Ukubhekana Nenselele Yokwethembeka
“Nigqoke ubuntu obusha obadalwa ngokwentando kaNkulunkulu ngokulunga kweqiniso nokwethembeka.”—EFESU 4:24.
1. Kungani sikweleta uJehova uNkulunkulu ukwethembeka?
UKUBHEKANA nenselele yokwethembeka kunezici eziningi. Esibaluleke kunazo zonke ukubhekana nenselele yokwethembeka kuJehova uNkulunkulu. Yiqiniso, uma sicabangela ukuthi uJehova ungubani nokuthi usenzeleni, nangenxa yokuthi sizinikezele kuye, simkweleta ukwethembeka. Sikubonakalisa kanjani ukwethembeka kuJehova uNkulunkulu? Indlela eyinhloko iwukwethembeka ezimisweni zikaJehova zokulunga.
2, 3. Ukwethembeka kuhlobene kanjani nokulunga?
2 Ukuze sibhekane naleyo nselele, kumelwe silalele amazwi atholakala kweyoku-1 Petru 1:15, 16: “Ngokuvumelana noNgcwele owanibiza, nani yibani ngcwele ngokwenu kukho konke ukuziphatha kwenu, ngoba kulotshiwe ukuthi: ‘Kumelwe nibe ngcwele, ngoba mina ngingcwele.’” Ukwethembeka kuJehova uNkulunkulu kuyosenza simlalele ngazo zonke izikhathi, sivumelanise imicabango yethu, amazwi, nezenzo zethu nentando yakhe engcwele. Kusho ukuhlala sinonembeza omuhle, njengoba siyalwa kweyoku-1 Thimothewu 1:3-5: “Empeleni umgomo walomyalo [wokungafundisi imfundiso ehlukile noma ukunaka izindaba ezingamanga] uwuthando oluvela enhliziyweni ehlanzekileyo nakunembeza omuhle nasokholweni olungenabuzenzisi.” Yiqiniso, sonke asiphelele, kodwa kufanele sizame ukwenza konke esingakwenza, akunjalo?
3 Ukwethembeka kuJehova kuyosenza singahlehli ezimisweni zokulunga ngenxa yobugovu. Ngempela, ukwethembeka kuyosivimbela ukuba sibe okunye ngaphakathi sibe okunye ngaphandle. Umhubi wayecabanga ngokwethembeka lapho ehlabelela: “Ngifundise, Jehova, indlela yakho; ngiyakuhamba eqinisweni lakho; yenza inhliziyo yami iqonde-ntonye, yesabe igama lakho.” (IHubo 86:11) Ukwethembeka kufuna lokho okuye kwachazwa kahle ngokuthi “ukulalela imithetho engenakuphoqelelwa.”
4, 5. Ukwethembeka kuyosenza siqaphele, ukuze sigweme ukwenzani?
4 Ukwethembeka kuJehova uNkulunkulu kuyosivimbela ekubeni senze noma yini eyoletha isihlamba egameni naseMbusweni wakhe. Ngokwesibonelo, amaKristu amabili ake axabana kangangokuba ngokungafanele aze ayisana enkantolo yomthetho yezwe. Umahluleli wabuza, ‘Ingabe nobabili ningoFakazi BakaJehova?’ Ngokusobala wayengaqondi ukuthi ayezofunani enkantolo. Yeka isihlamba okwaba yiso! Ukwethembeka kuJehova uNkulunkulu kwakumelwe kubangele labo bazalwane ukuba balalele iseluleko somphostoli uPawulu: “Khona-ke, ngempela kusho ukunqotshwa okuphelele ngani ukuthi niyamangalelana. Kunalokho kungani ningavumi ukuba noniwe? Kunalokho kungani ningavumi ukuba niphanjwe?” (1 Korinte 6:7) Ngokuqinisekile, inkambo yokwethembeka kuJehova uNkulunkulu iwukuqoma ukulahlekelwa kunokuletha isihlamba kuJehova nasenhlanganweni yakhe.
5 Ukwethembeka kuJehova uNkulunkulu kuhilela nokungavumeli ukunqotshwa ukwesaba abantu. “Ukwesaba abantu kubeka ugibe, kepha owethemba uJehova uyalondeka.” (IzAga 29:25) Ngakho, asihlehli lapho sibhekene nokushushiswa, kodwa silandela isibonelo esabekwa oFakazi BakaJehova ezweni elaliyiSoviet Union, eMalawi, e-Ethiopia, nakwamanye amazwe amaningi.
