Izethulo Zingenza Umehluko
1 Ingabe ubuzisebenzisa ezinye zezingeniso ezisikiselwe encwadini Ukubonisana noma lezo ezivela kuNkonzo Yethu YoMbuso yamuva? Abamemezeli abaningi babika impumelelo enkulu enkonzweni yabo yendlu ngendlu ngokusebenzisa lezethulo ngokwezwi nezwi njengoba zibhaliwe. Abanye baye bathola ukuthi ngokusebenzisa nje isikhathi esithe xáxá ekulungiseleleni inkonzo yasensimini, baye bakwazi ukuzakhela izethulo ngamazwi abo siqu kodwa asekelwe emazwini alokhu kusikisela okubhaliwe.
2 Inye into eqinisekile, ukuthi uma usikhumbula kahle isethulo sakho ngaphambi kokuba uxoxe nothile ngesigijimi soMbuso, uyozizwa ukhululeke ngokwengeziwe futhi uqiniseka ngokwengeziwe. Amazwi akho ayobonisa isifiso sakho esiqotho sokuhlanganyela izindaba ezinhle nabanye. Ukulungiselela kwakho kahle kwenza inkonzo yakho ijabulise ngokwengeziwe ngoba uyothola imiphumela engcono. Okubaluleke kakhulu ukuthi senza umhlatshelo wethu wenkonzo ube ongcono kakhulu esinganikela ngawo.—Heb. 13:15; 1 Pet. 2:5.
3 Ngakho zinike isikhathi esanele sokulungiselela. Cabangela uhlobo lwabantu okungenzeka uhlangane nalo ensimini yebandla lenu. Yini ebakhathazayo? Iziphi izenzakalo zamuva ezithinta ukuphila kwabo? Ngemva kokucabangela izimpendulo zalemibuzo, bheka izethulo ezisikiselwe emakhasini 9-15 encwadi Ukubonisana noma ukhethe isethulo esisodwa noma ezengeziwe kuNkonzo Yethu YoMbuso. Zizwe ukhululekile ukushintsha noma ulungise lawomazwi alapho ukuze ukhululeke lapho uwasebenzisa. Isinyathelo esilandelayo kuyoba ukuba abanye abamemezeli bahlole kanye nawe isethulo sakho ngesikhathi sokuprakthiza. Mhlawumbe lokhu kuyokhuthaza nabanye ukuba bathuthukise ezabo izethulo. Nokho, ngokuqinisekile niyobe niyakhuthazana futhi nakhana emisebenzini emihle.
4 Isikhathi nomzamo okusebenzisa ekulungiseleleni izintshumayelo zakho zasensimini kuyovuzwa. Ungase ubusiswe ngokuba nengxenye ephumelela ngokwengeziwe emsebenzini wokuqoqa ojabulisayo oqhubekayo manje.