Ukuthuthukisa Amakhono Ethu Enkonzweni—Ukuhambisa Incwadi Ethi Okufundiswa IBhayibheli

Okwenza Kubaluleke: Incwadi ethi Okufundiswa IBhayibheli iyithuluzi eliyinhloko ebhokisini lethu lamathuluzi okufundisa. Nokho, ngaphambi kokuba siyisebenzisele ukufunda nomuntu, kumelwe simhambisele yona. Ngakho, sonke kufanele sizame ukuba nekhono lokuhambisa incwadi ethi Okufundiswa IBhayibheli ensimini. (IzAga 22:29) Ziningi izindlela zokuyihambisa, ngakho abamemezeli kufanele basebenzise ezibasebenzelayo.

Indlela Yokukwenza:

Buza umbuzo ovusa isithakazelo ongawusebenzisela ukuqondisa umninikhaya esahlukweni esithile sencwadi. Ungakhetha ngisho nomunye wemibuzo esekuqaleni kwesahluko. Ngemva kokuzwa impendulo yomninikhaya, funda umBhalo ofanelekayo bese umbonisa isigaba esikhuluma ngaleyo ndaba futhi mhlawumbe nixoxe ngaso kafushane.
Enye indlela iwukusebenzisa amakhasi esethulo ukuze sivuse isithakazelo bese sibonisa umninikhaya impendulo yeBhayibheli encwadini. Ngokwesibonelo, ungase ukhulume ngesehlakalo esibuhlungu samuva okukhulunywa ngaso ezindabeni futhi uchaze ukuthi abaningi baye bazibuza imibuzo esekhasini 3. Noma ungase uthi uhambele omakhelwane bakho ukuze uxoxe nabo ngekusasa elihle. Yibe usumkhombisa izithombe ezisemakhasini 4-5 bese uyambuza, “Yiziphi kulezi zithembiso ongathanda ukuzibona zigcwaliseka?” Enye indlela iwukusho ukuthi uxoxa nabantu kafushane ukuze ubasize bathole izimpendulo zemibuzo ebalulekile ekuphileni. Yibe usubonisa umninikhaya imibuzo esekugcineni kwekhasi 6 futhi umbuze ukuthi imuphi angathanda niwuphendule.
Mtshele ngokuqondile ngesifundo seBhayibheli. Ungase uthi: “Sibonisa omakhelwane bethu le ncwadi yokutadisha iBhayibheli. Wake wayibona? [Lindela impendulo.] Uma unesikhashana, ngingathanda ukukutshengisa ukuthi ingasetshenziswa kanjani kanye neBhayibheli lakho.”

Zama Lokhu Phakathi Nenyanga:

Prakthizani phakathi nokukhulekela kwenu komkhaya.
Lapho usensimini, xoxela abanye ohlela ukukusho. (IzAga 27:17) Uma intshumayelo yakho ingaphumeleli, yishintshe.