6. Ukwethembeka kuyosivimbela ukuba sibe nobudlelwane nobani?
6 Uma sithembekile kuJehova uNkulunkulu, siyogwema ukuba abangane babo bonke abayizitha zakhe. Kungakho umfundi uJakobe abhala: “Ziphingi, anazi yini ukuthi ubungane nezwe buwubutha noNkulunkulu? Ngakho-ke, noma ubani ofuna ukuba umngane wezwe uzenza isitha sikaNkulunkulu.” (Jakobe 4:4) Sifuna ukuba nokwethembeka iNkosi uDavide eyakubonisa lapho ithi: “Jehova, angibazondi abakuzondayo na? Anginengwa ngabakuvukelayo na? Ngiyabazonda ngenzondo epheleleyo; bayizitha kimi.” (IHubo 139:21, 22) Asifuni ukudlelana nezoni zangabomu, ngoba asihlobene ngalutho nazo. Ingabe ukwethembeka kuNkulunkulu ngeke kusivimbele ukuba sibe nobudlelwane nezitha zikaJehova ezinjalo, kungakhathaliseki ukuthi ngokuqondile noma ngethelevishini?
Ukulwela UJehova
7. Ukwethembeka kuyosisiza ukuba senzeni ngokuqondene noJehova, futhi u-Elihu wakwenza kanjani lokhu?
7 Ukwethembeka kuyosishukumisela ukuba simlwele uJehova uNkulunkulu. Yeka isibonelo esihle salokho u-Elihu ayiso kithi! UJobe 32:2, 3 uyasitshela: “Lwase luvutha ulaka lukaElihu . . . ulaka lwakhe lwavuthela uJobe, ngokuba wazithetha yena kunoNkulunkulu. Ulaka lwakhe lwavuthela nabangane bakhe abathathu, ngokuba noma bengafumananga impendulo, bamlahla nokho [uNkulunkulu, NW].” KuJobe izahluko 32 kuya ku-37, u-Elihu ulwela uJehova. Ngokwesibonelo, wathi: “Ngihlalele kancane, ngiyakukubonisa, ngokuba ngisenamazwi okummela uNkulunkulu. . . . Nginike uMenzi wami ukulunga. . . . Akabuyisi amehlo akhe kwabalungileyo.”—Jobe 36:2-7.
8. Kungani kudingeka silwele uJehova?
8 Kungani kunesidingo sokuba uJehova alwelwe? Namuhla, uNkulunkulu wethu uJehova uhlanjalazwa ngezindlela eziningi kakhulu. Kuthiwa akekho, kuthiwe uyingxenye kaZiqu-zintathu, uhlupha abantu phakade esihogweni esivuthayo, uyehluleka ukuguqula izwe, akanandaba nesintu, kanye nokunye. Sibonisa ukwethembeka kwethu kuye ngokumlwela sifakazele ukuthi uJehova ukhona; ukuthi unguNkulunkulu ohlakaniphile, onobulungisa, ongusomandla, nonothando; ukuthi unesikhathi sakho konke; nokuthi lapho isikhathi sakhe esifanele sifika, uyoqeda bonke ububi futhi enze wonke umhlaba ube yipharadesi. (UmShumayeli 3:1) Lokhu kwenza kudingeke ukuba sisebenzise wonke amathuba ukuze sifakaze ngegama likaJehova nangoMbuso.
Ukwethembeka Enhlanganweni KaJehova
9. Yiziphi izinto abanye abaye babonisa kuzo ukuntula ukwethembeka?
9 Manje siza endabeni yokwethembeka enhlanganweni kaJehova ebonakalayo. Ngokuqinisekile, kufanele sithembeke kuyo, kuhlanganise ‘nesigqila esikholekile nesiqondayo,’ ibandla lobuKristu elondliwa ngaso ngokomoya. (Mathewu 24:45-47) Ake sithi kuvela okuthile ezincwadini ze-Watch Tower esingakuqondi noma esingavumelani nakho ngaleso sikhathi. Yini esiyoyenza? Ingabe kufanele sicasuke bese sishiya inhlangano? Yilokho abanye abakwenza lapho INqabayokulinda, eminyakeni eminingi edlule, ithi isivumelwano esisha sasiyosebenza phakathi neMinyaka Eyinkulungwane. Abanye bacasulwa yilokho INqabayokulinda eyake yakusho ngendaba yokungathathi-hlangothi. Ukuba labo abakhubeka ngenxa yalezi zinto babethembekile enhlanganweni nakubafowabo, babeyolindela uJehova ukuba acacise lezi zinto, okuyilokho akwenza ngesikhathi sakhe esifanele. Ngakho, ukwethembeka kuhlanganisa nokulinda ngokubekezela kuze kube yilapho ukuqonda okwengeziwe kukhishwa isigqila esikholekile nesiqondayo.
