Unalo Yini Ukholo?

Ukuze sijabulise uJehova kumele sibe nokholo. Nokho, iBhayibheli lithi “ukholo alulona olwabo bonke abantu.” (2 Thes. 3:2) Umphostoli uPawulu wakhuluma ‘ngabantu’ ababemshushisa, “abalimazayo nababi” ayedinga ukukhululwa kubo. Kodwa lokho akusho mayelana nokholo kunencazelo ebanzi. Abanye abantu bakhetha ukungabunaki ubufakazi obusobala bokuthi ukhona uMdali—uNkulunkulu. (Roma 1:20) Abanye bangase bathi bayakholelwa ukuthi kukhona okuthile noma othile onamandla amakhulu kunawethu. Kodwa sidinga okungaphezu kwaleyo nkolelo ukuze sijabulise uJehova.

Kudingeka siqiniseke ukuthi uJehova ukhona futhi “uyabavuza” labo abanokholo oluqinile. (Heb. 11:6) Ukholo esinye sezithelo zomoya wakhe ongcwele. Ukuthandaza kuJehova kungamsiza umuntu athole umoya ongcwele. (Luka 11:​9, 10, 13) Indlela eyinhloko yokuthola lowo moya ukuba sifunde iZwi likaNkulunkulu eliphefumulelwe. Singabe sesicabanga ngalokho esikufundayo bese sizama ukukusebenzisa. Umoya kaJehova ungathonya indlela esiphila ngayo, usisize sibe nokholo olumjabulisayo.