ISihloko Sonyaka Ka-2015

Ngemva kokukhululwa kuFaro namabutho akhe oLwandle Olubomvu, ama-Israyeli ayenazo zonke izizathu zokubonga uJehova. Nathi singambonga ngenjabulo uJehova. Yiqiniso, lapho sehlelwa yizimo ezivivinyayo, singadikibala kalula. Ezikhathini ezinjalo singaduduzwa futhi siqiniswe ukucabanga ngezibusiso esinazo.

Phakathi kwezibusiso esizazisa kunazo zonke yithemba lethu eliqinisekisiwe lokukhululwa kukho konke okusibangela ubuhlungu nokucindezeleka. Kungakhathaliseki ukuthi yibuphi ubunzima obungasehlela, siyazi ukuthi uJehova ngeke asishiye. UMalusi wethu onothando usinika konke esikudingayo ukuze simkhonze ngokwethembeka. Akahluleki nanini ukuba “yisiphephelo namandla, usizo olutholakala ngokushesha ngesikhathi sokucindezeleka.” (IHu. 46:1) Ukuzigcina sigxile kulezi zibusiso kuyosisiza sikwazi ukuthwala ngisho nosizi olubuhlungu kunalo lonke. Kuwo wonke lo nyaka ozayo, kwangathi singacabanga ngokujulile nangenjabulo ngezibusiso esinazo futhi sishukumiseleke ukuba ‘sibonge uJehova, ngoba muhle; ngoba umusa wakhe wothando umi kuze kube nini nanini.’—IHu. 106:1.