“Memezelani Lokhu, Phakathi Kwezizwe”

1. Kungani ukukhuluma kukaJehova nomprofethi wakhe kufaniswa nokubhonga kwengonyama?

WAKE wayizwa ingonyama ibhonga? Kuthiwa umsindo wokubhonga kwayo udlula owomshini oqhekeza amadwala. Ungenzenjani uma ungayizwa ibhonga eduze kwakho ebusuku kuthule kuthé cwaka? Cishe ungacela empunzini. U-Amose, omunye wabaprofethi abangu-12 ababhala izincwadi esizifundayo, wasebenzisa lo mfanekiso: “Kukhona ingonyama ebhongile! Ubani ongeke esabe? INkosi EnguMbusi uJehova ngokwayo ikhulumile! Ubani ongeke aprofethe?” (Amose 3:3-8) Ukube ubuzwe uJehova ezikhulumela ngokwakhe, ubungeke yini usabele njengo-Amose? Wathatha isinyathelo ngokushesha, waprofetha ngombuso wakwa-Israyeli wezizwe eziyishumi.

2. (a) Ungamlingisa kanjani u-Amose ekufezeni isabelo sokuprofetha? (b) Sizofunda ngani kulesi sahluko?

² Ungase uthi, ‘Kodwa mina angiyena umprofethi!’ Ungase uzizwe ungafaneleki ngoba ungaqeqeshiwe njengomprofethi. Nokho, khumbula u-Amose. Lapho ephikiswa ngumpristi okhulekela ithole u-Amaziya, u-Amose wathi: “Ngangingeyena umprofethi, futhi ngingeyona nendodana yomprofethi; kodwa ngangingumalusi nomqhumbuzi wamakhiwane emisikhamori.” (Amose 7:14) Nakuba ayenesizinda esiphansi, u-Amose wayezimisele ukufeza isabelo sakhe njengomprofethi kaJehova. Wena-ke? Uyaqaphela yini ukuthi unikezwe isabelo esifanayo nesabaprofethi abangu-12 ngezici ezithile? Kumelwe umemezele isigijimi sikaNkulunkulu sanamuhla ubuye ufundise futhi wenze abafundi. Usibheka kanjani leso sabelo esingathí sina? Yisiphi isigijimi okumelwe usimemezele ezizweni? Usenza kahle kangakanani leso sabelo? Yini enquma ukuthi umsebenzi wakho uyaphumelela noma cha? Ake sizwe izimpendulo.

‘AMADUNA EZINKOMO EZINDEBE ZAKHO’

3. Ungahlanganyela kanjani emsebenzini ofana nowabaprofethi esifunda ngabo?

³ Ingabe ngempela wenza umsebenzi ofana nowabaprofethi? Kungase kube ukuthi awulizwanga ibhubesi libhonga ngomqondo wokuthi awuphefumulelwanga uJehova ngokuqondile. Kodwa usizwile isigijimi esiphuthumayo esiseZwini lakhe, iBhayibheli, mayelana nosuku lukaJehova olusondelayo. Njengoba sifundile eSahlukweni 1 sale ncwadi, igama elithi “umprofethi” nelithi “isiprofetho” anezincazelo ezihlukahlukene. Nakuba ungeyena umprofethi ngomqondo u-Amose noma abanye abaprofethi basendulo ababengabaprofethi ngawo, usengakhuluma ngekusasa. Kanjani? Ungamemezela izigijimi zesiprofetho ozifunde emiBhalweni Engcwele, ezihlanganisa nezabaprofethi abangu-12. Manje yisikhathi sokwenza lokho kanye.

