Finyelela Inhliziyo Yomuntu Omfundelayo
1 Ngaphambi kokuba anyukele ezulwini, uJesu watshela abafundi bakhe ukuba bafundise abanye ‘ukugcina’ zonke izinto ayebayale ngazo. (Math. 28:19, 20) Ukuze umuntu ‘agcine’ imiyalo kaKristu, ukwaziswa kufanele kufinyelele inhliziyo yakhe. (IHu. 119:112) Ungayithinta kanjani inhliziyo yomuntu omfundisa iBhayibheli?
2 Thandazela Isiqondiso SikaJehova: Ukwenza abafundi kungumsebenzi kaNkulunkulu. Akuwona amakhono ethu, kodwa isibusiso sakhe esidingekayo ukuze siphumelele. (IzE. 16:14; 1 Kor. 3:7) Ngakho, kubalulekile ukuthandazela usizo lukaJehova ukuze sifundise abanye iqiniso.—Isaya 50:4.
3 Thola Lokho Umfundi Akukholelwayo: Ukwazi lokho abantu abakukholelwayo nokuthi kungani bekukholelwa kungasenza sibe nombono wokuthi singathini ukuze sifinyelele inhliziyo yabo. Kungani umfundi ethola imfundiso ethile ikhanga? Yini eyamqinisekisa ukuba ayikholelwe? Ulwazi olunjalo lungasisiza ukuba sikhulume ngokuqonda.—IzE. 17:22, 23.
4 Xoxa Ngephuzu Elinengqondo, ElingokomBhalo: Iqiniso kufanele libe nengqondo kumfundi. (IzE. 17:24-31) Kufanele sibe nesizathu esinengqondo ngethemba elikithi. (1 Pet. 3:15) Nokho, kwenze njalo ngendlela yomusa nangesineke.
5 Gcizelela Ngemifanekiso: Imifanekiso ayigcini nje kuphela ngokwenza ukuba umfundi aqonde kalula kodwa futhi ishukumisa izisusa. Ithinta kokubili ingqondo nenhliziyo. UJesu wayeyisebenzisa njalo. (Marku 4:33, 34) Yiqiniso, ukuze uphumelele, umfanekiso osetshenziswayo kufanele ufanelane nephuzu enixoxa ngalo, futhi kufanele uhlobane nokuphila komfundi.
6 Bonisa Izinzuzo Zokwamukela Iqiniso: Abantu bafuna ukuzazi izinzuzo zokusebenzisa abakufundayo. Siza umuntu omfundisayo ukuba abone ukuhlakanipha kwamazwi kaPawulu kweyesi-2 Thimothewu 3:14-17.
7 Ungadangali uma abanye bengasabeli ekufundiseni kwakho. Akuzona zonke izinhliziyo ezilamukelayo iqiniso. (Math. 13:15) Nokho, abanye abantu bayaba amakholwa. (IzE. 17:32-34) Kwangathi imizamo yakho yokufinyelela izinhliziyo ngezindaba ezinhle ingasiza abaningi ukuba bamukele futhi “bagcine” lokho uJesu ayala ngako.