10. Yini ukwethembeka okuyosivimbela ukuba sibe nelukuluku lokuyazi?
10 Ukwethembeka enhlanganweni kaJehova ebonakalayo kusho nokungazihlanganisi nezihlubuki. AmaKristu athembekile ngeke abe nelukuluku lokufuna ukwazi ukuthi abantu abanjalo bathini. Yiqiniso, labo abasetshenziswa uJehova uNkulunkulu ekuqondiseni umsebenzi wakhe emhlabeni abaphelele. Kodwa iZwi likaNkulunkulu lisitshela ukuba senzeni? Sishiye inhlangano kaNkulunkulu? Cha. Ukusondelana kobuzalwane kufanele kusigcine sithembekile kuyo, futhi kufanele siqhubeke ‘sithandana kakhulu ngokusuka enhliziyweni.’—1 Petru 1:22.
Ukwethembeka Kubadala Abathembekile
11. Ukwethembeka kuyosisiza ukuba sigweme kuphi ukucabanga okungekuhle?
11 Lapho kushiwo noma kwenziwa okuthile ebandleni esinenkinga yokukuqonda, ukwethembeka kuyosivimbela ukuba singabaze izisusa zabanye kuyosisiza ukuba sibe nesimo sokuthi mhlawumbe kuyindaba yokwahlulela izinto. Akungcono yini ukugxila ezimfanelweni ezinhle zabadala abamisiwe nabanye esikholwa nabo kunasekushiyekeni kwabo? Yebo, sifuna ukugwema konke ukucabanga okunjalo okungekuhle, ngoba kuhlobene nokungathembeki! Ukwethembeka kuyosisiza futhi ukuba silalele isiqondiso sikaPawulu ‘sokungakhulumi kabi nganoma ubani.’—Thithu 3:1, 2.
12, 13. Yiziphi izinselele abadala okumelwe babhekane nazo?
12 Ukwethembeka kuletha izinselele ezithile kubadala. Enye yalezi zinselele indaba yokugcina izimfihlo. Ilungu lebandla lingase litshele umdala othile indaba eyimfihlo. Ukwethembeka kulo kuyovimbela umdala ukuba ephule isimiso sokugcina izimfihlo. Uyolalela iseluleko esikuzAga 25:9: “Ungambuli [imfihlo] yomunye.” Lokhu kusho ukungayisho ngisho nakumkakhe!
13 Kunolunye futhi uvivinyo lokwethembeka abadala okumelwe babhekane nalo. Ingabe bayojabulisa abantu, noma bayobasiza ngesibindi nangobumnene labo abadinga ukulungiswa, ngisho noma beyizihlobo zegazi noma abangane abaseduze? Ukwethembeka enhlanganweni kaJehova kuyobangela ukuba labo abangabadala bazame ukusiza noma yibaphi abadinga usizo olungokomoya. (Galathiya 6:1, 2) Nakuba siyoba nomusa, ukwethembeka kuyosenza singagwegwesi kumdala esikanye naye, njengoba nje uPawulu akhuluma ngokungagunci nomphostoli uPetru. (Galathiya 2:11-14) Ngakolunye uhlangothi, ababonisi kufanele baqaphele, funa bangenzi ngokuhlakanipha noma babonise ukukhetha noma basebenzise kabi igunya labo ngenye indlela, bese bekwenza kube nzima kulabo ababaphathisiwe ukuba bathembeke enhlanganweni kaNkulunkulu.—Filipi 4:5.
14, 15. Yiziphi izici ezingavivinya ukwethembeka kwamalungu ebandla?
