Intsha Ejabulisa Inhliziyo KaJehova

Lezi zihloko ezifundwayo zilungiselelwe intsha yoFakazi BakaJehova ngokukhethekile. Ngakho, siyabakhuthaza abasha ukuba bazitadishe ngokucophelela futhi bakhululeke ukuphendula lapho zifundwa ebandleni eSifundweni Se-Nqabayokulinda.

“Hlakanipha, ndodana yami, wenze inhliziyo yami ijabule, ukuze ngimphendule ongiklolodelayo.”—IZAGA 27:11.

1, 2. (a) Ingabe ukukhangwa nje yizinto zezwe kusho ukuthi awudalelwanga ukuba umKristu? Chaza. (Roma 7:21) (b) Yini oyifundayo esibonelweni sika-Asafa? (Bheka ibhokisi, ekhasini 13.)

AKE sithi usesitolo ufuna izingubo zokugqoka. Uthi usafuna bese ubona ingubo ovele uyithande zisuka. Iyakufanela ngombala nangesitayela sayo, futhi inani layo likwenza ubone ukuthi uhlabene. Bese uthi ukuyibhekisisa. Umangazwe ukubona ukuthi indwangu yayo iyavithika, nemithungo yenziwe ngobudlabha. Nakuba le ngubo ikhanga, ithungwe kabi. Ubungayichitha yini imali yakho entweni yezinga eliphansi kanjalo?

² Qhathanisa lokhu nesimo ongase ubhekane naso njengomusha ongumKristu. Uma uthi nhlá, izinto zaleli zwe zingase zibonakale zikhanga kakhulu, njengaleya ngubo. Ngokwesibonelo, izingane ofunda nazo zingase ziye emaphathini amnandi, zidle izidakamizwa, ziphuze, zijole futhi zibe nobuhlobo bobulili zingashadile. Kuke kwenzeke yini nawe uzizwe uyithanda leyo ndlela yokuphila? Uye ufise yini ukuyizwa kancane nje leyo nkululeko yabo yokuzisholo? Uma kunjalo, ungasheshi uzitshele ukuthi umubi ngaphakathi, awudalelwanga ukuba umKristu. IBhayibheli vele liyavuma ukuthi izwe lingakhanga kakhulu—ngisho nakumuntu ofuna ukujabulisa uNkulunkulu.—2 Thimothewu 4:10.

3. (a) Kungani kuyize ukuphishekela izinto zezwe? (b) Omunye umKristu ubuchaza kanjani ubuze bokuphishekela izinto zezwe?

³ Ake ubhekisise-ke manje, ngendlela obungabhekisisa ngayo ingubo ofuna ukuyithenga. Zibuze, ‘Linjani izinga lendwangu nemithungo yalesi simiso sezinto?’ IBhayibheli lithi “izwe liyadlula.” (1 Johane 2:17) Noma iyiphi injabulo etholakala kulo eyesikhashana kuphela. Ngaphezu kwalokho, ukuziphatha okubi kuyabiza. Akukhona neze ukuhlabana. Omunye umKristu, okuye kwadingeka abekezelele lokho akubiza ngokuthi “ubuhlungu bokusaphaza ubusha bakho,” uthi: “Izwe lingase libonakale likhazimula, likhanga. Futhi lifuna ukholelwe ukuthi ungazitika ngenjabulo yalo ngaphandle kokuhola ubuhlungu. Kodwa lokho yinto nje engenakwenzeka. Izwe liyokuxhaphaza, kuthi uma seliqedile likulaxaze laphaya.”a Ungabumoshelani ubusha bakho endleleni yokuphila ephansi kangako?

Ukuvikeleka ‘Komubi’

4, 5. (a) Ngaphambi nje kokufa kwakhe, yini uJesu ayicela kuJehova ngomthandazo? (b) Kungani lesi sicelo sasifaneleka?

⁴ Iqaphela ukuthi lesi simiso sezinto asinalutho oluhle esingayinikeza lona, intsha yoFakazi BakaJehova izama ukugwema ukuba abangane baleli zwe. (Jakobe 4:4) Ingabe ungomunye walaba basha abathembekile? Uma kunjalo, siyakuncoma. Kuyavunywa ukuthi akulula ukumelana nokucindezela kontanga, uhluke, kodwa lukhona usizo.

