba kwesikhathi eminingi yemibuzo yakhe iyophendulwa njengoba isifundo siqhubeka.—Bheka Incwadi Yokuchasisa Isikole, ikhasi 93, isigaba 14.
6 Uma umfundi ekholelwa ngokuqinile kuZiqu-zintathu, ukungafi komphefumulo, isihogo somlilo, noma ezinye izimfundiso zamanga ezinjalo, futhi lokho okushiwo encwadini ethi Ulwazi kungamgculisi, ungamnika incwadi ethi Ukubonisana noma enye incwadi ekhuluma ngaleyo ndaba. Mtshele ukuthi uzoxoxa naye ngalendaba ngemva kokuba esecabangile ngalokho akufundayo.
7 Ukuqala nokuphetha isifundo ngomthandazo wokucela isiqondiso sikaJehova nesibusiso kwenza isifundo sihlonipheke, kwenze umuntu abe nesimo sengqondo sokuhlonipha, futhi kwenze uJehova aqashelwe njengoMfundisi weqiniso. (Joh. 6:45) Uma umfundi esabhema, kungase kudingeke ukuthi ngokuhamba kwesikhathi umcele ukuba angabhemi phakathi nesifundo.—IzE. 24:16; Jak. 4:3.
8 Fundisa Ngokuphumelelayo NgemiBhalo, Imifanekiso, Nangemibuzo Yokubukeza: Umfundisi onekhono uyolungiselela isifundo ngasinye ecabanga ngomfundi ngamunye, kungakhathaliseki ukuthi useyifunde kaningi kangakanani ngaphambili incwadi. Lokhu kumsiza ukuba acabangele eminye imibuzo engase ibuzwe umfundi. Ukuze ufundise ngokuphumelelayo, waqonde kahle amaphuzu ayinhloko asesahlukweni. Bheka imibhalo ukuze ubone ukuthi isebenza kanjani endabeni, bese unquma ukuthi imiphi okufanele ifundwe phakathi nesifundo. Cabanga ngendlela ongafundisa ngayo usebenzisa imifanekiso nemibuzo yokubukeza esekugcineni kwesahluko.
9 Ngokuyisebenzisa kahle imibhalo, uyosiza umfundi ukuba aqaphele ukuthi ngempela utadisha iBhayibheli. (IzE. 17:11) Usebenzisa ibhokisi elithi “Lazi Kahle IBhayibheli Lakho,” elisekhasini 14 lencwadi ethi Ulwazi, mfundise indlela yokuthola imibhalo. Mbonise indlela yokubona amavesi acashuniwe asendabeni efundwayo. Uma isikhathi sivuma, vulani futhi nifunde imibhalo ekhonjiwe engacashunwanga. Umfundi makakhulumele indlela lamavesi asekela futhi acacise ngayo okushiwo esigabeni. Gcizelela izingxenye eziyinhloko zamavesi ukuze aqaphele izizathu zamaphuzu ayinhloko esifundo. (Neh. 8:8) Ngokuvamile, asikho isidingo sokuba umfundisi anezele eminye imibhalo engxoxweni ngaphezu kwaleyo esencwadini. Khulumela ukubaluleka kokwazi amagama nendlela yokulandelana kwezincwadi zeBhayibheli. Kungase kube usizo ngomfundi ukufunda amakhasi 27-30 e-Nqabayokulinda ka-June 15, 1991. Lapho kufaneleka, mkhuthaze ukuba asebenzise INguqulo Yezwe Elisha YemiBhalo YamaKristu YesiGreki. Kancane kancane ungambonisa indlela yokusebenzisa izici zayo ezivelele ezihlukahlukene, kuhlanganise nezikhombo zamagama aseBhayibhelini.
