Isithombe sesiteji noseyili onombhalo ngenhla kwaso
1922 Eminyakeni Eyikhulu Edlule
‘UNKULUNKULU usinika ukunqoba ngeNkosi yethu uJesu Kristu.’ (1 Kor. 15:57, i-King James Version) La mazwi, akhethwa ukuba abe yisihloko sonyaka ka-1922, aqinisekisa abaFundi BeBhayibheli ukuthi bayovuzwa ngenxa yokwethembeka kwabo. Phakathi nalowo nyaka, uJehova wabavuza laba bashumayeli abashisekayo. Wababusisa lapho beqala ukunyathelisa nokuzihlanganisela izincwadi zabo nalapho besebenzisa umsakazo ukuze bamemezele umyalezo woMbuso. Ngokuhamba kwesikhathi ngawo u-1922, kwaba sobala futhi ukuthi uJehova uyababusisa abantu bakhe. AbaFundi BeBhayibheli bakwazi ukuhlangana emhlanganweni oyingqophamlando eCedar Point, e-Ohio, e-U.S.A. Lowo mhlangano waba nomthelela emisebenzini eyenziwa inhlangano kaJehova kusukela ngaleso sikhathi kuze kube manje.
“ICEBO ELIMANGALISAYO”
Isidingo sezincwadi sakhula njengoba umsebenzi wokushumayela wawuqhubekela phambili. Abazalwane eBethel YaseBrooklyn babenyathelisa omagazini kodwa babesancike ezinkampanini ukuze benze izincwadi ezinezingqwembe eziqinile. Kwaphela izinyanga eziningi kushoda izincwadi futhi lokho kwaqala ukuphazamisa umsebenzi wokushumayela, ngakho uMfoweth’ uRutherford wabuza uRobert Martin, owayephethe ifektri yokunyathelisa, ukuthi babengakwazi yini ukuzinyathelisela izincwadi.
Ifektri ekuConcord Street eBrooklyn, eNew York
UMfoweth’ uMartin uyakhumbula: “Kwakuyicebo elimangalisayo ngoba kwakusho ukuthi kuzovulwa ifektri ephelele, eyenza yonke imisebenzi ehilelekile ekunyatheliseni izincwadi.” Abazalwane baqasha indawo eyayiku-18 Concord Street eBrooklyn futhi bathola yonke imishini edingekayo.
Akuyena wonke umuntu owayejabula ngokuthi sesizozinyathelisela thina izincwadi. Umphathi wenkampani eyayisinyathelisela izincwadi wafika ezobona ifektri yethu entsha. Wathi: “Ninemishini ehamba phambili kwezokunyathelisa la, kodwa akekho noyedwa okwazi ukuyisebenzisa. Ezinyangeni eziyisithupha nje yonke le nto izobe ingasasebenzi.”
UMfoweth’ uMartin wathi: “Wayeqinisile kodwa wakhohlwa ukuthi uJehova uzosisiza futhi uhlale esisiza.” UMfoweth’ uMartin wayeqinisile. Ngokushesha ifektri entsha yayisikhiqiza izincwadi ezingu 2 000 ngosuku.
Izisebenzi zimi eduze kwemishini yazo yokunyathelisa efektri
KUFINYELELWA IZINKULUNGWANE NGOMSAKAZO
Ngaphezu kokuzinyathelisela ezinye zezincwadi zabo, abantu bakaJehova baqala ukusebenzisa indlela entsha yokusakaza izindaba ezinhle—umsakazo. NgeSonto ntambama, ngomhla ka-26 Febhuwari, 1922, uMfoweth’ uRutherford wakhuluma okokuqala emsakazweni. Wanikeza inkulumo ethi “Izigidi Eziphila Manje Azisoze Zafa” esiteshini somsakazo iKOG, eLos Angeles, eCalifornia, e-U.S.A.