⁵ Ngaphambi nje kokufa kwakhe, uJesu wathandazela ukuba uJehova “abheke” abafundi bakhe “ngenxa yomubi.” (Johane 17:15) UJesu wayenesizathu esihle sokwenza lesi sicelo. Wayazi ukuthi kwakungeke kube lula kubalandeli bakhe ukuhlala beqotho, kungakhathaliseki ubudala babo. Ngani? Esinye sezizathu, njengoba uJesu avuma, ukuthi abafundi bakhe babezobhekana nesitha esingabonakali esinamandla—“omubi,” uSathane uDeveli. IBhayibheli lithi lesi sidalwa somoya esibi “sihambahamba njengengonyama ebhongayo, efuna engamshwabadela.”—1 Petru 5:8.

6. Sazi kanjani ukuthi uSathane akanamusa kwabasha?

⁶ Kuwo wonke umlando, uSathane ubelokhu ejatshuliswa yinto embi, ukulethela abantu usizi olunonya. Cabanga ngezinhlekelele ezesabekayo azilethela uJobe nomkhaya wakhe. (Jobe 1:13-19; 2:7) Mhlawumbe kukhona izenzakalo ozikhumbulayo ezavela ezindabeni usukhona nawe ezibonisa umoya wobudlova kaSathane. UDeveli uyazingela, futhi njengoba efuna ukushwabadela, akanasihawu kwabasha. Ngokwesibonelo, ekuqaleni kwekhulu lokuqala C.E., uHerode wakha icebo lokuba kubulawe bonke abafana eBhetlehema ababeneminyaka emibili ubudala kwehle. (Mathewu 2:16) Cishe nguSathane owashukumisa uHerode—ekwenza ngomzamo wokubulala umntwana owayezoba uMesiya kaNkulunkulu othenjisiwe ngolunye usuku futhi enze ngokuvumelana nesahlulelo sikaNkulunkulu kuSathane! (Genesise 3:15) Kusobala ukuthi uSathane akanamusa kwabasha. Inhloso yakhe ukushwabadela abantu abaningi ngangokunokwenzeka. Lokhu kuyiqiniso ngokukhethekile manje, ngoba uSathane uxoshiwe ezulwini waphonswa emhlabeni, “ethukuthele kakhulu, azi ukuthi unesikhathi esifushane.”—IsAmbulo 12:9, 12.

7. (a) Imuphi umehluko omkhulu ophakathi kukaJehova noSathane? (b) UJehova uzizwa kanjani ngokujabulela kwakho ukuphila?

⁷ Ngokuhluke kakhulu kuSathane ‘othukuthele kakhulu,’ uJehova ‘unobubele.’ (Luka 1:78) Uyisibonelo esiphelele sothando. Empeleni, le mfanelo enhle uMdali wethu uyibonisa kangangokuthi iBhayibheli lithi: “UNkulunkulu uluthando.” (1 Johane 4:8) Yeka umehluko phakathi kukankulunkulu walesi simiso sezinto noNkulunkulu wena onelungelo lokumkhulekela! USathane ufuna ukushwabadela, kanti uJehova “akafisi ukuba kubhubhe namunye.” (2 Petru 3:9) Ubheka ukuphila komuntu ngamunye njengokuyigugu—kuhlanganise nokwakho. Lapho uJehova ekukhuthaza ngeZwi lakhe ukuba ungabi ingxenye yezwe, akazami ukukuncisha injabulo yokuphila noma ukuvimba inkululeko yakho. (Johane 15:19) Ngokuphambene nalokho, ukugadile ngenxa yomubi. UYihlo osezulwini ufuna uthole okungcono kakhulu kunenjabulo edlulayo yaleli zwe. Isifiso sakhe siwukuba uthole “ukuphila kwangempela”—ukuphila okuphakade emhlabeni oyipharadesi. (1 Thimothewu 6:17-19) UJehova ufuna uphumelele, futhi ukukhuthaza ukuba ufinyelele lowo mgomo. (1 Thimothewu 2:4) Ngaphezu kwalokho, uJehova ukunika isimemo esikhethekile. Simemo sini?

‘Yenza Inhliziyo Yami Ijabule’

8, 9. (a) Isiphi isipho ongasipha uJehova? (b) USathane umklolodela kanjani uJehova, njengoba kubonakala endabeni kaJobe?