4. Sigcwaliseka ngamuphi umqondo namuhla isiprofetho esikuJoweli 2:28-32?

⁴ Ake uyibheke ngolunye uhlangothi le ndaba. UJehova uNkulunkulu watshela umprofethi uJoweli ngesikhathi lapho abantu bazo zonke izinhlobo beyoprofetha ngomqondo ongokomfanekiso: “Ngemva kwalokho ngithululele umoya wami phezu kwayo yonke inhlobo yenyama, amadodana enu namadodakazi enu ngokuqinisekile ayoprofetha. Amaxhegu enu, aphuphe amaphupho. Izinsizwa zenu, zibone imibono.” (Joweli 2:28-32) Ngosuku lwePhentekoste lika-33 C.E., umphostoli uPetru wasebenzisa la mavesi ekuthululweni komoya ongcwele phezu kwalabo ababebuthene ekamelweni eliphezulu eJerusalema, nasekushumayeleni kwabo “ngezinto ezinhle kakhulu zikaNkulunkulu” okwakuzolandela. (IzEnzo 1:12-14; 2:1-4, 11, 14-21) Manje cabanga ngesikhathi sethu. Ukugcwaliseka okukhulu kwesiprofetho sikaJoweli bekulokhu kuqhubeka kusukela ekuqaleni kwekhulu lama-20. AmaKristu agcotshwe ngomoya​—awesilisa nawesifazane, asekhulile nasemasha—​aqala ‘ukuprofetha,’ okusho ukuthi, ukumemezela ‘izinto ezinhle kakhulu zikaNkulunkulu,’ ezihlanganisa nezindaba ezinhle zoMbuso manje osumisiwe emazulwini.

5. (a) Yiliphi ilungelo esinalo sonke? (b) Kuhilelani ngawe ukunikela “ngamaduna ezinkomo ezindebe [zakho]” futhi kungani lokhu kuyilungelo?

⁵ Nakuba singazelwe ngomoya ongcwele ukuze sibe amadodana kaNkulunkulu, “isixuku esikhulu” ‘sezinye izimvu’ sithi kubalandeli bakaJesu Kristu abagcotshiwe: “Sizohamba nani, ngoba sizwile ukuthi uNkulunkulu unani.” (IsAmbulo 7:9; Johane 10:16; Zakariya 8:23) Kungakhathaliseki ukuthi unethemba lokuphila okuphakade emazulwini noma emhlabeni, unelungelo lokunikela “ngamaduna ezinkomo ezindebe [zakho].” (Hoseya 14:2) Isho ukuthini leyo nkulumo esesiprofethweni sikaHoseya? “Izinkabi ezisencane . . . zaziyizilwane ezingcono kakhulu zokwenza umnikelo wokubonga,” kusho isazi seBhayibheli uC. F. Keil. Umphostoli uPawulu wabhekisela kuHoseya 14:2, wabhala: “Masinikele ngaso sonke isikhathi kuNkulunkulu umhlatshelo wokudumisa, okuwukuthi, isithelo sezindebe ezivuma obala igama lakhe.” (Hebheru 13:15) Yebo, inkulumo ethi “amaduna ezinkomo ezindebe zethu” isho okungcono kakhulu kwezindebe zethu, amazwi esiwashoyo lapho sidumisa uJehova.

6. Kungani kufanele sihlole izinga lemihlatshelo yethu yokudumisa?

⁶ Usuke unikela kuJehova imihlatshelo yokumdumisa lapho uthandaza kuye ngokusuka enhliziyweni, unikeza izimpendulo zokwazisa ngaye emihlanganweni yobuKristu, nalapho uxoxa nabanye ngentshiseko enkonzweni yasensimini. Nokho, ngamunye wethu angabuza, ‘Lapho ngenza lezi zinto, lisuke linjani izinga lomnikelo wami?’ Kulokhu osukufundile, akungabazeki ukuthi usuyabenyanya abapristi bosuku lukaMalaki ababeletha ngamabomu izilwane ezinesici e-altare likaNkulunkulu. NgoMalaki, uJehova kwadingeka agcizelele kubo ukuthi imihlatshelo yabo yayisezingeni eliphansi, ngoba bona babengacabangi ukuthi badelela itafula likaJehova. (Malaki 1:8) Ngenxa yalokho, kuhle nathi sihlole izinga lemihlatshelo yethu ukuze siqiniseke ukuthi ingengcono kakhulu nokuthi ayinasici nakancane.

