“Uyolangazelela”

KUBUHLUNGU ukubona umuntu omthandayo egulela ukufa. Lapho efa, kungokwemvelo ukudabuka. Nokho, kuyaduduza ukwazi ukuthi uMdali wethu, uJehova uNkulunkulu, uyakuqonda ukudabuka kwethu. Ngaphezu kwalokho, ulangazelela ukusebenzisa amandla akhe amakhulu ukuze avuse abafileyo. Kukhona ithemba esilithola emazwini kaJobe encwadini kaJobe 14:13-15.

Cabanga ngokwenzeka. UJobe, indoda eyayinokholo oluqinile, wabhekana novivinyo olunzima—oluhlanganisa ukulahlekelwa yizinto zakhe ezibonakalayo, ukufa kwazo zonke izingane zakhe azithandayo nokuphathwa isifo esibuhlungu. Esezinhlungwini ezinkulu, wabiza uNkulunkulu: “O ukube ubungangithukusa eShiyoli [ithuna elivamile]!” (Ivesi 13) UJobe wabheka iShiyoli njengendawo ayezophumula kuyo. Njengegugu elifihlwe uNkulunkulu, wayengeke esabhekana nobunzima nezinhlungu.a

Ingabe uJobe uyohlala eShiyoli kuze kube phakade? UJobe wayengakholelwa kulokho. Waqhubeka nomthandazo wakhe: “Ukube ubungangilinganisela isikhathi futhi ungikhumbule!” UJobe wayenethemba lokuthi uyohlala isikhashana eShiyoli nokuthi uJehova wayengeke amkhohlwe. Wafanisa isikhathi ayeyosichitha eShiyoli ‘nomsebenzi oyimpoqo’—isikhathi sokulinda esiphoqelekile. Kuze kube nini? Wathi: “Kuze kufike impumuzo yami.” (Ivesi 14) Leyo mpumuzo iyosho ukuphuma eShiyoli—ngamanye amazwi, ukuvuka kwabafileyo!

Kungani uJobe ayenethemba lokuthi uyothola impumuzo? Ngoba wayazi ukuthi uMdali wethu onothando uzizwa kanjani ngabakhulekeli bakhe abafileyo. UJobe wathi: “Uyobiza futhi mina ngiyokuphendula. Uyolangazelela umsebenzi wezandla zakho.” (Ivesi 15) UJobe wayazi ukuthi wadalwa uNkulunkulu. UMniki-kuphila owabumba uJobe esibelethweni nakanjani angamvusa kwabafileyo.—Jobe 10:8, 9; 31:15.

Amazwi kaJobe asifundisa ngothando lukaJehova: Njengoba kwakunjalo ngoJobe, unobuhlobo obukhethekile nalabo abazibeka ezandleni zakhe, abamvumela ukuba ababumbe futhi abenze abantu abafiselekayo emehlweni akhe. (Isaya 64:8) UJehova uyabazisa abakhulekeli bakhe abathembekile. ‘Uyabalangazelela’ labo abafe beqotho. Esinye isazi sithi leli gama lesiHebheru “ngokungangabazeki lingelinye lamagama anamandla abonisa isifiso esikhulu sokwenza okuthile.” Yebo, uJehova akagcini ngokubakhumbula abakhulekeli bakhe, kodwa ulangazelela nokubavusa ekufeni.

Okuhle nakakhulu ukuthi encwadini kaJobe—enye yezincwadi zokuqala zeBhayibheli ezabhalwa—uJehova wakubona kufaneleka ukwambula injongo yakhe yokuvusa abafileyo.b Ufuna ukukuhlanganisa nabantu obathandayo abafa. Leli themba lingenza ubuhlungu bokushonelwa bubekezeleleke. Kunganjani ufunde okwengeziwe ngalo Nkulunkulu onothando nokuthi ungamvumela kanjani ukuba akubumbe ube uhlobo lomuntu oyokwazi ukubona izithembiso zakhe zifezeka.