UKUPHILA NJENGAMAKRISTU

Ingxenye Entsha Yomhlangano Waphakathi Nesonto

Kusukela ngoJanuwari 2018, imihlangano yaphakathi nesonto izoba namaphuzu okucwaninga kanye nezinto ezibukwayo okutholakala eBhayibhelini lokutadisha le-New World Translation of the Holy Scriptures (nwtsty) elikuyi-internet, ngisho noma lingakatholakali ngolimi lwakho. Akungabazeki ukuthi lokhu kuzothuthukisa indlela olungiselela ngayo imihlangano. Ngaphezu kwakho konke, kwangathi kungakusondeza nakakhulu kuBaba wethu onothando, uJehova!

AMAPHUZU OKUCWANINGA

Amaphuzu okucwaninga asisiza siqonde amasiko, izindawo nezilimi okukhulunywa ngakho emavesini amaningi eBhayibheli.

Mathewu 12:20

Intambo yefilakisi elokozayo: Isibani esivamile sasendlini kwakuba isitsha esincane sobumba esifakwa amafutha omnqumo. Intambo yefilakisi yayimunca amafutha ukuze ilangabi lihlale livutha. Inkulumo yesiGreki ethi “intambo yefilakisi elokozayo” ingase ibhekisele entanjeni esashunqa intuthu ngenxa yokuthi kusekhona inhlansana ekhanyayo nakuba ilangabi selicishile. Isiprofetho esiku-Isaya 42:3 sabikezela ngozwela lukaJesu; wayengasoze ayicima inhlansana yokugcina yethemba kubantu abathembekile nabacindezelekile.

Mathewu 26:13

Ngiqinisile: Yigama lesiGreki elithi, a·menʹ elivela kwelesiHebheru elithi ʼa·menʹ elisho ukuthi “makube njalo,” noma “impela.” UJesu wayevame ukusebenzisa le nkulumo lapho ethula indaba, isithembiso noma isiprofetho ukuze agcizelele ukuthi lokho akushoyo kuyiqiniso nokuthi kuthembeke ngokuphelele. Kuthiwa indlela uJesu asebenzisa ngayo igama elithi “ngiqinisile” noma amen, itholakala ezincwadini zenkolo kuphela. Lapho le nkulumo kaJesu ishiwo ngokulandelana (a·menʹ a·menʹ), njengakulo lonke iVangeli likaJohane, ihunyushwa ngokuthi “ngiqinisile impela.”—Joh 1:51.

OKUBUKWAYO

Izithombe, imidwebo, amavidiyo angakhiphi msindo nemidwebo enyakazayo okubonisa imininingwane ehlukahlukene eseBhayibhelini.

IBhetfage, Intaba Yeminqumo NeJerusalema

Le vidiyo emfushane ibonisa indlela eya eJerusalema esuka empumalanga, edolobheni lanamuhla i-et-Tur—okucatshangwa ukuthi iBhetfage yangezikhathi zeBhayibheli—ize ifike kwenye yezindawo ezimaphakathi neNtaba Yeminqumo. IBhethaniya lisempumalanga yeBhetfage egqumeni elisempumalanga yeNtaba Yeminqumo. Lapho uJesu nabafundi bakhe beseJerusalema, babevame ukulala eBhethaniya, namuhla eseliyidolobha lase-el-ʽAzariyeh, okuyigama lesi-Arabhu elisho ukuthi “Kubo KaLazaru.” Ngokungangabazeki, uJesu wayehlala kubo kaMarta, uMariya noLazaru. (Math 21:17; Mar 11:11; Luka 21:37; Joh 11:1) Lapho uJesu ethatha uhambo esuka kubo kaLazaru eya eJerusalema, kungenzeka wayehamba ngendlela efanayo nale eboniswe kule vidiyo. NgoNisani 9, 33 C.E., lapho uJesu egibele ithole lembongolo edlula eNtabeni Yeminqumo eya eJerusalema, kungenzeka wayesuka eBhetfage ehamba ngomgwaqo oya eJerusalema.

Umgwaqo osuka eBhethaniya uya eBhetfage
IBhetfage
Intaba Yeminqumo
ISigodi SaseKidroni
ISisekelo SeThempeli

Isipikili Ethanjeni Lesithende

Lesi isithombe esiwumfanekiso obazwe kabusha wethambo lesithende somuntu esibethelelwe isipikili esingamasentimitha angu-11.5 ubude. Ithambo langempela elinesipikili latholakala ngo-1968, ngesikhathi kumbiwa enyakatho neJerusalema futhi kuthiwa elangezikhathi zokubusa kwamaRoma. Lokhu kunikeza ubufakazi bemivubukulo bokuthi izipikili kungenzeka zazisetshenziswa lapho kubulawa abantu ngokubabethela esigxotsheni. Lesi sipikili kungenzeka sifana nalesi esasetshenziswa amasosha amaRoma ukuze abethele uJesu Kristu esigxotsheni. Ithambo langempela elinesipikili latholakala ebhokisini eliyitshe, elibizwa ngokuthi i-ossuary, lapho amathambo omile omuntu ofile ayefakwa khona ngemva kokuba inyama isibolile. Lokhu kubonisa ukuthi umuntu obulewe ngokubethelwa esigxotsheni wayengase angcwatshwe.—Math 27:35.