⁸ Wake wamthengela yini umngane omkhulu isipho wawusumbuka emamatheka emangele futhi ebonga lapho esithola? Cishe wacabangisisa isikhathi eside ngohlobo lwesipho esingafanela lowo muntu. Nanku-ke umbuzo: Luhlobo luni lwesipho ongasipha uMdali wakho, uJehova uNkulunkulu? Ekuqaleni, lo mqondo ungase uzwakale uxaka. UMninimandla onke udingani nje kumuntu ongelutho? Ungamuphani nje angenayo kakade? IBhayibheli liyaphendula kuzAga 27:11: “Hlakanipha, ndodana yami, wenze inhliziyo yami ijabule, ukuze ngimphendule ongiklolodelayo.”

⁹ Njengoba cishe wazi ngokutadisha iBhayibheli, nguSathane uDeveli oklolodela uJehova. Ugomela ngokuthi noma ubani okhonza uNkulunkulu akamkhonzi ngoba emthanda, kodwa umkhonza ngezizathu zobugovu. USathane uthi, ake ubayeke bahlupheke, bazokulahla ngokushesha ukukhulekela kweqiniso. Ngokwesibonelo, cabanga ngalokho uSathane akusho kuJehova ngendoda elungileyo uJobe: “Awuzange yini wena umbiyele yena nendlu yakhe nakho konke anakho nxazonke? Umsebenzi wezandla zakhe uwubusisile, nemfuyo yakhe ithé chithi saka emhlabeni. Kodwa, ngiyacela, ake welule isandla sakho, uthinte konke anakho ubone ukuthi ngeke yini akuthuke khona kanye ebusweni bakho.”—Jobe 1:10, 11.

10. (a) Sazi kanjani ukuthi uSathane akangabazanga ubuqotho bukaJobe kuphela? (b) Ungena kanjani wena empikiswaneni yobukhosi?

¹⁰ Njengoba kuvezwa yiBhayibheli, uSathane akangabazanga ubuqotho bukaJobe kuphela kodwa nobabo bonke abanye abakhonza uNkulunkulu—kuhlanganise nawe. Empeleni, ekhuluma ngesintu sisonke, uSathane wathi kuJehova: “Umuntu [noma ubani, hhayi uJobe kuphela] uyokhipha konke anakho ngenxa yomphefumulo wakhe.” (Jobe 2:4) Uyakubona yini wena ongakwenza kule mpikiswano ebalulekile? Njengoba kuboniswe kuzAga 27:11, uJehova uthi kukhona ongamnika kona—isisekelo sokuba aphendule umklolodeli wakhe, uSathane. Cabanga nje—uMbusi Wendawo Yonke ukucela ukuba ube nengxenye ekuxazululeni impikiswano enkulu kunazo zonke. Yeka umthwalo wemfanelo nelungelo elisabekayo onalo! Ungakwenza lokho uJehova akucela kuwe? UJobe wakwenza. (Jobe 2:9, 10) Ngokufanayo noJesu nabanye abaningi kakhulu kuwo wonke umlando, kuhlanganise nentsha eningi. (Filipi 2:8; IsAmbulo 6:9) Nawe ungakwenza. Kodwa ungalenzi iphutha, awukwazi ukungachemi kule ndaba. Ngenkambo yakho, uyobonisa ukuthi usekela ukuklolodela kukaSathane noma impendulo kaJehova. Uyokhetha ukusekela bani?

UJehova Uyakukhathalela!

11, 12. Uyathinteka yini uJehova uma ukhetha ukumkhonza noma ukungamkhonzi? Chaza.

¹¹ Ingabe kunendaba ngempela kuJehova ukuthi ukhetha kuphi? Abanele yini kakade abantu abaye bahlala bethembekile ukuze aphendule uSathane? Yiqiniso, uDeveli wathi akekho noyedwa okhonza uJehova ngoba emthanda, okuyinto esibonakele kakade ukuthi ingamanga. Noma kunjalo, uJehova ufuna wena ube ngasohlangothini lwakhe empikiswaneni yobukhosi ngoba ukhathalela wena uqobo lwakho. UJesu wathi: “Akuyona into efiselekayo kuBaba osezulwini ukuba kushabalale noyedwa walaba abancane.”—Mathewu 18:14.

