Isandla SikaJehova Asisifushane Neze

1. UMose wabonisa kanjani ukuthi wayethembele kuJehova ngesikhathi ehola ama-Israyeli ewakhipha eGibhithe?

PHAKATHI kwabantu abanokholo okukhulunywa ngabo encwadini yamaHebheru, omunye walabo bantu uMose owayenokholo olumangalisayo. (Heb. 3:​2-5; 11:​23-25) Wabonisa ukholo ngesikhathi ehola ama-Israyeli ewakhipha eGibhithe. Akazange avume ukwesatshiswa uFaro nebutho lakhe. Ethembele kuJehova, wahola ama-Israyeli badabula uLwandle Olubomvu, kamuva wawahola nasehlane. (Heb. 11:​27-29) Ama-Israyeli amaningi aqala ukungabaza ukuthi uJehova wayezokwazi ukuwanakekela, kodwa uMose waqhubeka ethembele kuNkulunkulu wakhe. Ukholo lukaMose aluzange lumdumaze ngoba ngokuyisimangaliso uNkulunkulu wapha abantu ukudla namanzi ukuze baqhubeke bephila ehlane.a—Eks. 15:​22-25; IHu. 78:​23-25.

2. Kungani uNkulunkulu abuza uMose ukuthi, “Sifushane yini isandla sikaJehova”? (Numeri 11:​21-23)

² Nokho, nakuba uMose ayenokholo oluqinile, ngemva kwesikhathi esingangonyaka ama-Israyeli ekhululwe ngokuyisimangaliso, wazibuza ukuthi kazi uJehova wayezokwazi yini ukunika abantu bakhe inyama. KuMose kwakubonakala kungenakwenzeka ukuba uJehova anike lezo zigidi zabantu ababesehlane inyama eyayizokwanela wonke umuntu. Ephendula, uJehova wabuza uMose: “Sifushane yini isandla sikaJehova?” (Funda uNumeri 11:​21-23.) Kulo mBhalo, inkulumo ethi “isandla sikaJehova” ibhekisela emoyeni ongcwele kaNkulunkulu, noma emandleni akhe. Ngamanye amazwi, uJehova wayebuza uMose ukuthi, ‘Ingabe ngempela ucabanga ukuthi ngeke ngikwazi ukwenza lokhu engithi ngizokwenza?’

3. Kungani kufanele sicabangisise ngendaba kaMose nama-Israyeli?

³ Wake wazibuza yini ukuthi kazi uJehova uyozinakekela yini izidingo zakho noma ezomndeni wakho? Kungakhathaliseki ukuthi wake wazibuza lowo mbuzo noma cha, ake sixoxe ngesibonelo sikaMose nama-Israyeli, ababengamethembi uNkulunkulu ukuthi uzobanakekela. Izimiso zeBhayibheli eziphathelene nale ndaba zizosisiza siqiniseke ukuthi isandla sikaJehova asisifushane.

FUNDA KUMOSE NAKUMA-ISRAYELI

4. Yini okungenzeka yenza abantu abaningi bangabaza ukuthi uJehova wayezokwazi ukubanakekela?

⁴ Cabanga ngokwenzeka. Isizwe sama-Israyeli ‘neqembu elikhulu elixubile’ labantu abangewona ama-Israyeli babesehlane elikhulu okwesikhathi esithile njengoba babesuka eGibhithe beya eZweni Lesithembiso. (Eks. 12:38; Dut. 8:15) Isixuku esiyingxubevange sakhathala ukudla imana, namanye ama-Israyeli amaningi aqala ukukhononda ngemana njengaleso sixuku. (Num. 11:​4-6) Abantu baqala ukukhumbula ukudla ababekuthola eGibhithe. Ngenxa yokucindezelwa abantu, kubonakala sengathi uMose wayecabanga ukuthi nguye okwakumele abatholele inyama.—Num. 11:​13, 14.

5-6. Yini esingayifunda endleleni isixuku esiyingxubevange esawathonya ngayo ama-Israyeli amaningi?

⁵ Kubonakala sengathi ama-Israyeli ayethonywe yisixuku esiyingxubevange esingabongi. Nathi singase sithonywe umoya wokungabongi wabantu abasizungezile bese singabe siseneliswa yilokho uJehova asenzela kona. Lokho kungenzeka uma sesiqala ukukhumbula izinto esasinazo noma uma siba nomona ngezinto abanye abanazo. Nokho, siyojabula nakakhulu uma sifunda ukwaneliseka, kungakhathaliseki ukuthi izimo zethu zinjani.