ISIGIJIMI OKUMELWE SIMENYEZELWE

7. Isibindi sidingeka ekumemezeleni siphi isici sesigijimi sethu esikabili?

⁷ Ukunikela “ngamaduna ezinkomo ezindebe zethu” enkonzweni kudinga isibindi, akunjalo? Lokhu kubangelwa ukuthi isigijimi esisiyisa kubantu sikabili, futhi esinye sezici saso asithandeki neze. Umprofethi uJoweli watshela abantu bakaNkulunkulu: “Memezelani lokhu, phakathi kwezizwe, ‘Ngcwelisani impi! Vusani amadoda anamandla! Mawasondele! Mawakhuphuke, wonke amadoda empi!’” (Joweli 3:9) Kulolu suku lwethu, yeka inselele okuyiyo lokho ezizweni! Kuyisimemezelo sempi kaJehova yokulunga elwa nabantu abamdelelayo. Nakuba uJehova etshela abantu bakhe ukuba ‘bakhande izinkemba zabo zibe ngamageja nemikhonto yabo ibe ngocelemba,’ utshela izizwe eziyizitha ukuba ‘zikhande amageja azo abe izinkemba nocelemba bazo babe yizijula.’ (Mika 4:3; Joweli 3:10) Yebo, izitha zikaNkulunkulu kumelwe zibhukulele ukutholana phezulu empini noMdali wendawo yonke. Akusona isigijimi esimnandi ukusimemezela leso.

8. Kungani “abaseleyo bakaJakobe” befaniswa nengonyama?

⁸ Esigijimini somprofethi uMika, abantu abanikela ‘ngamaduna ezinkomo ezindebe zabo’ bafaniswa nengonyama. Wabhala: “Phakathi kwezizwe . . . abaseleyo bakaJakobe bayoba njengengonyama phakathi kwezilwane zehlathi, njengebhongo lengonyama elinomhlwenga phakathi kwemihlambi yezimvu, lelo okuthi lapho lidlula, linyathele futhi lidwengule; angabi khona umkhululi.” (Mika 5:8) Kungani kusetshenziswa lesi sifaniso? Osukwini lwethu, abantu bakaNkulunkulu, beholwa insali egcotshiwe, kumelwe batshengise isibindi esinjengesengonyama ekumemezeleni isigijimi esiyisixwayiso ezizweni.a

9. (a) Kunini lapho kudingeka ukuba ube nesibindi esinjengesengonyama? (b) Ungasithola kanjani isibindi lapho uphikiswa noma unganakwa?

⁹ Ingabe unesibindi njengengonyama lapho umemezela isixwayiso sesigijimi sethu? Isibindi esinjalo ungase ungagcini ngokusidinga lapho uphambi kweziphathimandla kodwa nalapho uxoxa nontanga esikoleni, emsebenzini noma nezihlobo zakho ezingakholwa. (Mika 7:5-7; Mathewu 10:17-21) Ungasiqunga kanjani isibindi lapho uphikiswa noma unganakwa? Lalela indlela uMika akwazi ngayo ukufeza umsebenzi omkhulu wokuxwayisa ngokubhujiswa kweSamariya neJerusalema: “Mina ngigcwele amandla, ngomoya kaJehova, nobulungisa nobukhulu, ukuze ngitshele uJakobe ukuvukela kwakhe no-Israyeli isono sakhe.” (Mika 1:1, 6; 3:8) Nawe futhi ‘ungagcwala amandla’ ngoba ungawathola amandla amakhulu omoya kaNkulunkulu onikeza amandla. (Zakariya 4:6) Ngokuncika kuNkulunkulu ngomthandazo, uyokwazi ukumemezela amazwi ayokwenza izindlebe zinkeneneze.​—2 AmaKhosi 21:10-15.

