Izingoma Ezintsha Zokukhulekela!
1 Emhlanganweni wamuva waminyaka yonke we-Watch Tower Bible and Tract Society of Pennsylvania, owawungo-October 4, 2014, kwamenyezelwa ukuthi kunezinhlelo zokubukeza iculo esilisebenzisayo. Lezo kwakuyizindaba ezijabulisa ngempela! Bonke ababekhona bakhunjuzwa ngendima ebalulekile izingoma zethu zoMbuso okufanele zibe nayo ekukhulekeleni kwethu.—IHu. 96:2.
2 Ungase uzibuze, ‘Kungani kudingeka kubukezwe iculo?’ Ziningana izizathu. Esokuqala, ukuqonda kwethu imiBhalo kuyaqhubeka kulungiswa futhi lokho kungathinta amagama ezingoma zethu. (IzAga 4:18) Esinye isizathu sokubukezwa kweculo yilesi: Ezilimini eziningi, amagama amaningi aseculweni esilisebenzisayo athathwe ohlelweni lwangaphambili lwe-Nguqulo Yezwe Elisha. Lawo magama kumelwe ashintshwe ukuze ahambisane namagama enguqulo ebukeziwe. Njengoba kuzoba umsebenzi omkhulu ukwenza ushintsho emagameni, kunqunywe ukuba kunezelwe izingoma ezimbalwa ezintsha eculweni.
3 Ingabe kuzodingeka silinde kuze kunyatheliswe iculo elisha ngaphambi kokuba siqale ukusebenzisa izingoma ezintsha? Cha. Siyajabula ukunazisa ukuthi ezinyangeni ezimbalwa ezizayo, kuzofakwa izingoma ezintsha eziningana engosini yethu ethi jw.org. Lapho kukhululwa ingoma entsha, izofakwa ekupheleni kwesimiso soMhlangano Wenkonzo bese iphawulwa ngokuthi “ingoma entsha.”
4 Indlela Yokufunda Izingoma Ezintsha: Kungase kube inselele ukufunda ingoma entsha. Noma kunjalo, njengomhubi, sifuna ukucula ngokuzwakalayo emihlanganweni yebandla, ‘singathuli.’ (IHu. 30:12) Ukuze ufunde ingoma entsha, yenza lokhu okulandelayo.
Yilalele ngokuphindaphindiwe ingoma eqoshiwe edlalwa ngopiyano eyobe ifakwe engosini yethu. Uma ulokhu uyilalela, kuyoba lula ukuyikhumbula.
Funda amagama ayo, uzame ukuwabamba ngekhanda.
Cula ngamagama uhambisane nopiyano. Yicule uze uyazi kahle.
Prakthizani izingoma ezintsha izikhathi eziningana phakathi nokuKhulekela Komkhaya nize nizazi kahle.
5 Ezinyangeni ezizayo, uma kufakwe ingoma entsha ekupheleni kwesimiso soMhlangano Wenkonzo, ibandla lizoqale liyilalele kanye ingoma eqoshiwe edlalwa ngopiyano. Ngemva kwalokho lizoyicula lihambisane nopiyano, njengoba senza kwezinye izingoma.
6 Empeleni, ukucula emihlanganweni yethu kusinika injabulo yokuhubela uJehova ngobunye ngamaphimbo ethu. Ngakho, akufanele sibe nomkhuba wokusuka ngokungadingekile ezihlalweni zethu uma kwethulwa ingoma emihlanganweni yobuKristu.
7 Kunenye indlela esingabonisa ngayo ukwazisa ngomculo wethu ongcwele. Emihlanganweni emincane nemikhulu, kudlalwa umculo ngaphambi kokuba kuqale isimiso ngasinye. Kabili ngonyaka, abazalwane nodade abavela emazweni ahlukahlukene basebenzisa imali yabo ukuze baye ePatterson, eNew York, bayoqopha umculo omnandi ozosetshenziswa ekukhulekeleni kwethu. Ngakho, lapho usihlalo esicela ukuba sihlale phansi silalele lokho esikulungiselelwe yileli qembu labafowethu, kufanele senze kanjalo. Lokho kuyosisiza silungise izinhliziyo zethu ukuze zamukele ukwaziswa esizokuzwa.—Ezra 7:10.
8 Sizophetha umhlangano wanamuhla ngokucula ingoma entsha enesihloko esithi “UMbuso Usumisiwe—Mawuze!” Le ngoma, eyadlalwa emhlanganweni wamuva waminyaka yonke, yaqanjelwa ngokukhethekile ukuhlangana kweminyaka eyikhulu kusukela kwazalwa uMbuso.
9 Ngempela, lezi zingoma ezintsha ‘ziyizinto ezinhle’ ezivela kuJehova. (Math. 12:35a) Masizimisele ukuzifunda futhi sizicule ngokusuka enhliziyweni, sinike uNkulunkulu wethu udumo nenkazimulo okumfanele!—IHu. 147:1.