Abantu abacishe babe ngu-25 000 baluzwa lolo hlelo. Abanye babo bathumela izincwadi bebonga. Enye yalezo zincwadi yayivela kuWillard Ashford, isakhamuzi saseSanta Ana, eCalifornia. Wancoma uMfoweth’ uRutherford ngenkulumo “emnandi nethakazelisayo.” Wanezela: “Njengoba kunabantu abathathu abagulayo endlini, besingeke sikwazi ukukuzwa ukube anisebenzisanga le ndlela, ngisho noma kuthiwa ubukhuluma ukwamakhelwane.”
Kwasakazwa izinhlelo eziningi emavikini alandela. Ekupheleni konyaka INqabayokulinda yathi, “cishe abantu abangu-300 000 bawuzwa lowo myalezo emsakazweni.”
Bekhuthazwe indlela abantu abasabela ngayo, abaFundi BeBhayibheli banquma ukwakha isiteshi somsakazo eStaten Island, eduze kwaseBethel, eBrooklyn. Eminyakeni eyalandela abaFundi BeBhayibheli basebenzisa lesi siteshi, iWBBR, ukuze basakaze kabanzi umyalezo woMbuso.
“ADV”
INqabayokulinda kaJuni 15, 1922, yamemezela ukuthi kwakuzoba nomhlangano omkhulu eCedar Point, e-Ohio, kusukela ngomhla ka-5 kuya kumhla ka-13 Septhemba, 1922. AbaFundi BeBhayibheli babejabule ngempela njengoba betheleka eCedar Point.
Enkulumweni yakhe yokuqala yokwamukela izethameli, uMfoweth’ uRutherford wathi: “Ngiyaqiniseka ukuthi iNkosi . . . izowubusisa lo mhlangano futhi kunikezwe ubufakazi obungakaze bunikezwe ngaphambili emhlabeni.” Izikhulumi kulowo mhlangano zakhuthaza izilaleli ngokuphindaphindiwe ukuba zenze umsebenzi wokushumayela.
Isixuku esize emhlanganweni wango-1922 eCedar Point, e-Ohio.
Kwathi ngoLwesihlanu ngomhla ka-8, Septhemba, izethameli ezingu-8 000 zangena ehholo, zibheke phambili ekuzweni inkulumo kaMfoweth’ uRutherford. Zazinethemba lokuthi uzochaza ukuthi zazisho ukuthini izinhlamvu ezithi “ADV,” ezazibhalwe ezimemweni zazo. Lapho zihlala phansi, akungabazeki ukuthi ezinye zaphawula ukuthi kwakunoseyili omude ogoqiwe phezu kwesiteji. U-Arthur Claus, owayesuka eTulsa, e-Oklahoma, e-U.S.A. eze emhlanganweni, wathola indawo yokuhlala enhle ngempela, eyayizomvumela ukuba ezwe kahle ngoba ngalezo zikhathi zazingekho izinto zokukhulisa izwi.
“Sasilalele izwi nezwi”
Ukuze kuqinisekiswe ukuthi azibi khona iziphazamiso, usihlalo wenza isaziso sokuthi akekho ofike sekuqaliwe owayezovunyelwa ukuba angene ehholo phakathi nenkulumo kaMfoweth’ uRutherford. Ngo-9:30 ekuseni uMfoweth’ uRutherford waqala ngokucaphuna amazwi kaJesu akuMathewu 4:17: “Umbuso wezulu ususondele.” (i-King James Version) Lapho ekhuluma ngendlela isintu esasizozwa ngayo ngalo Mbuso, wathi: “UJesu ngokwakhe wathi phakathi nokuba khona kwakhe wayeyovuna abantu bakhe; abuthele kuye abaqotho nabaneqiniso.”
UMfoweth’ uClaus, owayehlezi ehholo elikhulu uyakhumbula: “Sasilalele izwi nezwi.” Kodwa waqala ukugula kungalindelekile futhi kwadingeka aphume ehholo. Nakuba ayengathandi, u-Arthur waphuma ehholo ngisho noma ayazi ukuthi ngeke esavunyelwa ukuba aphinde angene.