10. Singamlingisa kanjani uZefaniya lapho simemezela isigijimi esimayelana ‘nosuku lukaJehova’?

¹⁰ Ufuna ukuba nesibindi, kodwa futhi kufanele ube nesu lokungacunuli lapho wethula isigijimi esiyisixwayiso kubantu. Kudingeka sibe “mnene [noma, “isu lokungacunuli”] kubo bonke,” ngisho noma isigijimi simayelana ‘nosuku lukaJehova’ olusondelayo. (2 Thimothewu 2:24; umbhalo waphansi we-Reference Bible; Joweli 2:1, 11; Zefaniya 1:14) Nalapha futhi singafunda kubaprofethi abangu-12. Bazimemezela ngesibindi izahlulelo zikaJehova, nokho babebacabangela abantu ababelalela. Ngokwesibonelo, umprofethi uZefaniya akazange agudl’ iguma lapho ekhuluma nezikhulu zosuku lwakhe ezase zilukhuni, kodwa akazange ayisole inkosi ethembekile uJosiya. (Zefaniya 1:8) Lapho simemezela isigijimi esiyisixwayiso, ingabe singabasiza abantu ngokubabheka njengabangaba izimvu, singababheki kabi?​—Mathewu 25:32-34.

11. (a) Siyini isici sesibili sesigijimi sethu esikabili esisimemezelayo? (b) Ungabalingisa kanjani abaprofethi abangu-12 lapho umemezela usuku lukaJehova?

¹¹ Yisiphi esinye isici sesigijimi sethu esikabili esisiphethe? Siqokonyiswe kuMika isahluko 5. “Abaseleyo bakaJakobe bayoba njengamazolo avela kuJehova phakathi kwezizwe eziningi, njengezihlambi ezinkulu phezu kwezimila, ezingathembele kumuntu futhi ezingalindele amadodana omuntu wasemhlabeni.” (Mika 4:1; 5:7) Ngenxa yezindaba ezinhle abaziyisa ‘ezizweni eziningi’ namuhla, “abaseleyo” bakaJakobe ongokomoya, noma u-Israyeli, nabangane babo bafana ‘namazolo [aqabulayo] avela kuJehova nezihlambi ezinkulu phezu kwezimila.’ Kufanele sikwazi ukufunda okuningi ezincwadini zokugcina ezingu-12 zemiBhalo yesiHebheru ngalesi sici sesibili sesigijimi sethu, ngoba labo baprofethi abamemezelanga ukubhujiswa nje kuphela kodwa nokubuyiselwa. Enkonzweni yakho, ingabe uyasigcizelela isici esihle sesigijimi sethu esiphathelene nosuku lukaJehova?

USIMEMEZELA KANJANI LESI SIGIJIMI?

12, 13. (a) Kungani abantu bakaNkulunkulu befaniswa noswebezane lwezilokazane? (b) Uzizwa kanjani ngalokhu okufunda kuJoweli 2:7, 8?

¹² Usimemezela kanjani-ke lesi sigijimi esikabili? Umprofethi uJoweli wafanisa umsebenzi wabantu bakaNkulunkulu nohlupho olukhulu lwezilokazane ezihlanganisa isikhonyane. (Joweli 1:4) Ezintweni zonke nje, kungani sifanisa abantu bakaJehova noswebezane lwezilokazane? Kungoba, njengoba kusho uJoweli 2:11, uNkulunkulu ubiza lezi zilokazane ngokuthi ‘ibutho lakhe lempi.’ (Abantu bakaNkulunkulu bafanekiselwa yisikhonyane nasencwadini yesAmbulo. Bheka isAmbulo 9:3, 4.) Umsebenzi walezi zilokazane ochazwa uJoweli wawufana nomlilo oqothulayo, futhi lapho zidlule khona, ‘okunjengensimu yase-Edene’ kwakuphenduka “ihlane eliyincithakalo.” (Joweli 2:2, 3) Ungabonisa kanjani ukuthi uyakubona ukubaluleka kwesiprofetho sikaJoweli?

