Qhubeka ‘Ulandela’ UJesu Ngemva Kokubhapathizwa

1-2. Yiziphi izibusiso umuntu azitholayo ngemva kokubhapathizwa?

KUYAJABULISA ukubhapathizwa ube ingxenye yomndeni kaJehova. Labo abajabulela lelo lungelo bangavumelana namazwi omhubi uDavide, owathi: ‘Uyajabula umuntu [uJehova] amkhethayo, bese emsondeza ukuze ahlale emagcekeni akhe.’—IHu. 65:4.

² UJehova akalethi noma ubani emagcekeni akhe. Njengoba isihloko esidlule sibonisile, ukhetha ukusondelana nalabo ababonisayo ukuthi bayafuna ukuba nobuhlobo obuseduze naye. (Jak. 4:8) Lapho uzinikezela kuJehova futhi ubhapathizwa, usondelana naye ngendlela ekhethekile. Ungaqiniseka ngokuthi ‘uyokuthululela isibusiso uze ungasweli lutho.’—Mal. 3:10; Jer. 17:​7, 8.

3. AmaKristu azinikezele abhapathizwa anamuphi umthwalo obalulekile? (UmShumayeli 5:​4, 5)

³ Yiqiniso, ubhapathizo lumane luyisiqalo. Ngemva kokuthatha leso sinyathelo uyofuna ukwenza konke ongakwenza ukuze uphile ngokuvumelana nesifungo sakho sokuzinikezela, ngisho nalapho ubhekene nezilingo noma lapho ukholo lwakho luvivinywa. (Funda umShumayeli 5:​4, 5.) Njengomfundi kaJesu, uyokwenza konke okusemandleni ukuze ulandele isibonelo sakhe nemiyalo yakhe. (Math. 28:​19, 20; 1 Pet. 2:21) Lesi sihloko sizokusiza wenze lokho kanye.

QHUBEKA ‘ULANDELA’ UJESU NAPHEZU KOVIVINYO NEZILINGO

4. Abafundi bakaJesu bathwala “isigxobo . . . sokuhlushwa” ngamuphi umqondo? (Luka 9:23)

⁴ Uyoba nazo izinkinga nangemva kokuba usubhapathiziwe. Eqinisweni, uJesu wakwenza kwacaca ukuthi abalandeli bakhe babeyothwala “isigxobo . . . sokuhlushwa.” Empeleni, babeyokwenza kanjalo “usuku nosuku.” (Funda uLuka 9:23.) Ingabe uJesu wayethi abalandeli bakhe babeyohlale behlupheka? Akunjalo neze. Wayemane egcizelela ukuthi naphezu kwezibusiso ababeyozithola babeyobhekana nezinkinga. Ezinye zalezo zinkinga zingasizwisa ngisho nobuhlungu.—2 Thim. 3:12.

5. Yiziphi izibusiso uJesu azithembisa labo abazidelayo?

⁵ Mhlawumbe bewuphikiswa amalungu omndeni wakho noma udele izinto zaleli zwe ezithile ukuze ubeke uMbuso kaNkulunkulu kuqala. (Math. 6:33) Uma kunjalo, qiniseka ukuthi uJehova uyibonile imisebenzi yakho yokwethembeka. (Heb. 6:10) Cishe ukubonile ukuba yiqiniso kwamazwi kaJesu athi: “Akekho oshiye indlu noma abafowabo noma odadewabo noma unina noma uyise noma abantwana noma amasimu ngenxa yami nangenxa yezindaba ezinhle ongeke athole kwamanje—izindlu, abafowabo, odadewabo, onina, abantwana namasimu izikhathi eziphindwe kawu-100, kanye nokushushiswa—futhi esikhathini esizayo athole ukuphila okuphakade.” (Marku 10:​29, 30) Ngempela izibusiso ozitholile zinkulu kakhulu ukwedlula noma yikuphi ukuzidela okwenzile.—IHu. 37:4.