10 ISifundo 34 encwadini ethi Incwadi Yokuchasisa Isikole Senkonzo EsingokwaseZulwini sichaza ukuthi imifanekiso yenza umuntu acabange futhi yenze kube lula ukuqonda imiqondo emisha. Ihlanganisa ukukhanga ingqondo nokuthinta imizwelo ngokunamandla, ukuze isigijimi sidluliselwe ngamandla angenakwenzeka lapho iphuzu lishiwo ngenkulumo elula. (Math. 13:34) Incwadi ethi Ulwazi inemifanekiso eminingi efundisayo elula kodwa enamandla. Ngokwesibonelo, umfanekiso osetshenziswe esahlukweni 17 wakha ukwazisa ngendlela uJehova alungiselela ngayo ngokomoya ukudla, okokwembatha, nendawo yokukhosela esebenzisa ibandla lobuKristu. Izithombe ezinhle zencwadi ethi Ulwazi zingasetshenziswa ngokuphumelelayo ukuze zishukumise imizwelo. Ngaphansi kwesihlokwana esithi “Uvuko Olujabulisayo,” esisekhasini 185, amaphuzu anamandla esigaba 18 ayogcizeleleka ngokucela umfundi ukuba abheke emuva isithombe esisekhasini 86. Lokhu kungamshukumisela ukuba acabange ngovuko njengento ezokwenzeka ngaphansi koMbuso kaNkulunkulu.
11 Abantu esifunda nabo iBhayibheli kufanele benze intuthuko engokomoya ngesifundo ngasinye. Ngenxa yalokho, ungayeqi imibuzo yokubukeza esebhokisini elithi “Hlola Ulwazi Lwakho” elisekugcineni kwesahluko ngasinye. Zama ukuthola okungaphezu nje kwempendulo esuka engqondweni yalokho okufundiwe. Eminingi yalemibuzo iklanyelwe ukwenza umuntu aphendule ngokusuka enhliziyweni. Ngokwesibonelo, bheka ikhasi 31, lapho umfundi ebuzwa khona ukuthi: “Yiziphi izimfanelo zikaJehova uNkulunkulu ozithanda ngokukhethekile?”—2 Kor. 13:5.
12 Qeqesha Abafundi Ukuba Balungiselele Isifundo: Umfundi osilungiselelayo isifundo, aphawule izimpendulo, abese ecabanga indlela azozisho ngayo ngamazwi akhe, uyothuthuka ngokushesha okukhulu ngokomoya. Ngesibonelo sakho nangesikhuthazo, ungamqeqesha ukuba asilungiselele isifundo. Mbonise incwadi yakho oyidwebele amagama nemishwana eyisihluthulelo. Mchazele indlela yokuthola izimpendulo eziqondile zemibuzo esencwadini. Ukulungiselela isahluko ndawonye kungaba usizo kumfundi. Mkhuthaze ukuba aphendule ngamazwi akhe. Kuyocaca lapho-ke ukuthi uyakuqonda yini akufundayo. Uma impendulo yakhe eyifunda encwadini, ungashukumisa ingqondo yakhe ngokumbuza ukuthi ubengamchazela kanjani othile leli phuzu ngamazwi akhe.
13 Khuthaza umfundi ukuba ekulungiseleleni kwakhe kwamasonto onke afunde imibhalo engacashuniwe, ngoba kungenzeka singabibikho isikhathi sokuyifunda yonke phakathi nesifundo. Mtuse ngomzamo awenzayo esifundweni sakhe. (2 Pet. 1:5; bheka INqabayokulinda ka-August 15, 1993, amakhasi 13-14, ukuze uthole ukusikisela okwengeziwe okuphathelene nalokho okungase kwenziwe umfundisi nomfundi ukuze bazuze okuningi esifundweni seBhayibheli.) Ngalendlela, umfundi uqeqeshelwa ukuba alungiselele futhi anikeze izimpendulo ezizuzisayo emihlanganweni yebandla. Uyofunda indlela yokuhlakulela imikhuba emihle yesifundo somuntu siqu eyomhlomisela ukuba aqhubeke ethuthuka eqinisweni ngemva kokuba esesiqedile isifundo sakhe siqu seBhayibheli encwadini ethi Ulwazi.—1 Thim. 4:15; 1 Pet. 2:2.
