Hlanganiswani Ndawonye Ngokuvumelana
1 Kukangaki umangala lapho ubheka umzimba womuntu oklanywe ngobunyoninco? (IHu. 139:14) Ilungu ngalinye lomzimba lisebenza ngokuvumelana namanye. IZwi likaNkulunkulu lifanisa ibandla lobuKristu nomzimba osebenza ngokuvumelana. Ngaphansi kweNhloko, uKristu, wonke amalungu ebandla ‘ahlanganiswe ndawonye ngokuvumelanayo nangokwenziwa ukuba abambisane ngawo wonke amalunga anikeza lokho okudingekayo.’ (Efe. 4:16a) Ngakho, uJehova uyakwazi ukusebenzisa abantu bakhe abanobunye ukuze afeze izinto ezimangalisayo.
2 Amalungu ebandla lekhulu lokuqala asebenza “nganhliziyonye” ekunakekeleni izidingo zabanye ezingokomoya nezingokwenyama. (IzE. 2:44-47) Njengoba ayesekelwa uJehova, aphikiswa ngonya kodwa anqoba ngobunye. (IzE. 4:24-31) Amemezela isigijimi soMbuso nomaphi lapho ayeya khona, ahlanganisa umhlaba owawaziwa ngaleso sikhathi ngezindaba ezinhle. (Kol. 1:23) Ezikhathini zanamuhla, ibandla lobuKristu liye lafeza izinto ezifanayo ngobunye ngisho nangezinga elikhulu. Yiziphi izici ezinomthelela kulobu bunye?
3 Sihlanganiswa Imfundiso Yaphezulu: Embulungeni yonke, ukukhulekela kwethu kusenza sibe nobunye. Kwenzeka kanjani lokhu? Siqaphela umzila obonakalayo uJehova awusebenzisayo ekulungiseleleni “ukudla [okungokomoya] ngesikhathi esifanele.” (Math. 24:45) Siyazazisa ‘nezipho ezingabantu’ asinike zona ukuba zibe abafundisi ebandleni. Njengoba samukela ngokuzithoba amalungiselelo kaJehova okusondla ngokomoya, ukuqonda kwethu iZwi likaNkulunkulu kuyakhula futhi kuvuse isifiso esifanayo kithi sokulingisa uJesu njengabafundi bakhe. Kumelwe siqhubeke sitadisha iZwi likaNkulunkulu, ngokuzimisela silwela ‘ukufinyelela ebunyeni okholweni.’ (Efe. 4:8, 11-13) Ingabe uthuthukisa ubunye bethu obungokomoya ngokufunda iBhayibheli nsuku zonke?
4 Sihlanganiswa Ubudlelwano BobuKristu: Uthando lusenza sibe nobudlelwano obusondelene emihlanganweni yobuKristu. Kule mihlangano, ‘siyacabangelana.’ (Heb. 10:24, 25) Lokhu kuhlanganisa ukubheka ngalé kokubonakala kwangaphandle futhi sibazi ngempela abafowethu, sibabheke njengabayigugu, ngendlela uJehova ababheka ngayo. (Hag. 2:7, umbhalo waphansi we-NW) Njengoba silalela amazwi abo okholo, iyajula indlela esibathanda ngayo nobunye bethu buqiniswe. Ingabe waziwa njengomuntu oba khona njalo emihlanganweni yebandla?
5 Izisebenzi Ezikanye Nathi Ensimini: Ukushumayela izindaba ezinhle nesikholwa kanye nabo kuyasihlanganisa ekwenzeni intando kaNkulunkulu. Umphostoli uPawulu wayebazisa labo ‘ababeyizisebenzi ezikanye naye ngenxa yombuso kaNkulunkulu.’ (Kol. 4:11) Ukuxoxa ngokuhlangenwe nakho nokulekelelana lapho sisenkonzweni kusisiza ukuba sifeze umsebenzi wethu wobuKristu futhi kuqinise nesibopho sethu sobunye.—Kol. 3:14.
6 Ithonya Elihlanganisayo Lomoya Ongcwele: Lapho sizikhandla ukuze senze intando kaJehova, usibusisa ngomoya wakhe. Lokhu kusisiza ukuba silungise ukungezwani futhi sihlalisane ngobunye. (IHu. 133:1) Kusishukumisela ukuba ‘sigcine ubunye bomoya esibophweni esihlanganisayo sokuthula.’ (Efe. 4:3) Ngamunye wethu angaba neqhaza ekuzwaneni okukhona phakathi kwabantu bakaNkulunkulu ngokubonakalisa izithelo zomoya ekusebenzelaneni kwethu.—Gal. 5:22, 23.
7 Ukukhonza ndawonye ngobunye ngaphansi kobunhloko bukaKristu ‘kubangela ukukhula komzimba ukuze uzakhe othandweni.’ (Efe. 4:16b) Ngaphezu kwalokho, kukhazimulisa uJehova, “uNkulunkulu onika ukuthula.”—Roma 16:20.