INDLELA YOKUQEDA UKUZONDANA OKUNGAPHELI

4 | Nqoba Inzondo Ngosizo Lukankulunkulu

IBhayibheli Lithi:

“Izithelo zomoya ziluthando, injabulo, ukuthula, ukubekezela, umusa, ubuhle, ukholo, ubumnene, ukuzithiba.”—GALATHIYA 5:22, 23.

Lokho Okukushoyo:

Ukuzondana okungapheli kunganqotshwa kuphela ngosizo lukaNkulunkulu. Umoya wakhe ongcwele ungasisiza sibe nobuntu ebesingeke sibe nabo ngamandla ethu. Ngakho kunokuzama ukunqoba inzondo ngamandla ethu, senza kahle ngokuncika osizweni esilunikezwa uNkulunkulu. Uma sincika kuNkulunkulu, singase sizizwe njengomphostoli uPawulu owabhala: “Nginamandla azo zonke izinto ngenxa yalowo ongipha amandla.” (Filipi 4:13) Ngempela, siyosho kugcwale umlomo ukuthi: “Usizo lwami luvela kuJehova.”—IHubo 121:2.

Lokho Ongakwenza:

“UJehova uye wangiguqula ngasuka ekubeni umuntu onobudlova ngaba umuntu onokuthula.”—UWALDO

Thandaza kuJehova, umcele ngobuqotho ukuba akuphe umoya wakhe ongcwele. (Luka 11:13) Cela uNkulunkulu akusize ukuba ube nobuntu obuhle. Funda ngalokho okushiwo yiBhayibheli mayelana nezimfanelo ezizokusiza ususe inzondo, ezinjengothando, ukuthula, ukubekezela nokuzithiba. Bheka izindlela zokuhlakulela lezo zimfanelo ekuphileni kwakho. Yiba nabangane abazama ukuthuthukisa izimfanelo ezinjalo. Abantu abanjalo bangakusiza ‘uvuselele uthando nemisebenzi emihle.’—Hebheru 10:24.

Indaba Yokuphila—UWALDO

Wanqoba Ubudlova Obubangelwa Yinzondo

UWaldo wakhula kanzima okwambangela ukuba agcwale inzondo. Uyachaza: “Ngangihlale ngisezimpini zasemgwaqweni ngilwa nabadayisa izidakamizwa . . . Ngesinye isikhathi, iqembu lezigelekeqe esasingezwani nalo laqasha umsocongi owaziwayo ukuba angibulale, kodwa ngakwazi ukuphunyuka nginenxeba lokugwazwa kuphela.”

UWaldo wayengajabule neze lapho umkakhe eqala ukufunda iBhayibheli noFakazi BakaJehova. Uthi: “Ngangibazonda oFakazi, futhi izikhathi eziningi ngangibachapha ngenhlamba. Kodwa babesabela ngendlela enokuthula njalo.”

Ekugcineni, uWaldo naye waqala ukufunda iBhayibheli. Uthi: “Kwakungelula ukusebenzisa engangikufunda. Ngangiqiniseka ukuthi ngangingasoze ngakwazi ukulawula isimo sami sokuba nobudlova.” Kodwa okuthile akufunda eBhayibhelini kwenza umehluko omkhulu.

UWaldo uyachaza: “Ngolunye usuku, umuntu owayengifundisa, u-Alejandro, wangicela ukuba ngifunde eyabaseGalathiya 5:22, 23. . . . U-Alejandro wangichazela ukuthi ukuba nalezo zimfanelo kwakungaxhomekile emandleni ami siqu, kodwa kwakuxhomeke emoyeni ongcwele kaNkulunkulu. Lelo qiniso lawushintsha ngokuphelele umbono wami!”

Ngokuncika osizweni oluvela kuNkulunkulu, uWaldo waphumelela ekunqobeni inzondo engapheli ekuphileni kwakhe. Uthi: “Izihlobo zami nalabo ababengabangane bami abayikholwa indlela engishintshe ngayo.” Uyenezela: “UJehova uye wangiguqula ngasuka ekubeni umuntu onobudlova ngaba umuntu onokuthula.”