⁶ Ama-Israyeli kwakufanele akhumbule ukuthi uNkulunkulu wayewaqinisekise ukuthi lapho efika ekhaya lawo elisha wayezowanika izinto eziningi ezinhle. Leso sithembiso sasiyogcwaliseka eZweni Lesithembiso, hhayi njengoba ayesahamba ehlane. Ngendlela efanayo, kunokuba sigxile kulokho esingenakho njengamanje, siyobe senza kahle uma sicabanga ngalokho uJehova athembise ukusinika kona ezweni elisha. Singazindla nangemiBhalo engasisiza simethembe nakakhulu uJehova.

7. Kungani singaqiniseka ukuthi isandla sikaJehova asisifushane?

⁷ Noma kunjalo, ungase uzibuze ukuthi kungani uNkulunkulu abuza uMose ukuthi, “Sifushane yini isandla sikaJehova?” Kungenzeka uJehova wayesiza uMose ukuba angagcini nje ngokucabanga ngamandla aKhe amakhulu, kodwa acabange nangokuthi angakwazi ukuwasebenzisa noma kuphi amandla akhe, ngisho nasezindaweni ezikude. UNkulunkulu wayengawanika inyama eningi ama-Israyeli, ngisho noma ayesehlane elikude. “Ngesandla esinamandla nangengalo eyeluliwe,” uNkulunkulu wabonisa amandla akhe. (IHu. 136:​11, 12) Ngakho lapho sibhekene novivinyo, akufanele singabaze ukuthi isandla sikaJehova siyokwazi ukusiza ngamunye wethu, kungakhathaliseki ukuthi sikuphi.—IHu. 138:​6, 7.

8. Singakugwema kanjani ukwenza iphutha elenziwa yiningi lalabo ababesehlane? (Bheka nesithombe.)

⁸ Ngokushesha uJehova wabanika abantu inyama; wanika abantu bakhe izagwaca eziningi. Nokho, ama-Israyeli awazange ambonge uNkulunkulu ngaleso simangaliso. Kunalokho, iningi lawo laba nobugovu. Ubusuku nemini, ayebutha izagwaca eziningi. UJehova wabathukuthelela kakhulu labo “ababonisa isifiso sobugovu” futhi wabajezisa. (Num. 11: 31-34) Kukhona esingakufunda kuleso sibonelo. Kudingeka siqaphe ukuba singanqotshwa ubugovu. Kungakhathaliseki ukuthi sicebile noma asicebile, ukuzibekela “ingcebo ezulwini” kufanele kuze kuqala ekuphileni kwethu ngokuthi sibe nobuhlobo obuseduze noJehova noJesu. (Math. 6:​19, 20; Luka 16:9) Uma senza kanjalo, singaqiniseka ukuthi uJehova uyosinakekela.

9. Yini esenza siqiniseke ukuthi uNkulunkulu uzosisekela?

⁹ Nanamuhla uJehova welula isandla sakhe ukuze asize abantu bakhe. Nokho, lokho akusho ukuthi asisoze salahlekelwa yizinto esinazo noma ukuthi asisoze salamba.b Kodwa uJehova akasoze asilahle. Uyosisekela noma ngabe sibhekene naluphi uvivinyo. Lelo qiniso singalibona ngokuhlola izimo ezimbili esingabonisa kuzo ukuthi sithembele kuJehova ukuthi uzosinika izinto esizidingayo: (1) lapho sibhekene nezinkinga zezimali (2) nalapho sikhathazeke ngokuthi siyoba nakho yini esikudingayo lapho sesikhulile.

LAPHO SIBHEKENE NEZINKINGA ZEZIMALI

10. Yiziphi izinkinga zezimali esingase sibhekane nazo?

¹⁰ Njengoba ukuphela kwaleli zwe elibi kusondela, singalindela ukuba izimo zomnotho zibe zimbi nakakhulu. Izinxushunxushu zezepolitiki, izimpi, izinhlekelele zemvelo noma izifo ezintsha eziwumshayabhuqe kungasifaka ezindlekweni ebesingazilindele noma kusenze silahlekelwe umsebenzi, impahla yethu noma imizi yethu. Kungase kudingeke sifune omunye umsebenzi lapho esihlala khona noma sicabangele ukuthutha nomndeni wethu siyohlala kwenye indawo ukuze sikwazi ukuwunakekela. Yini engasisiza senze izinqumo ezibonisa ukuthi sithembele kuJehova?

