Isimiso Esisha Somhlangano Wesifunda
Ngokwenye incazelo elithi ukwesaba lisho “inhlonipho ejulile nokuthuthumela, ikakhulukazi ngoNkulunkulu.” Lokhu kuchaza ukwesaba okunempilo okubhekiselwa kukho emiBhalweni ‘njengokuqala kokuhlakanipha.’ (IHu. 111:10) Ngokuphambene, olunye uhlobo lokwesaba lubusa izwe likaSathane elisizungezile. Singawugwema kanjani lowo muzwa ongakhi sibe sihlakulela umuzwa wokwesaba uJehova okunenhlonipho? Isimiso esisha somhlangano wesifunda sonyaka wenkonzo ka-2002 siphendula lo mbuzo. Sinesihloko esithi “Mesabeni UNkulunkulu Nimnike Inkazimulo.” (IsAm. 14:7) Siyoqonda izindlela eziningi ukwesaba uJehova okusizuzisa ngazo njengabantu nenhlangano.
Nakuba ukwesaba kungase kusho ukukhathazeka noma ukuphelelwa ithemba nokuba manqikanqika ekubhekaneni nezimo ezinzima, iBhayibheli lithi: “Babusisiwe bonke abamesabayo uJehova.” (IHu. 128:1) Isimiso somhlangano siyosibonisa indlela esingabhekana ngayo ngokuphumelelayo nezinselele zokukhulekela kweqiniso. Siyobona indlela yokusiza abasanda kuhlanganyela ukuba bahlakulele umuzwa wokwesaba uNkulunkulu okunempilo, oyobashukumisela ukuba bafune ukumkhonza ngenhliziyo, umphefumulo, ingqondo namandla abo onke. (Marku 12:30) Usuku lokuqala luphetha ngenkulumo yombonisi wesigodi ethi “Sondelana Eduze Nalabo Obathandayo.” Uyochaza indlela esingahlala siqaphe ngayo imizamo kaDeveli yokuba sifulathele uJehova, umkhaya wethu nabafowethu abangamaKristu.
Isihloko esithi “Yesabani UJehova, Hhayi Abantu” siyinkulumo ewuchungechunge eyizingxenye ezine eyonikezwa ngosuku lwesibili. Iyochaza ukuthi kungani kufanele sinqobe ukwesaba okusivimbela ukuba sifeze inkonzo yethu ngokugcwele, noma silondoloze ubuqotho bethu nonembeza omuhle esikoleni nasendaweni yomsebenzi, ichaze nokuthi singakwenza kanjani. Inkulumo yeningi enesihloko esithi “Yesabani UNkulunkulu Nigcine Imiyalo Yakhe” isekelwe ezenzakalweni eziwuchungechunge ezichazwe kusAmbulo isahluko 14. Umhlangano wesifunda uyophetha ngesiqondiso esikhuthazayo sokuba ‘Siqhubeke Sihamba Ngokumesaba UJehova.’
ISikole Senkonzo Esingokwasezulwini, uMhlangano Wenkonzo oyisibonelo, inkulumo yobhapathizo nokubukezwa kweSifundo Se-Nqabayokulinda yizinkulumo ezivelele zomhlangano ongeke uthande ukuba zikulahlekele. Mema ofunda nabo iBhayibheli ukuba nabo babekhona. Noma ubani ofisa ukubhapathizwa kufanele azise umbonisi owengamele ngokushesha ngangokunokwenzeka. Sonke siyofuna ukubonisa ukwesaba kwethu uJehova okunempilo futhi simnike inkazimulo ngokuba singalahlekelwa nayinoma iyiphi ingxenye yalesi simiso esivelele!