14 Qondisa Abafundi Enhlanganweni KaJehova: Kuwumthwalo wemfanelo womuntu owenza abafundi ukuba aqondise isithakazelo somfundi enhlanganweni kaJehova. Umfundi uyothuthukela ekuvuthweni ngokomoya ngokushesha ngokwengeziwe uma eyiqaphela futhi eyazisa inhlangano abese ebona isidingo sokuba ingxenye yayo. Sifuna akujabulele ukuhlanganyela nabantu bakaNkulunkulu futhi akulangazelele ukuba nabo eHholo LoMbuso, lapho engathola khona ukusekelwa ngokomoya nangokomzwelo okunikezwa ibandla lobuKristu.—1 Thim. 3:15.
15 Incwajana engangomagazini ethi OFakazi BakaJehova—Ngobunye Benza Intando KaNkulunkulu Emhlabeni Wonke iye yanyatheliswa ukuze ijwayelanise abantu nokuwukuphela kwenhlangano ebonakalayo uJehova ayisebenzisayo namuhla ukuze afeze injongo yakhe. Lapho isifundo sesiqaliwe, kungani unganikezi umfundi eyakhe? Zisuka nje amadaka, mmemele njalo emihlanganweni umfundi. Mchazele indlela eqhutshwa ngayo. Ungase umtshele isihloko senkulumo yeningi elandelayo noma umbonise isihloko okuzoxoxwa ngaso eSifundweni Se-Nqabayokulinda. Mhlawumbe ungase uyombonisa iHholo LoMbuso lapho kungekho mihlangano eqhubekayo ukuze uqede noma ikuphi ukwesaba angase abe nakho kokuya endaweni angayazi ngokokuqala ngqá. Ungase ukwazi ukumsiza ngento yokuya emihlanganweni. Uma ekhona, menze azizwe amukelekile futhi ethokomele. (Math. 7:12) Methule kwabanye oFakazi, kuhlanganise nabadala. Kwethenjwa ukuthi uyoqala ukubheka ibandla njengomkhaya wakhe ongokomoya. (Math. 12:49, 50; Marku 10:29, 30) Ungase umbekele umgomo othile, onjengokuba khona emhlanganweni owodwa isonto ngalinye, bese kancane kancane uwandisa lowo mgomo.—Heb. 10:24, 25.
16 Njengoba isifundo seBhayibheli siqhubeka ngencwadi ethi Ulwazi, gcizelela izingxenye eziqokomisa isidingo sokuhlangana njalo nebandla emihlanganweni. Phawula ngokukhethekile amakhasi 52, 115, 137-9, 159, kanye nesahluko 17. Veza imizwa yakho ejulile yokwazisa inhlangano kaJehova. (Math. 24:45-47) Khuluma kahle ngebandla lendawo nangalokho okufunda emihlanganweni. (IHu. 84:10; 133:1-3) Kungaba kuhle ukuba umfundi abuke i-video ngayinye yeNhlangano, aqale ngalena ethi Jehovah’s Witnesses—The Organization Behind the Name. Ukuze uthole imiqondo eyengeziwe ngokuthi ungasiqondisa kanjani isithakazelo enhlanganweni, bheka INqabayokulinda ka-November 1, 1984, amakhasi 13-17 [w84 11/1 14-18], nesenezelo se-Nkonzo Yethu YoMbuso ka-May 1993.