11. Yini engakusiza ubhekane nezinkinga zezimali? (Luka 12:​29-31)

¹¹ Isinyathelo esiyinhloko nesiwusizo ukuba utshele uJehova izinto ezikukhathazayo. (IzAga 16:3) Mcele akuphe ukuhlakanipha okudingayo ukuze wenze izinqumo ezihlakaniphile, akwenze uzole ukuze ugweme ‘ukuhlala ukhathazekile’ ngesimo obhekene naso. (Funda uLuka 12:​29-31.) Mcele akusize waneliswe yizinto ozidingayo. (1 Thim. 6:​7, 8) Cwaninga ezincwadini zethu ngokuthi ungabhekana kanjani ngokuphumelelayo nezinkinga zezimali. Abantu abaningi abasizile amavidiyo nezihloko ezitholakala ku-jw.org/zu ezikhuluma ngezinkinga zezimali.

12. Yimiphi imibuzo engasiza umKristu ukuba enzele umndeni wakhe izinqumo ezihlakaniphile?

¹² Abanye baye balingeka ukuba bamukele imisebenzi edinga bashiye imindeni yabo, kodwa ubufakazi bubonisa ukuthi ngokuvamile ukwenza kanjalo kuyisinqumo esingahlakaniphile. Ngaphambi kokuba wamukele umsebenzi omusha, ungacabangi nje kuphela ngemali ongase uyithole kulowo msebenzi, kodwa cabanga nangokuthi uzokusiza yini wena nomndeni wakho ukuba nihlale nisondelene noJehova. (Luka 14:28) Zibuze: ‘Yini engenzeka emshadweni wami uma ngingahlali nomuntu engishade naye? Ukuthutha kuyoyithinta kanjani indlela engikhonza ngayo uJehova nenkonzo yami?’ Uma unabantwana, kudingeka uzibuze nalo mbuzo obalulekile: ‘Ngiyobakhulisa kanjani abantwana bami “ngokubaqeqesha nangesiyalo sikaJehova” uma ngingahlali nabo?’ (Efe. 6:4) Lapho wenza isinqumo, lingisa indlela uNkulunkulu acabanga ngayo, ungalawulwa yilokho okutshelwa umndeni wakho noma abangani abangazihloniphi izimiso zeBhayibheli.c UTony, ohlala entshonalanga ye-Asia, wathola amathuba amaningi emisebenzi eholela kahle kwelinye izwe. Nokho, ngemva kokuthandaza ngale ndaba nokuxoxa ngayo nomkakhe, wanquma ukuthi wayengeke ayamukele leyo misebenzi, kunalokho babezozama ukunciphisa izindleko. Namuhla, uTony uthi: “Ngibe nelungelo lokusiza abantu abaningana ukuba bazi uJehova futhi izingane zethu zimthanda kakhulu uJehova. Umndeni wethu ufunde ukuthi uma nje senza lokho okushiwo uMathewu 6:​33, uJehova uzosinakekela.”

LAPHO SIKHATHAZEKE NGOKUPHILA KWETHU LAPHO SESIKHULILE

13. Yiziphi ezinye izinto esingazenza manje eziyosisiza sikwazi ukuzinakekela lapho sesikhulile?

¹³ Ukuthembela kwethu kuJehova kungavivinyeka nalapho sicabanga ngokuthi ukuphila kwethu kuyoba njani lapho sesikhulile. IBhayibheli lisikhuthaza ukuba sisebenze kanzima ukuze sizokwazi ukuzinakekela esikhathini esizayo. (IzAga 6:​6-11) Uma izimo zisivumela, kuhle ukuba sizibekele imali ethile esizoyisebenzisa esikhathini esizayo. Ngokwezinga elithile, imali iyisivikelo. (UmSh. 7:12) Noma kunjalo, kufanele sigweme ukugxila kakhulu ekufuneni ukuba nemali.