¹³ Cabanga ngendlela eziwenzisisa ngayo umsebenzi lezi zilokazane. UJoweli ukubeka kanje: “Bagijima njengamadoda anamandla. Bakhuphukela odongeni njengamadoda empi. Bahamba kube yilowo nalowo ngezindlela zakhe, abaziguquli izindlela zabo. Abasunduzani. Balokhu behamba njengendoda enamandla endleleni yayo; uma kwenzeka abanye bewa phakathi kweminsalo, abanye abaphambuki endleleni.” (Joweli 2:7, 8) Akukho ‘donga’ oluwukuphikiswa olwalungazivimba zona kanye nohlupho lwazo. “Uma kwenzeka abanye bewa phakathi kweminsalo,” njengoba kwenzekile ngamaKristu aqotho aye abulawa izitha ezicindezelayo, abanye bayawuqhuba umsebenzi, bafeze isabelo abasinikwe uJehova. Ingabe uzimisele ukubambelela esabelweni sokumemezela usuku lukaJehova kuze kube yilapho uNkulunkulu ethi kufeziwe? Kungenzeka nokuthi uqhubeka nalo msebenzi esikhundleni samanye amaKristu athembekile asefile.

14. Ungasiza ngayiphi indlela ekwenzisiseni umsebenzi wokushumayela?

¹⁴ Isihluthulelo siwukwenzisisa. Wena ungasiza kanjani ekuwenzisiseni umsebenzi wokushumayela njengoba kuchazwe esiprofethweni sikaJoweli? Ngokuhlanganyela enkonzweni yendlu ngendlu bese uphindela uyofundisa abantu ababonise isithakazelo. Uphindele futhi ukuze uthole abebengekho emakhaya. Ngokwenza kanjalo ubonisa ukuthi uyayiqonda incazelo yalesi siprofetho. Lapho futhi ushumayeza abantu emgwaqweni, ungase uthole abantu obungeke ubafinyelele ngenye indlela. Nansi enye indlela: Ungase ukwazi ukusiza abantu basendaweni yakini abavela kwamanye amazwe.b Ingabe uyawabheka wonke amathuba anjalo, ube nesandla ekwenzisiseni umsebenzi wokushumayela namuhla?

YINI ENQUMA IMPUMELELO YAKHO?

15. Yini ephawulekayo ngokusabela kwabantu ezigijimini zabaprofethi abangu-12?

¹⁵ Abantu basabela kanjani esigijimini esiphathelene nosuku lukaJehova olwesabekayo? Akufanele umangale uma uphikiswa noma unganakwa. Kwakunjalo nangabaprofethi bakaNkulunkulu abaningi, iningi labo elalinezigijimi eziyisixwayiso ezinamandla okwakumelwe lizimemezele. (Jeremiya 1:17-19; 7:27; 29:19) Naphezu kwalokho, abaprofethi abaningana babona imiphumela emihle! Okungenani abahlanu babo​—uJona, uMika, uZefaniya, uHagayi, noZakariya—​bakwazi ukushukumisa izinhliziyo zabanye abantu, baphenduka ezonweni zabo bashintsha nenkambo yabo.

16. Imizamo kaMika njengomprofethi yathela ziphi izithelo?

¹⁶ Umsebenzi kaZefaniya njengomprofethi ngokusobala washukumisa iNkosi uJosiya ukuba iqale ukuvuselela ukukhulekela okumsulwa. Ngesibindi, uMika wamemezela isigijimi sokwahlulelwa kwabaholi bakwaJuda futhi izenzo zeNkosi uHezekiya zahambisana nokwakushiwo uMika. (Mika 3:1-3) Ngokuthakazelisayo, amanye amadoda amadala osuku lukaJeremiya abhekisela kokwenziwa uHezekiya njengesibonelo esihle, lapho ethi inkosi ‘yesaba uJehova futhi yathambisa ubuso bukaJehova.’ (Jeremiya 26:18, 19; 2 AmaKhosi 18:1-4) Beholwa uHezekiya, abantu bakwaJuda nabasembusweni wasenyakatho ababethanda, bagubha iPhasika noMkhosi Wamaqebelengwane Angenamvubelo, baze basinweba ngesonto lonke isikhathi salo mkhosi. Waba yini umphumela wokubuyela kwabo ekukhulekeleni kweqiniso? “Kwaba khona ukujabula okukhulu eJerusalema.” (2 IziKronike 30:23-26) UMika waqala ukumemezela isigijimi sikaNkulunkulu sokulahlwa kwesizwe sezihlubuki kusabusa iNkosi u-Ahazi. Kodwa lo mprofethi waze wabona izithelo ezinhle zemizamo yakhe lapho indodana ka-Ahazi, uHezekiya, isabela kahle.

