Iminyaka Eyikhulu Yokumemezela UMbuso!
1. Yini abantu bakaJehova abakhuthazwa ukuba bayenze eminyakeni engaba yikhulu edlule?
1 “Bhekani, iNkosi iyabusa! Nina ngingamanxusa ayo okuyimemezela. Ngakho-ke memezelani, memezelani, memezelani iNkosi nombuso wayo.” Ngalawo mazwi ashukumisayo ashiwo uMfoweth’ uRutherford eminyakeni engaba yikhulu edlule, abantu bakaJehova bakhuthazwa ukuba bamemezele isigijimi soMbuso emhlabeni wonke. Futhi yilokho kanye esikwenzile! NjengamaKristu akuqala, siye samemezela izindaba ezinhle zoMbuso “kuyo yonke indalo engaphansi kwezulu.” (Kol. 1:23) Phakathi neminyaka eyikhulu edlule, yini esiyenzile ukuze simemezele uMbuso kaNkulunkulu? Singaqhubeka kanjani siwumemezela njengoba sekuzohlangana unyaka wekhulu wokuzalwa koMbuso?
2. Izincwadi zethu ziwuqokomise kanjani uMbuso kaNkulunkulu?
2 Esikhathini Esidlule: Sekungamashumi eminyaka izincwadi zethu ziqokomisa uMbuso kaNkulunkulu. Kusukela ngo-1939 umagazini wethu oyinhloko ubulokhu unesihloko esithi: INqabayokulinda Ememezela UMbuso KaJehova. Lo magazini uhlale ukhuluma ngoMbuso nangalokho ozokwenza. I-Phaphama! nayo ikhuluma ngoMbuso kaNkulunkulu njengokuwukuphela kwethemba lesintu. Akumangalisi-ke ukuthi bobabili lab’ omagazini bahunyushwa futhi basakazwe ukudlula noma yibaphi abanye omagazini emhlabeni!—IsAm. 14:6.
3. Yiziphi ezinye izindlela esiye sazisebenzisa ukuze simemezele uMbuso?
3 Abantu bakaJehova baye basebenzisa izindlela ezihlukahlukene ukuze bamemezele uMbuso. Ekuqaleni kwakusetshenziswa izimoto ezinemibhobho, izinhlelo zomsakazo namagilamafomu aphathwayo. Lezo zindlela zasisiza ukuba sisakaze izindaba ezinhle kubantu abaningi esikhathini lapho abamemezeli boMbuso babembalwa khona. (IHu. 19:4) Eminyakeni yamuva, siye sakhipha ukwaziswa kuyi-jw.org, ngaleyo ndlela samemezela uMbuso ezigidini zabantu—kuhlanganise nalabo abahlala ezindaweni lapho umsebenzi wethu uvinjelwe khona.
4. Iziphi izindlela ezikhethekile zokushumayela esiye sazisebenzisa?
4 Abantu bakaJehova baye bahlanganyela nasezindleleni ezikhethekile zokusakaza isigijimi soMbuso. Ngokwesibonelo, phakathi nawo-1990 senza umzamo wokwenza okungaphezu kokushumayela endlini ngendlu ngokufakaza emapaki omphakathi, ezindaweni zokupaka izimoto nasezindaweni zamabhizinisi. Muva nje, siye sahlela ukufakaza okukhethekile emadolobheni amakhulu emhlabeni wonke. Ngaphezu kwalokho, amabandla amaningi ahlanganyela ekufakazeni obala emasimini awo ngokusebenzisa izinqola namatafula abekwa lapho kudlula khona abantu abaningi. Noma kunjalo, sigcina umsebenzi wokushumayela endlini ngendlu uyindlela yethu eyinhloko yokushumayela ngoMbuso.—IzE. 20:20.
5. Yimaphi amathuba azovulekela abaningi bethu onyakeni wenkonzo omusha?
5 Esikhathini Esizayo: Njengoba kuzoqala unyaka wenkonzo omusha ngo-September, abaningi bazokhonza njengamaphayona avamile. Wena ungakwazi yini ukuba iphayona elivamile? Uma kungenjalo, ungaba yini iphayona elisizayo ngezikhathi ezithile? Kungakhathaliseki ukuthi uyakwazi yini ukuphayona noma cha, uJehova uyokubusisa ngenxa yanoma yikuphi ukuzidela okwenzayo ukuze uhlanganyele ngokugcwele ekumemezeleni uMbuso.—Mal. 3:10.
6. Kungani inyanga ka-October 2014 izoba ekhethekile?
6 Ngo-October 2014 kuzohlangana iminyaka eyikhulu kusukela kwazalwa uMbuso. Kuyafaneleka ukuba INqabayokulinda yomphakathi yangaleyo nyanga igxile eMbusweni kaNkulunkulu. Kunganjani wenze umzamo wokuhambisa lo magazini kwabaningi ngangokunokwenzeka? Njengoba isikhathi siqhubeka, kwangathi ngamunye wethu angaqhubeka “ememezela izindaba ezinhle zombuso kaNkulunkulu” kubo bonke abalalelayo.—IzE. 8:12.