¹² Kusobala ukuthi uJehova unesithakazelo kulokho okukhethayo. Ngaphezu kwalokho, kuyamthinta. IBhayibheli likwenza kucace ukuthi uJehova unemizwa ejulile ethintwa izenzo ezinhle noma ezimbi zabantu. Ngokwesibonelo, lapho ama-Israyeli ehlubuka ephindelela, uJehova ‘wezwa ubuhlungu.’ (IHubo 78:40, 41) Ngaphambi kukaZamcolo wosuku lukaNowa, lapho “ububi bomuntu babudlangile,” uJehova “wezwa ubuhlungu enhliziyweni yakhe.” (Genesise 6:5, 6) Cabanga ukuthi kusho ukuthini lokhu. Uma ungathatha inkambo engalungile, ungazwisa uMdali wakho ubuhlungu. Lokhu akusho ukuthi uNkulunkulu untekenteke noma ubuswa imizwelo. Kunalokho, uyakuthanda futhi uyayikhathalela inhlalakahle yakho. Ngakolunye uhlangothi, lapho wenza okulungile, inhliziyo kaJehova iyajabula. Akajabuli kuphela ngoba ethola enye impendulo angayinika uSathane kodwa nangoba kumenza akwazi ukuba uMvuzi wakho. Akeve efuna ukwenza lokho. (Hebheru 11:6) Yeka uBaba onothando uJehova uNkulunkulu anguye kuwe!

Izibusiso Ezicebile Manje

13. Ukukhonza uJehova kuziletha kanjani izibusiso ngisho kwamanje?

¹³ Izibusiso ezitholakala ngokukhonza uJehova akuzona ezesikhathi esizayo kuphela. Intsha eningi yoFakazi BakaJehova ibusiswa ngokuthola injabulo nokwaneliseka kwamanje, futhi kube kufanele. “Imiyalo evela kuJehova iqotho, ibangela inhliziyo ukuba ijabule,” kubhala umhubi. (IHubo 19:8) UJehova ukwazi ngaphezu kwanoma imuphi umuntu lokho okusilungele. Ngomprofethi u-Isaya, uJehova wathi: “Mina, Jehova, nginguNkulunkulu wakho, Lowo okufundisayo ukuze uzuze, Lowo okubangela ukuba unyathele endleleni okufanele uhambe ngayo. O ukube ubuyoyilalela nokuyilalela imiyalo yami! Khona-ke ukuthula kwakho bekuyoba njengomfula, nokulunga kwakho kube njengamagagasi olwandle.”—Isaya 48:17, 18.

14. Izimiso zeBhayibheli zingakusiza kanjani ukuba ugweme ubuhlungu bezikweletu?

¹⁴ Ukulalela izimiso zeBhayibheli kuyokusiza ukuba ugweme ubuhlungu obukhulu benhliziyo. Ngokwesibonelo, iBhayibheli lithi labo abaye bahlakulela uthando lwemali baye “bazigwaza yonke indawo ngeminjunju eminingi.” (1 Thimothewu 6:9, 10) Bakhona yini ontanga yakho abaye babona kabuhlungu ukuthi lo mbhalo uqinisile? Ezinye izinsizwa nezintokazi zisezikweletini ezinkulu ngoba nje zifuna izingubo zamuva zamagama noma izinto zobuchwepheshe ezisashisa. Ukusindwa yizikweletu isikhathi eside nenzalo enkulu ngenxa yezinto ongenawo ngempela amandla okuzikhokhela kuwuhlobo lobugqila olubuhlungu!—IzAga 22:7.

15. Izimiso zeBhayibheli zikuvikela ngaziphi izindlela ebuhlungwini bokuziphatha okubi kobulili?

¹⁵ Cabanga nangendaba yokuziphatha okubi kobulili. Emhlabeni wonke, unyaka ngamunye inqwaba yentsha engashadile iyakhulelwa. Enye izala ingane engenasifiso namandla okuyikhulisa. Enye ikhipha isisu bese ibhekana nemiphumela kanembeza obuhlungu. Bese kuba nezinsizwa nezintombi ezithola isifo esithathelwana ngobulili, njengengculaza. Yebo, kumuntu omaziyo uJehova, umphumela omkhulu kunayo yonke kungaba ukulimala kobuhlobo bakhe noJehova.b (Galathiya 5:19-21) IBhayibheli lisho ngesizathu esihle ukuthi: “Balekelani ubufebe.”—1 Korinte 6:18.

Ukukhonza “UNkulunkulu Ojabulayo”

16. (a) Sazi kanjani ukuthi uJehova ufuna ubujabulele ubusha bakho? (b) Kungani uJehova ekunika iziqondiso okufanele uzilandele?