17. UHagayi noZakariya bakwazi ukufezani?

¹⁷ Cabanga nangomprofethi uHagayi noZakariya. Bakhonza amaJuda abuyiselwe, ayengasanaki futhi engamagovu. (Hagayi 1:1, 2; Zakariya 1:1-3) Ngesikhathi laba baprofethi ababili beqala izabelo zabo, kwase kudlule iminyaka engu-16 kwabekwa isisekelo sethempeli. Abantu ‘babegijima, yilowo nalowo ngenxa yendlu yakhe,’ indlu kaJehova ibe ‘iyincithakalo.’ UHagayi watshela amaJuda: “‘Yibani namandla, nonke nina bantu bezwe,’ kusho uJehova, ‘nisebenze.’” Kwabe sekwenzekani? UJehova “wavusa umoya” woMbusi uZerubhabhele, womPristi Ophakeme uJoshuwa, ‘nabo bonke ababesele kubantu.’ Ngenxa yalokho, bakwazi ukuphothula umsebenzi ethempelini.​—Hagayi 1:9, 12, 14; 2:4.

18, 19. (a) Abantu kwamanye amazwe basabela kanjani esimemezelweni sosuku lukaJehova? (b) Uzosabela kanjani esidingweni sokumemezela isigijimi esiyisixwayiso kubo bonke abantu?

¹⁸ Iningi labaprofethi abangu-12 lamemezela izigijimi esizweni esasizinikezele kuJehova. Kungenzeka ukuthi sishumayeza abantu abangakaze bamazi uNkulunkulu weqiniso, kodwa sisengafunda emiphumeleni yokushumayela kwabaprofethi. Nanamuhla, emasimini amaningi abantu bayasemukela isigijimi esiphuthumayo esiphathelene nosuku lukaJehova. Sibona imiphumela enjengaleyo eyabikezelwa uZakariya: “Izizwe eziningi ngokuqinisekile ziyozihlanganisa noJehova ngalolo suku, empeleni zibe yisizwe sami; futhi ngiyohlala phakathi kwenu.” (Zakariya 2:11) Sikhuluma nje abantu bakaNkulunkulu bathola ukusabela phakathi ‘kwezizwe eziningi.’ (IsAmbulo 7:9) UZakariya wabikezela: “Amaqembu abantu amaningi nezizwe ezinamandla ziyofika impela zizomfuna uJehova wamabutho eJerusalema nokumnxusa uJehova.” Achazwa ngokuthi ‘angamadoda ayishumi avela kuzo zonke izilimi zezizwe’ ayobamba umphetho wengubo yomIsrayeli ongokomoya, ethi: “Sizohamba nani, ngoba sizwile ukuthi uNkulunkulu unani.”​—Zakariya 8:20-23.

¹⁹ Phawula inkulumo ethi “zonke izilimi zezizwe.” IBhayibheli nezincwadi zeBhayibheli zihunyushelwa ezilimini eziningi, futhi oFakazi BakaJehova baqeqesha izikhonzi ukuba zifundise abantu bazo “zonke izilimi zezizwe.” (Mathewu 28:19, 20; IzEnzo 1:8) Kungenzeka ukuthi usufunde olunye ulimi ukuze usize abantu abalukhulumayo endaweni yakini. Abantu abaningi impela baye bazimisela ukufunda ulimi noma izilimi ezintsha futhi bathuthele emazweni anabantu abaningi abazamukela ngesasasa izindaba ezinhle. Ungakwazi yini wena ukuthuthela emasimini akhiqiza kanjalo, ngaleyo ndlela ‘umemezele lokhu phakathi kwezizwe’? Kucabangele ngomthandazo. Uma unezingane, xoxani njalo ngalokhu ekhaya, kube umgomo osezingqondweni zezingane zakho ezisakhula.

