Umbono Webhayibheli

Ingabe Ubumpofu Benza Ukweba Kuthetheleleke?

“Ubumpofu Buyisitha Esikhulu Senjabulo Yesintu; Ngokuqinisekile Buyayiqeda Inkululeko Futhi Benza Kungabi Nakwenzeka Ukwenza Izinto Ezinhle, Futhi Ezinye Kube Nzima Kakhulu Ukuzenza.”—Usamuel Johnson, Umlobi Wekhulu Lesi-18.

ISIKHULU sikahulumeni waseRoma uMagnus Aurelius Cassiodorus sathi: “Ubumpofu buzala ubugebengu.” Lemibono ibonakala isikisela ukuthi obunye ubugebengu buyimiphumela evamile yobumpofu. Ngokusobala abaningi namuhla bayavumelana nalokhu, ikakhulukazi lapho icala liwukweba.

Inkolelo yokuthi ukucindezelwa nobumpofu kwenza ukweba kuthetheleleke iyathandwa. Cabangela izingoma ezidumile zesiNgisi zekhulu lesi-14 ezikhuluma ngoRobin Hood, ezichaza ngesaphula-mthetho sasenganekwaneni esasiphanga abacebile bese sabela abampofu impango. Sasilokhu sibhekwa njengeqhawe amakhulu amaningi eminyaka.

Kuyavunywa, abaningi namuhla babhekana nobunzima obukhulu ngokomnotho. Muva nje iBhange Lomhlaba labika ukuthi kunabantu abayizigidi eziyizinkulungwane ezingu-1,3 abaphila ngemali engaphansi kwamaRandi amane ngosuku. Kokunye ukuhlolwa kwabantu basePhilippines, amaphesenti angu 70 athi azibheka njengampofu. EBrazil amaphesenti angu-20 abantu abacebe kakhulu ahola ngokuphindwe izikhathi ezingu-32 kunabangamaphesenti angu-20 abampofu. Izimo ezinjalo zingabakhungathekisa abanye abantu kuze kube sezingeni lokwenza noma yini, ngisho nokweba, ukuze nje banelise izidingo zabo zansuku zonke zokuphila.

IBhayibheli likulahla ngokucacile ukweba. Owesishiyagalombili eMiyalweni Eyishumi uthi: “Ungebi.” (Eksodusi 20:15) Kodwa, abaningi abakholelwa eBhayibhelini bathambekele ekuthetheleleni ukweba lapho isela liphoqelelwa izimo ezidabukisayo ezingokomnotho.

Lokhu kuphakamisa imibuzo ebalulekile: Ingabe ubumpofu ngempela bungenza ukweba kuthetheleleke? Yini umuntu angayenza uma edla imbuya ngothi? Kuthiwani uma enezingane ezigulayo noma ezilambile okufanele azinakekele? Ingabe ngaphansi kwalezo zimo uJehova uNkulunkulu uyokuvumela ukweba, ikakhulu uma lezo zinto ezebiwe zingezabantu abangenandaba nazo?

UNkulunkulu Uthini?

Njengoba uJesu abonakalisa ubuntu bukaYise, isibonelo sakhe singasisiza ukuba siqonde umbono kaNkulunkulu. (Johane 12:49) Lapho esemhlabeni, uJesu wayenesihawu ekusebenzelaneni kwakhe nabaswele. IBhayibheli lithi: “Lapho ebona izixuku wafikelwa isihawu ngazo.” (Mathewu 9:36) Noma kunjalo, akakaze, nangaphansi kwaziphi izimo, athethelele ukweba. Ngokufanayo, nakuba uNkulunkulu ebakhathalela abampofu, ubumpofu akabubheki njengobuthethelela ukweba. Ku-Isaya 61:8, iBhayibheli lisitshela ukuthi uNkulunkulu ‘uyakuzonda ukuphanga kanye nokubi.’ Futhi umphostoli uPawulu ukubeka ngokucacile ukuthi amasela ngeke awuzuze njengefa uMbuso kaNkulunkulu. Ngakho siwuqonda kahle umbono kaNkulunkulu.—1 Korinte 6:10.