17 Khuthaza Abafundi Ukuba Bafakaze Kwabanye: Umgomo wethu ekutadisheni nabantu uwukwenza abafundi abafakaza ngoJehova. (Isaya 43:10-12) Lokho kusho ukuthi umfundisi kufanele akhuthaze umfundi ukuba akhulume nabanye ngalokho akufunda eBhayibhelini. Lokhu kungenziwa ngokumane nje ubuze: “Ubungalichaza kanjani leli qiniso emkhayeni wakho?” noma “Imuphi umbhalo obungawusebenzisa ukuze ubonise umngane wakho lokhu?” Gcizelela izindawo eziyisihluthulelo encwadini ethi Ulwazi lapho sikhuthazwa khona ukuba sifakaze, njengamakhasi 22, 93-5, 105-6, kanye nesahluko 18. Uma kufaneleka, umfundi angase anikezwe amapheshana ukuze awasebenzise ekufakazeni kwabanye ngokwethukela. Sikisela ukuba ameme amalungu omkhaya wakhe ukuba ahlanganyele naye esifundweni sakhe. Ingabe unabo abangane abangase bathande ukufunda? Mcele ukuba akutshele labo abanesithakazelo.
18 Ngokuba khona eSikoleni SeNkonzo Esingokwasezulwini naseMhlanganweni Wenkonzo, lowo ofunda naye angathola ukuqeqeshwa okwengeziwe nogqozi oluzomsiza ukuba abe ummemezeli wezindaba ezinhle. Lapho ebonisa isithakazelo sokubhalisa esikoleni noma sokuba ummemezeli ongabhapathiziwe, kuyosetshenziswa izimiso ezisemakhasini 98 no-99 encwadi ethi Ukuhlelelwa. Uma kunesici sokuphila kwakhe esimvimbela ukuba afaneleke, ungacwaninga ezincwadini zeNhlangano ukuze uthole ukwaziswa okuwusizo okuphathelene naleyo ndaba bese ukuhlanganyela naye. Ngokwesibonelo, kungenzeka umfundi unobunzima bokunqoba ukuba umlutha kagwayi noma ezinye izidakamizwa. Incwadi ethi Ukubonisana inikeza izizathu ezinamandla ezingokomBhalo zokuthi kungani amaKristu kufanele agweme imikhuba elimaza njengalowo, futhi ekhasini 112 ichaza indlela eye yabonakala iphumelela ekusizeni abanye ukuba bagqashule. Thandaza naye ngalendaba, umfundise ukwakha ukwethembela kwakhe kuJehova ukuze amsize.—Jak. 4:8.
19 Indlela elandelwayo yokubona ukuthi umuntu uyafaneleka yini ukuhlanganyela enkonzweni yasobala ichazwe kuyi-Nqabayokulinda ka-January 15, 1996, ikhasi 16, isigaba 6. Uma umfundi efaneleka, kungaba usizo ukuprakthiza ukuze umlungiselele usuku lwakhe lokuqala enkonzweni yasensimini. Ngendlela eyakhayo, xoxani ngokusabela kwabantu nokuphikisa kwabo okuvamile ensimini yenu. Uma kungenzeka, mqalise emsebenzini wendlu ngendlu, bese kancane kancane umqeqeshela ezinye izici zenkonzo. Uma ugcina intshumayelo yakho imfushane futhi ilula, kuyoba lula ngaye ukuyilingisa. Yiba owakhayo nokhuthazayo, ubonise injabulo emsebenzini, ukuze awubone umoya onawo futhi awulingise. (IzE. 18:25) Umgomo womfundi omusha kufanele ube ukuba ummemezeli wezindaba ezinhle ophuma njalo, noshisekayo. Mhlawumbe ungamsiza ukuba enze isimiso esisebenzisekayo senkonzo. Ukuze athuthuke ekhonweni lakhe lokufakaza kwabanye, ungase usikisele ukuba afunde INqabayokulinda ka-April 1, 1985 amakhasi 26-31 neka-April 15, amakhasi 25-9 [w84 8/15 15-25]; July 15, 1988, amakhasi 9-20; January 15, 1991, amakhasi 15-20; no-January 1, 1994, amakhasi 20-5.