14 Kunezinye izici zendaba yokubhekana nenselele yokwethembeka ebandleni nakubadala abakulo. Uma kunezimo ezithanda ukuba yinkinga ebandleni, lokhu kusinika ithuba lokubonisa ukwethembeka kuJehova nakulabo abammelelayo. (Bheka INqabayokulinda ka-June 15, 1987, amakhasi 15-17.) Lapho othile esuswe ekuhlanganyeleni, ukwethembeka kufuna ukuba sisekele abadala, singazami ukuqagela ukuthi bekunezizathu ezanele yini zesinyathelo esithathiwe.
15 Ukwethembeka ebandleni kuhilela futhi ukuba sisekele yonke imihlangano emihlanu yamasonto onke kuye ngezimo namandla ethu. Ukwethembeka kufuna ukuba singagcini ngokuba khona njalo kuyo kodwa futhi ukuba siyilungiselele sinikeze nezimpendulo ezakhayo uma ithuba livela.—Heberu 10:24, 25.
Ukwethembeka Emshadweni
16, 17. Yiziphi izinselele zokwethembeka amaKristu ashadile okumelwe abhekane nazo?
16 Obani abanye okumelwe sithembeke kubo? Uma sishadile, ngenxa yezifungo zethu zemishado, kumelwe sibhekane nenselele yokwethembeka kubangane bethu bomshado. Ukwethembeka kwesishade naye kuyosivimbela ukuba sibe nomusa kwabanye besifazane noma abesilisa kunakumakhosikazi noma abayeni bethu. Ukwethembeka kwesishade naye kufuna futhi ukuba singembuli ubuthakathaka noma ukushiyeka kwakhe kwabangaphandle. Kulula ukukhononda kwabanye kunokusebenza kanzima ukuze sigcine imizila yokukhulumisana nesishade naye ivulekile, okuyinto okufanele siyenze ngokuvumelana noMthetho Wegolide. (Mathewu 7:12) Eqinisweni, ukushada kuletha inselele yangempela ekwethembekeni kwethu kobuKristu.
17 Ukuze sibhekane nalenselele yokwethembeka, akumelwe nje sigweme ukuba necala lokuziphatha okubi kakhulu kuphela kodwa kumelwe siqaphele nayo kanye imicabango nemizwa yethu. (IHubo 19:14) Ngokwesibonelo, uma izinhliziyo zethu ezikhohlisayo zihahela injabulo, kulula ukuba ngobugovu ukwazisa kwethu into ethile kudlulele ekuyifiseni. Ikhuthaza ukwethembeka emshadweni, iNkosi uSolomoni yeluleka amadoda ukuba ‘aphuze [ngokomfanekiso] amanzi emgodini wawo.’ (IzAga 5:15) Futhi uJesu wathi: “Umuntu oqhubeka ebuka owesifazane ukuze amkhanuke usephingile naye kakade enhliziyweni yakhe.” (Mathewu 5:28) Amadoda afunda izincwadi ezinezithombe zobulili ezingcolile asengozini yokuyengelwa ekuphingeni, ngalokho akhohlise amakhosikazi awo futhi angathembeki kuwo. Ngesizathu esifanayo, inkosikazi ethanda ukubukela nokulalela imidlalo ewuchungechunge enezigcawu zokuphinga ingase ilingekele ekubeni ingathembeki kumyeni wayo. Nokho, ngokwethembeka ngempela kumngane wethu womshado siqinisa isibopho somshado, futhi siyasizana emizamweni yethu yokujabulisa uJehova uNkulunkulu.
Okungasisiza Sihlale Sithembekile
18. Ukuqaphelani okuyosisiza ukuba sithembeke?
18 Yini engasisiza ukuba sibhekane nenselele yokwethembeka kulezi zici ezine: ukwethembeka kuJehova, enhlanganweni yakhe, ebandleni, nakwesishade naye? Okunye okungasiza kuwukuqaphela ukuthi ukubhekana nenselele yokwethembeka kuhlobene kakhulu nokulwelwa kobukhosi bukaJehova. Yebo, ngokuhlala sithembekile sibonisa ukuthi sibheka uJehova njengoMbusi Wendawo Yonke. Ngenxa yalokho singaba nokuzihlonipha nethemba lokuphila okumi phakade ezweni elisha likaJehova. Singazisiza ukuba sihlale sithembekile ngokucabangela izibonelo ezinhle zokwethembeka, kusukela kuJehova kuze kufike kulabo okukhulunywe ngabo eBhayibhelini nasezincwadini zethu ze-Watch Tower, kuhlanganise nokulandisa kwe-Ncwadi Yonyaka.