6. Kungani kuyodingeka uqhubeke ulwa ‘nesifiso senyama’ ngemva kokubhapathizwa?

⁶ Ngemva kokubhapathizwa kusazodingeka ulwe ‘nesifiso senyama.’ (1 Joh. 2:16) Lokho kungenxa yokuthi uzobe useyinzalo ka-Adamu enesono. Ngezinye izikhathi ungase uzizwe njengomphostoli uPawulu. Wabhala: “Ngempela, umuntu enginguye ngaphakathi uyajabula ngomthetho kaNkulunkulu, kodwa emzimbeni wami ngibona omunye umthetho olwa nomthetho wengqondo yami futhi ongithumbela emthethweni wesono osemzimbeni wami.” (Roma 7:​22, 23) Kungase kukudumaze ukuthi ulwisana nezifiso ezingafanele. Nokho, ukucabanga ngesithembiso owasenza kuJehova ngesikhathi uzinikezela kuye, kuyokwenza uzimisele nakakhulu ukulwa nesilingo. Iqiniso liwukuthi lapho ubhekana nezilingo, isifungo sakho sokuzinikezela siyokusiza. Kanjani?

7. Ukuzinikezela kuJehova kuyokusiza kanjani uhlale uthembekile kuye?

⁷ Lapho uzinikezela kuJehova uyazidela. Lokho kusho ukuthi uyazenqaba izifiso nemigomo engeke imjabulise uJehova. (Math. 16:24) Ngakho lapho ubhekene novivinyo, ngeke kudingeke ulokhu ucabanga ngokuthi yini okumele uyenze. Uyobe unomgomo owodwa kuphela—ukwethembeka kuJehova. Uyohlale uzimisele ukujabulisa uJehova. Ngaleyo ndlela uyofana noJobe. Nakuba ayebhekene novivinyo olunzima kakhulu, washo ngokuqiniseka: ‘Ngeke ngibulahle ubuqotho bami!’—Jobe 27:5.

8. Ukucabanga ngomthandazo owawenza ngesikhathi uzinikezela kungakusiza kanjani umelane nesilingo?

⁸ Ukucabanga ngomthandazo owawenza lapho uzinikezela kuJehova kuyokunika amandla okulwa nanoma yisiphi isilingo. Ngokwesibonelo, ungadlala yini ngothando nomuntu oshadile? Lutho neze! Wathembisa uJehova ukuthi ngeke uyenze into enjalo. Uma ungayivumeli leyo mizwa engafanele ukuba ikhule, ngeke kudingeke ubhekane nobuhlungu bokuzama ukuyiqeda ngemva kokuba seyigxilile. ‘Uyophambuka’ “endleleni yabakhohlakele.”—IzAga 4:​14, 15.

9. Ukucabanga ngomthandazo owawenza ngesikhathi uzinikezela kungakusiza kanjani nokuba ugcine ukukhonza uJehova kuza kuqala ekuphileni kwakho?

⁹ Kuthiwani uma uthola umsebenzi ozokwenza ungayi njalo emihlanganweni yobuKristu? Uyokwazi okufanele ukwenze. Ngaphambi kokuba uthole lowo msebenzi, wawusunqumile ukuthi ngeke uwamukele umsebenzi onjalo. Ngakho, ngeke kudingeke uwamukele bese uzama ukulungisa imiphumela yaleso sinqumo esibi. Ukukhumbula indlela uJesu ayezimisele ngayo ukujabulisa uYise, kuzokwenza wenqabe ngokushesha noma yini engeke imjabulise uNkulunkulu ozinikele kuye futhi ngeke unqikaze ukwenza kanjalo.—Math. 4:10; Joh. 8:29.

10. UJehova uyokusiza kanjani uqhubeke ‘ulandela’ uJesu ngemva kokubhapathizwa?

¹⁰ Iqiniso liwukuthi uvivinyo nezilingo kukunika ithuba lokubonisa ukuthi uzimisele ukuqhubeka ‘ulandela’ uJesu. Njengoba wenza kanjalo, ungaqiniseka ukuthi uJehova uzokusiza. IBhayibheli lithi: “UNkulunkulu uthembekile, ngeke avumele ukuba nilingwe ngaphezu kwalokho eningakuthwala, kodwa kanye naleso silingo uyokwenza nendlela yokuphuma ukuze nikwazi ukusikhuthazelela.”—1 Kor. 10:13.