¹⁶ IBhayibheli lichaza uJehova ngokuthi ‘uNkulunkulu ojabulayo.’ (1 Thimothewu 1:11) Ufuna ukuba nawe ujabule. Empeleni, iZwi lakhe ngokwalo lithi: “Bujabulele ubusha bakho. Jabula usemusha.” (UmShumayeli 11:9, Today’s English Version) Kodwa uJehova ubona ngalé komzuzwana wamanje, ukwazi ukubona imiphumela ekude yakho kokubili ukuziphatha okuhle nokubi. Yingakho ekunxusa: “Manje khumbula uMdali wakho Omkhulu ezinsukwini zobunsizwa bakho, ngaphambi kokuba kufike izinsuku eziyinhlekelele, noma kufike iminyaka lapho uyothi khona: ‘Angijabuli ngayo.’”—UmShumayeli 12:1.

17, 18. Wathini omunye umKristu osemusha ngenjabulo yakhe ekukhonzeni uJehova, futhi ungayithola kanjani leyo njabulo?

¹⁷ Namuhla, intsha eningi iye yathola injabulo enkulu ekukhonzeni uJehova. Ngokwesibonelo, uLina oneminyaka engu-15 ubudala uthi: “Ngiyaziqhenya. Nginempilo enhle ngenxa yokungabhemi nokungadli izidakamizwa. Ebandleni ngithola isiqondiso esibalulekile esingisiza ukuba ngilwe nethonya elibi likaSathane. Ubuso bami bugcwele injabulo ngenxa yobudlelwane obakhayo obutholakala eHholo LoMbuso. Ngaphezu kwakho konke, nginethemba elingenakudlulwa yilutho lokuphila phakade emhlabeni.”

¹⁸ NjengoLina, intsha eningi yamaKristu ilulwela kanzima ukholo, futhi lokhu kuyayijabulisa. Iyaqaphela ukuthi nakuba ukuphila kwayo kunezinselele ngezinye izikhathi, kunenjongo yangempela nekusasa langempela. Ngakho-ke, qhubeka ukhonza uNkulunkulu okufunela okuhle kodwa. Yenza inhliziyo yakhe ijabule, yena uzokwenza ujabule manje naphakade!—IHubo 5:11.

[Imibhalo yaphansi]

Uyakhumbula?

• Iyiphi ingozi obhekene nayo evela ‘komubi,’ uSathane?

• Ungayenza kanjani inhliziyo kaJehova ijabule?

• IBhayibheli libonisa kanjani ukuthi uJehova uyakukhathalela?

• Iziphi ezinye zezibusiso zokukhonza uJehova?

[Ibhokisi/Isithombe ekhasini 13]

Indoda Elungile Icishe Ikhubeke

U-Asafa wayengumculi ongumLevi ovelele ethempelini likaJehova kwa-Israyeli wasendulo. Waqamba ngisho namaculo ayesetshenziswa ekukhulekeleni kweningi. Nokho, naphezu kwamalungelo akhe avelele, kwaba khona isikhathi lapho u-Asafa azithola ekhangwa ukuziphatha okungamhloniphi uNkulunkulu kozakwabo ababebonakala bephula imithetho kaNkulunkulu kodwa bangajezi. Kamuva u-Asafa wavuma: “Kusale kancane ukuba izinyawo zami ziphambuke, kusale kancane ukuba izinyathelo zami zishelele. . . . Ngaba nomona ngabaziqhayisayo, lapho ngibona ukuthula kwabantu ababi.”—IHubo 73:2, 3.

Kamuva, u-Asafa waya endlini engcwele kaNkulunkulu wayothandaza ngale ndaba. Evuselelekile ngokomoya, waqonda ukuthi uJehova uyabuzonda ububi nokuthi, ngokuhamba kwesikhathi, ababi nabalungileyo bayovuna abakuhlwanyelayo. (IHubo 73:17-20; Galathiya 6:7, 8) Ngempela, ababi basemhlabathini oshelelayo. Bayogcina bewile lapho uJehova ebhubhisa lesi simiso esingamhloniphi.—IsAmbulo 21:8.

[Izithombe ekhasini 15]

UJehova ukufunela okuhle kodwa, kanti umgomo kaSathane uwukukushwabadela

[Isithombe ekhasini 16]

Intsha eningi ithola injabulo enkulu ngokukhonza uJehova namanye amaKristu