Nokho, izAga 6:30 zithi: “Abamdeleli yini oyisela ukuthi uyeba ukuba azisuthise lapho elambile na?” Ingabe lamazwi ayakuthethelela ukweba? Lutho neze. Umongo ubonisa ukuthi uNkulunkulu ubheka isela njengelifanelwe isijeziso ngephutha lalo. Ivesi elilandelayo lithi: “Uma efunyanwa, uyakubuyisa kasikhombisa, anikeze yonke impahla yendlu yakhe.”—IzAga 6:31.

Nakuba isela eleba ngenxa yendlala lingase lingasoleki njengalelo eleba ngenxa yobugovu noma ngenhloso yokulimaza isisulu salo, labo abafisa ukwamukeleka kuNkulunkulu akufanele babe necala lanoma iluphi uhlobo lokweba. Ngisho nangaphansi kwezimo zobumpofu obudlulele, ukweba kuyamhlazisa uNkulunkulu. IzAga 30:8, 9 zikubeka kanje: “Ngiphe isinkwa engisimiselweyo, . . . funa ngibe-mpofu, ngebe, ngilone igama likaNkulunkulu wami.” Yebo, isela liyalihlambalaza igama likaNkulunkulu. Njengoba ukweba kuyisenzo esingabonisi uthando, kuyisono kungakhathaliseki ukuthi kwebelwa abantu abacebile noma abampofu. Kulabo abathanda uNkulunkulu nomakhelwane, ukweba akunakuthethelelwa neze.—Mathewu 22:39; Roma 13:9, 10.

Awunangqondo umbono wokuthi umuntu ompofu unelungelo lokweba. Ukusho lokhu kungafana nokuthi umdlali ongakhekile kahle ngokomzimba unelungelo lokusebenzisa izidakamizwa ezenqatshelwe ukuze anqobe. Ngisho noma enganqoba, uye wasebenzisa izindlela zokungathembeki. Abanye bangase ngokufanele babe nomuzwa wokuthi ubanqobe ngezindlela ezingemthetho. Kunjalo nangesela. Lithatha izinto zabanye abantu ngendlela yokungathembeki. Isimo salo sobumpofu asikuthetheleli lokho.

Noma iliphi isela elifuna ukwamukeleka kuNkulunkulu kumelwe liphenduke endleleni yalo yokuziphatha. IBhayibheli liyayala: “Owebayo makangabe eseba, kodwa kunalokho makenze umsebenzi onzima, enze lokho okuwumsebenzi omuhle ngezandla zakhe.” (Efesu 4:28) Labo ababekade bengamasela abaphenduka ngobuqotho bangaqiniseka ukuthi uJehova uyobaxolela.—Hezekeli 33:14-16.

Yini Abampofu Abangayenza?

IBhayibheli liyathembisa: “UJehova akavumi ukuba olungileyo alambe, kepha isifiso somubi uyasihlohloloza.” (IzAga 10:3) UNkulunkulu ngeke abasize labo ngamabomu abephula imithetho yakhe ukuze banelise izifiso zabo. Kodwa unesihawu ngalabo abazama ngobuqotho ukumlalela, futhi uyoyibusisa imizamo yabo yokuthola lokho abakudingayo.—IHubo 37:25.

Kakade izigidi zabantu seziye zathola ukuthi lapho zilandela izimiso zokuhlonipha uNkulunkulu, izimo zazo ekuphileni ziba ngcono. Ngokwesibonelo, ukusebenzisa iseluleko seBhayibheli sokukhuthala nokugwema imikhuba emibi enjengokugembula, ukudakwa, ukusebenzisa kabi izidakamizwa, kuye kwabenza bakwazi ukuthola okungaphezu kwalokho abakudinga ngempela. (Galathiya 5:19-21) Lokhu kudinga ukuba babonise ukholo, futhi labo abaye benza kanjalo baye bafunda ukuthi “uJehova muhle” nokuthi ubasiza ngempela labo abathembela kuye.—IHubo 34:8.

[Umthombo Wesithombe ekhasini 18]

Robin Hood: General Research Division/The New York Public Library/Astor, Lenox and Tilden Foundations