20. Yisiphi isimo sengqondo uJehova asigcizelela ngokuqondene nabantu baseNineve?

²⁰ Omunye umprofethi owaba nezilaleli ezilalelayo, okwakungalindelekile nokho ukuba zilalele, kwakunguJona. Abantu baseNineve, ngisho nenkosi uqobo, basamukela kahle isigijimi sikaJona, baba nokholo kuJehova. UNkulunkulu uqobo lwakhe wabuza: “Akufanele yini ngilihawukele iNineve umuzi omkhulu, okukhona kuwo abantu abangaphezu kwezinkulungwane eziyikhulu namashumi amabili abangawazi nhlobo umehluko phakathi kwesandla sabo sokunene nesobunxele?” (Jona 4:11) Cabanga ngalawo mazwi ngokuqondene nalokho okukushukumisela ukuba umemezele kwabanye usuku lukaJehova olwesabekayo. Ingabe uzizwa umkweleta uJehova ngokukusindisa ngesihlengo? Ingabe uzizwa unomthwalo wemfanelo njengenceku kaJehova ezinikezele? (1 Korinte 9:16, 17) Lezi yizizathu ezizwakalayo zokumemezela usuku lukaJehova. Nokho, ngaphezu kwalokho, ingabe ‘uyabahawukela’ abantu omemezela kubo usuku lukaJehova? Yeka indlela ongajabula ngayo lapho isihe esinjengesikaNkulunkulu sikushukumisela ukuba uxoxe nabantu mayelana nalolo suku!

21. Ufundani esibonelweni sika-Amose sokusingatha usongo luka-Amaziya?

²¹ Akukuningi esikwaziyo ngokusabela okwatholwa uJoweli, u-Obadiya, uNahume, uHabakuki, noMalaki. Siyakwazi ukusabela okungenani okukodwa okwatholwa u-Amose. U-Amaziya wayengamfuni nakumbona u-Amose, emsola ngokwakhela inkosi uzungu futhi wazama nokumvala ukuba angashumayeli eBethele. (Amose 7:10-13) U-Amose wabhekana ngesibindi nalokhu kuphikiswa. Nanamuhla, abantu abashisekela inkolo bangase bazame ukuthonya abanye abaholi bezombusazwe ukuba bashushise abantu bakaJehova, noma bazame ukuvimbela ngisho nomsebenzi wabo ozuzisayo wokushumayela. Ingabe uyolingisa u-Amose ngokumemezela izindaba ezinhle ngesibindi naphezu kokuphikiswa?

22. Kungani ungase uthi inkonzo iyaphumelela ensimini yakini?

²² Nakuba laba baprofethi abangu-12 bathola ukusabela okuhlukahlukene, bonke bakufeza ukuthunywa kwabo. Into ebalulekile akukhona ukuthi abantu basabela kanjani esigijimini sethu esikabili, kodwa iwukuba silethe kuJehova “amaduna ezinkomo ezindebe zethu,” ‘umhlatshelo wethu wokudumisa’ ongcono kakhulu. (Hoseya 14:2; Hebheru 13:15) Singabe sesiyishiyela kuNkulunkulu imiphumela. Uyobadonsa abantu abayizimvu ngempela. (Johane 6:44) Ngaphezu kwalokho, ungaphumelela njengommemezeli wesigijimi saphezulu kungakhathaliseki indlela abantu abasabela ngayo. Ungaqiniseka ukuthi “izinyawo zoletha izindaba ezinhle, omemezela ukuthula,” zinhle kulabo abamukela izindaba ezinhle ngokwazisa. Kodwa ngaphezu kwakho konke, zinhle kuJehova. (Nahume 1:15; Isaya 52:7) Njengoba usuku olukhulu lukaJehova seluseduze kangaka, zimisele ukuqhubeka wenza lokho uJoweli akubikezelela isikhathi sethu: “Memezelani lokhu, phakathi kwezizwe, ‘Ngcwelisani impi! Vusani amadoda anamandla!’” Lokho kusho ukulwa kukaNkulunkulu nezizwe.​—Joweli 3:9.