14. Kungani kufanele sicabange ngomBhalo wamaHebheru 13:5 lapho sihlelela ikusasa?

¹⁴ UJesu walandisa umfanekiso oveza ubuwula bokuqongelela imali kodwa ube ‘ungacebile kuNkulunkulu.’ (Luka 12:​16-21) Akekho owaziyo ukuthi ukuphila kwethu kuyoba njani kusasa. (IzAga 23:​4, 5; Jak. 4:​13-15) Njengalandeli bakaKristu, sibhekana nenselele ehlukile. UJesu wathi kumele sikulungele ‘ukulahla’ konke esinakho ukuze sibe abafundi bakhe. (Luka 14:​33, mbhw.) AmaKristu angekhulu lokuqala eJudiya akwamukela ngenjabulo ukulahlekelwa yikho konke ayenakho. (Heb. 10:34) Esikhathini sethu, abafowethu abaningi kuye kwadingeka balahlekelwe umsebenzi wokuziphilisa ngenxa yokwenqaba ukusekela ezepolitiki. (IsAm. 13:​16, 17) Yini ebasize ukuba benze lokho? Basethemba ngokuphelele isithembiso sikaJehova esithi: “Angisoze ngakushiya futhi angisoze ngakulahla.” (Funda eyamaHebheru 13:5.) Senza konke esingakwenza ukuze sihlelele ikusasa, kodwa uma sehlelwa yizimo ezingalindelekile, siyaqiniseka ukuthi uJehova uzosisekela.

15. Yimuphi umbono olinganiselayo abazali abangamaKristu okufanele babe nawo ngabantwana babo? (Bheka nesithombe.)

¹⁵ Kwamanye amazwe, isizathu esiyinhloko esenza abantu abashadile babe nabantwana ukuthi bafuna abantwana babo babanakekele ngokwezimali lapho sebekhulile. Ngomqondo othile, labo bazali babheka abantwana babo njengendlela yokuthola “imali ezobanakekela lapho sebekhulile.” Kodwa iBhayibheli lithi abazali kufanele banakekele izidingo zabantwana babo. (2 Kor. 12:14) Yiqiniso ukuthi njengoba abazali bekhula bangase badinge ukuba abantwana babo babasize ngemali noma ngezinye izinto futhi abantwana abaningi bayakujabulela ukusiza abazali babo. (1 Thim. 5:4) Kodwa, abazali abangamaKristu bayaqaphela ukuthi into ejabulisa kakhulu ukusiza abantwana babo babe yizinceku zikaJehova, hhayi ukubakhulisa benomgomo wokuthi bazobanakekela ngokwezimali lapho sebekhulile.—3 Joh. 4.

16. Abazali bangabasiza kanjani abantwana babo ukuba bakwazi ukuzinakekela ngokwezimali lapho sebebadala? (Efesu 4:28)

¹⁶ Ngesibonelo sakho, fundisa abantwana bakho ukuba bathembele kuJehova njengoba ubasiza balungele ukunakekela izidingo zabo lapho sebebadala. Kusukela besebancane, babonise izinzuzo zokusebenza kanzima. (IzAga 29:21; funda eyabase-Efesu 4:28.) Njengoba bekhula, basize ukuba bazikhandle esikoleni. Abazali abangamaKristu benza kahle ngokucwaninga nangokusebenzisa izimiso zeBhayibheli ukuze basize izingane zabo zinqume ukuthi zingayisebenzisa kanjani imfundo ngokuhlakanipha. Lokho kuyosiza izingane zabo zikwazi ukuzinakekela futhi zihlanganyele ngokugcwele enkonzweni.

17. Yini esingaqiniseka ngayo?

¹⁷ Izinceku zikaJehova eziqotho zingaqiniseka ngokuthi uJehova uyakwazi futhi uyafisa ukunakekela izidingo zazo. Njengoba ukuphela kwaleli zwe sekuseduze, singalindela ukuba ukuthembela kwethu kuJehova kuvivinywe. Kungakhathaliseki ukuthi kwenzekani, siqiniseka ngokuphelele ukuthi uJehova uyosebenzisa amandla akhe ukuze anakekele izidingo zethu. Singaqiniseka ngokuthi isandla sakhe esinamandla nengalo yakhe eyeluliwe akusoze kwaba kufushane ukuba kusisize, kungakhathaliseki ukuthi sikuphi.