Ngemva kwemizuzu embalwa waqala ukuzizwa engcono. Wathi, lapho ephindela ehholo wezwa kushaywa ihlombe kakhulu. Kwamjabulisa ngempela lokho! Wanquma ukuthi ngisho noma kwakudingeka agibele ophahleni, wayezogibela ukuze ezwe ingxenye esele yale nkulumo emnandi. UMfoweth’ uClaus, owayeneminyaka engu-23 ngaleso sikhathi, wakwazi ukugibela ophahleni. Ngenxa yokuthi amawindi asophahleni ayevulekile, waphawula ukuthi njengoba esondela kuzwakala kahle kakhulu.
Kodwa uArthur wayengeyedwa. Abanye babangane bakhe nabo babesophahleni. Omunye wabo, uFrank Johnson, weza kuye wambuza, “Awunawo ummese obukhali lapho?”
U-Arthur wathi: “Nginawo.”
UFrank wathi: “Uphendule imithandazo yethu. Uyayibona le nto egoqiwe la? Useyili obhaliwe oboshelwe kulezi zipikili. Lalelisisa uJudge.a Uma esethi, ‘ngakho, memezelani, memezelani,’ unqume lezi zintambo ezine.”
Ngakho u-Arthur walinda ephethe ummese. Ngokushesha uMfoweth’ uRutherford wafinyelela umvuthwandaba wenkulumo yakhe. Ngentshiseko enkulu, wamemeza wathi: “Yibani ofakazi beNkosi abathembekile nabaneqiniso. Qhubekelani phambili kuze kube yilapho iBhabhiloni selibhujisiwe ngokuphelele. Shumayelani lo myalezo yonke indawo. Izwe kumelwe lazi ukuthi uJehova unguNkulunkulu nokuthi uJesu Kristu uyiNkosi yamakhosi. Lolu usuku olubaluleke kakhulu emlandweni. Bhekani, iNkosi iyabusa! Nina ningabakhulumeli bayo. Ngakho, memezelani, memezelani, memezelani, iNkosi noMbuso wayo!”
U-Arthur wathi yena nabanye abazalwane basika izintambo ezazibambe useyili wehla ngokushelela. Ngokuvumelana nezinhlamvu ezithi “ADV,” useyili wawubhalwe ukuthi “Memezelani iNkosi noMbuso.” Izinhlamvu ezithi ‘ADV’ esiNgisini zazifushanisa igama elithi ‘advertise’ okuyigama elisho ukuthi ‘shumayela’ noma ‘fakaza.’
UMSEBENZI OBALULEKILE
Umhlangano owawuseCedar Point wasiza abazalwane ukuba bagxile emsebenzini obalulekile wokushumayela ngoMbuso, labo ababezimisele bakujabulela ukuhlanganyela kuwo. I-colporteur (manje elibizwa ngokuthi iphayona) lase-Oklahoma, e-U.S.A. labhala, “Indawo esasebenza kuyo kwakuyindawo yamalahle futhi inhlupheko yayinkulu lapho.” Wathi ngokuvamile lapho abantu bezwa umyalezo owawukumagazini i-Golden Age, “babevele bakhale.” Wakufingqa kanje, “Kuyisibusiso ngempela ukubaduduza.”
Laba baFundi BeBhayibheli bakubona ukuphuthuma kwamazwi kaJesu akuLuka 10:2: “Umsebenzi wokuvuna mkhulu, kodwa izisebenzi zimbalwa.” Njengoba unyaka uphela, bazimisela nakakhulu ukumemezela umyalezo woMbuso ezindaweni ezikude zomhlaba.
a UMfoweth’ uRutherford wayebizwa ngokuthi “uJudge” ngenxa yokuthi ngezikhathi ezithile wayesebenza njengejaji eMissouri, e-U.S.A.