INDLELA YOKUQHUBEKA ULANDELA UJESU

11. Iyiphi enye indlela enhle kakhulu yokuqhubeka ulandela uJesu? (Bheka nesithombe.)

¹¹ UJesu wayeshiseka futhi wayethandaza njalo ukuze ahlale esondelene noJehova. (Luka 6:12) Empeleni, enye indlela enhle kakhulu yokuqhubeka ulandela uJesu ngemva kokubhapathizwa ukuqhubeka wenza izinto ezizokusondeza kuJehova. IBhayibheli lithi: “Ngezinga esesithuthuke ngalo, masiqhubeke sihamba ngokuhlelekile ngalo mzila ofanayo.” (Fil. 3:16) Ngezinye izikhathi, uzozwa ngalokho abafowethu nodadewethu abakwenzile ukuze bandise inkonzo yabo engcwele. Mhlawumbe baye eSikoleni Sabashumayeli Bevangeli LoMbuso noma bathuthele lapho kunendingeko enkulu khona. Uma izimo zikuvumela ukuba uzibekele lowo mgomo, zama ukuwufinyelela. Abantu bakaJehova bayakulangazelela ukwandisa inkonzo yabo. (IzE. 16:9) Nokho, kuthiwani uma okwamanje ungakwazi ukukwenza lokho? Ungacabangi ukuthi labo abakwazi ukukwenza lokho bangcono kunawe. Umncintiswano wamaKristu udinga ukukhuthazela. (Math. 10:22) Ungakuthathi kancane ukubaluleka kokuqhubeka ukhonza uJehova ngokwalokho amandla akho nezimo zakho okukuvumela ukuba ukwenze. Lena indlela ebalulekile ongaqhubeka ngayo ulandela uJesu ngemva kokubhapathizwa.—IHu. 26:1.

12-13. Yini ongayenza uma intshiseko yakho incipha? (1 Korinte 9:​16, 17) (Bheka nebhokisi elithi “Hlala Usemncintiswaneni.”)

¹² Kuthiwani uma ngezinye izikhathi ubona sengathi awusathandazi ngokusuka enhliziyweni noma awusayijabuleli inkonzo yakho ngendlela owawuyijabulela ngayo ngaphambili? Kuthiwani uma ukufunda iBhayibheli kungasakujabulisi ngendlela okwakukujabulisa ngayo ekuqaleni? Uma ngemva kokubhapathizwa kuphakama izimo ezinjengalezi, ungaphethi ngokuthi awusenawo umoya kaJehova. Ungumuntu onesono futhi indlela ozizwa ngayo ingashintshashintsha. Uma intshiseko yakho iqala ukuncipha, cabanga ngesibonelo sikamphostoli uPawulu. Nakuba azama ukulingisa uJesu, wayazi ukuthi ngezinye izikhathi angase angabi nawo umdlandla ayeba nawo ngezinye izikhathi. (Funda eyoku-1 Korinte 9:​16, 17.) Wathi: “Ngisho noma ngikwenza ngingathandi, ngisenawo umsebenzi engiwuphathisiwe.” Ngamanye amazwi, uPawulu wayezimisele ukufeza inkonzo yakhe kungakhathaliseki ukuthi wayezizwa kanjani ngaleso sikhathi.

¹³ Ngendlela efanayo, ungenzi izinqumo ulawulwa imizwa yakho enesono. Kungakhathaliseki ukuthi uzizwa kanjani, zimisele ukwenza okulungile. Ngokuhamba kwesikhathi indlela ozizwa ngayo ingashintsha uma uqhubeka wenza okulungile. Kunoma yikuphi, ukuqhubeka wenza izinto ezizokusondeza kuJehova kuzokusiza uqhubeke ulandela uJesu ngemva kokubhapathizwa. Ukuphikelela kwakho kuzoba yisikhuthazo nakulabo okholwa nabo.—1 Thes. 5:11.

‘QHUBEKA UZIHLOLA’

14. Yini okudingeka ulokhu uyihlola futhi kungani? (2 Korinte 13:5)

¹⁴ Kuyokusiza nokulokhu uzihlola ngemva kokuba usubhapathiziwe. (Funda eyesi-2 Korinte 13:5.) Ngezikhathi ezithile zihlole, uhlole nezinto ozenzayo ukuze ubone ukuthi uthandaza nsuku zonke yini, uyalifunda futhi ulitadishe yini iBhayibheli, uba khona yini emihlanganweni nasensimini. Zama ukuthola izindlela zokwenza lezi zingxenye zokukhulekela zizuzise nakakhulu. Ngokwesibonelo, zibuze le mibuzo: ‘Ngingakwazi yini ukuchazela abanye izimfundiso eziyisisekelo zeBhayibheli? Kukhona yini engingakwenza ukuze ngiyijabulele nakakhulu inkonzo yami? Lapho ngithandaza ngiyazisho yini ngokuqondile izinto engizithandazelayo futhi ziyabonisa yini ukuthi ngithembele ngokuphelele kuJehova? Ngiba khona njalo yini emihlanganweni yobuKristu? Ngingayithuthukisa kanjani indlela engilalela nengihlanganyela ngayo emihlanganweni?’