20 Khuthaza Abafundi Ukuba Bazinikezele Futhi Babhapathizwe: Umfundi oqotho kufanele akwazi ukufunda okwanele ngesifundo sencwadi ethi Ulwazi ukuze azinikezele kuNkulunkulu futhi afanelekele ubhapathizo. (Qhathanisa nezEnzo 8:27-39; 16:25-34.) Nokho, ngaphambi kokuba umuntu ashukumiseleke ukuba azinikezele, kudingeka ahlakulele ukuzinikela kuJehova. (IHu. 73:25-28) Njalo lapho nifunda, funa amathuba okwakha ukwazisa ngezimfanelo zikaJehova. Zwakalisa imizwa yakho siqu ejulile ngoNkulunkulu. Siza umfundi ukuba acabange ngokwakha ubuhlobo obufudumele, nobomuntu siqu noJehova. Uma ngempela efinyelela ekumazini nasekumthandeni uNkulunkulu, khona-ke uyomkhonza ngokwethembeka, ngoba ukuzinikela kokuhlonipha uNkulunkulu kuhlobene nendlela esizizwa ngayo ngoJehova njengomuntu.—1 Thim. 4:7, 8; bheka Incwadi Yokuchasisa Isikole, ikhasi 76, isigaba 11.
21 Zabalazela ukufinyelela inhliziyo yomfundi. (IHu. 119:11; IzE. 16:14; Roma 10:10) Kudingeka abone indlela iqiniso elimthinta ngayo ngokomuntu siqu abese enquma ukuthi yini okumelwe ayenze ngalokho akufundile. (Roma 12:2) Ingabe uyalikholelwa ngempela iqiniso alinikezwa isonto ngalinye? (1 Thes. 2:13) Ukuze ufeze leyo njongo, ungenza umfundi akhulume ngokumbuza imibuzo ephenyayo efuna umbono, enjengokuthi: Uzizwa kanjani ngalokhu? Ungakusebenzisa kanjani lokhu ekuphileni kwakho? Ngezimpendulo zakhe ungakwazi ukubona ukuthi uludinga kuphi usizo kakhulu ukuze ufinyelele inhliziyo yakhe. (Luka 8:15; bheka Incwadi Yokuchasisa Isikole, ikhasi 51, isigaba 11.) Amazwi achaza imifanekiso esemakhasini 172 no-174 encwadi ethi Ulwazi ayabuza: “Ingabe usuzinikezele kuNkulunkulu ngomthandazo?” nokuthi “Yini ekuvimbela ukuba ubhapathizwe?” Lokhu kalula kungashukumisela umfundi esenzweni.
22 Inqubo okufanele ilandelwe lapho ummemezeli ongabhapathiziwe enesifiso sokubhapathizwa ichazwe kuyi-Nqabayokulinda ka-January 15, 1996, ikhasi 17, isigaba 9. Incwadi ethi Ulwazi yabhalwa ngenjongo yokuhlomisa umuntu ukuba akwazi ukuphendula esithi “Imibuzo Yalabo Abafisela Ukubhapathizwa,” esitholakala esithasiselweni sencwadi ethi Ukuhlelelwa, abadala abayosibukeza naye. Uma uzigcizelele izimpendulo zemibuzo esencwadini ethi Ulwazi, umfundi kufanele abe eseyihlomele kahle imibuzo esingathwa abadala ekulungiseleleni ukubhapathizwa kwakhe.