19. Ukholo lunayiphi indima ekwethembekeni kwethu?
19 Ukholo oluqinile kuJehova uNkulunkulu nokwesaba ukumdumaza kuyosisiza sibhekane nenselele yokwethembeka. Siqinisa ukholo lwethu kuJehova futhi sikhulise ukumesaba ngokutadisha iZwi likaNkulunkulu ngenkuthalo nangokuhlanganyela enkonzweni yobuKristu. Lokhu kuyosisiza ukuba senze ngokuvumelana neseluleko sikaPawulu esilotshwe kweyabase-Efesu 4:23, 24: “Kufanele nenziwe basha emandleni ashukumisa ingqondo yenu, futhi nigqoke ubuntu obusha obadalwa ngokwentando kaNkulunkulu ngokulunga kweqiniso nokwethembeka.”
20. Ngaphezu kwakho konke, iyiphi imfanelo eyosisiza sithembeke kuJehova nakubo bonke abanye esibakweleta ukwethembeka?
20 Ukwazisa izimfanelo zikaJehova kusisiza ukuba sithembeke. Ngaphezu kwakho konke, uthando olungenabugovu ngoBaba wethu wasezulwini nokubonga ngakho konke asenzele khona, ukumthanda ngenhliziyo yethu yonke, ingqondo namandla kuyosisiza ukuba sithembeke kuye. Ngaphezu kwalokho, ukuba nothando uJesu athi lwaluyobonakalisa abalandeli bakhe kuyosisiza ukuba sithembeke kuwo wonke amaKristu ebandleni nasemikhayeni yethu. Ngamanye amagama, kuyindaba yokuba nobugovu noma ukungabi nabo. Ukungathembeki kusho ukuba nobugovu. Ukwethembeka kusho ukungabi nabugovu.—Marku 12:30, 31; Johane 13:34, 35.
21. Indaba yokubhekana nenselele yokwethembeka ingabekwa kanjani ngamafuphi?
21 Ngamafuphi: Ukwethembeka kuyimfanelo ephakeme kakhulu eboniswa uJehova uNkulunkulu, uJesu Kristu, nayizo zonke izinceku zikaJehova zeqiniso. Ukuze sibe nobuhlobo obuhle noJehova uNkulunkulu, kumelwe sibhekane nenselele yokwethembeka kuye, ngokuphila ngezimfuneko zakhe zokulunga, ngokungazihlanganisi nezitha zakhe, nangokulwela uJehova ngokufakaza ngendlela ehleliwe nangokwethukela. Futhi kumelwe sibhekane nenselele yokwethembeka enhlanganweni kaJehova ebonakalayo. Kumelwe sithembeke emabandleni ethu futhi sithembeke kwesishade nabo. Ngokubhekana nenselele yokwethembeka ngokuphumelelayo, siyobe sihlanganyela ekulweleni ubukhosi bukaJehova, futhi siyobe sima ngasohlangothini lwakhe lwempikiswano. Ngenxa yalokho, siyozuza umusa wakhe futhi sithole umvuzo wokuphila okumi phakade. Lokho umphostoli uPawulu akusho ngokuzinikela kokuhlonipha uNkulunkulu kungashiwo nangokubhekana kwethu nenselele yokwethembeka. Kuyinzuzo kokubili ekuphileni kwamanje nakulokho okuzayo.—IHubo 18:25; 1 Thimothewu 4:8.
Ungaphendula Kanjani?
◻ Yiziphi izindlela esingabhekana ngazo nenselele yokwethembeka kuNkulunkulu?
◻ Ukwethembeka enhlanganweni kaJehova kufunani kithi?
◻ Abadala bangabhekana kanjani nenselele yokwethembeka?
◻ Iyiphi inselele yokwethembeka amaKristu ashadile okumelwe abhekane nayo?
◻ Yiziphi izimfanelo eziyosisiza ukuba sibhekane nenselele yokwethembeka?
[Isithombe ekhasini 17]
Ukwethembeka emalungwini ebandla kuyovimbela abadala ukuba bembule izindaba eziyimfihlo
[Izithombe ekhasini 18]
Ukwethembeka komuntu kumngane wakhe womshado kuqinisa isibopho somshado