15-16. Okwenzeka komunye umzalwane kukufundisani ngokwenqaba isilingo?

¹⁵ Uyobe wenza kahle uma uzihlola ngobuqotho ukuze ubone ukuthi yini obuthaka kuyo. Ukuze abonise lokho, umzalwane okuthiwa uRobert ulandisa okwenzeka: “Lapho sengizohlanganisa iminyaka engu-20, ngangisebenza izinsuku ezithile. Ngelinye ilanga ngemva kokushayisa emsebenzini, owesifazane engangisebenza naye wangimemela lapho ehlala khona. Wathi kuzobe kuyithi nje sobabili futhi ‘sizoba nesikhathi esimnandi.’ Ngaqale ngabeka izaba ezingathi shu kodwa ngagcina nginqabile futhi ngachaza ukuthi kungani.” URobert wamelana nesilingo futhi lokho kuyancomeka. Kodwa kamuva wacabanga ngalokho okwakwenzekile, wabona ukuthi ngabe wasisingatha kangcono lesi simo. Uyavuma: “Angizange ngisenqabe ngokushesha lesi sicelo njengoba kwenza uJosefa kumkaPotifari. (Gen. 39:​7-9) Empeleni, kwangimangaza ukuthi kwakungelula ukwenqaba. Lokhu kwangisiza ngabona ukuthi ngangidinga ukuqinisa ubungani bami noJehova.”

¹⁶ Kungakuzuzisa ukuzihlola njengoba kwenza uRobert. Ngisho nalapho ukwazile ukumelana nesilingo, zibuze, ‘Kungithathe isikhathi esingakanani ukwenqaba?’ Uma ubona ukuthi kukhona lapho okudingeka uthuthukise khona, ungadumali. Jabula ngokuthi manje usuyazi ngalobo buthakathaka. Thandaza ngabo, wenze izinto ezizokusiza uzimisele nakakhulu ukuphila ngokuvumelana nemithetho kaJehova yokuziphatha.—IHu. 139:​23, 24.

17. Igama likaJehova lalihileleke kanjani kulokho okwenzeka kuRobert?

¹⁷ Kukhona nokunye esingakufunda kulokho okwenzeka kuRobert. Uyaqhubeka: “Ngemva kokwenqaba isimemo sowesifazane engangisebenza naye, wathi, ‘Uyohamb’ usinda!’ Ngambuza ukuthi wayesho ukuthini. Wathi umngani wakhe owayekade enguFakazi wayemtshele ukuthi bonke oFakazi abasebasha baphila ukuphila okumbaxambili futhi uma kuvela ithuba lokwenza okungalungile bayolisebenzisa. Ngakho watshela umngani wakhe ukuthi uzobona ngami ukuthi kuyiqiniso yini lokho. Ngajabula lapho ngibona ukuthi ngangidumise igama likaJehova.”

18. Yini ozimisele ukuyenza ngemva kokubhapathizwa? (Bheka nebhokisi elithi “Uchungechunge Ozolujabulela.”)

¹⁸ Lapho uzinikezela kuJehova futhi ubhapathizwa ubonisa ukuthi ufuna ukungcwelisa igama lakhe kungakhathaliseki ukuthi kwenzekani. Ungaqiniseka ukuthi uJehova uyazazi izinkinga obhekana nazo nezilingo ozenqabayo. Uzoyibusisa imizamo oyenzayo ukuze uhlale uthembekile. Ungaqiniseka ngokuthi ngomoya wakhe ongcwele angakunika amandla okukwenza lokho. (Luka 11:​11-13) Ngosizo lukaJehova, uzokwazi ukuqhubeka ulandela uJesu ngemva kokubhapathizwa.