Indlela Ethakazelisayo Okwenziwe Ngayo Amapheshana Amasha!
1. Imaphi amathuluzi enkonzo enziwe ngendlela ethakazelisayo?
1 EMihlanganweni Yesigodi Ka-2013 enesihloko esithi “Izwi LikaNkulunkulu Liyiqiniso!” kwakhululwa amapheshana amasha amahlanu. Ngaphezu kwalokho, kuye kwanezelwa ne-Kingdom News No. 38, enesihloko esithi “Ingabe Abafileyo Bangaphinde Baphile Ngempela?” Wonke la mapheshana ayisithupha enziwe ngendlela entsha ethakazelisayo. Kungani enziwe ngale ndlela? Lapho siwahambisa endlini ngendlu, singazisebenzisa kanjani ngokunenzuzo izici zawo?
2. Kungani la mapheshana enziwe ngale ndlela entsha?
2 Kungani Enziwe Ngale Ndlela?: Ngokuvamile izethulo eziphumelelayo endlini ngendlu zihlanganisa lezi zinyathelo ezine: (1) Buza umbuzo odinga umbono womninikhaya ukuze uqale ingxoxo. (2) Funda umBhalo. (3) Mshiyele incwadi azosala eyifunda. (4) Mshiye nombuzo ozowuphendula lapho ubuya, uhlele nokwenza impindelo. Indlela entsha okwenziwe ngayo la mapheshana yenza kube lula ukwenza konke lokhu okune okungenhla.
3. Singalihambisa kanjani ipheshana elisha ensimini?
3 Indlela Yokuwasebenzisa: (1) Ngemva kokubingelela, bonisa umninikhaya umbuzo ovusa isithakazelo osekhasini lokuqala olandelwa izimpendulo ezintathu, umcele akhethe eyodwa kuzo. (2) Vula ipheshana, uxoxe naye ngesihloko esithi “Okushiwo IBhayibheli.” Uma izimo zivuma, mfundele ngokuqondile umBhalo eBhayibhelini. Uma umninikhaya enaso isikhathi, xoxani ngesihloko esithi “Lokho Okungase Kukusho Ngawe.” (3) Mnikeze ipheshana, umkhuthaze ukuba azifundele ingxenye yalo esele uma ethola ithuba. (4) Ngaphambi kokuba uhambe, mbonise umbuzo ongemuva ngaphansi kwesihloko esithi “Cabanga Ngalokhu” wenze namalungiselelo okubuyela niyoxoxa ngempendulo yeBhayibheli.
4. Singawasebenzisa kanjani amapheshana amasha lapho senza impindelo?
4 Kulula nokwenza impindelo. Sebenzisa imiBhalo ekhonjiwe engemuva kwepheshana ukuze uphendule umbuzo owawubuza ngesikhathi esidlule. Ngaphambi kokuba uhambe, bonisa umninikhaya isithombe sencwajana ethi Izindaba Ezinhle, umbonise incwajana nesifundo esinokwaziswa okwengeziwe ngendaba enixoxa ngayo bese umhambisela yona. Uma eyamukela, hlelani ukuxoxa ngayo lapho uphindela. Kanjalo ususiqalile isifundo seBhayibheli! Noma esikhundleni sokumnika incwajana, ungamnika elinye ipheshana uhlele ukubuya nizoxoxa ngalo.
5. Awusizo kangakanani amapheshana enkonzweni yethu?
5 Sekuyiminyaka engaphezu kuka-130 sisebenzisa amapheshana enkonzweni yethu. Nakuba ubukhulu bawo nendlela enziwe ngayo kuhlukahluka, abelokhu eyithuluzi eliphumelela kakhulu lapho sishumayela. Sengathi singayisebenzisa kahle le ndlela entsha la mapheshana enziwe ngayo ukuze siqhubeke sisakaza ulwazi lweBhayibheli emhlabeni wonke.—IzAga 15:7a.