23 Siza Labo Asebesiqedile Isifundo SeBhayibheli Sasekhaya: Kulindeleke ukuthi lapho umuntu eseqedile ukufunda incwadi ethi Ulwazi, ubuqotho bakhe nokujula kwesithakazelo sakhe sokukhonza uNkulunkulu kuyobe sekusobala. (Math. 13:23) Yingakho isihlokwana sokugcina salencwadi sibuza, “Yini Ozoyenza?” Izigaba zokugcina zinxusa umfundi ukuba agxile ebuhlotsheni ayobe esenabo noNkulunkulu, esidingweni sokusebenzisa ulwazi aye walufunda, nasesidingweni sokuthatha isinyathelo ngokushesha sokubonisa uthando lwakhe ngoJehova. Alikho ilungiselelo lokufunda ezinye izincwadi nalabo asebeqede incwadi ethi Ulwazi. Ngomusa nangokucacile chazela umfundi ongasabeli olwazini ngoNkulunkulu lokho okufanele akwenze ukuze athuthuke ngokomoya. Ungalokhu uthintana naye njalo ngezikhathi ezithile, ushiye indlela ivulekile yokuthatha izinyathelo eziholela ekuphileni okumi phakade.—UmSh. 12:13.
24 Umfundi omusha owamukela iqiniso abese ebhapathizwa kuyodingeka akhule kakhulu olwazini lwakhe nasekuqondeni ukuze azinze ngokugcwele okholweni. (Kol. 2:6, 7) Kunokuba uqhubeke nesifundo seBhayibheli ngemva kokuqeda incwadi ethi Ulwazi, ungazenza utholakale ukuze unikeze noma iluphi usizo lomuntu siqu angase aludinge ukuze avuthwe ngokomoya. (Gal. 6:10; Heb. 6:1) Usengazikhulisela yena ukuqonda kwakhe ngokufunda iBhayibheli nsuku zonke, azifundele INqabayokulinda nezinye izincwadi ‘zesigqila esikholekile,’ alungiselele futhi abe khona emihlanganweni, abese exoxa ngeqiniso nakholwa nabo. (Math. 24:45-47; IHu. 1:2; IzE. 2:41, 42; Kol. 1:9, 10) Ukufunda kwakhe incwadi ethi Ukuhlelelwa nokusebenzisa lokho ekushoyo kuyofeza indima ebalulekile ekuhlelekeni kwakhe ngendlela engokwasezulwini ukuze afeze inkonzo yakhe ngokugcwele.—2 Thim. 2:2; 4:5.
25 Thuthukisa Ikhono Lokufundisa: Sithunywe ukuba ‘senze abantu babe abafundi, sibafundise.’ (Math. 28:19, 20) Njengoba ikhono lokufundisa lihlangene ngokungenakuhlukaniseka nokwenza abafundi, sifuna ukulwela ukuthuthuka njengabafundisi. (1 Thim. 4:16; 2 Thim. 4:2) Ukuze uthole ukwaziswa okwengeziwe ngendlela ongathuthukisa ngayo ikhono lokufundisa, ungase ufise ukufunda esithi: “Ukuthuthukisa Ikhono Lokufundisa” nesithi “Ukufinyelela Inhliziyo Yezilaleli Zakho” ezisencwadini ethi Incwadi Yokuchasisa Isikole, iZifundo 10 no-15; esithi “Teacher, Teaching” esikuyi-Insight, Umqulu 2; nesihloko esithi “Ukwakha Ngezinto Ezingashi” nesithi “Lapho Ufundisa, Finyelela Inhliziyo,” ezikuyi-Nqabayokulinda ka-March 15, 1985 [w84 8/1]; esithi “Ingabe Ubonisana Ngokuphumelelayo Nabanye NgemiBhalo?,” esikweka-March 1, 1986; nesithi “Indlela Yokuthola Injabulo Ekwenzeni Abafundi,” esikweka-February 15, 1996.
26 Njengoba uzama ukwenza abafundi, usebenzisa incwadi ethi Ulwazi, thandaza njalo ukuba uJehova, “okhulisayo,” abusise imizamo yakho ekufinyeleleni izinhliziyo zabantu ngezindaba ezinhle zoMbuso. (1 Kor. 3:5-7) Kwangathi ungathola injabulo yokufundisa abanye ukuba baqonde, babe nokwazisa, futhi benze ngokuvumelana nolwazi oluholela ekuphileni okumi phakade!